Со донаторската вечер „Конци на светлината“ (Threads of Light), која се одржа синоќа, официјално беше одбележан почетокот на работата на Фондацијата „Фросина Кулакова“ – иницијатива посветена на градење култура на грижа, правда и свесност, и на системска поддршка за семејствата погодени од сообраќајни трагедии.

Настанот ги обедини уметноста, културата и јавната одговорност во една силна и достоинствена вечер, во која беа изложени и ставени на хуманитарна аукција дела од македонски уметници и креативци од различни области. Преку аукцијата беа собрани вкупно 512.500 денари, средства кои ќе бидат наменети за програмите на Фондацијата, вклучително и за психосоцијална и правна поддршка за семејствата погодени од сообраќајни трагедии, како и за фондот за стипендирање на млади талентирани уметници кои поради социјални или финансиски причини не можат да ја остварат својата креативност и да ја изградат својата иднина.

На донаторската вечер присуствуваа бројни високи државни претставници, меѓу кои и претседателката на Република Македонија, Гордана Сиљановска-Давкова, претседателот на Собранието, Африм Гаши, министерот за внатрешни работи Панче Тошковски, министерот за култура Зоран Љутков, министерот за правда Игор Филков, министерката за образование Весна Јаневска, претседателот на Републичкиот совет за безбедност на сообраќајот на патиштата Горан Ангеловски, како и бројни гости од културната сцена, институциите, дипломатскиот кор, граѓанскиот сектор и јавниот живот.

На присутните им се обрати директорката на Фондацијата, Росица Кулакова, сестра на трагично починатата Фросина, која зборуваше за патот од личната загуба до одлуката таа болка да се претвори во јавна мисија.

– Фондацијата „Фросина Кулакова“ се роди по загубата што го прекина текот на еден млад живот, но и од одлуката таа загуба да не остане затворена меѓу ѕидовите на нашиот дом, туку да стане одговорност, свест и заложба за подобар свет. Денес името на Фросина не го изговараме само како спомен, туку како повик за правда, за безбедност, за човечност, емпатија и солидарност. Оваа вечер е само почеток на процес, во кој од заедничката болка се ткае љубов, надеж и смисла – истакна Кулакова во своето обраќање.

Таа сподели дека во текот на вечерта министерот Тошковски изразил особен интерес за идната соработка помеѓу Фондацијата и Министерството за внатрешни работи, упатувајќи официјална покана за потпишување меморандум за соработка. Таа истакна дека поддршка и подготвеност за партнерство била изразена и од страна на Републичкиот совет за безбедност на сообраќајот на патиштата, предводен од претседателот Горан Ангеловски, со што Фондацијата добива институционален партнер во својата мисија за системски пристап кон превенцијата и безбедноста во сообраќајот.

Посебен и длабоко емотивен момент на вечерта беше претставувањето на официјалната химна „Фросина“, отпеана од познатиот автор Александар Митевски заедно со Хорот Фрида под водство на Сузана Турунџиева, со текст на Огнен Неделковски. Химната на фондацијата беше најавена од мајката на Фросина, Камелија, а присутните ја проследија со силни емоции и долги аплаузи, како достоинствена почит, но и како силна јавна порака за смисла, одговорност и промена .

Фондацијата „Фросина Кулакова“ е основана од семејството на трагично починатата Фросина со цел да создаде долгорочна и одржлива платформа за подигнување на јавната свест за безбедноста во сообраќајот, за развој на кампањи за општествена одговорност и за обезбедување психосоцијална и правна поддршка за семејствата кои се соочуваат со последиците од сообраќајни несреќи.

Донаторската вечер „Конци на светлината“ го означи почетокот на една иницијатива која има за цел тишината по трагедиите да ја претвори во глас за промена и во трајна заложба за колективна одговорност.

The post СОБРАНИ 512.000 ДЕНАРИ НА ДОНАТОРСКАТА ВЕЧЕР „КОНЦИ НА СВЕТЛИНАТА“ Почна со работа Фондацијата „Фросина Кулакова“ appeared first on plusinfo.mk.

Гаши порача дека е крајно време да определиме приоритети во државата и да не се делиме по идентитети „зашто се уморивме од тоа“. Како што рече, секој се гледа во потенцијален иден ризик и ова треба да биде последен аларм што треба да нѐ отрезни.

– Пред сè сме луѓе и заеднички треба да ги градиме институциите. Лично донирав, но мислам дека треба да ги поттикнеме сите граѓани колку што можат да донираат и како општество да реагираме на тој начин и нашите институции да се стават во функција на ситуацијата. Да го дадеме целиот капацитет, а тој не е мал, зашто имаме одлични професионалци, меѓу кои се и докторите. Ако така реагираме, убеден сум дека одговорот ќе биде добар и ќе има утеха за оние кои ги изгубиле најблиските иако тагата не може да ја надоместиме – рече претседателот на Собранието .

Во врска со реакции во јавноста зошто Собранието, покрај минатата, не работи и оваа седмица, Гаши одговори дека Собранието работело и претходната и оваа недела, но немало пленарни и комисиски седници во знак на почит. Тоа, рече, било договорено на координација т.е. на состанок на координаторите на пратеничките групи.

– Нема седници во знак на почит, за да нема дефокус и да отвораме други теми на политикантство и дневна политика од кои граѓаните ќе се згрозат. Сакавме да покажеме солидарност и емпатија – рече претседателот на Парламентот.

Собранието не донирало како институција за помош по несреќата во Кочани туку одлучиле, рече, „секој пратеник да донира по своја волја и совест“.

– Но уверен сум дека веќе донирале и ги повикувам оние што не донирале, тоа да го сторат – рече Гаши кој учествуваше на Донаторската вечер на ТВ Канал 5.

The post ОВА НЕКА НИ БИДЕ ПОСЛЕДЕН АЛАРМ Гаши вели дека трагедијата во Кочани треба да ги отрезни институциите appeared first on plusinfo.mk.