Државниот завод за ревизија утврди сериозни неправилности во работењето на Државната изборна комисија за 2024 година, изразувајќи неповолно мислење и за финансиските извештаи и за усогласеноста со законската регулатива. Според ревизорите, извештаите не ја прикажуваат објективно финансиската состојба, а дел од активностите не се спроведени согласно прописите.

Клучните наоди покажуваат системски слабости во управувањето со средствата и организацијата на изборните процеси. Меѓу нив се издвојува фактот дека пописот на имотот и обврските не е спроведен согласно законските правила, што директно влијае врз точноста на финансиските податоци.

Дополнително, дел од недвижностите со кои располага Комисијата воопшто не биле проценети, па не се ниту евидентирани во сметководствените книги. Ова отвора прашања за реалната вредност на државниот имот со кој управува институцијата.

Ревизијата утврди и дека планирањето на буџетските средства за изборите не било во согласност со законски утврдениот сооднос. Наместо пропишаната распределба, значителен дел од средствата биле пренасочени, при што над 129 милиони денари биле прелеани кон трошоци за политичко рекламирање.

Проблеми се забележани и во начинот на кој изборните органи ја доставувале документацијата за трошоците. Во повеќе случаи извештаите биле некомплетни, без основни документи како фискални сметки, патни налози или записници, што го отежнува следењето на трошењето на јавните пари.

Во делот на јавните набавки, ревизорите констатирале дека се набавувале стоки и услуги без да се спроведе законска постапка, како и недоследна примена на Законот за јавни набавки. Ова, според извештајот, го нарушува принципот на транспарентност и еднаков третман на понудувачите.

Посебно е посочена и спорната набавка на софтвер за обработка на изборни резултати, каде што условите не биле јасно дефинирани, а договорот бил потпишан пред да се обезбеди банкарска гаранција.

Ревизорите укажуваат и на организациски слабости, меѓу кои и фактот дека во текот на најголемиот дел од 2024 година институцијата немала генерален секретар, што влијаело врз координацијата и управувањето со административните процеси.

Дополнителен ризик претставува и нерешеното прашање со складирањето на изборниот материјал. Комисијата долго време немала соодветен магацин, што отвора можност за несоодветно чување и потенцијално оштетување на чувствителна опрема, вклучително и уредите за биометриска идентификација.

И покрај утврдените слабости, ревизорите нотираат дека дел од претходно дадените препораки остануваат неспроведени или само делумно реализирани, што укажува на континуитет на проблемите во работењето. Од вкупно девет препораки од претходната ревизија, само една е целосно исполнета.

Во насока на надминување на состојбите, Државниот завод за ревизија дал повеќе препораки, меѓу кои усогласување на законската рамка за финансирање на изборите и преиспитување на моделот за распределба на средствата за политичко рекламирање.

Целосната ревизија за работата на ДИК може да ја читате на следниот ЛИНК.

The post ГРЕШКИ ВО ТЕНДЕРИТЕ И ТРОШЕЊЕТО ПАРИ, СКАПА ОПРЕМА „СКАПУВА“ Ревизорите најдоа куп неправилности во работата на ДИК appeared first on plusinfo.mk.

Новиот состав на Државната изборна комисија (ДИК) денеска даде свечена изјава пред претседателот на Собранието, Африм Гаши.

Новиот состав го сочинуваат Бојан Маричиќ, претседател на Комисијата, Абдуш Демири, потпретседател, и членовите Александар Даштевски, Ангелчо Ристов, Светлана Карапетрова, Борис Кондарко и Дитмире Шеху.

Претседателот на ДИК, Маричиќ, во името на сите членови се заблагодари за двотретинската поддршка од сите 83 пратеници што гласале за нивниот избор. Потенцира дека оваа функција е сериозна одговорност и доверба, која мора да се оправда.

– Знаете дека во изминатиот период, последните десетина години, ДИК била секогаш на ниво на задачата и фактот што досега немало проблеми со изборниот процес укажува дека веќе креираме таква традиција, институционална меморија. Ние ќе продолжиме во тој дух – рече тој.

Маричиќ информира дека денеска од спикерот Гаши биле поканети и прифатиле да учествуваат во работната група за Изборниот законик за, како што посочи, да придонесат новиот законик да е поквалитетен.

– На дневен ред е разгледување на измените на Изборниот законик или нов Изборен законик. Ние тоа ќе го следиме со големо внимание. И во разговорот со претседателот на Собранието бевме поканети да учествуваме во работната група. Се разбира дека ќе прифатиме, за да бидеме на ниво на должноста и да придонесеме новиот Изборен законик да има што подобар квалитет и да има своја практична примена. Државната изборна комисија може да помогне во тој дел – нагласи Маричиќ.

Државната изборна комисија е составена од седум члена – претседател, потпретседател и пет други члена, со право на повторен избор. Нивниот мандат е четири години. Политичките партии во опозиција предлагаат претседател и двајца членови на ДИК, а партиите на власт предлагаат потпретседател и тројца членови на ДИК. Сите нив ги избира Собранието со двотретинско мнозинство гласови од вкупниот број пратеници. Кандидатите за членови на ДИК треба да бидат државјани на Македонија со постојано место на живеење, да се дипломирани правници со најмалку осум години работно искуство како правници и да не бидат членови на орган на политичка партија.

The post ЧЛЕНОВИТЕ НА ДИК ЌЕ РАБОТАТ НА НОВИОТ ИЗБОРЕН ЗАКОНИК Новиот состав даде свечена изјава пред претседателот на Собранието appeared first on plusinfo.mk.

Во недела на 11 јануари во земјава треба да се одржат повторените избори за градоначалник во општините Гостивар, Маврово Ростуше, Врапчиште и Центар Жупа. Дваесетдневната изборна кампања за изборите завршува утре (9 јануари) на полноќ, по што започнува изборниот молк до завршување на гласањето на 11 јануари во 19 часот. Според информациите од Државната изборна комисија (ДИК), гласачките ливчиња веќе се печатат и утре заедно со апаратите за биометриска идентификација ќе се дистрибуираат до Општинските изборни комисии а оттаму да бидат подигнати од Избирачките одбори. Во сабота гласаат болните и изнемоштените и лицата во затворите.

Сѐ е подготвено за повторените избори во четирите општини 

Кандидати за градоначалник на Гостивар се Невзат Бејта, од коалицијата Вреди и независниот Ваљбон Лимани поддржан од НАИ. Во Врапчиште кандидати за градоначалник се Исен Шабани од НАИ и Зуљхајрат Демири поддржан од Група избирачи. Во Центар Жупа има само еден кандидат за градоначалник и тоа Аријан Ибраим од Демократска партија на Турците. Во Маврово и Ростуше, пак, има двајца кандидати и тоа Онер Јакупоски, поддржан од Коалиција Твоја Македонија предводена од ВМРО – ДПМНЕ и Анес Ахмети, кандидат на СДСМ.

Избирачкиот список за повтореното гласање е веќе заклучен. Во Гостивар во Избирачкиот список се запишани 82.870 граѓани со право на глас, 78.185 гласачи се постојани жители на општината, додека во посебниот Избирачки список за лица кои живеат во странство се запишани 4.604 гласачи, а 81 лице се во затвор или во притвор.

Во Избирачкиот список за Маврово Ростуше се запишани 10.575, од кои во посебниот Избирачки список за жители во Општината 9 622, во странство 951, а во затвор или во притвор се двајца.

Во Избирачкиот список за Врапчиште запишани се 27.279 граѓани со право на глас, 26.318 во посебниот Избирачки список за жители од Општината, во посебниот ИС за гласачи кои живеат во странство се запишани 950, а 11 во затвор или во притвор.

Бројот на гласачи во Центар Жупа запишани во Избирачкиот список се 7.562, од нив 6.305 во оштината, во посебниот ИС за гласачи во странство се запишани 1.257 лица.

Според информациите од ДИК, нема никаков интерес за набљудување на повторените избори. До денеска нема пријавено ниту еден набљудувач.

Во Регистарот за медиуми за платено политичко рекламирање пријавени се 32 интернет портали, 13 регионални и национални телевизии и пет радиостаници.

Треба да гласаат повеќе од половината од излезените избирачи за еден кандидат 

Согласно членовите 132, 132а и 133 од Изборниот законик на повторените избори не е потребна излезност од една третина на гласачите туку за да се избере градоначалник треба за еден од кандидатите да гласаат повеќе од половината од излезените избирачи, вклучувајќи ја и Центар Жупа каде што има само еден кандидат.

Изборите за градоначалник во овие четири општини се повторуваат бидејќи на Локалните избори 2025 таму немаше доволен број граѓани излезени на гласање.

Според податоците од Државната изборна комисија (ДИК), во овие општини во првиот круг на 19 октомври не беше постигната законската излезност од најмалку една третина (33,33 проценти) од запишаните гласачи, што е услов за изборите да се сметаат за успешни.

Во Гостивар одѕивот беше 33,31 процент, во Врапчиште – 25,18 проценти, во Маврово и Ростуше – 30,31 процент и во Центар Жупа – 21,49 проценти.

Ова се последни избори за овој состав на Државната изборна комисија. Нивниот мандат завршува на 15 јануари односно до изборот на нов состав на Комисијата.

The post В НЕДЕЛА ЌЕ СЕ ИЗБИРААТ ГРАДОНАЧАЛНИЦИ ВО 4 ОПШТИНИ Ќе победи оној за кого ќе гласаат повеќе од половина од излезените гласачи appeared first on plusinfo.mk.

Државната изборна комисија (ДИК) на денешната 155 седница ги објави официјалните резултати од вториот круг на Локалните избори 2025 за избор на градоначалник во 29 општини и град Скопје, додека за три општини – Брвеница, Карпош и Шуто Оризари има приговори, кои ќе се разгледуваат денеска на јавна седница на ДИК во 14 часот.

Претседателот на ДИК, Борис Кондарко ги објави официјалните резултати од вториот круг на Локалните избори, со што Орце Ѓорѓиевски е избран градоначалник на Град Скопје од коалицијата „Твоја Македонија“ предводена од ВМРО-ДПМНЕ.

– Општина Аеродром:Дејан Митевски коалиција „Твоја Македонија“ –ВМРО-ДПМНЕ, Општина Боговиње:Фети Абази коалиција ВЛЕН, Општина Валандово:Ѓоко Камчев коалиција „Твоја Македонија“-ВМРО-ДПМНЕ, Општина Виница: Митко Костадиновски коалиција „Твоја Македонија“ ВМРО-ДПМНЕ, Општина Демир Капија: Наталија Димитриева коалиција „Твоја Македонија“ ВМРО-ДПМНЕ, Општина Дебар: Фесник Нела коалиција ВРЕДИ, Општина Дебарца: Златко Силјановски коалиција „Твоја Македонија“ ВМРО-ДПМНЕ, Општина Дојран: Илија Тентов коалиција „Твоја Македонија“ ВМРО-ДПМНЕ, Општина Долнени: Блерим Ислјами коалиција ВРЕДИ, Општина Зрновци: Ванчо Митев коалиција Локални избори 2025 СДСМ, Општина Кичево: Александар Јовановски коалиција „Твоја Македонија“ ВМРО-ДПМНЕ, Општина Конче: Златко Ристов коалиција „Твоја Македонија“ ВМРО-ДПМНЕ, Општина Кочани: Владко Грозданов коалиција „Твоја Македонија“ ВМРО-ДПМНЕ, Општина Крушево: Нико Чоневски коалиција „Твоја Македонија“ ВМРО-ДПМНЕ, Општина Куманово: Максим Димитриевски Движење ЗНАМ за наша Македонија, Општина Лозово: Бошко Цветковски коалиција „Твоја Македонија“ ВМРО-ДПМНЕ, Општина Македонски Брод: Жарко Ристевски коалиција „Твоја Македонија“ ВМРО-ДПМНЕ, Општина Македонска Каменица: Соња Стаменкова коалиција СДСМ, Општина Могила: Драганчо Сабатковски коалиција „Твоја Македонија“ ВМРО-ДПМНЕ, Општина Неготино: Марија Нацева коалиција „Твоја Македонија“ ВМРО-ДПМНЕ, Општина Пробиштип: Тони Тоневски коалиција „Твоја Македонија“ ВМРО-ДПМНЕ, Општина Ранковце: Даниел Павловски коалиција „Твоја Македонија“ ВМРО-ДПМНЕ, Општина Росоман: Ѓорѓи Крстевски коалиција „Твоја Македонија“ ВМРО-ДПМНЕ, Општина Струга: група избирачи Менди Ќура избран градоначалник, Општина Студеничани: Ејуп Абази Национална алијанса за интеграција (НАИ), Општина Тетово: Биљал Касами коалиција ВРЕДИ, Општина Центар Горан Герасимовски коалиција Локални избори 2025 СДСМ, Општина Чешиново-Облешево: Јорданче Костадинов коалиција „Твоја Македонија“ ВМРО-ДПМНЕ, Општина Чучер-Сандево: Зоран Бајовски коалиција „Твоја Македонија“ ВМРО-ДПМНЕ. Ова беа 29 општини во кои се избрани градоначалници, а за кои објавивме конечни резултати за избор на градоначалници во вториот круг на Локалните избори, како и за градоначалник на Град Скопје – рече Кондарко.

Тој соопшти дека до ДИК има поднесено 16 приговори за гласањето за избор на градоначалници во општините Брвеница, Карпош и Шуто Оризари.

– Во врска со овие приговори Државната изборна комисија ја известува јавноста дека ќе постапува на јавна седница во законскиот рок денеска со почеток во 14 часот – рече Кондарко.

Тој додаде дека до ДИК има поднесено и три приговори за гласањето за избор на членови на Советот во Општина Шуто Оризари, каде што имаше прегласување спроведено на 2 ноември 2025 година и тоа на трите избирачки места.

– Поради тоа објавувањето на конечните резултати од гласањето за Советот на Општина Шуто Оризари нема да бидат објавени денеска, ќе се чека по постапувањето на приговорите на седницата на Државната изборна комисија, а потоа и по одлучување на евентуални тужби пред Управниот суд – рече Кондарко.

Членовите на ДИК донесоа и заклучок Општинските изборни комисии во 29 општини и Град Скопје, за кои денеска и официјално се објавија конечните резултати за избор на градоначалник и тие да ги објават конечните резултати од гласањето во вториот круг на Локалните избори.

The post ДИК ГИ ОБЈАВИ КОНЕЧНИТЕ РЕЗУЛТАТИ ОД ВТОРИОТ КРУГ Приговори има за Брвеница, Карпош и за Шуто Оризари appeared first on plusinfo.mk.

Одѕивот на изборите за градоначалници и советници за првпат не надминува 50 проценти, ниту во првиот круг, ниту во вториот круг, што ги прави осмите локални избори со најмала излезност од независноста на Македонија досега.

Според податоците на Државната изборна комисија (ДИК), во првиот круг за градоначалници одѕивот е 48,30% од вкупно регистрираните избирачи. Од 1.832.415 избирачи во Избирачкиот список, гласале 885.085 избирачи. Излезноста во вториот круг на локалните избори 2025, според податоците на ДИК од обработени 98,26 % од податоците, изнесува 40,46 проценти. Според првичните неофицијални податоци на ДИК излезноста во вториот круг е 41,24%.

Во вториот круг најголема излезност има во Росоман, 79,68% и во Лозово – 77,85%, додека најмала во Куманово, 35,70% и во Шуто Оризари – 32,03%

За избор на градоначалник на Скопје излезноста во вториот круг изнесува 35,33 проценти. Од вкупно 474.304 избирачи, гласале 167.575. Најголема излезност има во општините Карпош – 50,52% и Центар – 47,59%, во кои, исто така се гласаше и за општински градоначалник во втор круг. Најниска излезнсот има во Сарај – 12,27% и во Чаир – 14,15%, каде се гласаше само за градоначалник на Град Скопје.

Најголема излезност во првиот круг на изборите за градоначалници во земјава имало на Локалните избори во 2013 година, кога на гласање излегоа 67% од гласачите, по што е во постојан пад.  На локалните избори во 2017 година изнесуваше 60 отсто, а во 2021 година, 50,57%.

Излезноста во вториот круг на локалните избори генерално е секогаш помала, споредено со првиот круг. Најголема излесност во втор круг имаше на локалните во 2013 година, кои беа први избори на кои се избираа градоначалници во 80 општини и во Градот Скопје, кога изнесуваше 65%. Оттогаш е во постојан пад и на изборите во 2017 година изнесуваше 52 отсто, во 2021 година – 50,69%, а на последние избори – 41,24%.

На овие избори во 4 општини во првиот круг не беше постигнат потребниот цензус на излезност од над една третина од запишаните избирачи и тоа во Гостивар, Центар Жупа, Маврово Ростуше и Врапчиште. Во овие општини ќе се спроведе нова изборна постапка во рок од 60 дена од објавувањето на конечните резултати од Локалните избори 2025.

Првите локални избори во независна Македонија се одржаа на 17 ноември 1996 година и се избираа советници и градоначалници во 123 општини, плус Градот Скопје. Имаше вкупно 683 кандидати за градоначалници и 747 кандидатски листи за членови на општинските совети. Одѕивот на гласачите во првиот круг беше 60%, а во вториот круг 51%. На овие избори право на глас имаа 1.419.081 избирач.

Вторите локални избори се одржаа на 10 септември 2000 година, на кои се избирани советници и градоначалници во 123 општини, плус Градот Скопје. Имаше 323 кандидати за градоначалници и 564 кандидатски листи за членови на општинските совети. На овие избори право на глас имаа 1. 634.859 избирачи. Одѕивот во првиот круг беше 59%, а во вториот 53%.

Третите локални избори се одржаа на 13 и на 27 март 2005 година и беа избирани советници и градоначалници во 84 општини и во Градот Скопје. Ова беа првите локални избори по новата територијална распределба и намалувањето на бројот на општините на 80 плус Град Скопје. Имаше 379 кандидати за градоначалници и 445 кандидатски листи за членови на општинските совети. На овие избори право на глас имаа 1.711.293 избирачи. Одѕивот на гласачите во првиот круг беше 56,36%, а во вториот 53,66%.

Четвртите локални избори се одржаа на 22 март 2009 година, на кои се избираа градоначалници и советници во 84 општини и Градот Скопје. Вкупно беа поднесени 364 листи за градоначалници и 702 кандидатски листи за советници. На овие избори право на глас имаа 1.792.082 избирачи. Одѕивот во првиот круг беше 57%, а во вториот круг 43%.

Петтите локални избори се одржаа на 24 март 2013 година, а се избираа советници и градоначалници во 80 општини и Градот Скопје. Имаше вкупно 350 кандидати за градоначалници и 480 листи на кандидати за советници. На овие избори, право на глас имаа 1. 743.403 гласачи. Одѕивот во првиот круг беше 67%, а во вториот 65%.

Шестите локални избори се одржаа на 15 октомври 2017 година, на кои се избираа градоначалници и советници на 80 општини и Градот Скопје. Имаше вкупно 257 кандидати за градоначалници и 371 кандидатска листа за советници. Право на глас имаа 1.814.644 граѓани запишани во избирачкиот список. Во првиот круг излезноста беше 60%, а во вториот круг 52%.

Седмите локални избори се одржаа на 17 и 31 октомври 2021 година. Право на глас имаа 1.824.864 гласачи. Излезноста во првиот круг беше 50,57%, а во вториот круг 50,69%. Имаше вкупно 299 кандидати за градоначалници и 572 кандидатски листи за членови на општинските совети.

The post НАЈНИЗОК ОДЗИВ НА ЛОКАЛНИ ИЗБОРИ ДОСЕГА Излезноста на гласачите за прв пат не надмина 50 отсто appeared first on plusinfo.mk.

Излезеноста на гласачите до 11 часот на вториот круг од гласањето за градоначалници, како што соопшти Државната изборна комисија, изнесува 10,1 проценти, согласно податоците добиени од 1.276 избирачки места, односно од 92, 94 проценти. Одзивот на ниво на град Скопје до 11 часот е 8,30 проценти, според податоците и од 611 избирачки места, односно 89,20 проценти.

Портпаролката на Државната изборна комисија, Радица Тодорвска истакна дека гласањето се одвива непречено без поголеми проблеми, освен помал технички проблем во Дојран со апаратот за отпечатоци, каде гласањето е продолжено на стариот начин на гласање со УВ ламба и спреј.

До 11 часот највисока е излезеноста на гласачите во Пробиштип, каде гласале 22 проценти од избирачите и во Крушево, каде гласале 19,92 отсто. Најмала е во општините Боговиње со 6,67 и во Шуто Оризари со 5,93 отсто.

The post ДО 11 ЧАСОТ ОДЗИВОТ Е 10,1 ОТСТО Највисока е излезноста во Пробиштип, најмала во Шуто Оризари appeared first on plusinfo.mk.

Државната изборна комисија (ДИК) информира дека денешното гласање на болни и изнемоштени лица и затвореници се одвива непречено, без пријавени потешкотии, проблеми или поплаки.

– Се спроведува гласањето, навреме е започанто, немаме никаков проблем ниту со изборен материјал и изборни органи, немаме никакви забелешка, приговор, поплака или други информации. Надлежни овластени лица претпладнево беа на терен на одредени општински изборни комисии – информираше Борис Кондарко, претседател на ДИК на продолжението на 151. седница.

Дополни дека гласовите од денешното гласање нема да се бројат одделно, туку ќе бидат запечатени и приклучени кон утрешното гласање, по што ќе се објават како дел од вкупните резултати. Воедно, најави дополнително соопштение за денешниот одѕив по завршување на гласањето.

Во рамки на продолжението на 151. седница, ДИК разгледа и неколку приговори за остварување на избирачко право. Четири приговори беа усвоени, со што на пријавителите кои не биле евидентирани во соодветните избирачки списоци им се признава правото на глас, бидејќи ги исполнуваат законските услови. Од друга страна, 3 приговори беа одбиени како неосновани поради тоа што лицата или веќе се запишани во избирачкиот список, или немаат живеалиште на територијата на државата.

Во однос на набљудувањето на изборниот процес, ДИК потврди дека се акредитирани вкупно 1.622 набљудувачи, од кои 957 домашни, 651 меѓународни и 14 странски новинари.

Своето избирачко право денеска го остваруваат 4.826 болни или немоќни лица, 1.256 лица во 14 казнено-поправни установи и 214 лица сместени во 13 центри за вонсемејна грижа.

Во вториот круг од локалните избори 2025 утре се гласа за градоначалници во 32 општини и во Градот Скопје, како и на три избирачки места во Шуто Оризари за советници.

Право на глас имаат 1.013.375 граѓани.

The post ДОСЕГА НЕМА ПРИЈАВИ ЗА НЕРЕГУЛАРНОСТИ ПРИ ГЛАСАЊЕ Прифатени се 4 приговори за гласачко право, одбиени се 3 appeared first on plusinfo.mk.

Во 7 часот утрово почна гласањето на осмите локални избори од осамостојувањето на Македонија. Од Државната изборна комисија (ДИК) потврдија дека избирачките места се отворени.

Се гласа на 3.474 избирачки места, на кои до 19 часот правото на глас можат да го искористат 1.832.415 граѓани.

На локалните избори 2025 има вкупно 309 кандидати за градоначалници и 576 листи за членови на општинските совети, со вкупно 10.490 кандидати.

Вчера, ден пред изборите, гласаа затворениците, лицата во домашен притвор, болните и немоќните лица и лицата во старските домови.

ДИК најави дека првите согледувања за текот на гласањето и за излезноста ќе ги објави на прес-конференција во 9.30 часот.

Првичните резултати од локалните избори ДИК треба да ги соопшти во рок од 12 часа по завршувањето на гласањето.

МАКЕДОНИЈА ДЕНЕСКА ГЛАСА Граѓаните по осми пат избираат локална власт

The post ОТВОРЕНИ СЕ СИТЕ 3.474 ИЗБИРАЧКИ МЕСТА Право на глас имаат 1.832.415 граѓани appeared first on plusinfo.mk.

Државната изборна комисија (ДИК) на денешната седница отфрли седум приговори поднесени од граѓани за лично избирачко правo, а прифати три.

Отфрлени како неосновани беа приговорите на Радица Радеска од Битола, Зилќафете Мемеди од Желино, Иџел Камбери од Желино, Гордана Радеска од Битола, Јетон Далипи од Струга, Весна Трајкова од Кичево и Оливер Трајановски од Куманово.

Прифатени, пак, беа приговорите на Божидар Алтипармаков од Битола, Адис Таири од Гостивар и Едина Таири од Гостивар.

Тројцата утре ќе може непречено да го остварат своето право на глас, но се должни со себе на гласачкото место да го донесат и покажат решението што ќе го добијат од ДИК како правен основ да бидат запишани во дополнителнот образец на Избирачкиот список.

На седницата беше усвоена и Одлуката за поништување на потврдена листа за членови на Совет на Град Скопје. Образложението е дека ДИК на 17 октомври, по допрен глас, дошла до информација дека на оваа листа има починато лице. ДИК предложи за овој случај понатаму да постапува Јавното обвинителство.

– ДИК одлучи дадените гласови за поништената листа членовите на избирачките одбори да ги евидентираат како неважечки гласачки ливчиња во записникот за гласање. Исто така, членовите на општинските изборни комисии кои спроведуваат гласање за Град Скопје, како и Изборната комисија на Град Скопје нема да ги сметаат како добиени гласови во соодветните записници за сумирање и утврдување на резултатите од гласањето – објасни претседателот на ДИК, Борис Кондарко.

Членот на ДИК, Александар Даштевски рече дека ваков случај, на предложено починато лице, имало и лани. Листата била отфрлена.

– Беше покрената и кривична постапка што е предвидено за вакви случаи – истакна Даштевски.

На седницата ДИК информира дека досега за следење на утрешните локални избори се пријавени 1.463 набљудувачи од кои 807 домашни и 644 меѓународни, како и 12 странски новинари. ДИК воедно денеска им одобри акредитации за следење на изборниот процес и на уште двајца новинари од Радио-телевизија Косово.

Беше прифатена и Одлуката за доделување дополнителни средства на општинските изборни комисии за локалните избори.

Попладневната 147. седница на ДИК, како што напомена Кондарко, останува отворена за евентуално пристигнување на други приговори.

– Јавноста ќе биде известена за продолжение на седницата. Сега само ја прекинуваме, а ќе ја продожиме денеска ако има потреба, ако не, утре ќе констатираме дека ја затвораме – објасни Кондарко.

The post ДИК ОТФРЛИ 7, ПРИФАТИ 3 ПРИГОВОРИ ЗА ЛИЧНО ИЗБИРАЧКО ПРАВО На една советничка листа има починато лице appeared first on plusinfo.mk.

Исправена е печатната грешка во гласачките ливчиња во Општина Ново Село и материјалот е веќе доставен. Гласањето таму за болните ќе се одвива непречено и сите ќе го остварат своето право на глас до крајот на денот, рече денеска претседателот на Државната изборна комисија (ДИК) Борис Кондарко.

Како што истакна Кондарко, одговорајќи на новинарски прашања по јавната седница на ДИК, денешното гласање генерално се одвива без никакви проблеми, материјалот е навреме дистрибуиран од општински изборни комисии до соодветните избирачки одбори и граѓаните непречено го остваруваат своето избирачко право.

– Досега немаме никакви приговори и забелешки од ниту една општинска изборна комисија и од ниту едно избирачко место – потенцира Кондарко.

Според него, засега податоци за излезноста нема зашто гласањето трае до крајот на денот, а кога ќе заврши, ДИК ќе објави колку од пријавените лица за гласање во домашни услови и во старски домови го оствариле своето гласачко право.

– Пред завршување на гласањето, околу 16 часот, ќе објавиме пресек, а по завршување на гласањето ќе објавиме и целосен процент на излезност – објасни претседателот на ДИК.

Тој потсети дека не денеска, туку утре ќе бидат објавени резултатите од гласањето на овие категории лица.

– Така е по Изборниот закон и тоа е праксата на сите избори. Ливчињата од денешното гласање поединечно се ставаат во посебен запечатен плик и во гласачката кутија. Гласачките кутии и пликовите денеска не се отвораат и нема да се објават како резултати, туку се бројат утре, по завршување на гласањето заедно со сите други ливчиња во соодветните избирачки одбори и се евидентираат во соодветните ОИК. Резултатот од денешното гласање се брои заедно со гласачките ливчиња, се евидентира и ќе се објави утре по 20 часот – подвлече Кондарко.

The post ИСПРАВЕНА Е ПЕЧАТНАТА ГРЕШКА ВО ГЛАСАЧКИТЕ ЛИВЧИЊА ВО НОВО СЕЛО Гласањето на болните се одвива непречено, вели претседателот на ДИК appeared first on plusinfo.mk.