Една од најскапите и најамбициозни инвестиции во рамки на Спортскиот центар „Борис Трајковски“ – Аква паркот – годинава не работи, а во 2023 година остварил приходи што биле за 41% пониски од планираното. Ревизијата што ја спроведе Државниот завод за ревизија покажала дека токму овој објект е еден од најпроблематичните во портфолиото на центарот. Од некогашен симбол на модерен градски воден рај, Аква паркот се претвори во финансиско бреме.

Според податоците во ревизорскиот извештај, во 2023 година паркот остварил само 4,29 милиони денари приходи, далеку под очекувањата. Причините за оваа состојба се повеќеслојни – од недоволен интерес на посетители, до хронични технички и инфраструктурни проблеми, кои со годините не биле навремено адресирани. Поради ваквата неисплатливост, Аква паркот е целосно затворен во 2024 година.

Особено алармантен е фактот што гарантниот рок на вградените реквизити, на опремата и на инсталации истекол, а тоа значи дека изведувачите веќе не гарантираат за нивниот квалитет. Без функционални услови и без гаранции, управителите не можат да го отворат објектот без ризик од дефекти и дополнителни трошоци. Во меѓувреме, приходите од другите делови на центарот – базенот, кугланата и лизгалиштето – продолжиле да растат.

Додека другите спортско-рекреативни објекти во рамки на „Борис Трајковски“ бележат континуиран пораст на посетеност и приходи, приказната со Аква паркот останува еден од најсилните примери за недоволно одржување, лошо планирање и изгубена можност за долгорочно профитабилно стопанисување. Наместо да биде извор на приход и забава, тој стана неликвидна обврска.

Што доби „Борис Трајковски“ од Самитот на ОБСЕ?

Ревизорскиот извештај за Спортскиот центар „Борис Трајковски“ укажува дека и организацијата на големиот самит на ОБСЕ, кој се одржа во Скопје од 30 ноември до 1 декември 2023 година, не поминала без проблеми во административно-имотниот дел. Иако центарот ги отворил вратите за настанот и овозможил целосна логистичка поддршка, ревизијата покажува дека по завршување на самитот не се знае што точно е изведено, што инсталирано и оставено како трајна вредност во центарот.

Министерството за надворешни работи склучило договори за јавни набавки во вредност од над 124 милиони денари, со цел адаптација и надворешно уредување на просторот. Но, ревизорите утврдиле дека не постојат записници со кои би се потврдило какви работи биле извршени и кои добра и инсталации се инкорпорирани во објектот. Дополнително, одредбите од договорот за соработка меѓу МНР и управителот на салата не се целосно исполнети.

Ова отвора прашања не само за транспарентноста на спроведените јавни набавки, туку и за долгорочната вредност која салата ја добила од самитот. Иако настанот завршил со позитивна меѓународна слика за Скопје, останува впечатокот дека на внатрешен план, дел од институциите не постапиле целосно во согласност со законските прописи и стандардите за отчетност.

Долгот кон Град Скопје стар цела деценија го покри државата

Ревизорскиот извештај за Спортскиот центар „Борис Трајковски“ открива дека објектот бил изграден уште во 2011 година преку задолжување на Град Скопје, со заем во износ од 260 милиони денари. Договорено било овој износ да се враќа во три еднакви месечни рати уште истата година, но слабата финансиска кондиција на управителот го направила тоа невозможна мисија. Наместо во 2011, исплатата започнала дури во 2019 година, осум години подоцна.

Во меѓувреме, центарот работел со загуба, а ликвидноста била нарушена. Од 2019 до 2022 година, не успеал самостојно да генерира доволно средства за да го враќа долгот, па наместо тоа, целата обврска паднала на товар на државниот Буџет. Министерството за финансии го зголемило основниот влог на државата во друштвото, и со тоа ги покрило сите три рати. Последната била исплатена дури во 2023 година.

Оваа ситуација отвора важни прашања за одржливоста на јавните инвестиции и за транспарентноста на финансирањето на капитални објекти во културата и спортот. Иако салата „Борис Трајковски“ со години функционира како главен спортски и конгресен објект во земјата, нејзиното менаџирање покажува дека дури и објекти од национално значење можат да се најдат во долгови и да зависат од државна интервенција за да избегнат финансиски колапс.

The post СКОПСКИОТ АКВА ПАРК ТОНЕ СО ГОДИНИ Наместо приходи, затворени врати и опрема без гаранција appeared first on plusinfo.mk.

– И актуелниот министер за здравство, како и претходните, најави дека ќе се воспостави

професионален, редовен и транспарентен процес за ажурирање на Позитивната листа на лекови кои ги плаќа Фондот за здравствено осигурување. Но, зошто тоа не е направено досега, иако сме единствената држава во регионот во која не постои таков процес со кој на сите осигуреници на ФЗО би им овозможувал подеднаква и редовна достапност до повеќе, понови и поевтини лекови, преку аптеките и болниците – прашува ВМРО-ДПМНЕ.

Партијата потсетува на укажувањата од Државниот завод за ревизија за тоа дека постојат слабости во планирањето, реализацијата и контролата на доделување средства и исплати од ФЗО.

„Законот за здравствено осигурување како основни здравствени услуги ги дефинира и лековите што не се на листата на лекови на ФЗО, а кои јавните здравствени установи (ЈЗУ) имаат право да ги набавуваат по претходна согласност од МЗ и ФЗО во која е утврдена поединечната цена на секој лек.

Во 2021 година ФЗО одобрил условен надоместок на 17 ЈЗУ, во вкупен износ од 1.265.265.000 денари (околу 20 милиони евра), од кои 91% или околу 18 милиони евра се однесуваат за набавка на лекови. Во 2022 година ФЗО одобрил 1.313.000.000 денари (околу 21 милион евра) за иста намена. Станува збор за зголемување во 2022 во однос на 2021 година за 3,7% или 47.735.000 милиони денари повеќе во споредба со вкупниот износ за договорени надоместоци.

Според податоците објавени со ивештаите од ДЗР и од ФЗО, условните буџети од 2017 до 2022 година имаат континуиран раст.

Позитивната листа на лекови официјално не е ажурирана од 2015 година, а скапи лекови се набавувале со условни буџети за ЈЗУ кои се доделуваат по некаков си правилник кој нема конкретни правила и постапка за начинот на избор на таа скапа терапија, со години и не за сите ЈЗУ и не за сите пациенти подеднакво.

Јасно е дека некој арбитрарно и селективно одлучувал кои и колку лекови плус ќе се набават за некоја ЈЗУ, си играл Комисија за позитивна листа, одлучувал преку кои ЈЗУ, од кои веледрогерии и колку пари во милионски износи во евра ФЗО ќе даде од народните пари.

Посебно алармантно е што за „усовршените“ условни буџети за лекови, по аферата објавена во 2023 година „Онкологија“ , на почетокот на октомври 2023 во Службениот весник се објавени повеќе акти (правилници, одлуки) од ФЗО за условните буџети и сл.

Ова е приказ на само еден дел од нефункционалниот здравствен систем кој не им служи на граѓаните туку се креира за да служи на приватниот профит интерес“ – се вели во соопштението од Центарот за комуникации на ВМРО-ДПМНЕ.

The post ДО КОГА ЌЕ БИДЕ БЛОКИРАНА ПОЗИТИВНАТА ЛИСТА НА ЛЕКОВИ? Не е ажурирана од 2015 година, тврди ВМРО-ДПМНЕ appeared first on plusinfo.mk.

Кај СДСМ ревизорите пронашле дека поседуваат имот во Тетово, Куманово, Виница, Кочани, Делчево и скопски Центар и Кисела Вода за кој немаат имотни листови. Партијата се правда дека дел од имотот е наследен и дека не се користи. Најдени се и проблеми со средствата за членарина кои се уплаќаат на сметка на партијата во вкупен износ.

Членарината е главен проблем кај коалициониот партнер на СДСМ, ДУИ. Пречекорен бил лимитот на уплатена членарина, а исто така фалат фактури за расходи и бројки во пописните листи.

Кај ВМРО-ДПМНЕ, фактот што партијата има забрана да располага со имотот од 2018 година прави покомплицирано да се процени Билансот на состојата. Во деловните книги од 2020 година стои дека има зголемена вредност на имотот. Од партијата велат дека ова не може да се исправи сѐ додека трае судскиот процес.

Алијанса за Албанците за изборната кампања користеле средства што ги добиле од државниот Буџет, што е забрането за време на  парламентарни избори. Нема евиденција ниту документација и за дел од деловните промени и трансакции.

Необезбедена уредна документација за паричните средства во готово, неуредно сметководство и нецелосно извршен попис на средства, обврските и изворите на средствата се најголемиот проблем и кај ДПА.

Во извештаите ревизорите наоѓаат системски слабости и нагласуваат дека мора да се преиспита законската одредба во делот на финансирањето на изборната кампања со средства од редовната сметка, како и да се допрецизира  делот на донации и да се регулира на начинот на плаќање, уплата и евидентирање на членарината како извор на финансирање.

The post ПОЗИТИВНО МИСЛЕЊЕ САМО ЗА БЕСА И ЗА ГРОМ, ДРУГИТЕ „СО РЕЗЕРВА“ Државните ревизори ги проверуваа финансиите на партиите appeared first on plusinfo.mk.

Исплати на средства за авторски хонорари кои не се во согласност со намената утврдена во договорите за донација, исплати на средства кои не се правно поткрепени и по фактури без приложена поткрепувачка документација, отсуство на годишни и месечни планови за работното време, неусвоен акт за реаудиција на веќе вработените, неусогласености меѓу извештаите за остварени приходи од одржаните претстави, годишниот фискален извештај и уплатените средства во благајна, отсуство на интерни акти и процедури за остварување и евидентирање на приходите, како и за условите и критериумите за доделување гратис билети, се само дел од слабостите што ги утврди државната ревизија во Националната опера и балет (НОБ).

Според ревизорските извештаи објавени денеска, средствата од продадените билети не се предаваат секој ден во благајна, а надоместокот за изнајмување сценски простор не е конкретно прецизиран со што е овозможено субјективно формирање на цените при закупот.

Констатирано е и дека НОБ издавала простор по цени пониски од минималниот предвиден праг, како и дека изнајмувала рекламен простор без претходно донесен акт од органот на управување за утврдување на висината на овој вид закуп.

Ревизорските извештаи укажуваат и на слабости при спроведување на пописот на материјалните средства, ситниот инвентар и залихите, како и на тоа дека не е извршен попис на дел од средствата.

Слабости има и кај дел од спроведените постапки за јавни набавки.

– Изразено е неповолно мислење во однос на вистинитото и објективното прикажување на финансиската состојба и резултатите од финансиските активности и за усогласеноста на финансиските трансакции со релевантната законска регулатива, упатства и воспоставените политики за 2020 година – пишува во извештајот.

Во однос на исплатата на авторските хонорари, директорот на НОБ испратил забелешки, но Државниот завод за ревизија не ги прифатил со образложение дека „не се добиени дополнителни докази кои би имале влијание на промена на утврдената состојба во извештајот“.

The post ВО ОПЕРА И БАЛЕТ НЕ БИЛО САМО ИГРА И ПЕСНА Ревизорите со полни раце работа во културната институција appeared first on plusinfo.mk.