Државна лотарија на Македонија реагираше во врска со јавните дебати околу Предлог-законот за игрите на среќа и забавните игри, посочувајќи дека постојната уставно-судска практика ја потврдува посебната улога на државата во организирањето и регулирањето на игрите на среќа.

Во реакцијата се наведува дека генералниот директор на Државна лотарија, проф. д-р Александар Климовски, на јавната дебата за Предлог-законот правно и аргументирано ја застапувал позицијата дека државата треба да биде единствен приредувач на интернет игрите на среќа.

Од Државна лотарија се повикуваат на Решението У. бр. 156/2019 од 6 мај 2020 година на Уставниот суд, со кое не е поведена постапка за оценка на уставноста на член 7 ставови 2 и 3 од Законот за игрите на среќа и за забавните игри.

„Недвосмислено се потврдува уставната оправданост на новото предлог-законско решение, со кое државата задржува посебни права и надлежности во сферата на приредувањето игри на среќа“, се наведува во реакцијата.

Според Државна лотарија, во своето образложение Уставниот суд оценил дека определбата на законодавецот за задржување на правото за приредување одредени игри на среќа кај државата претставува легитимна законодавна политика заснована на јавен интерес.

„Судот особено ги истакнува видот и карактерот на игрите на среќа, нивната масовна достапност, обемот и сложеноста на нивното организирање, како и потребата од засилена контрола, надзор и заштита на јавниот интерес“, велат од Државна лотарија.

Во реакцијата се посочува дека Уставниот суд утврдил оти ваквото законско решение не е спротивно на член 55 од Уставот и не ги повредува принципите на слободен пазар и претприемништво.

Од Државна лотарија нагласуваат дека постапувањето на генералниот директор било во целосна согласност со важечката законска рамка и со веќе утврдените правни ставови на Уставниот суд.

„Постапувањето на генералниот директор на Државна лотарија не било ниту произволно, ниту надвор од законската рамка, туку претставувало доследно следење на важечките законски решенија и на правните ставови веќе потврдени од највисоката уставно-судска инстанца“, се наведува во реакцијата.

Оттаму додаваат дека уредувањето на пазарот на игрите на среќа е прашање на законодавна политика на државата, при што законодавецот има право да одлучува за обемот, начинот и условите под кои ќе се организираат поединечни видови игри на среќа.

„Од уставно-правен аспект, произлегува дека државата има легитимно право да утврдува дали, под кои услови и во кој обем ќе биде дозволено организирањето на интернет игрите на среќа, имајќи ја предвид својата одговорност за заштита на јавниот интерес, спречување на злоупотреби и обезбедување ефективен надзор над оваа дејност“, стои во реакцијата.

Во завршниот дел од соопштението, Државна лотарија оценува дека секој обид постапувањето на генералниот директор да се прикаже како незаконско или спротивно на уставните принципи е во спротивност со веќе утврдените правни ставови на Уставниот суд.

„Основано може да се заклучи дека генералниот директор на Државна лотарија постапувал совесно, законито и во согласност со уставно-судската практика, имајќи ја предвид својата обврска да го штити јавниот интерес и да обезбеди доследна примена на законската рамка во областа на игрите на среќа“, наведуваат од институцијата.

Во реакцијата се поставува и прашањето дали непознавањето на законската и уставно-судската практика од страна на АПИС и АСОМ, кои според Државна лотарија дејствуваат во име и за сметка на приватните приредувачи на игри на среќа, е намерна или ненамерна грешка.

The post РЕАКЦИЈА НА ДРЖАВНА ЛОТАРИЈА Уставниот суд ја потврдува улогата на државата во игрите на среќа appeared first on plusinfo.mk.

„Државата, односно државната компанија Државна лотарија треба да има монопол и само таа да приредува интернет игри на среќа“. Со оваа директна и скандалозна изјава на директорот на Државната лотарија, Александар Климовски, дадена во Собранието на јавната расправа, дефинитивно паднаа во вода сите лажни оправдувања за новиот Предлог-закон за игрите на среќа. Признанието дека крајната цел е бришење на конкуренцијата и воспоставување апсолутен државен монопол јасно потврди дека овој закон нема никаква врска со заштита на младите или просторна регулација. Напротив, ова е брутален обид за насилно затворање на легалниот приватен сектор и преземање на контролата и профитот од страна на поединци на власта.

Ова самопризнание отвора сериозен уставен и правен скандал. Како може државата истовремено да биде законодавец кој ги диктира правилата на игра и фаворизиран натпреварувач кој си ги крои законите исклучиво за сопствен профит? Климовски дрско порача дека „не треба да се гледа само процентот од 15 наспроти 23“, обидувајќи се да ја релативизира неуставната даночна дискриминација. Со законот, на државната лотарија ѝ се дава повластен данок, додека приватните компании се оптоваруваат со енормни стапки и дополнителни фиксни давачки од илјадници евра, со единствена цел финансиски да бидат уништени. Ваквото грубо газење на слободниот пазар и на уставно загарантираната еднаквост на економските субјекти е директен повик за итна интервенција на Уставниот суд.

Дополнително, обидот на Климовски да се затскрие зад европската пракса е класично извртување на фактите. Тој се повика на пресуди од Судот на правдата на ЕУ, тврдејќи дека монополите се дозволени заради заштита на потрошувачите и борба против зависноста. Но, веднаш потоа самиот се поби, гордо истакнувајќи го „континуираниот раст на прометот и приходите“ на Државната лотарија. Да правиш монопол под изговор дека ги штитиш граѓаните, а истовремено да се фалиш со зголемен промет од нивните уплати, не е европска вредност, туку врвно лицемерие.

Во трката за монопол, предлагачите на законот свесно газат преку судбините на граѓаните. Желбата да се затвори легалниот приватен сектор значи директно бркање на 10.000 работници на улица. Тоа се 10.000 семејства кои преку ноќ ќе останат без егзистенција, само за да се исчисти теренот за државната лотарија. Ветувањето дека „игрите ќе се тргнат од телефоните“ се покажа како најобична лага. Игрите нема да се тргнат, туку само ќе се промени сопственикот на платформите и од приватни и строго регулирани компании, пазарот ќе биде предаден во рацете на еден државен монопол.

Економската логика на директорот на лотаријата дека преку монополот парите ќе останеле во државата, а не кај странски компании, е уште една опасна илузија. Приватниот лиценциран сектор секоја година полни над 350 милиони евра во државниот буџет, исплаќа плати за 10.000 граѓани и плаќа кирии низ целата земја. Ако овој сектор биде уништен и затворен, македонските играчи нема да престанат да играат. Тие само ќе ги побараат своите игри на стотици нелегални, диви странски сајтови на црниот пазар. Токму таму државата нема никаква контрола врз заштитата на малолетниците, и токму таму стотици милиони евра вистински ќе се одлеат во странство без во буџетот да влезе ниту еден единствен денар данок.

Предлог-законот за игри на среќа е флагрантно кршење на Уставот и обид за легализирање на државен грабеж врз еден цел бизнис сектор. По отвореното признание во Собранието дека се работи за свесно создавање монопол, на потег се пратениците, но пред сè највисоките правни инстанци. Уставниот суд не смее да остане нем пред закон кој ја уништува правната држава, воведува нелојална конкуренција и свесно жртвува 10.000 работници заради нечии монополистички апетити.

The post ДРЖАВАТА БАРА АПСОЛУТНА КОНТРОЛА ВРЗ ОНЛАЈН ИГРИТЕ НА СРЕЌА Само ќе се смени сопственикот, а пазарот ќе отиде во државен монопол appeared first on plusinfo.mk.

Директорот на Државна лотарија, Александар Климовски, призна дека државата сака и треба да има монопол на интернет игрите на среќа.

Во своето излагање на денешната јавна расправа за Предлог-законот за игрите на среќа и за забавните игри, покрај аргументите за членовите што Климовски побара да не останат во новото законско решение, тој силно застана на страната на тоа во законот да остане монополот на државата, односно на Државната лотарија над игрите на среќа на интернет, на што предупредуваат приватните компании лиценцирани во земјава за организирање на игри на среќа.

Според Климовски, ако државата ги организира и контролира игрите на среќа, ќе има поголема заштита, но и поголеми приходи за државата.

– Факт е дека доколку државата ги организира игрите на среќа на интернет, парите ќе завршуваат директно во буџетот на државата. Наспроти тоа, кога приватните лиценцирани приредувачи на игри на среќа би ги организирале игрите на среќа приходите ќе завршуваат за други намени и во странските компании кои стојат зад овие субјекти – рече Климовски во своите аргументи зошто интернет игрите на среќа не треба да бидат достапни за приватните компании.

The post КЛИМОВСКИ ПРИЗНА ДЕКА ДРЖАВАТА САКА ДА НАПРАВИ МОНОПОЛ ВРЗ ИГРИТЕ НА СРЕЌА Парите би оделе во Буџетот, а не кај странските компании appeared first on plusinfo.mk.

Асоцијацијата на спортски обложувалници на Македонија (АСОМ) на јавната расправа пред собраниската Комисија за финансирање и буџет остро се спротивстави на Предлог-законот за игри на среќа. Претседателот на АСОМ, Васко Илијевски, во своето обраќање пред пратениците ги претстави вистинските намери на предложениот закон, потенцирајќи дека тие не се насочени кон заштита на граѓаните, туку кон воспоставување на целосен државен монопол.

– Денес не сум овде за да ја бранам индустријата на игрите на среќа. Денес сум овде да ја бранам правната држава и да ја бранам еднаквоста пред законот. Денес сум тука да ги одбранам работните места на 10.000 колеги кои поради монополистички интереси на поединци ќе останат на улица – истакна Илијевски на почетокот од неговиот говор.

Осврнувајќи се на тврдењата дека законот ќе го намали играњето, тој нагласи дека вистината е сосема поинаква и дека легалните приредувачи ќе бидат затворени само за да се отвори простор за државната лотарија на интернет.

– Во 21 век интернетот не е посебна игра на среќа и никогаш не бил. Интернетот е само начин на кој се нуди услугата. Но, само во овој закон интернетот одеднаш станува привилегија резервирана за еден државен субјект. Ова е грубо кршење на Уставот – порача претседателот на АСОМ, и ги праша пратениците зошто државата го забранува пристапот до интернет пазарот за лиценцираните компании, а истовремено го резервира ексклузивно за себе.

Илијевски пред Комисијата ја презентираше и фрапантната финансиска нееднаквост која се воведува со новиот закон. Тој појасни дека за истите игри на среќа, државната лотарија ќе плаќа давачка од само 15 %, додека приватниот сектор се задолжува со 23 %, плус нови енормни фиксни давачки од 1.000 евра за секое уплатно место.

– Државата си создава подобри услови за себе отколку за сите останати. Замислете, утре државата да донесе закон според кој една банка ќе плаќа помал данок од другите банки. Никој не би го прифатил тоа. Како може државата истовремено да биде и судија и натпреварувач во ист меч? Како може државата сама да ги пишува правилата и истовремено сама да биде фаворит? Тоа не е европски принцип, тоа не е слободен пазар, тоа не е уставно гарантирана еднаквост – категоричен е Илијевски.

Предупредувајќи за последиците од затворањето на легалните објекти, Илијевски посочи дека граѓаните нема да престанат да играат, туку играта ќе се пресели таму каде што државата нема апсолутно никаква контрола.

– Најзадоволни од овој закон се нелегалните оператори и криминалците кои брзо ќе ја вратат истата шема од деведесетите. Додека ние ќе затвораме легални компании, тие ќе отвораат нелегални канали. Додека ние ќе отпуштаме луѓе, тие ќе регрутираат нови клиенти без лиценца, без контрола и без давачки кон државата – предупреди тој.

На крајот од своето обраќање, Илијевски потсети дека зад бројката од 10.000 работни места стојат семејства и човечки судбини, а државниот буџет трајно ќе ги изгуби 350-те милиони евра кои годишно легално се слеваат во него, бидејќи покачените даноци математички ќе значат само затворање и крах на легалниот бизнис.

– Денес пред вас е избор помеѓу легален и контролиран систем или нелегален и криминализиран пазар. Помеѓу конкуренција и монопол. Помеѓу еднаквост и привилегија. Помеѓу европски вредности и закон кој не постои никаде во Европа. Ние денес не бараме привилегии. Не бараме посебен третман. Бараме само едно, а тоа е истите правила да важат за сите. Бараме закон кој ќе биде правичен, уставен и одржлив. И кој навистина ќе ги штити граѓаните – истакна претседателот на АСОМ.

Тој ги повика пратениците да го отфрлат предложеното решение и да отворат вистински јавен дијалог со експертите.

The post ДРЖАВАТА СИ ПРАВИ МОНОПОЛ, НА УЛИЦА ЌЕ ОСТАНАТ 10.000 ВРАБОТЕНИ Пратениците повикани да го отфрлат предложениот закон за игри на среќа appeared first on plusinfo.mk.

Асоцијацијата на спортски обложувалници на Македонија (АСОМ) на јавната расправа закажана за петок, 19 јуни, пред собраниската Комисија за финансирање и буџет, отворено и со факти ќе ги соочи предлагачите на новиот Предлог-закон за игрите на среќа со катастрофалните последици од нивните решенија. Пред пратениците и експертската јавност, АСОМ ќе ги презентира главните аргументи кои јасно разоткриваат дека зад параванот на лажна грижа за граѓаните, државата всушност спроведува класична монополизација на пазарот, воведува скандалозна финансиска нееднаквост и свесно го турка легалниот приватен сектор во сигурен банкрот.

Асоцијацијата соопшти дека еден од главните аргументи кој ќе биде изложен се однесува на апсурдната забрана за приредување на игрите на среќа преку интернет. Според светските и европските стандарди, интернет игрите не се посебна категорија, туку само медиум преку кој се одвиваат веќе постоечките игри на среќа. Но, новиот закон предвидува државата да добие ексклузивно право самостојно да организира интернет игри на среќа, преку друштво во кое е единствен акционер. Со ова, на останатите лиценцирани приредувачи кои веќе платиле скапи лиценци, им се забранува пристапот до глобалната интернет мрежа. Освен Северна Кореја, не постои друга држава во светот која на легални компании им го забранува користењето на интернетот како медиум за легално работење. АСОМ ќе посочи дека овој потег има единствена цел да го монополизира пазарот и да го озакони досегашното незаконско работење на државната платформа „Мега Вин“, преку елиминирање на секоја конкуренција.

Дополнително, пред Комисијата ќе бидат презентирани и аргументите дека субјектите што приредуваат игри на среќа свесно се доведуваат во финансиска нееднаквост, со што државата ја озаконува нелојалната конкуренција. Со ова Предлог-законот целосно го крши уставот и е спротивен на уставното право за еднаква положба на сите учесници на пазарот. Имено, предлог-законот предвидува државната лотарија за интернет игрите на среќа да плаќа посебна давачка од само 15%, а останатите приредувачи за истите игри ќе плаќаат 23%. Истовремено, за приватниот сектор се воведуваат и нови огромни фиксни давачки. Ова претставува очигледен доказ дека државата си одредува повластени услови за себе, додека приватниот сектор го оптоварува со давачки кои се неиздржливи.

Кога на забраната за онлајн работење и воведувањето драстично повисоки давачки ќе се додаде и мерката за оддалеченост од 500 метри, станува јасно оти целта на законодавецот не е просторната регулација и заштитата на учениците, туку чистење на пазарот. Легалните приредувачи ќе мора да затворат над 90% од своите објекти, а оние кои ќе останат, едноставно нема да можат да ѝ конкурираат на државната лотарија која ќе има монопол на интернет, помали давачки и ќе нема трошоци за кирии за физички објекти.

„Пред пратениците јасно ќе ја изнесеме суровата вистина дека Владата свесно жртвува 10.000 директни работни места и егзистенцијата на илјадници семејства, ги затвора легалните објекти за да го преземе профитот преку државен монопол, оставајќи го притоа просторот ширум отворен за развој на нелегална црна економија на терен. Црниот пазар работи само за профит, таму нема контрола на идентитет и никој не штити малолетници. Дополнително, 350 милиони евра кои годишно легално се слеваат во државниот буџет, ќе бидат префрлени директно на црниот пазар“, се наведува во соопштението од АСОМ.

Врз основа на овие непобитни аргументи, на претстојната јавна расправа АСОМ категорично ќе бара итно повлекување на овој скандалозен предлог-закон. Асоцијацијата останува доследна во борбата за спас на 10.000 работни места и зачувување на легалната индустрија сè до донесување на вистински, одржлив и европски закон.

The post „ВО ЛАЖНАТА ГРИЖА ЗА ГРАЃАНИТЕ СЕ КРИЕ ОБИД ЗА ДРЖАВЕН МОНОПОЛ“ Од АСОМ обвинуваат дека државата си прави повластени услови за себе appeared first on plusinfo.mk.

Во продажба е третата серија на инстант лозот „Златна треска“, кој носи возбудливи можности за добивки. Лозот е особено атрактивен бидејќи содржи три различни игри, со кои секој играч има повеќе шанси за добивка.

Првата игра „Златна десетка“ носи добивка кога збирот на двата едноцифрени броја е десет, а добивката е наведена во полето „Добивка“. Втората игра додава уште повеќе возбуда: симболот „златна плочка“ веднаш носи добивка со означената сума. А во бонус играта, ако еден од броевите на играчот се совпадне со добитниот, добивката се освојува, а доколку се појави симболот „2x“, сумата се удвојува.

Она што ја прави „Златна треска“ посебна е можноста на еден лоз да се освојат до три добивки истовремено, што ја претвора секоја комбинација во вистинска авантура. Со цена од само 60 денари, секој лоз е шанса за нова приказна и можност да се почувствува златната треска.

„Златна треска“ е повеќе од игра – тоа е симбол на возбуда, надеж и изненадување, што може да се сподели и во „Среќа плус“ ковертите на Државна лотарија, претворајќи го секој мал знак на внимание во подарок што носи можност за незаборавна добивка и радост.

The post ТРИ ИГРИ, ТРИ ШАНСИ ЗА ДОБИВКА Лозот „Златна треска“ носи возбудливи можности за добивки appeared first on plusinfo.mk.

На Артан Груби му е продолжен домашниот притвор со 24-часовен полициски надзор. Од Основниот кривичен суд Скопје информираат дека по предлог на Обвинителството, судот ја продолжил мерката за 30 дена.

Поранешниот вицепремиер и министер по повеќе од 14 месеци бегство се врати на 23 февруари. Поради безбедносни закани, Обвинителството за него побара, а судот додели домашен притвор.

Груби е осомничен заедно со уште еден бегалец, екс директорот на Државна лотарија Перпарим Бајрами за злоупотреби со набавка на ВЛТ апарати при што МВР процени дека државата била оштетена за повеќе од 8 милиони евра.

Груби досега не дал исказ пред обвинител.

The post ПРОДОЛЖЕН КУЌНИОТ ПРИТВОР НА ГРУБИ Сѐ уште не дал исказ пред обвинител appeared first on plusinfo.mk.

Инстант лозот „Калинка“ е еден од најпрепознатливите и најомилените лозови на Државна лотарија. Пласиран уште во 2010 година како прв паричен лоз во историјата на Државна лотарија, „Калинка“ веќе израдува многу среќни добитници со различни парични добивки.

Со својата богата симболика – плодот калинка како симбол на среќа, благодат и радост е дел и од корпоративното лого на Државна лотарија. „Калинка“ е лесна и забавна игра – доволно е да се изгребат полињата за игра и да се пронајдат три исти износи, кои може да ви донесат една од 7-те главни премии по 700.000 денари или една од многубројните други парични добивки.

Со секој лоз, шансата за нова среќна приказна е пред вас, а со цена од само 70 денари, „Калинка“ останува достапна и привлечна за сите што сакаат да ја предизвикаат својата среќа.

„Калинка“ може да се сподели и како подарок во ковертите „Среќа плус“ на Државна лотарија. Со еден коверт подарувате симбол на среќа и можност за добивка до 700.000 денари, претворајќи го подарокот во вистинска радост.

Среќата е навистина насекаде – откријте ја со „Калинка“!

The post „КАЛИНКА“ – СИМБОЛ НА СРЕЌА И ДОБИВКИ СО 700.000 ДЕНАРИ Еден од најомилените лозови на Државна лотарија appeared first on plusinfo.mk.

Инстант лозот „Мега милионер“ на Државна лотарија ја нуди најголемата парична добивка од инстант лотаријата – 10.000.000 денари. Со оваа рекордна премија, „Мега милионер“ се издвојува како најатрактивниот инстант лоз во историјата на Државна лотарија.

Првиот среќен добитник на оваа премија доаѓа од Битола. Добитниот лоз е купен во продажното место „Димпо“ – локација препознатлива по многу среќни добивки од игрите на среќа на Државна лотарија. Овој момент уште еднаш покажува дека среќата може да се насели во секој дом, во секој град и село низ државата.

Инстант лозот „Мега милионер“ крие вкупно 323.755 добивки со вредност од 150 до 10.000.000 денари, носејќи возбуда, надеж и изненадувања на секој чекор.

Играта е едноставна и забавна – доволно е да се изгребат полињата и да се пронајдат три исти симболи „МЕГА МИЛИОНЕР“ за добивка од 10 милиони денари, три исти симболи „МИЛИОНЕР“ за милион денари или три исти износи за другите парични добивки.

Со цена од само 150 денари, секој лоз „Мега милионер“ е шанса за нова приказна, нова радост и можност да станете дел од историјата на најголемите добивки. А ако сакате да ја споделите радоста – подарете „Мега милионер“ во ковертите „Среќа плус“ на Државна лотарија. Со еден мал знак на внимание може да подарите голема возбуда и можност за незаборавна добивка.

The post САМО ЕДЕН ИНСТАНТ НАЧИН ДА СТАНЕТЕ МИЛИОНЕР Инстант лоз „Мега милионер“ на Државна лотарија appeared first on plusinfo.mk.

Поранешниот вицепремиер Артан Груби останува во домашен притвор, додека истрагата за случајот што го опфаќа и натаму трае, потврдија од Кривичен суд Скопје.

Според достапните информации, Груби бил изведен пред судот и поминал повеќечасовни процесни дејствија, но не се произнел за сомнежите што се предмет на истрагата пред јавен обвинител.

Во меѓувреме, надлежните институции продолжуваат со собирање докази за предметот, кој се однесува на сериозни сомневања за злоупотреби во Државна лотарија, при што штетата се проценува на повеќе милиони евра.

Груби, кој повеќе од една година беше недостапен за органите на прогонот, по враќањето во земјава беше приведен, по што постапките против него повторно беа активирани.

Случајот веќе предизвикува силни реакции во јавноста, особено поради одлуката за домашен притвор, имајќи предвид дека станува збор за поранешен висок државен функционер.

Истрагата сè уште не е завршена, а обвинителството најавува дека по нејзиното целосно расчистување ќе следуваат натамошни одлуки и можни обвиненија.

The post ГРУБИ ОСТАНУВА ВО ДОМАШЕН ПРИТВОР Истрагата за милионскиот скандал продолжува appeared first on plusinfo.mk.