Гордана Јовиќ-Стојковска е единствениот кандидат за претседател на Друштвото на писателите на Македонија за претстојното редовно изборно Собрание на ДПМ, кое е закажано за 30 мај, во 12 часот.

Како што информираат од ДПМ изборот на новото раководство оваа година за првпат ќе се одржи со гласање во живо, но и со онлајн-гласање.

Кандидатката е романописец, раскажувач, поетеса, преведувач и книжевен критичар, творец на дела на македонски и на српски јазик, поранешна претседателка на Македонска книжевна младина.

Гордана Јовиќ – Стојковска е родена 1961 во Грделица, Србија, каде што го има завршено основно и средно образование. Во Скопје доаѓа да живее по запишување на студии на Биолошкиот факултет.

Книжевната кариера ја започнала уште од рани младешки денови објавувајќи во списанијата за култура и млади во тогашната Југославија. По одлуката да живее во Скопје, таа го изучила македонскиот јазик, на којшто ја објавува својата прва книга „Noctambulissmus (Северно талкање)“ која што е објавена како награден ракопис на тогаш југословенскиот конкурс за дебитантска книга при Книжевниот клуб Куманово. Со оваа поетска книга Гордана Јовиќ – Стојковска добива награда Млада Струга 1989. Од крајот на истата година раководи со Книжевна младина на Македонија како Претседател. Во неа во периодот до 2002 година промовира и објавува голем број дебитантски книги на сега афирмирани млади писатели, воспоставува контакт и соработка со врвни автори од Бугарија, Кипар, Турција, Русија и одржува континуирана соработка со писателите од просторот на дотогашната Југославија.

The post ГОРДАНА ЈОВИЌ СТОЈКОВСКА – ЕДИНСТВЕН КАНДИДАТ ЗА ПРЕТСЕДАТЕЛ НА ДРУШТВОТО НА ПИСАТЕЛИТЕ Изборот е на 30 мај appeared first on plusinfo.mk.

„Оваа книжевна камарила сега сака да ја верификува својата „естетска вредност“ на национално ниво, преку освојување на книжевниот бастион наречен Друштво на писателите на Македонија, ниту бирајќи методи, ниту располагајќи со капацитети соодветно да раководи со институции. Тие дотолку веруваат дека позициите во ДПМ им припаѓаат токму ним што веќе дискутирале кои од традиционалните награди на Друштвото кому да се доделат во догледна иднина.
Им посакувам онолку среќа на тој пат колку што им посакувам ‘рбет на македонските книжевни научници и критичари“, напиша Марковски на Фејсбук велејќи дека ова е мало појаснување за оние кои отстрана ги гледаат збиднувањата во ДПМ.

Во саботата ДПМ соопшти дека пропаднал и вториот обид за свикување на Вонредното изборно собрание поради немање кворум. Друштвото останува без претседател, а тројца кандидати се откажаа од трката – Блаже Миневски, Живко Гроздановски и Гоце Ристовски. Голем дел од кандидатите самите констатираа дека постојат повеќе нерегуларности, а дека тоа може да го наруши угледот на институцијата. Стефан Марковски беше кандидат за претседател на Собранието на ДПМ, заедно со Иван Антоновски, но и двајцата се повлекоа.

Марковски се повлече велејќи дека се злоупотребуваат потписи на дел од членството со посредство на влијателни личности од литературната сцена и наука. Во статусот на Фејсбук тој се осврнува и на недостатокот од конструктивна критика на литературната сцена што, според него, предизвикува да се валоризираат медиокритетите:

„Нема нешто што е позагрижувачко за современата македонска литература од фактот дека континуираното сузбивање на конструктивната критика оневозможи тенденција кон објективно вреднување на некои од медиокритетски „талентираните“ прозаисти, чиишто романи или „романи“ во голема мера може да се сведат на недовршени развојни форми на проширени раскази/повести и интелектуално полузаокружени хибридни прозно-метаесеистички форми со неверојатна естетска празнотија, стилистичко-јазична и структурна инертност, како и отсуство на суштински книжевни пораки“, вели тој и додава:

„Оваа полуизграденост доаѓа до израз при секоја посериозна анализа на нивното (не)познавање на некои од книжевните правила етаблирани не само во светската, туку и во македонската проза, каде зачетничките обрасци се идентификуваат во делата на Петре М. Андреевски, Славко Јаневски, Живко Чинго, Стале Попов, Стојан Христов итн.

Основно правило при „кршењето на правилата“ е да ги познаваш или поточно, да ги владееш, пред да ги поместиш/прекршиш. Сепак, последниве години се испоставува дека со доволно влијание во одредени кругови, потоа со тактичко молчење на повиканите – книжевните критичари и теоретичари со адекватен „книжевен багаж“, како и со освојување награди кои носат звучни имиња (на пример, со суфикс „на годината“), овие „нови вредности“ може да се „етаблираат“ и без познавање на „старите“, се вели во написот на Марковски.

The post „КНИЖЕВНА КАМАРИЛА САКА ДА ГО ЗАПОСЕДНЕ ДПМ“ Писателот Марковски смета дека немањето конструктивна критика е огромен проблем appeared first on plusinfo.mk.

Во продолжение ја пренесуваме нивната реакција:

„По неотповикливата оставка на Христо Петрески од функцијата претседател на Друштвото на писателите на Македонија (ДПМ); по свикувањето Вонредно изборно собрание од Претседателката на Собранието на ДПМ, Кристина Николовска; и по повлекувањето на Христо Петрески на неговата неотповиклива оставка (постапка без преседан), ние, како членови на ДПМ, со цел да се заштити достоинството на македонскиот писател, по денешното обраќање на Христо Петрески до медиумите, во кое, потпишан како претседател на ДПМ, зборува дека е „под притисок за прашања кои задираат во националниот идентитет и прашањата за македонскиот јазик“, укажуваме дека:

– ДПМ има важно историско значење за македонската култура и држава, а со тоа и за националниот идентитет, и мора да има општествена одговорност и цврста позиција во денешницата;

– Сите реакции, критики и барања од страна на членовите на ДПМ во изминатиот период се поттикнати од лошото раководење и функционирање на Друштвото;

– Лошото раководење и функционирање на ДПМ се во спротивност на националните и на сите други интереси на нашата писателска и културна заедница;

– Доброволната оставка на 8 од 9 членови на Претседателството на ДПМ не смее да остане незабележана, и недозволиво е да се направи самоиницијативен обид, неоправдан од Статутот, за нивна замена со други членови.

– Начинот на кој Христо Петрески се обидува да создаде матна слика во јавноста преку веќе наведевениве постапки е штетен за угледот на ДПМ во Македонија и во странство, но штетен е и за националните (и за сите други) интереси;

– Христо Петрески, пред целото членство на ДПМ (преку кој било медиум), мора да го образложи неаргументираното тврдење испратено до медиумите за наводните притисоци и закани, како и за прашањата што наводно ги задираат идентитетот и македонскиот јазик;

– Членството на ДПМ нема да дозволи да биде изманипулирано и бара медиумите и пошироката јавност да бидат запознаени со тековните случувања во раководството на Друштвото, зашто по сите превирања и обвиненија, сметаме дека невалидна е изјавата на Христо Петрески дека „работата на Друштвото се одвива во неговите простории и во културните институции“;

– По последните настани, невозможно е Друштвото да продолжи со нормална работа. Следствено на тоа, ја повикуваме претседателката на Собранието, Кристина Николовска, во согласност со Статутот на ДПМ, за Вонредното изборно собрание, веќе закажано за 25.11.2023 (сабота) да подготви и да испрати до членството Дневен ред на Собранието, како и Деловник за Вонредното изборно собрание, со повик за доставување кандидатури за претседател на ДПМ и претседател на Собранието на ДПМ, за заинтересираните да можат да ги исполнат своите обврски во согласност со роковите предодредени со Статутот.

15.10.2023 година

Со почит,

Влада Урошевиќ

Димитрие Дурацовски

Славе Ѓорѓо Димоски

Оливера Ќорвезироска

Весна Мојсова-Чепишевска

Виолета Танчева-Златева

Зоран Јакимовски

Лидија Димковска

Билјана Црвенковска

Игор Станојоски

Румена Бужаровска

Ирена Јурчева

Славица Гаџова-Свидерска

Драгана Евтимова

Фросина Пармаковска

Живко Грозданоски

Петар Андоновски

Давор Стојановски

Иван Антоновски

Михајло Свидерски

Никола Илијовски

The post ПЕТРЕСКИ ДА ОБРАЗЛОЖИ КАКВИ СЕ ТИЕ ПРИТИСОЦИ Членовите на ДПМ го повикаа претседателот да го аргументира своето тврдење пред јавноста appeared first on plusinfo.mk.

Нема никакво сомневање дека со укинувањето на ДПМ би се укинал, избришал и фрлил во корпа за отпадоци, уште еден значаен и незаменлив сегмент на македонскиот национален идентитет. Што би ја заменило празнината доколку ДПМ се испрати во неврат и му се стави клуч на врата? Но сосема е јасно дека многумина посакуваат токму таков развој и „епилог“.

Кога ќе се спомене културата во Македонија, па и што било друго поврзано со креативност и со творештво, првиот одговор што ќе го добиете е дека „ние немаме пари“, буџетите се огранчени, што да се прави „ние сакаме, ама немаме средства“. Тоа, се разбира, не одговара на вистината. За луѓето кои одлучуваат во Македонија, не само сега, туку и со децении наназад, потребите и проблемите со кои се соочува ДПМ постојат само некаде на маргините на „интелектуалниот“ напор. Проблемите на ДПМ не произлегуваат само од начинот на работењето на сегашното претседателство, кое речиси колективно поднесе оставка. Во последните неколку децении претседателствата на ДПМ главно се занимаваа со „ситни“ ништа и со различни форми на автопромоција.

Друштво на писателите треба да се занимава со подобрување на општетствениот статус на неговите членови, а тоа ДПМ го прави во исклучително мал обем, бидејќи не располага ниту со материјални, ниту, пак, со соодветни професионални кадровски можности. Оние кои никогаш немаат пари, а сакаат да ја водат државата и да се прогласуваат за заштитници на националниот идентитет, треба да бидат похрабри за да го согледаат историското значење на ДПМ и да преземат чекори кои ќе овозможат пристап што ќе подразбира и нова свест околу оваа проблематика, односно прераснување на ДПМ во интересна организација отворена за сите активни писатели и литературни преведувачи (посебна секција).

Колку и да звучи тоа преамбицизоно, на ДПМ треба да му се обезбедат услови за да работи пред сѐ со економски, правни и социјални прашања поврзани со литературната професија, која во Македонија речиси и да не постои како професија, но не значи дека и не треба да постои.

Но едно е сигурно, нешто што без никакво двоумење треба да се потенцира: од укинувањето на ДПМ никој во Македонија не би извлекол некаква полза.

The post Друштвото на писателите треба да добие државна поддршка! appeared first on plusinfo.mk.

Друштвото на писателите на Македонија го отвора Конкурсот за традиционалните награди за најдобри книжевни остварувања во календарската 2022 одина, чии автори се членови на асоцијацијата.

Наградите „Стале Попов“ за проза, „Ацо Шопов“ за поезија, „Димитар Митрев“ за критика и есеј, „Ванчо Николески“ за книга за деца и млади и наградата „Мост“ за книга напишана на еден од јазиците на националностите, веќе со години се клучен критериум за валоризација на годишната книжевна продукција кај нас.

Право на учество на овој конкурс имаат сите членови на ДПМ, кои до истекот на годината треба да достават по четири примероци од своите новообјавени книги во текот на 2022 година во посочените категории.

Примероците може да се достават во канцеларијата на ДПМ , или да се испратат по пошта на следнава адреса: Друштво на писателите на Македонија, ул. Максим Горки бр.18, 1000 Скопје.

За секоја од наградите ќе одлучуваат тричлени комисии составени од истакнати писатели со евидентно искуство во жанровските домени на кои тие се однесуваат, соопшти ДПМ

The post 5 НАГРАДИ ЗА НАЈДОБРИ КНИГИ Друштвото на писателите отвори Конкурс appeared first on plusinfo.mk.

Книгата ја издаде Агенцијата за иселеништво на РСМ. Промотор на книгата ќе биде проф.д-р Кристина Николовска, а стихови од збирката ќе интерпретира Лилјана Стоилковска-Андовска.

Во „Позлатено распетие“, осма по ред поетска книга на авторот, се истражува важноста на возвишеното воздигнување, како стратегија за преживување во еден сè побанализиран и нехуман свет. Возвишеното станува одбрана против индивидуалната и духовната неслобода во светот на надворешниот, материјален и социјален детерминизам. „Тој ист пат… без замислен крај“, со чувство на смиреност, и со помош на стиховите што даваат поттик да можеме да ја признаеме горечката сила во секој неочекуван изблик, затскриен зад нејасен зрак од неизгаснат пламен, и во секој мал знак на животот што се извишува над ехото на приземената и вонземна песна.

The post ВОЗВИШЕНОТО ВОЗДИГНУВАЊЕ НА „ПОЗЛАТЕНОТО РАСПЕТИЕ“ Промоција на поетската збирка на Ивица Челиковиќ appeared first on plusinfo.mk.

Песната или есејот треба да се испрати во четири примероци потпишани со шифра на адреса: улица Максим Горки, бр. 18, 1000 Скопје, или преку електронска пошта на адресата: prazniknalipite@gmail.com најдоцна до 15 јуни 2022 година.

Манифестацијата „Празник на липите“ ќе се одржи во втората половина на јуни, а точниот датум ќе биде дополнително и благовремено објавен.

Од Друштвото напоменуваат дека е потребно учесниците што ќе учествуваат по електронски пат да направат нова адреса за електронска пошта исклучиво наменета за конкурсот, која нема да ги оддава нивните лични податоци и ќе го гарантира принципот на анонимност.

The post НАПИШЕТЕ ПЕСНА ИЛИ ЕСЕЈ! Пријавете се за конкурсот „Празник на липите“ appeared first on plusinfo.mk.

Ова беше истакнато од неговите колеги од Македонската академија на науки и уметностите (МАНУ), Друштвото на писателите на Македонија и Катедрата за романски јазици и книжевности при Филолошкиот факултет „Блаже Конески“ кои денеска на комеморативна седница се простија од реномираниот писател и академик Луан Старова.

Претседателот на МАНУ, Љупчо Коцарев во своето обраќање на денешната комеморација истакна дека академик Старова има богата и интересна биографија, а за неговото творештво пишуваат и говорат бројни филозофи, филолози, книжевници и книжевни теоретичари.

Академик Коцарев го цитираше писателот Едгар Морен, кој на промоција на „Времето на козите“ во 1997 година за Старова потенцираше дека „е совршен претставник на балканскиот соживот и на отвореноста. Човек кој во целиот свој живот го интересира балканското братство и соживот без каква и да е етничка затвореност, спротиставувајќи се на секакви сесии и идеолошки апстракции, како и на секаква етнички и религиозна тврдокорност“.

– Една од централните теми за кои пишува Луан Старова е балканскиот хронотоп. Зборот хронотоп буквално значи времепростор и е дефиниран од факти како суштинска поврзаност на временските и просторните врски кои се уметнички изразени во литературата. МАНУ, македонска литература и култура со смртта на академикот Луан Старова загубија неповторлив автор, луциден раскажувач, брилијантен интелектуалец и голем хуманист, а сите ние загубивме прекрасна и благородна личност – рече академик Коцарев.

Според академик Влада Урошевиќ, Луан Старова е творец кој во литературата и во науката досегна резултати кои се прифатени како исклучителни, не само во нашата средина, туку во еден мошне голем опсег кој можеме слободно да го наречеме европски и светски.

– И пред да се појави, во 1992 година, пред 30 години, романот „Татковите книги“, кои станаа камен темелник на идните негови романсиерски дела, Луан Старова веќе имаше свое место во првите редови на нашите млади интелектуалци, кои со својот настап во тие години внесуваа нов, свеж дух во македонската култура – рече Урошевиќ.

Тој посочи дека раните книги на Луан Старова, патописи, записи, есеи, го профилираа како еден особено образован, широко информиран, и љубопитен истражувач на книжевните феномени, упатен во современите книжевни случувања кај нас и во светот, вклучен во жива комуникација со нив, и отворен кон европските хоризонти.

– Сето тоа веќе тогаш го потврдуваше Луан Старова како значајна личност, која на нашата книжевна сцена донесува нови вредности. Но вистинска промоција на неговиот икслучителен книжевен талент беше појавата на „Татковите книги“. Роман, напишан надвор од дотогаш постојните калапи, на начин кој кај нас дотогаш не беше вообичаен, со еден својствен и длабоко личен, но и универзално прифатлив стил – рече тој.

Урошевиќ посочува дека како што во романот „Татковите книги“ во библиотеката на неговиот татко стојат една до друга светите книги на хебрејската, христијанската и муслиманската релгија, така и во идеите на Луан Старова преовладува уверувањето дека вистината и правдата не се сопственост на ниту една вера и на ниту една нација, туку дека единствената можност за соживот на еден простор, а пред сѐ, на овој нашиот балканскиот, лежи во заемното разбирање, во добрата волја и во постојаниот обид за премостување на разликите.

Раководителката на Катедрата за романски јазици и книжевности при Филолошкиот факултет „Блаже Конески“ на УКИМ, Ирина Бамбова, во своето обраќање на комеморацијата посочи дека оваа катедра имаше привилегија да го има професорот Старова во редовите на својот наставен кадар.

– Старова беше срдечна и блиска личност. Ведар и почитуван колега, строг и правичен професор. Ќе остане во нашите сеќавања како одличен педагог, далекувиден научник, вроден писател. Во годините што следуваат нам, на неговите поранешни студенти ни ја остава обврската да ја чуваме и да го негуваме споменот за него и за неговото дело – рече Бамбова.

Весна Мојсова-Чепишевска од Друштвото на писателите на Македонија (ДПМ) посочи дека Друштото е благодарно што во своите редови имало личност како Старова кој пишувал и на македонски и на албански јазик.

– Тоа е неговата животна приказна на Старова – бегалска судбина, и тоа е она што нѐ поврзува. Бегалската субдина на неговото семејство од Албанија ќе го донесе во Македонија и токму тоа ќе го одреди неговиот пат, ќе се школува на македонски и ќе живее дома на албански јазик. И така се случи Старова да пишува на двата јазика, и затоа сме му многу благодарни од Друштвото на писателите – рече Мојсова-Чепишевска.

Академик Луан Старова почина на 24 февруари оваа година, на 81-годишна возраст. Роден е на 14 август 1941 гоцина во Поградец, Албанија.

Добитник е на низа награди и признанија, како и највисокото француско признание за достигнување во уметноста и книжевноста „Командант на Орденoт за уметност и писмо“. Луан Старова создаде многубројни романи, а автор е на поетски, есеистички книги, како и на неколку патеписи. Исто така, преведе и дела од Жан-Пол Сартр, Ѓерѓ Лукач, Исмаил Кадаре и многу други.

The post КОМЕМОРАЦИЈА ЗА ЛУАН СТАРОВА Македонската литература загуби неповторлив автор appeared first on plusinfo.mk.