Парламентарното мнозинство на коалицијата „Твоја Македонија“ се зголемува и брои 59 пратеници откако Демократската партија на Турците потпиша договор за политичко партнерство, изјави лидерот на ВМРО-ДПМНЕ и премиер Христијан Мицкоски.

– Денес направивме уште еден значаен чекор во насока на зацврстување на парламентарното мнозинство и обезбедување политичка стабилност, како неопходен предуслов за продолжување на реформите, реализација на проектите и исполнување на обврските што ги презедовме пред граѓаните – изјави Мицкоски на свеченоста заедно со колеги од ДПТМ.

Првиот човек на ВМРО-ДПМНЕ вели дека со потпишување на Договорот за политичко партнерство, соработка и поддршка со Демократската партија на Турците на Македонија се испраќа јасна порака дека кога станува збор за интересите на граѓаните и иднината на државата, постои простор за обединување околу заеднички вредности, принципи и цели.

Тој вели дека се работи за партнерство засновано врз доверба, заемно почитување и искрена определба да се работи во интерес на сите граѓани.

– Посебно ми е драго што денес нашето политичко семејство станува побогато со Демократската партија на Турците на Македонија. Турската заедница е нераскинлив дел од нашето општество, народ кој со својата работа, традиција и лојалност со децении придонесува за развојот на државата. Нашата соработка е доказ дека вистинските политики ги поврзуваат луѓето, а не ги разделуваат, и дека кога постои искрена намера да се работи за граѓаните, различностите стануваат наша предност.

Мицкоски вели дека не е среќен што, во меѓувреме, опозицијата се наоѓа во лоша состојба бидеќи, како што вели, на државата и во интерес на демократија и на граѓаните е потребна, како што вели, силна, сериозна и конструктивна опозиција.

– Од друга страна, парламентарното мнозинство продолжува да се консолидира. Практично Демократската партија на Турците на Македонија од денеска е составен дел на коалицијата, како дел од внатрешната коалиција која што ја предводи ВМРО-ДПМНЕ во рамките на македонското собрание и со тоа веќе парламентарното мнозинство добива уште еден пратеник дополнително, а пратеничката група на коалицијата која што ја предводи ВМРО-ДПМНЕ во македонскиот парламент ќе брои 59 пратеници.

Мицкоски истакнува дека за ВМРО-ДПМНЕ и за владејачката коалиција тоа не е причина за самозадоволство, ниту политичка привилегија.

– Напротив, тоа е уште поголема обврска и уште поголема должност кон граѓаните. Колку е поголема довербата што ја добиваме, толку е поголема и нашата одговорност да испорачаме резултати.

Според него, новото партенрство во коалицијата е уште еден доказ дека ВМРО-ДПМНЕ е силна, стабилна и моќна политичка структура, која ја препознаваат сè повеќе граѓани и политички субјекти.

– Но, мојата амбиција никогаш не била ВМРО-ДПМНЕ само да победува на избори. Победите се важни, но тие не се крајната цел. Мојата цел е ВМРО-ДПМНЕ да биде политичка сила која обединува, која ги поврзува луѓето околу заеднички вредности, околу развојот на државата и економскиот напредок, владеењето на правото, подобриот живот за секој граѓанин, без разлика на неговата етничка, верска и политичка припадност.

Мицкоски вели дека верува дека токму така се гради силна држава.

– Токму кога политиката не создава нови поделби, туку нови партнерства; кога не се бројат разликите, туку заедничките цели; и кога сите што искрено сакаат да допринесат за напредокот имаат место во заедничкиот пат кон подобра иднина.

Првиот човек на коалицијата и на владата вели дека коаицијата продолжува со работа посветено, одговорно и со уште поголема енергија.

– Граѓаните очекуваат резултати, а наша должност е секој ден да ја оправдуваме нивната доверба со работа, реформи и исполнети ветувања – заклучува Мицкоски.

The post КОАЛИЦИЈАТА НА ВМРО-ДПМНЕ ПОРАСНА НА 59 ПРАТЕНИЦИ Демократската партија на Турците потпиша партнерство со „Твоја Македонија“ appeared first on plusinfo.mk.

Демократската партија на Турците во Македонија (ДПТМ) соопшти дека денескка официјално ја поднела кандидатурата за нејзиниот кандидат Аријан Ибраим за градоначалник на Општина Центар Жупа на повторените локални избори што ќе се одржат на 11 јануари 2026 година.

„Центар Жупа е општина во која со години заеднички вложуваме труд, доверба и посветеност. Нашиот кандидат Аријан Ибраим, преку својата работа и пристап, ја стекна и ја зацврсти поддршката на граѓаните. Уверени сме дека и на овие избори ќе продолжиме по истиот пат, со истата одлучност и посветеност.

Веруваме дека на 11 јануари, со уште поголема излезност и уште посилна поддршка од нашите сограѓани, Центар Жупа повторно ќе победи. Нека овие избори бидат успешни и благотворни за нашиот народ, за државата и за целото наше членство. На нашиот кандидат и на општинската организација им посакуваме искрен успех“ – се вели во соопштението на ДПТМ.

The post АРИЈАН ИБРАИМ ВО ТРКАТА ЗА ГРАДОНАЧАЛНИК НА ЦЕНТАР ЖУПА Го кандидираше Демократската партија на Турците appeared first on plusinfo.mk.