Фросина Манева и Стефан Цубалевски запишаа историски успех за македонското судиско бокс-семејство, откако на престижниот турнир „Дракула Опен“ што се одржа во Романија од 15 до 23 февруари оваа година, се здобија со највисокиот можен судиски ранг 3* (три ѕвезди) во рамки на Меѓународната боксерска асоцијација (ИБА).

Овој исклучителен успех доаѓа по нивното учество на судиското полагање организирано од ИБА во рамките на самиот турнир, каде Манева и Цубалевски покажаа врвна стручност, професионалност и познавање на правилата, заслужувајќи го високото признание.

Со стекнувањето на 3* рангот, Манева и Цубалевски не само што го впишаа своето име во спортската историја на земјата како први македонски судии со ваков статус, туку добија и право да судат на најголемите спортски сцени, меѓу кои и Светското првенство и Олимписките игри.

Овој успех претставува значајно достигнување и за македонскиот бокс воопшто, кој добива силна поддршка на меѓународната сцена преку признавањето на домашната стручност. Судиската елита во светот од сега ќе брои и претставници од Македонија – чекор кој ја зацврстува позицијата на нашата држава во светот на спортот.

The post МАКЕДОНИЈА НА СВЕТСКИТЕ НАТПРЕВАРИ ВО БОКС Фросина Манева и Стефан Цубалевски добија престижно признание appeared first on plusinfo.mk.