Зајакнување на економските врски, нови инвестиции и зголемување на трговската размена меѓу Северна Македонија и Индија беа главните пораки од Македонско-индискиот бизнис форум што се одржа во Скопје, на кој се обратија претседателките на двете држави, Гордана Сиљановска Давкова и Друпади Мурму.

Сиљановска Давкова оцени дека политичките односи меѓу двете земји не се доволно одразени во економската соработка и порача дека постои голем простор за развој.

– Моменталната трговска размена е скромна и достигнува помалку од 133 милиони долари годишно. Ова не ги одразува нашите одлични политички односи и големиот потенцијал за економска соработка – рече претседателката.

Таа предложи амбициозна цел во следните пет години трговската размена меѓу двете земји да достигне најмалку 400 милиони американски долари.

Според неа, најголем потенцијал за соработка има во автомобилската индустрија, фармацијата, металургијата, производството на храна, дигиталните технологии и енергетиката.

– Како европска земја, нашата стратешка цел е членството во Европската Унија. Сите што ќе инвестираат во нашата земја имаат отворени порти кон европскиот пазар – порача Сиљановска Давкова.

Претседателката на Индија, Друпади Мурму, оцени дека економското партнерство меѓу двете земји има голем неискористен потенцијал.

Таа посочи дека Индија веќе извезува органски хемикалии, електрични машини и текстил во Македонија, додека од земјава увезува висококвалитетен мермер кој е ценет на индискиот пазар.

Мурму најави можности за заеднички инвестиции во дигиталната трансформација, вештачката интелигенција, фармацевтската индустрија, здравството, земјоделството, производството на храна и зелените технологии.

– Нашиот фармацевтски сектор има желба да инвестира во Северна Македонија преку воспоставување заеднички производствени капацитети – рече индиската претседателка.

Таа ја покани Македонија да се вклучи во Меѓународната соларна алијанса и да ги искористи можностите за соработка во обновливите извори на енергија.

Претседателот на Здружението на трговски и индустриски комори на Индија (ASSOCHAM), Нирмал Кумар Минда, оцени дека Македонија има стратешка позиција, квалификувана работна сила и пристап до европскиот пазар.

Тој посочи дека најголеми можности за соработка гледа во производството, фармацевтската индустрија, здравството, земјоделството, преработката на храна и иновациите.

– Вистинската можност лежи во инвестициите, заедничките компании и производството кое ќе донесе иновации и раст – порача Минда.

На форумот учествуваа и повеќе министри од македонската влада, претставници на стопанските комори и бизнис заедници од двете земји.

The post МАКЕДОНИЈА И ИНДИЈА СО НОВА ЕКОНОМСКА АМБИЦИЈА Трговијата да достигне 400 милиони долари за пет години appeared first on plusinfo.mk.

Додека престојува во официјална посета на Македонија, индиската претседателка Друпади Мурму е пречекана со сите државнички почести. Но, зад насмевката на првата жена од индиските домородни племиња што стигна до највисоката државна функција се крие една од најтрагичните лични приказни во современата светска политика. Малкумина политички лидери во светот доживеале толку големи семејни загуби, а сепак успеале повторно да се исправат и да продолжат понатаму.

Мурму е родена во 1958 година во сиромашното село Упарбеда, во индиската држава Одиша. Потекнува од племето Сантал, едно од најголемите домородни племиња во Индија. Пред да влезе во политиката работела како службеничка во државната администрација, а потоа и како наставничка, професија што и денес ја споменува како една од најважните во животот. Во локалната политика влегла во 1997 година, а постепено се издигнала до министерка во владата на Одиша, гувернерка на Џарканд и, конечно, претседателка на Индија во 2022 година. Со изборот испиша историја како прва претседателка од домородните заедници и најмладата личност што ја извршувала таа функција.
 

Тешки животни удари

Но, токму во периодот кога нејзината политичка кариера се соочувала со застој, животот ѝ приредил удари што би скршиле речиси секого. Постариот син, Лакшман Мурму, починал во октомври 2009 година под неразјаснети (мистериозни) околности. Вечерта претходно бил на вечера со пријатели, а следното утро бил пронајден во бессознание во креветот. Бил пренесен во болница, но лекарите само констатирале смрт. Според тогашната полициска истрага, постоело сомневање дека можеби паднал од мотоцикл и претрпел внатрешна повреда на главата, но не биле пронајдени надворешни повреди и случајот никогаш не бил целосно разјаснет.

Помладиот син, Сипун Мурму, загинал во сообраќајна несреќа во 2012 година.

Како трагедијата да не била доволна, во 2014 година од срцев удар починал и нејзиниот сопруг Шјам Чаран Мурму, банкар по професија. Во период од само неколку години Драупади Мурму останала без двата сина и без животниот сопатник. Единствено нејзината ќерка Итишри останала покрај неа.

Подоцна Мурму јавно призна дека по сите тие трагедии паднала во длабока психолошка криза. Наместо целосно да се повлече од јавниот живот, спас побарала во духовноста. Станала активна во духовното движење „Брама Кумарис“, каде што, како што самата сведочи, научила да ги прифати загубите и повторно да пронајде внатрешен мир. Духовната дисциплина, медитацијата и секојдневната молитва станале дел од нејзиниот живот.

Токму духовноста, според неа, ја вратила и во политиката. Наместо да се затвори во себе, прифатила нови јавни должности. Во 2015 година беше именувана за гувернерка на Џарканд, станувајќи првата жена на таа функција во оваа индиска држава. Мандатот го заврши со репутација на умерен и внимателен политичар, кој често инсистира на почитување на правата на домородните заедници.

Во духовноста нашла спокој 

Кога владејачката коалиција ја предложи за претседателски кандидат во 2022 година, многумина во Индија го оценија изборот како историски. Но, покрај симболиката дека првпат домородна жена ќе стане шеф на државата, во јавноста силно одекна и нејзината лична приказна. Голем број индиски медиуми тогаш пишуваа дека нејзината животна истрајност станала подеднакво важен дел од кампањата како и политичката биографија.

По преземањето на функцијата, Мурму остана препознатлива по скромниот стил. Иако е на чело на најнаселената држава во светот, ретко користи остар политички речник. Во јавните настапи многу почесто зборува за образованието, духовните вредности, природата, грижата за сиромашните и положбата на жените и домородните народи отколку за дневната политика.

Нејзината посета на Македонија има и историско значење. Таа е прв индиски претседател што престојува во официјална билатерална посета на земјава, што е оценето како важен чекор во развојот на односите меѓу двете држави.

За многумина, сепак, најсилниот впечаток што го остава Друпади Мурму не е политичката функција што ја извршува, туку фактот дека успеала да продолжи да живее и да ѝ служи на својата земја по трагедии какви што ретко кој човек може да ги замисли. Во светот на високата политика, каде што најчесто доминираат моќта и амбицијата, нејзината биографија останува потсетник дека понекогаш најголемата сила не е во победите, туку во способноста човек повторно да стане по секој тежок удар.

Прва посета на индиски претседател на Македонија

Претседателката на Индија е сигурна дека нејзината посета на земјата ќе отвори ново поглавје во билатералните односи и ќе ги зацврсти партнерствата меѓу Македонија и Индија. Таа потврди дека со нејзината домаќинка македонската претседателка Гордана Сиљановска Давкова се согласиле билатералната трговија да ја прошират двојно од сегашниот обем.

Индија сака да ја олесни меѓународната соработка преку иницијативи, како Меѓународната соларна алијанса, Алијансата за катастрофи на инфраструктурата.

– Ја поздравувам намерата на Македонија да се вклучи во овие иницијативи, а учеството во нив ќе ѝ овозможи на Македонија да извлече корист од глобалните алијанси за ублажување на катастрофите – рече претседателката Мурму.

Таа најави и можност за обуки за Македонија на полето на вештачка интелигенција, промоција на традиционалната медицина, но и дека заедно со претседателката Сиљановска Давкова во Музејот на град Скопје ќе ја откријат бистата на Махатма Ганди.

– Ова е посебен подарок од народот на Индија за народот на Македонија, кој ги открива заедничките принципи и вредности на двете нации – реча индиската претседателка.

Индиската претседателка пристигна во Скопје синоќа, а на скопскиот аеродром ја пречека шефот на дипломатијата, Тимчо Муцунски.

Предвидено е таа да положи венец на гробот на Гоце Делчев во црквата „Св. Спас“ во Скопје.

Индиската претседателка ќе оствари средба и со претседателот на Собранието, Африм Гаши, ќе се потпише во Книгата на впечатоци и ќе има обраќање пред пратениците во македонскиот парламент.

Претседателката Сиљановска Давкова и претседателката Мурму утре ќе се упатат кон Охрид, каде што ќе го посетат манастирскиот комплекс „Свети Наум“, како и манастири и цркви во стариот град на Охрид.

The post НАЈТАЖНАТА ЖИВОТНА ПРИКАЗНА ВО СВЕТОТ НА ПОЛИТИКАТА Ги загуби сопругот и двата сина, а потоа се врати во политиката и стана претседателка на Индија appeared first on plusinfo.mk.

Преземање активности за подигнување на билатералните односи на уште повисоко ниво од сегашното, можноста за отворање на резидентна Амбасада на Индија во земјава, но и зајакнување на економската соработка биле дел од темите на кои денеска во Скопје разговарале претседателката Гордана Сиљановска Давкова и нејзината индиска колешка, Друпади Мурму, која престојува во дводневна официјална посета на Македонија. Ова е прва посета на индиски претседател на државава.

На сребата претседателките се согласиле дека контактите меѓу владите, министерствата, парламентите и институциите треба да станат почести, подобро структурирани и поамбициозни.

– Парламентарната дипломатија останува еден од најсилните столбови на меѓународната соработка и уверена сум дека денешното обраќање на претседателката пред пратениците во нашето Собрание ќе ги зацврсти врските меѓу двата парламента и ќе отвори нови можности за парламентарен дијалог. Ја изразив нашата искрена благодарност за сè поактивното присуство на Индија во Западен Балкан и во Југоисточна Европа. Ја поздравуваме секоја иницијатива за продлабочување на соработката и се надеваме на идно отворање резидентна Амбасада на Република Индија во Скопје – рече Сиљановска Давкова.

Таа нагласи дека економската трансформација на Индија е, веројатно, една од највпечатливите успешни приказни на 21 век. Во текот на само една генерација, додаде претседателката, Индија прерасна во водечка економска сила во светот, станувајќи еден од глобалните центри на иновациите, дигиталните технологии и претприемништвото.

Шефицата на државата додаде дека во исто време и нашата држава има многу што да им понуди на индиските партнери.

– Сместена на крстопатот на главните европски транспортни коридори, со политичка стабилност, конкурентна деловна клима, добро квалификувана работна сила и преференцијален пристап до европските пазари, ние сме привлечна влезна точка за индиските компании што сакаат да го прошират своето присуство во Европа – истакна таа.

Во текот на разговорите идентификувале бројни области за зајакнување на економската соработка, меѓу кои автомобилската индустрија, фармацевтската, здравството, информатичките технологии, аутсорсингот на деловни процеси, обновливите извори на енергија, земјоделството, прехранбената индустрија, машинството, логистиката и напредното производство. Разговарале и за економијата на иднината – вештачката интелигенција, дигиталната трансформација, научните истражувања, соработката меѓу универзитетите и развојот на новите технологии.

Попладнево, тие ќе се обратат на Македонско-индискиот бизнис-форум за дополнително да ја охрабрат соработката меѓу компаниите на двете држави.

Минатата година трговската размена меѓу двете земји, достигнала приближно 133 милиони американски долари.

– Тоа е далеку под вистинскиот потенцијал. Токму затоа со претседателката Мурму го споделив моето уверување дека треба да си поставиме заедничка, поамбициозна, но остварлива цел, во следните пет години билатералната трговска размена да достигне најмалку 500 милиони американски долари. Верувам дека ваквите цели не се само израз на оптимизам, туку претставуваат стратешка определба што ќе ги поттикне владите, институциите и приватниот сектор со уште поголема решителност да работат кон мерливи резултати – нагласи Сиљановска Давкова.

Како огромен неискористен потенцијал за соработка таа ги наведе и културата, образованието, науката, иновациите, младинските размени и академската соработка.

– Нашата држава нуди недопрена природа, локалитети под заштита на УНЕСКО, богато културно наследство, древни археолошки локалитети, византиски цркви, османлиски џамии и, пред сè, искрено гостопримство. Воедно, се надеваме дека сè повеќе наши граѓани ќе имаат можност да го искусат цивилизациското богатство на Индија. Најсилните пријателства меѓу народите не ги градат само претседателите и владите, туку и студентите, уметниците, претприемачите, научниците и младите луѓе кои учат едни од други, создавајќи трајни спомени и длабоко меѓусебно разбирање – додаде таа.

Двете претседателски разговарале и за неколку значајни глобални иницијативи на Индија.

Врз основа на првичната проценка, рече Сиљановска Давкова, не гледаме пречки за приклучување на нашата држава кон Меѓународната соларна алијанса, Глобалната алијанса за биогорива и Коалицијата за инфраструктура отпорна на природни катастрофи.

– Очекуваме да ги утврдиме конкретните начини на кои нашата држава ќе може активно да придонесе за нивниот понатамошен успех – истакна Сиљановска Давкова.

Претседателката Мурму ја поканила Сиљановска Давкова да ја посети Индија.

The post ТРГОВСКАТА РАЗМЕНА СО ИНДИЈА ДА ПОРАСНЕ ОД 133 МИЛИОНИ ДОЛАРИ НА 500 МИЛИОНИ ДОЛАРИ Поставени амбициозни цели за соработка по средбата на двете претседателки appeared first on plusinfo.mk.

Претседателката Гордана Сиљановска Давкова на свечена церемонија со највисоки државни и воени почести ја пречека Друпади Мурму, која е прв претседател на Република Индија кој дошол во официјална посета на Македонија.

Како што соопшти Кабинетот на Сиљановска Давкова, по тет-а-тет средбата следел пленарен состанок на македонската и на индиската делегација.

Предмет на разговорот беа актуелните македонско-индиски односи, со акцент на можностите за соработка во економијата, образованието, науката, културата, туризмот, здравството и дигиталната трансформација.

Соговорничките разменија мислења за глобалните состојби, укажувајќи на потребата од почитување на меѓународното право и мирното решавање на споровите.

За Сиљановска Давкова, посетата е важен исчекор во проширувањето и зајакнувањето на соработката. Во заедничкото хумано наследство на Света Мајка Тереза, како и во искуството од Движењето на неврзаните, таа препознава цврсти темели на новата ера во македонско-индиските односи.

Според неа, македонската геостратешка положба, инфраструктурните коридори и лесниот пристап до европскиот пазар, може да бидат од особен интерес за индиските инвеститори.

Друпади Мурму оцени дека нејзината прва посета на државава е историски момент и изрази волја за нова динамика во сестраното партнерство меѓу двата народа.

Според обете, политичкиот дијалог и меѓуинституционалната соработка се претпоставки за продлабочувањето на севкупните односи.

The post МАКЕДОНСКАТА ГЕОСТРАТЕШКА ПОЛОЖБА МОЖЕ ДА БИДЕ ПРИВЛЕЧНА ЗА ИНДИСКИТЕ ИНВЕСТИТОРИ Сиљановска Давкова ја пречека претседателката на Индија appeared first on plusinfo.mk.

Претседателката на Индија Друпади Мурму, која вчера пристигна во земјава, денеска ќе биде пречекана од претседателката Гордана Сиљановска-Давкова со највисоки државни и воени почести.

Предвидена е тет-а-тет средба на двете претседателки и пленарен состанок на македонската и индиската делегација по што ќе се одржи заедничка прес-конференција.

Предвидено е претседателката на Индија да положи венец на гробот на Гоце Делчев во црквата „Св. Спас“ во Скопје.

Попладнето со почеток во 17 часот ќе се одржи македонско-индиски бизнис форум, организиран од страна на Кабинетот на претседателот во соработка со Директоратот за економска дипломатија при Министерството за надворешни работи и надворешна трговија. На отворањето на бизнис форумот ќе се обратат двете претседателки по што ќе бидат презентирани инвестициските можности на земјава.

На вториот ден од посетата, двете претседателки ќе ги посетат Спомен-куќата на Мајка Тереза и Музејот на град Скопје, кадешто ќе се обратат на церемонија на откривање на биста на Махатма Ганди.

По церемонијата во Музејот на град Скопје, претседателката Сиљановска-Давкова и претседателката Мурму ќе се упатат кон Охрид, кадешто ќе го посетат манастирскиот комплекс Свети Наум, како и манастири и цркви во Стариот град на Охрид.

Друпади Мурму пристигна вчера на скопскиот аеродром каде беше пречекана од министерот за надворешни работи Тимчо Муцунски. Поради посетата на претседателката Мурму, во поширокото централно подрачје на Скопје ќе се применува посебен режим на сообраќај.  СВР Скопје апелира до сите граѓани учесници во сообраќајот да ги почитуваат наредбите кои ќе ги даваат униформираните полициски службеници.

The post ПРЕТСЕДАТЕЛКАТА НА ИНДИЈА ЌЕ ПОЛОЖИ ЦВЕЌЕ ПРЕД ГРОБОТ НА ГОЦЕ ДЕЛЧЕВ Богата агенда на претседателката Друпади Мурму во Македонија appeared first on plusinfo.mk.