Документи од американското Министерство за правда повторно го отворија случајот „Епстин“. Меѓу материјалите се појави и фотографија од покојниот физичар Стивен Хокинг.

На сликата физичарот лежи на плажа со 2 жени во бикини. Не е познат точниот датум. Се знае дека во 2006 година присуствувал на научна конференција организирана од сексуалниот престапник Џефри Епстин на Девствените Острови.

„Научниот филантроп Епстин“

Се смета дека фотката е снимена 5 месеци пред Епстин да биде обвинет за подведување малолетници. Хокинг бил дел од група од 21 научник што го посетиле Свети Тома и приватниот остров Литл Сент Џејмс.

На блог на фондацијата поврзана со Епстин било наведено дека гостите се собрале за „разговори, одмор на плажа и патување до блискиот приватен островски одмор на научниот филантроп Џефри Епстин, кој го финансираше настанот“. Конференцијата се одржала во хотелот „Риц-Карлтон“.

Ноќевањето, според медиумски извештаи, чинело околу 1.600 долари.

250 спомнувања, малку докази

Хокинг се појавува најмалку 250 пати во над 3,5 милиони документи. Самото споменување не значи кривично дело.

Во објавени електронски пораки од Епстин се појавуваат неосновани тврдења поврзани со Вирџинија Џуфре.

„Можете да понудите награда на секој пријател, познаник или член на семејството од Вирџинија кој ќе се појави и ќе помогне да се докаже дека нејзините обвинувања се лажни. Најсилна (лага) е вечерата со Клинтон и новата верзија на Девствените Острови дека Стивен Хокинг учествувал во оргии со малолетници “, напишал Епстин.

Обвинувањата не се поткрепени со докази.

Џуфре почина во април 2025 година. Таа го обвини принцот британаскиот принц Ендру за сексуален напад. Случајот беше решен надвор од суд. Принцот се согласи на исплата од 12 милиони фунти, без признание на вина.

Ендру неодамна беше уапсен, па пуштен од британската полиција и е под истрага за злоупотреба на службената должност.

9,1 милиони за Харвард од Епстин

Досиејата сугерираат дека сексуалнит претстапник Епстин се претставувал како филантроп. Остварил контакти со научници и универзитети. Универзитетот Харвард соопштил дека примил 9,1 милиони долари донации од него меѓу 1998 и 2008 година.

Федералното истражно биро примило и непотврдена дојава дека Епстин и Хокинг посетиле „геј клуб само за мажи“ во 2011 година. Нема јавно објавени докази што ја потврдуваат таа информација.

Хокинг почина во 2018 година на 76 години. Боледуваше од амиотрофична латерална склероза повеќе од 50 години.

The post ХОКИНГ МЕЃУ ДЕВОЈКИ ВО БИКИНИ НА ОСТРОВОТ НА ЕПСТИН Снимка од 2006 повторно ја разгоре контроверзата околу физичарот appeared first on plusinfo.mk.

Таканаречените „досиеја на Епстин“, кои неодамна ги објави американското Министерство за правда, содржат вознемирувачки и веродостојни докази за систематско и обемно сексуално злоставување, трговија со луѓе и експлоатација на жени и девојчиња, кои можат да бидат карактеризирани како злосторства против човештвото, соопштија денеска експерти на ОН.

Како што наведуваат, овие дела би можеле да се сметаат за сексуално ропство, репродуктивно насилство, присилно исчезнување, мачење, нехумано и понижувачко постапување и фемицид.

„Овие злосторства се извршени во контекст на супрематистички верувања, расизам, корупција, екстремна мизогинија и комодификација и дехуманизација на жени и девојчиња од различни делови на светот“ – наведоа експертите на ОН во соопштение објавено на сајтот на Канцеларијата на ОН за човекови права.

Се напоменува дека овие откритија укажале на постоење на глобален криминален потфат и „застрашувачки импликации на нивото на неказнивост за таквите злосторства“.

„Обемот, природата, систематскиот карактер и транснационалниот дострел на овие злосторства врз жените и девојчињата се толку сериозни што одреден број од нив би можеле разумно да го исполнат законскиот праг за злосторства против човештвото“, се истакнува во соопштението.

Експертите предупредија дека пријавените обрасци можат да го исполнат овој праг и дека овие злосторства мора да се процесуираат пред сите надлежни национални и меѓународни судови.

„Сите обвинувања содржани во ’досиејата на Епстин‘ се од нечуена природа и бараат независна, темелна и непристрасна истрага, како и истраги за да се утврди како таквите злосторства можеле да се случуваат толку долго“, наведоа експертите на ОН.

И покрај обемот на документите, тие предупредија на сериозни пропусти во почитувањето на прописите и лошо редигирани податоци кои откриле чувствителни информации за жртвите, при што штетата често се случувала пред записите да бидат повлечени.

„Одговорноста беше ограничена, а само еден близок соработник е под истрага“, се вели во соопштението и се додава дека според меѓународното право, државите се обврзани да го спречат, истражат и казнат насилството врз жените и девојчињата, вклучително и делата што ги вршат приватни лица.

Експертите ја пофалија храброста и отпорноста на жртвите во барањето одговорност со значителни лични трошоци. Група на овие жртви неодамна се сретна со специјалниот известувач на ОН за насилство врз жени и девојчиња.

„Неуспехот да се заштити нивната приватност ги доведува во опасност од одмазда и стигма. Неволноста целосно да се откријат информациите или да се прошират истрагите, остави многу преживеани со чувство на повторна траума и изложеност на она што го опишуваат како ’институционален геслајтинг‘“, предупредија експертите и ги повикаа американските власти итно да ги отстранат овие пропусти и да обезбедат целосно откривање и надомест на штетата за жртвите, како и да стават крај на неказнивоста за сторителите.

Исто така напоменуваат дека мора да биде укината застареноста која спречува кривично гонење на тешки злосторства кои му се припишуваат на криминалниот потфат на Епстин.

„Секој предлог дека е време да се откаже од ’досиејата на Епстин‘ е неприфатлив. Тоа претставува неуспех на одговорноста кон жртвите. Само оставките на инволвираните поединци не се соодветна замена за кривична одговорност“, рекоа експертите на ОН.

Тие ги поздравија чекорите на одредени влади да ги истражат сегашните и поранешните официјални лица и поединци именувани во досиејата и ги повикаа и другите држави да го сторат истото.

„Неуспехот на владите ефикасно да ги истражат и гонат оние кои се одговорни за овие злосторства, вклучително и соучесништво или премолчено согласување, таму каде што постои надлежност, ризикува поткопување на правните рамки насочени кон спречување и реагирање на насилството врз жените и девојчињата“, се истакнува во соопштението. Се додава дека е неопходно владите одлучно да дејствуваат за да ги повикаат сторителите на одговорност.

„Никој не е премногу богат или премногу моќен за да биде над законот“, се заклучува во соопштението.

Процесот на објавување на „досиејата на Епстин“ се одвива во согласност со американскиот Закон за транспарентност на овие документи, кој стапи во сила на 19 ноември 2025 година. Министерството за правда на САД на 30 јануари, по одложувањето, објави големо количество материјал, вклучувајќи повеќе од 3 милиони страници, 2.000 видео снимки и 180.000 фотографии.

The post ДОСИЕЈАТА НА ЕПСТИН УКАЖУВААТ НА ЗЛОСТОРСТВО ПРОТИВ ЧОВЕШТВОТО Обединетите нации побараа правна акција против сторителите appeared first on plusinfo.mk.

Лавиринт од мејлови, пријателства и покани повторно ја отвори сенката на аферата со Џефри Епстин. Овојпат во фокусот се најде Кимбал Маск, брат на познатиот милијардер Илон Маск и долгогодишен директор во Тесла.

Министерството за правда на САД објави нов сет документи на 30 јануари. Меѓу нив се и електронски пораки од периодот 2012–2015 година. Во дел од нив се спомнува Маск. Некои пораки упатуваат на контакт со жени поврзани со Епстин.
Во мејл од октомври 2012 година, Кимбал Маск им напишал на Епстин и на неговиот соработник Борис Николиќ:

„Одлично што се дружевме денес. Ви благодарам што ме поврзавте со Џенифер. Верувам дека двајцата одигравте улога“, напишал Маск.

Николиќ возвратил со предупредување:

„Подобро да бидеш љубезен. Џефри полудува кога некој се однесува лошо кон неговите девојки“, се вели во пораката.

Размената покажува опуштен тон. Се споменуваат забави. Се споменува и можноста за посета на островот на Епстин. Кон крајот на јануари 2013 година, Епстин го поканил Маск „на островот неколку дена“. Не е јасно дали Маск ја прифатил поканата.

Епстин во 2008 година се изјаснил за виновен во Флорида за две обвиненија поврзани со сексуални престапи. Во 2019 година почина во затвор во Њујорк. Властите соопштија дека станува збор за самоубиство.

Во 2026 година повторно се објавуваат милиони страници од неговите преписки. Дел од извештаите ги пренесе и „Блумберг“.

„Мојата единствена средба со демонот“

Кимбал Маск се огласи преку соопштение на Икс. Тој навел дека во 2012 година започнал врска со 30-годишна жена. Тврди дека ја запознал преку пријател. Нагласил дека „Епстин не нè запознал“.

„Мојата единствена средба со тој демон беше во неговата канцеларија во Њујорк во текот на денот. Никогаш не отидов на неговиот остров“, напишал Маск.

Според него, честото споменување на неговото име во документите било резултат на билтен што го испраќал до илјадници луѓе.

Семејни врски и деловни империи

Кимбал Маск ја градел својата кариера и надвор од технолошкиот свет. Во 2004 година ја коосновал „Kitchen Restaurant Group“. Бил член на одборот на „Chipotle Mexican Grill“. Ја основал и непрофитната организација „Big Green“.

Браќата Маск се меѓу најдолгогодишните членови на одборот на Тесла. Кимбал поседува околу 1,4 милиони акции. Според податоци на „Блумберг“, уделот вреди повеќе од 500 милиони долари. Од 2010 година продал акции во вредност од 346 милиони долари.

Бил член и на одборот на Спејс Икс до 2022 година.

„Сега си назад со полно работно време“

Во април 2013 година, односот меѓу Маск и жената по име Џенифер се влошил. Во порака тој ѝ напишал дека „не е во можност да воспостави вистинска врска“. Таа ја препратила пораката до Епстин. Тој одговорил:

„Добри вести, сега повторно те имам назад, со полно работно време“, напишал Епстин.

Во јуни 2015 година, Епстин во порака до трето лице напишал дека „му дал уште една девојка на Кимбал“.

Нема докази во објавените документи дека Маск бил обвинет за кривично дело. Нема ниту официјална истрага против него. Документите, сепак, ја отворија дебатата за кругот на луѓе со кои Епстин одржувал контакт и по неговото прво осудување.

The post ЕПСТИН МУ „МЕСТЕЛ“ ДЕВОЈКИ НА БРАТОТ НА МАСК? „Се сретнав со демонот, но не отидов на островот“ appeared first on plusinfo.mk.

Контроверзата околу смртта на сексуалниот престапник Џефри Епстин повторно се разгоре, овој пат преку гласот на Лејди Викторија Херви, поранешна партнерка на Принцот Ендрју. Таа јавно изјави дека не верува оти Епстин починал во затвор, туку тврди дека бил извлечен и префрлен во Израел, пренесува британски Експрес.

Во разговор на радио, Херви кажа дека не ја прифаќа официјалната верзија за настаните во 2019 година и дека приказната за самоубиство е „неубедлива“. Нејзините зборови веднаш се проширија на социјалните мрежи и повторно ги активираа старите сомнежи.

– Да бидам искрена, дури и не мислам дека Џефри Епстин е мртов – рече Херви во етер, додавајќи дека според неа постоел разработен план за бегство.

Според нејзините тврдења, Епстин не се обесил, туку бил заменет со друго тело и извлечен од објектот со возило. Таа инсистира дека токму Израел е местото каде што се криел.

Смртта на Џефри Епстин во Метрополитен поправен центар во Њујорк беше прогласена за самоубиство додека чекал судење за трговија со луѓе. Настанот веднаш предизвика бран сомнежи, особено поради пропустите во обезбедувањето и контрадикторните информации од затворските служби.

Тогашниот државен обвинител Вилијам Бар ја опиша ситуацијата како „совршена бура од грешки“, по што неколку високи затворски функционери беа разрешени. И покрај тоа, официјалната верзија остана непроменета.

Теориите на заговор дополнително се хранат со анонимен пост на 4Чен, објавен пред официјалната потврда за смртта, во кој наводен чувар тврдеше дека телата биле заменети. Херви сега се повикува и на електронска пошта што се појавила меѓу т.н. досиеја на Епстин, тврдејќи дека укажува на сведок од внатрешноста на затворот.

– Видов една од тие пораки и мислам дека чуварот мора да биде испрашан – рече таа, повторувајќи дека нејзиното убедување е дека Епстин е жив.

Лејди Херви се појавува повеќепати во објавените досиеја поврзани со Епстин и тоа јавно го признава. Таа изјави дека присуството во тие документи го гледа како доказ за кругот на моќни луѓе со кои се движел финансиерот.

Иако нејзините тврдења не се воопшто поткрепени со официјални докази, тие повторно ја отворија дебатата што шест години не стивнува и покажаа дека случајот Епстин и натаму живее меѓу сомнежите, недовербата и теориите што упорно одбиваат да згаснат.

The post ЕПСТИН Е ЖИВ И СЕ НАОЃА ВО ИЗРАЕЛ?! Бившата на принцот Ендрју упорно шири неверојатна приказна appeared first on plusinfo.mk.