Колку пари ќе потроши едно домаќинство за греење оваа зима зависи од тоа со што ќе се грее, дали има добро изолирано живеалиште, колку простории се загреваат, од надворешната температура и од тоа дали годинава инвестирало во некој од системите за греење.

Парното поскапе, а цените на новите апарати за греење – инвертерклима, уред, термо-панели, печки … имаат нови цени пред грејната сезона.

Експертите истакнуваат дека централното греење е најефикасно за масовен систем на национално ниво, додека индивидуалните инвертерски клима уреди се исклучително исплатливи бидејќи испорачуваат три до четири киловати топлинска енергија за еден киловат потрошена електрична енергија.

Од друга страна, конвекторите и кварцните грејачи се најмалку енергетски ефикасен избор. Споредувајќи ги дрвата и пелетите, пелетите се поеколошки и енергетски поефикасни, како и многу поудобни за ракување, но нивната цена во моментов е повисока поради побарувачката на пазарот.

Парното греење најевтино, но недостапно за сите

Скопјани ќе плаќаат повисока цена за парното греење во текот на целата година, ако нема нова промена на цената. Од 1 август цената на топлинската енергија за корисниците на ЕСМ Снабдување, каде што се приклучени најголем дел од домаќинствата, е зголемена за 5,96%, кај ЕСМ Енергетика за 5,18%, а кај Енерго Еколог за 3,65%.

Според пресметките објавени при донесувањето на одлуката, за просечен стан од околу 60 квадратни метри зголемувањето изнесува приближно 140 денари месечно.

Оптималната и законски пропишана температура за централно парно греење во становите изнесува 20°C до 21°C во текот на денот. Испораката на топлинска енергија во градските мрежи (како ЕСМ во Скопје) вообичаено се врши од 06:00 до 22:00 часот, при што системот автоматски го адаптира греењето во зависност од надворешните атмосферски влијанија.

Огревно дрво, пелети или брикети – скапа варијанта

Познавачите велат дека пелетите се енергетски поефикасни, тие се чисто дрво, само што се компримирани со процент на влага под 10% и со многу мал процент на пепел. Од друга страна, се енергетски поефикасни, еколошки пооправдани, но цената на пелетите, поради пазарната психологија, побарувачката и придобивките од одредени економски активности, е нереално висока.

Во земјава сè уште најголем дел од домаќинствата, околу 60%, се грее на дрва. Нивната цена, според ценовникот на ЈП Македонски шуми не е променета, но на складиштата цената е повисока.

Кај „Национални шуми“, просторен метар дабово огревно дрво чини 3.192 денари со ДДВ, а буката 3.092 денари, додека во приватните складови цената стигнува до 4.750 – 5.000 денари за просторен метар. Дополнително се плаќа и превозот. Вообичаена потрошувачка на дрва за огрев се движи од осум до 10 кубни метри во сезона, што значи дека овие домаќинства инвестирале од 40.000 до 50.000 денари за претстојната сезона. Ако ладното време потрае и сезоната се одолжи трошокот може да биде и повисок.

Дел од домаќинствата веќе се префрлија на греење со пелети. Цената на овој вид огрев зависи од тоа дали е направено од листопадно или иглолисно дрво. Цената се движи од 22.600 до 25.200 денари за тон, односно околу 339 до 350 денари за вреќа од 15 килограми. За дом до 70 квадрати просечно се потребни од 2 до три тони пелети, но за поголема и послабо изолирана куќа до 200 квадратни метри потрошувачката оди и до 6 тони.

Цената на брикетите годинава се движи од 18.500 за иглолисни до 21.000 денари по тон за букови. За дом од 50 – 70 м² потребни се околу 2 до 3 тони пелети.

Јагленот како огревно средство во домовите речиси и не се користи во земјава. Според Државниот завод за статистика јагленот за директно греење во домови е под 1%.

Во овој дел влегуваат и печките на нафта кои во последно време не се користат многу, бидејќи цената на нафтата за греење последните години е висока.

Инвертерот и топлотните пумпи имаат предност пред другите грејни тела

Експертите велат дека за греењето кое не е парно, инвертер-клима уредите се исклучително исплатливи, бидејќи испорачуваат 3 до 4 киловати топлинска енергија за еден киловат потрошена електрична енергија. Поради тоа, во соодветни услови, современата инвертер-клима може да биде ефикасен начин за загревање.

Но, потрошувачката може да биде различна за стан или куќа и зависи од тоа дали има еден или повеќе инвертер уреди и каква е изолацијата на објектот.

Во Македонија, просечната потрошувачка на електрична енергија во станбените објекти изнесува помеѓу 100 и 200 kWh на метар квадратен годишно, во зависност од квалитетот на изолацијата и начинот на греење. Доколку објектот целосно се грее и лади на струја (без парно или дрва), оваа бројка лесно може да надмине 250 kWh/m² во постарите и енергетски неефикасни домови.

Според актуелните тарифи, цената на електричната енергија за домаќинствата во високата тарифа зависи од блокот на потрошувачка. Таа започнува од 4,7074 денари за киловат-час во првиот блок, продолжува со 5,8976 денари во вториот и 7,8537 денари во третиот, додека во четвртиот блок достигнува 19,1904 денари за киловат-час.

Ниската тарифа изнесува 2,1893 денари, а надоместокот за пренос и дистрибуција е 2,0339 денари по киловат-час.

Токму блоковското тарифирање е важно при пресметката. Доколку домаќинството веќе има висока потрошувачка на електрична енергија, греењето може да го префрли во поскап тарифен блок. Исто така, голема разлика прави просторот што треба да се загрее.

Но не сите ги загреваат становите со инвертер. Другите опции се панели и печки на струја кои трошат повеќе струја и секогаш домаќинството што ги користи преминува во повисока тарифа каде што и сметката за струја е далеку повисока.

Грејната сезона, се разбира, ќе ги чини домаќинствата различно, зависно од тоа колку добро домот им е изолиран, и какви се нивните потреби за греење.

The post КАКО ЌЕ СЕ ГРЕЕМЕ ОВАА ЗИМА? Најисплатливи се парното греење, инвертерите и топлинските пумпи appeared first on plusinfo.mk.