Друштвото на филмски работници на Македонија реагира по најновиот извештај на Државниот завод за ревизија, во кој повторно се отвораат дилеми околу финансирањето на нивните активности. Од таму потсетуваат дека ревизијата за 2023 година веќе утврдила дека нема злоупотреби на парите што Агенцијата за филм ги доделила, но дека постоела формална забелешка – дека процедурата тогаш не била поддржана со правилник. Агеницијата потоа изготвила нов правилник и објавила јавен повик за поддршка на проектите.

И покрај тоа што овие забелешки биле исполнети, ДЗР и во 2025 година повторно спровел ревизија и, според Друштвото, влегол во сфера која не му е надлежност. Во извештајот стои дека доделените средства – нешто над 2,8 милиони денари – биле користени за хонорари, правни и сметководствени услуги, одржување на веб-страница, закуп на простор, патувања и членарини. Ревизорите сметаат дека вакви трошоци не се во склад со Законот за филмска дејност, кој предвидува соработка со здруженијата, но не и финансирање на нивното секојдневно функционирање.

Филмаџиите, пак, велат дека ревизорот го надминал својот мандат и се обидува да ја оспори проценката на стручните тела на Агенцијата за филм, конкретно уметничкиот совет, во кој членуваат признати професионалци и авторитети од културата. Според нив, токму тие се компетентни да оценат што значи развој на кинематографијата, а не институција чија работа е само финансиска контрола.

Од Друштвото потсетуваат дека постојат повеќе од 75 години, дека се темелна институција во македонската култура и дека заедно со писателите и ликовните уметници се носители на традицијата и развојот на уметноста. Тие истакнуваат дека вакви модели на соработка меѓу агенции и здруженија се вообичаени во европските филмски индустрии и дека токму така функционира филмскиот сектор насекаде.

Во својата реакција додаваат дека ДЗР очигледно не ја разбира природата на граѓанските организации, но и дека не мора да ја разбира, бидејќи тоа не е во негов опсег. Наместо, како што велат, да се пишуваат извештаи со „непотребни и тенденциозни“ делови, ревизорот треба да се насочи кон реалните проблеми во културата и филмот, за кои постојат докази и за кои веќе постапуваат институциите што се надлежни за финансиски криминал.

The post ФИЛМАЏИИТЕ РЕАГИРААТ НА НАОДИТЕ НА ДРЖАВНАТА РЕВИЗИЈА Не нашла злоупотреби, ама го напаѓа начинот на работа на Друштвото на филмски работници  appeared first on plusinfo.mk.

„ДФРМ, како асоцијација на филмски професионалци, исклучително ги почитува вашите заложби преку новинарски и академски средства да се борите да ги заштитите активните филмски работници од секакви видови злоставување. Но, овој пат, за жал, доведени сте во заблуда. Затоа се чувствуваме повикани да реагираме на вашата објава и да ви ги појасниме нештата. Бездруго, во вашата објава се споменуваат само уверувањата и аргументите на Милчо Манчевски, што претставува субјективно, а во случајов и невистинито толкување“, се вели во реакцијата.

Од Друштвото посочуваат дека во име на вистината треба да се согледаат фактите, односно дека кон Милчо Манчевски во никој случај не постои политички прогон, туку се водат истраги и постапки за правниот субјект „Банана филм“ во негова сопственост. Односно, правни постапки поради индиции за финансиски злоупотреби.

„Овие постапки се водат пред истражните органи на РСМ, како Основното јавно обвинителство и Управата за финансиска полиција, како последица на кривична пријава поднесена од страна на Агенцијата за филм на РСМ. Според законот, додека тие не бидат расчистени со правна разврска, на ‘Банана филм’ ѝ е оневозможено да располага со државни средства. Жалбените барања на Манчевски и неговата продукциска куќа ги отфрли и високата правна инстанца Вишиот управен суд“, посочува ДФРМ.

Друштвото на филмски работници на Македонија е уверено дека „Филм индастри воч“ ќе увиди дека реакцијата е избрзана, како резултат на подметната манипулација од страна на Манчевски, кој се претставува како жртва на политички прогон. А всушност, дека како и секој друг граѓанин на нашата држава, за кого би постел сомнеж за финансиски криминал, би одговарал според законите пред надлежните институции.

Во реакцијата се додава дека образложението на Манчевски, со кое претходно во заблуда ги доведе и првите луѓе на филмскиот фестивал во Венеција, дека тој е „свиркач“ и „укажувач на корупција“, всушност е исто така манипулација. Истовремено, посочуваат дека на објавата на Филмскиот фестивал во Венеција, реагираше и Агенцијата за филм на РСМ, која појасни дека не станува збор за никаков политички прогон, туку за правни истраги.

„Сигурни сме дека длабоко ги почитувате етичките, моралните и правните начела врз кои се темели работата на продуцентите насекаде во светот, особено кога станува збор за пари кои се насочуваат во филмската уметност од страна на државната каса. Ние, како филмски професионалци, кои исто така соработуваат и се во партнерство со бројни европски здруженија и асоцијации, најмногу од сѐ се водиме кон начелата на европскиот филмски свет, кој е колегијален и солидарен. Затоа, ве молиме да ја повлечете објавата, бидејќи таа е невистинита и неоснована. Ве уверуваме дека Друштвото на филмски работници на Македонија стои во заштита на филмот и на филмските работници и доколку постои каков било вид на стигматизација или политички прогон кон било кој филмски автор во нашата земја, ние жестоко ќе реагираме“, стои во реакцијата од ДФРМ.

The post „МИЛЧО МАНЧЕВСКИ ВЕ МАНИПУЛИРА“ Македонските филмаџии го предупредија „Филм индастри воч“ дека режисерот ги довел во заблуда appeared first on plusinfo.mk.

Филмот „Врба“ од 2019 година, со тегобна и тажна тематика, на Милчо Манчевски му донел многу голема финансиска среќа. И не би било ништо спорно, ако тој заработил со филмот, преку дистрибуција, продажба, киноприкажување, логична заработка по примерот на европските и светските режисери. Но, за Манчевски златната кокошка секогаш се народните пари, овдешните македонски, тврди ДФРМ.

Манчевски си потпишал договор со самиот себе

Од македонскиот дел од буџетот на филмот, во висина од 1 милион и 350.000 евра, пари директно финансирани од џебот на граѓаните преку  Агенцијата за филм на РСМ (АФРСМ), во џебот на Манчевски завршиле речиси една третина.  За сценариото наплатил 62.500 евра, за режија 163.88 евра, а се потпишал и како продуцент со 40.000 евра хонорар – или вкупно 266.389 евра. Но, тоа не е се`.

ДФРМ тврди дека со директен трансфер Милчо Манчевски префрлил уште 88.000 евра од државните пари на својата фирма „Милкман“ во Њујорк. Оваа негова компанија во САД е регистрирана на негово име и негова адреса – вклучително и преку неа, за овој филм тој за себе наплатил вкупно фантастични 354.000 евра!

– Или, попрецизно, Манчевски потпишува договор со самиот себе и од својата македонска фирма „Банана филм“, си префрлува средства на својата фирма „Милкман“ во САД. Согласно договорот кој е склучен со неговата овдешна фирма „Банана филм“, неговата друга фирма од САД тој ја вклучува и во продукцијата на проектот „Врба“ и пак со нејасни парични трансакции и тоа, внимавајте, за „развој на проектот“.  За „развој на проектот“, ама ова откако проектот е завршен и оттука прашањето – каков е тоа „развој“ кога филмот е завршен и што потоа „развивал“ Милчо Манчевски? – прашува ДФРМ.

Се истражува „молзењето“ на народните пари преку „Милкман“

Притоа, интересен е фактот што неговата американска фирма „Милкман“ не фигурира, воопшпто не се спомнува во првите три извештаи кои се доставени во АФРСМ после снимањето на филмот, но се јавува во графата на конечниот извештај по завршување на премиерата на филмот. Во тој извештај стои дека кон „Милкман“ се реализирани исплати за „развој на филмот“ во висина од 4.920.000 денари.

– И според правилата и според праксата, сите трошоци настанати за подготовка на филмот се поднесуваат во првиот извештај за финансиското работење со државните пари. Како и зошто неговата фирма во САД „Милкман“ „развива“ филм по неговото завршување, е мистерија за која и надзорните органи се изјасниле дека не е логична и случајот станува предмет со кој се занимаваат македонските истражни органи – тврдат од ДФРМ.

Понижувањето на колегите соработници и актери – најголем срам во историјата на македонската филмска продукција

Во филмската фела, тврдат од ДФРМ, хонорарите на Манчевски се доживуваат како лудост, а понижувањето на колегите соработници и актерите на кои тој буквално им фрла само по некоја стотка и нивните хонорари се повеќе од стократно пониски од оние на Манчевски, е најголемиот срам во историјата на македонската филмска продукција.

– За споредба, nаспроти 350.000 евра хонорар за Манчевски, од извештајот може да се согледа дека на актерите им исплаќал хонорари од 50 до максимум 5.000 евра, на странските автори од македонски пари им префрлал по неколку десетици илјади евра, а на македонските соработници десеткратно помалку.

Kaj Манчевски, странските копродуценти, наместо да вложат, земале македонски пари

Европските, а со тоа и македонските филмови се во најголем дел копродукции и во нив, освен нашата, учествуваат и други држави, со сопствен влог во проектите.

Но, наспроти очекуваното од странските копродуценти во филмот да донесат пари или пак компензациски услуги, во филмот„Врба“ авторот Манчевски плаќал странци со наши пари, тврди ДФРМ. Евидентирани се исплати за консултантски услуги кон Белгија, односно кон „Сага филм“ во висина од 6.375 евра и за „Скала продукција“, 42.500 евра.

– Какви тоа консултантски услуги им плаќал Манчевски на копродуцентите и зошто тие не донеле странски пари, туку од Милчо Манчевски добиле македонски пари, тоа е уште една од низата нејасни финансиски еквилибристики на Милчо Манчевски и на неговата фирма „Банана филм“ – велат од ДФРМ.

Само хонорарот на Манчевски е колку сите пари за еден стандарден македонски филм

Тоа што е сигурно, а секако не е логично, е дека хонорарите на Манчевски се еднакви, дури и поголеми од буџетот на еден стандарен македонски филм. Изминативе години се снимија дузина филмови поддржани од Агенцијата за филм со буџет од 250.000 до 380.000 евра и го освоија светот.

Македонските филмови учествуваа на водечките филмски фестивали и се закитија со многу награди. Хонорарите на овие режисери – добар дел од нив далеку поуспешни од Милчо Манчевски со неговите последни остварувања, тврди ДФРМ – се и дваесеткратно пониски од неговите.

Истрагата нека го каже последниот збор за „Милкман“ и „Банана филм“, дури и Манчевски не е над правдата

– Да, познатите европски режисери можеби заработуваат приближно исти, па и поголеми износи од овие на Манчевски, но тоа не се пари од државните буџети, туку од договори за прикажување, дистрибуција или тантиеми. Тие заработуваат од успехот на својот филм, додека делот на хонорарот од буџетот за филм кој доаѓа од државата е процентуално сличен кај сите автори. Таков е европскиот филмски свет, колегијален и солидарен – појаснуваат од ДФРМ.

Во ДФРМ се уверени дека органите на прогонот ефикасно ќе ја завршат истрагата поврзана со американската фирма на Манчевски „Милкман“ и со другите негови финансиски дубиози поврзани со „Банана филм“ и со нејзиниот сопственик Милчо Манчевски и дека последниот збор за него ќе го имаат вистината и правдата.

The post ТАЖНАТА „ВРБА“ МУ ДОНЕЛА ГОЛЕМА ФИНАНСИСКА СРЕЌА НА МИЛЧО МАНЧЕВСКИ Во својот џеб инкасирал хонорар од 354.000 евра, колку што чини еден стандарден македонски филм appeared first on plusinfo.mk.

Македонскиот режисер Милчо Манчевски ја извести јавноста дека Меѓународната организација Филм индастри воч (Film Industry Watch) објавила текст во кој го опишува случајот на режисерот и „повикува да запре политичкиот прогон против него“.  Манчевски информира дека во текстот се говори за неговите проблеми кои почнале кога тој ги пријавил Агенцијата за филм на Република Македонија (АФРСМ) и Друштвото на филмски работници на Македонија (ДФРМ) за корупција, а Државниот завод за ревизија, Антикорупциската комисија и Транспаренси Интернешнл го потврдиле она што го кажал. Како одмазда, вели тој, политичкиот систем ги блокирал неговите проекти, веќе завршениот „Кајмак“ и новиот филм „Збогум, Копакабано“. „Ова е студија на случај за политички прогон на истакнат свиркач (укажувач) кој пријавил корупција на највисоките нивоа на власта“, се вели во објавата на Манчевски на Фејсбук.

Манчевски потсетува дека реномираниот Филмски фестивал во Венеција, здруженијата на филмски работници на Италија, како и Меѓународната федерација на филмски критичари – ФИПРЕСЦИ и Македонската секција на ФИПРЕСЦИ му изразиле поддршка, „повикувајќи да запре политичката репресија против него која е предизвикана од фактот дека тој пријавил корупција во Агенцијата за филм и во Друштвото на филмски работници на Македонија“.

И во кусо интервју за МИА, Милчо Манчевски пред некој ден ги обнови своите обвинувања за „ моќни поединци“ од Агенцијата за филм и од ДФРМ, кои наводно тргуваат со моќ и распределуваат пари за филмската дејност. Манчевски ги нарекува „кланови“ кои „имаат заземено позиции и мафијашки владеат со државни институции“.

Плусинфо во неколку наврати досега ги пренесуваше ставовите на Манчевски и на институции и поединци коишто го поддржуваат како како жртва на политички прогон и како автор кому Агенцијата за филм и Друштвото за филмски работници му ги банира проектите. Почитувајќи ја етичката обврска да се слушне другата страна, по најновото актуелизирање на јавната полемика од негова страна, Плусинфо побара став од луѓето што тој ги обвинува, нарекувајќи ги клановска и мафијашка структура. Во оваа и во неколку други реакции кои ќе уследат, засегнатите први луѓе на ДФРМ говорат за „случајот Манчевски“.

Прво да се расчисти како „Банана филм“ успеа да „стопи“ 1 милион евра!

Манчевски е под истрага за финансиски злоупотреби на буџетски пари, потсетуваат од Друштвото на филмски работници на Македонија. Станува збор за пари на државната Агенција за филм. Прецизно, непокриени или неотчитани 950.000 евра. И покрај фактот што бил должен да поднесе извештај со материјални докази за тоа каде се потрошени речиси 1 милон евра, Манчевски тоа го нема сторено до ден денешен. Истражните дејствија за финансиското работење на продукцијата „Банана филм“, во сопственост на Милчо Манчевски, за овие пари, се во тек.

И покрај јавните и институционални прозивки, Милчо Манчевски се уште нема одговорено и за други сомнителни парични трансакции, како на пример за префрлување на строго наменети државни пари во негови лични фирми регистрирани во други држави, велат од ДФРМ.

Освен тоа, и покрај забраната, Агенцијата за филм под раководство на доскорешниот директор Владимир Ангелов, со негов потпис, а секако бесправно, самоволно донесува решение со кое ја симнува забраната за „Банана филм“ и овозможува Милчо Манчевски и понатаму да троши државни пари – спротивно на одредбите од Законот за филмска дејност, спротивно на одлуката на Управниот одбор на Агенцијата за филм (АФРСМ) и спротивно на одлуката на Вишиот управен суд. И за овој бесправен чин е поднесена пријава до Оосновното јавно обвинителство.

Манчевски добил пари за новиот проект и покрај институциионалната забрана

За појаснување, решението за финансирање на новиот проект на Манчевски, наспроти актуелната одлука на Управниот одбор, злоупотребувајќи ја својата позиција и користејќи ја надвор од директорските овластувања, го потпишал доскорешниот директор на Агенцијата за филм, Владимир Ангелов.

За овој преседан во работата на АФРСМ, Ангелов немал поддршка од Управниот одбор. Новиот останал на истата правна линија со стариот состав на Управниот одбор, кој исто така констатирал неотчетност и сомнежи за финансиски проневери од страна на продукцијата во сопственост на Милчо Манчевски, што го потврдува и одлуката на Вишиот управен суд.

Поранешниот директор на Агенцијата за филм, Бојан Лазаревски, во чиј мандат е потпишано решението за стопирање на проектите на продуцентската куќа „Банана филм“, неодамна изјави дека постапил според Законот за филмска дејност, односно согласно налогот на УО и тој како директор бил должен да ја почитува одлуката на Управниот одбор на АФРСМ.

– Во мојот мандат го потпишав решението за стопирање финансирање на проектите на продуцентската куќа „Банана филм“, а врз основа на одлуката  на Управниот одбор на АФРСМ. Според Законот за филмска дејност, директорот е должен да ги почитува одлуките на Управниот одбор, кој е управен орган на Агенцијата.  За сомнежите поткрепени со документи, врз основа на кои е донесена одлуката на УО, беа известени сите надлежни институции, а Вишиот управен суд, постапувајќи по жалбата на АФРСМ од одлуката на Управниот суд, ги отфрли барањата на тужителот „Банана филм“ како неосновани и донесе решение проектите да останат стопирани до конечното затворање на истрагата – објасни Лазаревски.

Koja e спрегата меѓу Бисера Костадиновска Стојчевска и „Банана филм“?

Обвинетите за клановско и мафијашко поведение очекуваат и персонални и институционални одговори за тоа дали дали доскорешната министерка за култура Бисера Костадиновска Стојчевска е во спрега со „Банана филм“, односно со сопственикот Милчо Манчевски и кој е нејзиниот евентуален интерес во случајот „Манчевски“.

– Ќе има ли одговор прашањето зошто Костадиновска Стојчевска, која била добро информирана за случајот, за сомнежите, за индикациите, но и за фактите за финансиски злоупотреби на компанијата на Манчевски, па и за тековните проблеми на филмаџиите, не соработувала зо решавање на состојбите? – прашуваат тие.

Бисера Костадиновска Стојчевска мора да одговори и на прашањето зошто и ресорното министерство – кое исто така било во тек со тоа дека филмската фела, односно Друштвото на филмски работници е бомбардирано со најразлични пријави од страна на „Банана филм“, за кои  постапиле и инспекции на Министерството, Државната комисија за спречување на корупцијата и други органи, при што сите пријави биле отфрлени како неосновани – не застанало во институционална заштита на филмските работници.

– Зошто, откако Костадиновска Стојчевска го именува Ангелов за директор, тој бесправно одобрува исплата на буџетски пари на Манчевски? – прашуваат од ДФРМ.

Патем, според правни експерти, во постапката на директорот Ангелов постои ризик за казниво дело „неизвршување судска одлука“, поточно делото предвидено во Кривичниот законик во член 377, став 2: „Службено лице или одговорно лице во правно лице што ќе одбие да изврши правосилна и извршна судска одлука што е должно да ја изврши, ќе се казни со парична казна или со затвор до три години.“

Зошто наумила министерката за култура да го „оправа“ Друштвото на филмски работници?

Во меѓувреме, за сомнежите врз кои е донесена оваа одлука на Управниот одбор и судот,  истрага се води во Основното јавно обвинителство и во Управата за финансиска полиција , а известена е и Државната комисија за спречување на корупцијата. Севкупната документација за овие предмети на „Банана филм“ , Управата за финансиска полиција ја побарала од Агенцијата за филм во јули минатата година и до денес се води истрага.

И додека институциите не го кажале конечниот збор во истрагата за „Банана филм“, а доскорешната министерка останува заштитена со пратеничкиот имунитет со кој неодамна се стекна, сега потписот на Ангелов станува предмет на ОЈО.

– Зошто, од кои причини и со кои наменски мотиви, покрај контролните органи во Агенцијата, Управниот и Надзорниот одбор и нивните извештаи, Костадиновска Стојчевска формира т.н. „инспекциска комисија“ и објавува извештај со невистини за работењето на Агенцијата за филм и на Друштвото за филмски работници? – прашуваат првите луѓе на ДФРМ.

Тие сакаат да знаат зошто, од кои причини и од кои мотиви, во јавноста се пласира  т.н. „Извештај за подобрување на работата на АФРСМ“, подготвен по налог на доскорешната министерка Бисера Костадиновска Стојчевска и тоа нестрпливо и набрзина, во политичко време на предизборие.

– Tој „извештај“ преполн со невистини, лаги, тенденции со кои, несвесно или свесно, се оцрнуваат и целата македонска кинематографија и нејзините меѓународни достигнувања – велат тие.

Има ли корупција и кај Бисера Костадиновска Стојчевска?

Од ДФРМ се сомневаат дека со овој т.н. извештај, Костадиновска Стојчевска прави обид да се сврти вниманието на јавноста, па и на институциите, од веќе и институционално констатираните неправилности за работата на „Банана филм“ на Милчо Манчевски, за кои постапува Основното јавно обвинителство.

Дотолку повеќе што споменатиот извештај е подготвен од работна група, на чие чело е Весна Илиевска, државен советник во Министерството за култура, позната како блиска пријателка на Манчевски, која освен фабрикуваниот извештај, се јавува и како автор на серија таканаречени „правни мислења“ што служат како инструмент за олеснување на процедурите при извршување на спорните дејства поврзани со финасирањето на проектите на Манчевски, велат од ДФРМ. Но, според правните експерти, овие „правни мислења“ немаат вистинска правна тежина, тие се само параван кој на ниту еден начин не ги штити потписниците и извршителите на против правните дејствија во случаите со Манчевски и на неговата продукциска компанија.

Ваквите чудни постапки, несомнено мирисаат, најблаго речено, на коруптивни дејствија и притисоци кон поединци и институции, евентуално во насока да се спречи натамошната истрага кон Манчевски која се води пред ОЈО во соработка со Управата за финансиска полиција.

– Дали е ова обид да се попречи истрагата и да се видоизмени впечатокот во јавноста додека Манчевски веќе со години, а без никаков ефект, прави постојан притисок, со неосновани кривични пријави кон сите инволвирани кои одлучувале за поддршка на неговите проекти во Агенцијата за филм, во обид да го прикрие сопствениот криминал? – прашуваат засегнатите од ДФРМ.

Како успеа „прогонетиот“ Манчевски од владата на СДСМ да добие 2,5 милиони евра за 3 филма?

Тие прашуваат дали ова е негов обид, тој самиот, Милчо Манчевски, според сопствени написи во јавноста, себеси да се прикажува како жртва на политички прогон и тоа токму во време на политички околности во кои од доскорешната влада на СДСМ тој лично добива поддршка за три играни филмови, односно финансиски средства во вредност од безмалку 2,5 милиони евра?

За неговото „незадоволство“ од поддршката од државата, од која секогаш го исползувал максимумот, своевремено реагираше и министерката за култура Елизабета Канчевска Милеска која во 2017 година изјави:

„Особено значајана финансиска помош од државата е издвоена и за режисерот Милчо Манчевски кому преку Министерството за култура и Филмскиот фонд на Манчевски во изминатите 10 години му се исплатени близу 280 милиони денари“.

Филмските работници ги чекаат одговорите и резултатите на институционалните постапки и процедури, пред се како морална сатисфакција за нивната посветеност на филмската уметност. Од друга страна, финалето на истрагите конечно треба да ја расчисти и дилемата дали во Македонија навистина постојат филмаџиски кланови и мафијаши, како и политички прогонети лица. А ако постојат такви нешта, дефинитивно треба да се разбистри и тоа кој кого прогонува и зошто.

The post БОЖЕМ „ПОЛИТИЧКИ ПРОГОНЕТИОТ“ МАНЧЕВСКИ САМИОТ ПРОГОНУВА МАКЕДОНСКИ ФИЛМАЏИИ?! Главната улога во филмот „Држете го крадецот“ ја игра Бисера Костадиновска Стојчевска appeared first on plusinfo.mk.

Во прилог го пренесуваме целиот нивен допис до јавноста и до граѓаните:

„Бараме од органите во Агенцијата за филм, од техничкиот и идниот Министер за култура и од техничката и новата македонска Влада, како и од останатите релевантни државни институции, итно разгледување на состојбите во Агенцијата за филм и итно запирање на лажната слика која се креира за состојбите во филмската дејност, кога во суштина фимските работници, автори и продуценти ги живеат најлошите денови во историјата на македонската кинематографија.

Наспроти ваквиот однос на институциите, македонскиот филм години наназад е амбасадор на македонската култура во светот и успесите кои нашите филмови ги имаат во последните 5 години гордо го веат македонското знаме на најголемите светски филмски фестивали во Кан, Венеција, Берлин, Парк сити, Карлови Вари, а македонската јавност беше особено горда кога успеавме да имаме и две номинации за Оскар.

Загрозувањето на остварените соработки, кои се грижливо градени низ годините, со многу труд и залагање на многумина од нас, филмските професионалци, претставува не само тажен чекор назад за македонската кинематографија, туку и голем срам и оцрнување на севкупниот имиџ на нашата култура и држава, на патот кон толку посакуваната европска иднина.

Македонскиот филм е доведен до колапс!

И покрај нашите бројни предупредувања во 2023 година, македонскиот филм доби буџет за 2024 кој не е доволен за елеметарно да се покријат потребите на нашата кинематографија и кој ја води во нејзино забрзано системско распаѓање.

Во моментов во јавноста успешно се креира сликата од типот „Барем се снима” само затоа што во периодов е завршена или во тек е реализација на 4 долгометражни играни филмови, а во текот на летото се очекува да започнат со снимање уште најмалку 4 филма.

Она кое што е катастрофално и погубно за нас филмаџиите, а особено за филмските продуценти, во оваа “Барем се снима” слика, е фактот што дел од овие филмови средствата ги имаат добиено во 2023 година, а оние кои добиваат средства оваа година мора да се согласат на половични ислати кои не се во колерација со досегашните стандардни исплати и договорно утврден процент кој продуцентите го добиваат за снимање, од одобрените средства од Агенцијата за филм.

Ваквата ситуација во пракса значи дека секое отпочнување на филм носи несигурност и страв затоа што долгот од речиси 4.000.000 евра кој Агенцијата за филм го има кон филмските продуценти, за проекти кои се одобрени на конкурс и се старувани до овој момент, се зголемува, без притоа да се има јасен план како и кога продуцентите ќе можат да ги очекуваат средствата кои и самите ги должат спрема филмските работници, авторите, актерите и останати соработници и тоа за филмовите кои се веќе снимени и за добра и услуги кои се одамна веќе реализирани.

Несигурност и страв дополнително внесува и нефункционалноста на процедурата за прегледувањето на извештаи за наменско трошење на средства во Агенцијата за филм, проблем кој трае од нејзиното основање до денес. Во Агенцијата постојат извештаи кои се предадени и пред 1 до 2 години, а кои кои до ден денес не се прегледани.

Поради немање на соодветна служба и поради неможноста за ангажирање на надворешни лица, во изминативе 4 месеци во Агенцијата за филм дополнително се таложат поднесени, а непрегледани извештаи, со што сакајќи или не сакајќи, сеедно, дополнително се пролонгира исплаќањето на нови средства спрема продуцентите за веќе реализирани фази од одобрените проекти на конкурс.

Како денес, така и години наназад пролонгирањето на исплаќање на средства за одобрени проекти на конкурс се случува и преку непотпишување на нови договори, односно пролонгирање на потпишувањето на договорите, дури и во случаи кога продуцентите до Агенцијата за филм ја имаат доставено целосната документација согласно законот и имаат обезбедено банкарски гаранции.

За јавноста да има комплетна слика, и ова писмо да не се извади од контекст со прикажување на некаква поинаква состојба, сакаме да напоменеме дека во последните 15-тина години речиси сите македонски долгометражни играни филмови се реализираат како ко-продукции помеѓу неколку земји. Ова значи дека македонските продуценти не снимаат филмови со средства кои се 100% државни и од буџетот на земјава и на Агенцијата, туку станува збор за покомплексен систем за финансирање во кој одолговлекувањето на потпишување на договори, исплати или прегледување на извештаи го загрозува или забавува финансирањето на нашите филмови и во останатите земји, а во некои случаи доаѓа и до раскинување на овие соработки поради пробивање на рокови.

Дополнително, за да се одржи сликата „Барем се снима”, Агенцијата за филм сериозно почнува да ги загрозува меѓународните договори кои самата таа ги има склучено со останати агенции и филмски центри од регионот и пошироко, да излегува од договорени повеќе годишни соработки кои бараат минимална финасиска партиципација, да го проблематизира плаќањето на котизации за одредени програми во кои Агенцијата е вклучена со цел промовирање на македонскиот филм, автори, актери, продуценти.

Проблематизирањето на веќе донесени одлуки и менувањето на веќе постигнати договори, поради менувањето на раководството во државните институации е нешто со кое сите постојано се соочуваме во изминативе 30 години. Секако, оваа пракса не ја заобиколува ниту Агенцијата за филм, па така со секоја промена на раководство, ние филамџиите губиме драгоцени месеци во објаснување и запознавање на новите челници со функционирањето и спецификите на нашата дејност.

Секоја промена за нас значи прилагодување на нови правила и „револуционерни” идеи кои никако не одат во прилог на принципите на еднаквост и транспарентност. За жал сме биле, но и денес сме сведоци на нови толкувања на законот за филмска дејност и на негово заобиколување кога е тоа некому потребно.

Токму поради сè што е наведено во ова писмо, бараме од органите во Агенцијата за филм, од техничкиот и идниот Министер за култура и од техничката и идната македонска Влада, како и од останатите релевантни државни институции, итно разгледување на состојбите во Агенцијата за филм и итно запирање на лажната слика која се креира за состојбите во филмската дејност, кога во суштина фимските работници, автори и продуценти ги живеат најлошите денови во историјата на македонската кинематографија.

Со цел доловување на целосната слика, сакаме да информираме дека согласно податоците кои неофицијално ги имаме добиено од Агенцијата за филм, во периодот од 2020 до 2024 година, преку кратење на основното барање на средства за следната година, кое Агенцијата за филм го упатува до Министерство за култура, а преку нив и до Министерство за финансии, и преку ребаланс на буџет во текот на годината, од македонскот филм се одземени околку 8.500.000 евра, но во исто време бројот на поддржани проекти воопшто не е намален.

Како што напоменавме со ваквото континуирано и паушално кратење на буџетот за филм во изминатите 5 години, македонските филмски продуценти тонат во долгови поради ненавремените исплаќање на средства од страна на Агенцијата за филм за одобрени проекти кои се завршени, чија реализација е во тек или кои допрва треба да стартуваат. Воедно, се доведува во прашање егзистенцијата на филмските автори, продуценти, филмски работници и сите останати учесници во процесите на реализација на филмските проекти.

Наспроти ваквиот однос на институциите, македонскиот филм години наназад е амбасадор на македонската култура во светот и успесите кои нашите филмови ги имаат во последните 5 години гордо го веат македонското знаме на најголемите светски филмски фестивали во Кан, Венеција, Берлин, Парк сити, Карлови Вари, а македонската јавност беше особено горда кога успеавме да имаме и две номинации за Оскар.

Постигнувањето на ваков успех, верувајте, не е лесно. Уште помалку е лесно повеќегодишно континуирано одржување на успехот на овој нов филмски бран, кога институциите кои треба да се грижат за македонскиот филм, да го штитат, стимулираат и поттикнуваат, остануваат незаинтересирани и глуви.

Тоа што дополнително загрижува е фактот што преку ваквиот однос кон домашниот филм, се прави огромна штета и врз угледот на државата пред нашите долгогодишни поддржувачи и меѓународни партнери.

Актуелната состојба, нередовното и задоцнето исплаќање на средства, паушалното и „сурово“ кратење на буџетот за филм, ја прави Македонија несериозен и недоверлив парнер, а македонските продуценти секојденево се соочуваат со притисоци и закани за меѓународни тужби и откажување на соработки.

Загрозувањето на остварените соработки, кои се грижливо градени низ годините, со многу труд и залагање на многумина од нас, филмските професионалци, претставува не само тажен чекор назад за македонската кинематографија, туку и голем срам и оцрнување на севкупниот имиџ на нашата култура и држава, на патот кон толку посакуваната европска иднина.

Филмот е нашиот живот, нашата сегашност и иднина.

Ние резервни професии и животи немаме!

Македонскиот филм е доведен до колапс!“

Со почит,

Игор Иванов, претседател на ДФРМ

Лабина Митевска, претседател на секцијата продукција при ДФРМ

Даријан Пејовски, претседател на секцијата режија при ДФРМ

The post ПОСЛЕДНИТЕ 4 ГОДИНИ НА МАКЕДОНСКИОТ ФИЛМ МУ СЕ ОДЗЕМЕНИ 8,5 МИЛИОНИ ЕВРА Ги живееме најлошите денови, сменете ја сликата, предупредуваат филмските работници appeared first on plusinfo.mk.

Барањата произлегоа од денешното Собрание на ДФРМ што се одржа во Кинотеката на РСМ со што се означи и почетокот на „Златна рамка“ 2021, а кои произлегоа од дискусијата за време на отворениот дел, каде се обрати претседателот на Друштвото на филмски работници, Игор Иванов – Изи. Тој се осврна на актуелната состојба на македонскиот филм и националната кинематографија, пред сè на распределбата на буџетот на Министерството за култура.

– Од 170 милиони денари во 2019, во 2020 во три наврати беа скратени цели 85 милиони. Имајќи предвид дека од истите тие средства се покриваат сите административни трошоци на Агенцијата за филм, членарините во Еуроимаж и други организации, плати за вработени и слично, ударот што нашиот сектор го доживеа е огромен. Филмаџиите ниту се вработени ниту имаат пензиско и здравствено осигурување, што не е случај со другите дејности во културата. Ние живееме единствено од производство на филмови – истакна Игор Иванов, соопштија од ДФРМ.

Минатата 2020 година беше комплексна за многу индустрии вклучувајќи ја и филмската, која се справуваше со многу предизвици поради отежнатите услови за продукција. Уште поголем застој направи тоа што немаше можност за промоција на филмовите, бидејќи речиси сите фестивали беа откажани.

– Но, за време на пандемијата ни се случи уште една стварност, а тоа е дека филмот успеа да донесе утеха за време на ограничувањата со кои се соочивме. Ниту една европска земја не скрати средства за аудио-визуелните уметности, напротив секаде се бележи зголемување на буџетот заради крепење на целата индустрија. За време на пандемијата осознавме дека дури и кога не можевме во кино, филмот останува нешто кон што се вртиме кога сме во четири ѕида. Токму поради тоа народот има потреба од содржина како никогаш порано, но и поради зачувување на макотрпно градениот систем на независно филмско производство, промоција и дистрибуција, систем во кој се негува авторскиот филм и културната разноликост на Европа. Систем во кој се негува културната размена по пат на ко-продукциско поврзување и филмските фестивали – беше потенцирано на Собранието.

Македонскиот филм, изминатите четири години доживеа своевидна ренесанса, се забележаа сериозни успеси на светски фестивали, а филмот стана најдобриот културен амбасадор на нашата држава.

– Ова скратување, пренамена на буџетот од страна на Министерството за култура, направена без анализи и без претходни консултации со филмските професионалци и Агенцијата за филм го оценуваме како чин кој е спротивен на принципите кои се втемелени во европското филмско семејство каде несомнено припаѓаме. Сите сектори се важни и сите ги почитуваме, но македонскиот филм ја доживува својата преродба и секој денар што е намален го доживуваме како навреда што нè демотивира, ова не смее да се повтори, ние тоа не смееме и нема да го дозволиме – додаде Иванов.

Друштвото на филмски работници на ова Собрание избра и нови членови, а присутните се осврнаа и на најновите успеси на македонскиот филм.

The post Филмаџиите бараат да се врати буџетот за филмот како пред короната appeared first on plusinfo.mk.

Претседателот на Друштвото на филмски работници на Македонија (ДФРМ) Игор Иванов – Изи на денешната прес-конференцијата соопшти дека при носењето на одлуката ги земале предвид искуствата од европските и светски фестивали, во консулатција со своите членови, по серија состаноци одржани онлајн и следење на состојбата.

– Ова беше тешка одлука. Не беше лесно да ја донесеме. Никој не е среќен со неа. Но, сметаме дека направивме вистинска одлука и дека тоа времето ќе го покаже – рече Иванов – Изи.

Toj посочи дека филмските работници или ДФРМ сметаат дека примарно државата треба да троши пари за продукција на филм и во овие услови поважно е да се снима отколку да се даваат пари за оналјн фестивал.

Директорката на фестивалот Гена Теодосиевска рече дека не била среќна кога ја слушнала одлуката на Управниот одбор и на Собранието на ДФРМ, но додаде оти до крај ќе ја испочитуваат.

Главниот настан ќе се одржи на 19 септември во Битола и ќе трае помалку еден час. Ќе се обрати покровителот на фестивалот, претседателот Стево Пендаровски, градоначалничката на Битола Наташа Петровска, а обраќања ќе имаат и директорката на фестивалот Гена Теодосиевска, претседателот на ДФРМ Игор Иванов – Изи. Со видео порака ќе се обратат добитникот на највисоката фестивалска награда и новиот претседател на ИМАГО, Острум, а добитникот на „Големата ѕвезда“ на ДФРМ очекуваат да биде присутен на тој настан.

Таа рече дека имаат намера да преговараат со јавниот сервис да прикаже по еден филм од добитниците на високите филмски признанија. Во следните денови и по 19 септември преку интернет платформа ќе организираат две видео работилници со добитниците на наградите и со членовите на ИМАГО, меѓународна асоцијација во која членува ДФРМ и со која соработуваат.

The post Фестивалот „Браќа Манаки“ ќе се одржи на 19 септември appeared first on plusinfo.mk.