Ерик Трамп, син на американскиот претседател Доналд Трамп, доби договор со министерството за одбрана вреден 24 милиони долари, со неговата технолошка компанија „Фаундејшн индустрис“, која развива футуристички алатки за војување.

Во гостување на телевизијата „Фокс бизнис“ 42-годишниот Трамп отворено се пофали со склучениот договор со администрацијата на неговиот татко, и покрај очигледниот судир на интереси. Ерик Трамп е вклучен во целата приказна како главен стратешки советник и еден од клучните финансиери, а се појави во студиото заедно со извршниот директор на компанијата, Санкает Патак.

Меѓу нејзините проекти е и производството на хуманоиден робот за кој компанијата тврди дека еден ден би можел да ги замени војниците на фронтот. Ерик не го криеше својот ентузијазам за технологијата што ја нуди на државата. Тој ги опиша роботите повеќе како играчки, а помалку како машини за убивање.

– Мора да ја добиеме оваа трка. Ние сме најсилната економија во светот. Кога ќе достигнат овие машини едно ниво, ќе може да комуницирате со нив, ќе ве поздравуваат со поздрав со дланка „да пукне“, и ќе ги слушаат вашите команди. Ако воведете автономија на вештачката интелигенција, тоа ќе ја промени индустријата, воените апликации, па дури и угостителската индустрија. Можностите се неограничени и мислам дека тоа е многу убава работа – рече Трамп помладиот во емисијата.

Сепак, синот на Трамп не навлезе во детали за тоа како точно неговата компанија го обезбедила мултимилионскиот владин договор. Во јавноста договорот предизвика обвинувања за непотизам и корупција, но никој во Републиканската партија, или од администрацијата на Трамп, засега не се спротивстави на овој договор.

Ккритичарите исто така го истакнуваат недостигот од претходно искуство на Ерик Трамп во индустријата за роботика, доведувајќи ја во прашање правичноста на добивањето на толку профитабилен воен договор. Тие тврдат дека ваквиот аранжман ја поткопува јавната доверба во процесите на владините набавки

Ова не е прв пат семејството Трамп да ја користи својата политичка моќ за да извлече пари од државата. Самиот Трамп за време на изборната година, склучи повеќе сомнителни договори, меѓу кои беа брендирани патики и други производи со неговото име, па дури и ограничено издание на Библијата со негов потпис, која се продаваше за 60 долари.

Трамп ја лансираше и сопствената социјална мрежа Трут соушл (Truth Social), а го стави своето име на нова платформа за криптовалути што ја водат неговите синови Ерик и Дон Џуниор.

Луѓето околу Трамп рекламираат можност инвеститорите лично да се сретнат со претседателот во Мар-а-Лаго, за одредена цена која се мери со милиони долари инвестирани во неговата криптовалута.

The post СИНОТ НА ТРАМП ЌЕ ПРОИЗВЕДУВА РОБОТИ ЗА ВОЈСКАТА Склучи договор со администрациjaта на Трамп appeared first on plusinfo.mk.

Портпаролот на Кремљ Дмитри Песков изјави дека рускиот претседател Владимир Путин може да се сретне со украинскиот претседател Володимир Зеленски само за финализирање на договорите за решавање на конфликтот.

Путин е подготвен за средба со Зеленски, но разговорите треба да бидат продуктивни и да се одржат во фаза на „финализирање на договореното“, појасни Песков.

– Клучно е која е целта на средбата. За што е средбата? Путин кажа дека е подготвен да се сретнат (со Зеленски) во Москва во секое време. Главното е да има причина за средбата и, најважно, таа да биде продуктивна и да служи само за финализирање на договорите“, изјави Песков.

The post ПУТИН БИ СЕ СРЕТНАЛ СО ЗЕЛЕНСКИ САМО ЗА КОНЕЧЕН ДОГОВОР Москва одговори на сигналите од Киев appeared first on plusinfo.mk.

Италија нема да го обнови својот одбранбен договор со Израел, изјави денеска во Верона италијанската премиерка Џорџа Мелони.

– Во светлината на моменталната ситуација, владата одлучи да го суспендира автоматското обновување на одбранбениот договор со Израел – изјави Џорџа Мелони.

Меморандумот, кој воспоставува рамка за одбранбена соработка во врска со размена на воена опрема и технолошки истражувања во рамките на вооружените сили, претходно предвидуваше обновување на секои пет години и стапи на сила на 13 април 2016 година, објави италијанската новинска агенција АНСА.

Писмото во врска со одлуката за суспендирање на меморандумот, испратено до израелската влада, е резултат на заедничка одлука на премиерот, вицепремиерите Антонио Тајани и Матео Салвини и министерот за одбрана Гвидо Кроче, и е адресирано до израелскиот министер за одбрана Израел Кац.

– Немаме безбедносен договор со Италија. Имаме меморандум за разбирање од пред многу години кој никогаш немал конкретна содржина – изјави портпаролот на израелското Министерство за надворешни работи, додавајќи дека ова суспендирање „нема да ѝ наштети на безбедноста на Израел“.

The post ИТАЛИЈА ГО СУСПЕНДИРА ДОГОВОРОТ ЗА ВОЕНА СОРАБОТКА СО ИЗРАЕЛ Мелони се повика на „моменталната ситуација“ appeared first on plusinfo.mk.

Претседателот Доналд Трамп преку социјалните мрежи соопшти дека Соединетите Американски Држави ќе започнат блиска соработка со Иран, за кој оцени дека поминал низ „многу продуктивна промена на режимот“.

Според неговите наводи, во земјата повеќе нема да има збогатување ураниум. Трамп истакна дека САД, во соработка со иранските власти, ќе го отстранат сиот длабоко закопан нуклеарен „прав“. Тој додаде дека локациите биле под прецизен сателитски надзор на Вселенските сили и дека ништо не е допрено од датумот на нападот. Во објавата се наведува дека во тек се преговори за олеснување на тарифите и санкциите кон Иран. Претседателот Трамп информираше дека веќе е постигната согласност за голем дел од предвидените точки од договорот.

Во меѓувреме, иранската новинска агенција Тасним објави дека став на Техеран е дека конечниот договор меѓу Иран и САД мора да биде потврден со обврзувачка резолуција на Советот за безбедност на Обединетите нации.

Според агенцијата, планот од 10 точки предложен од Иран, кој ќе биде основа за идните преговори со САД, предвидува дека сите можни договори мора да бидат одобрени со обврзувачка резолуција на Советот за безбедност на ОН.

Усвојувањето на таква резолуција би го претворило договорот во обврзувачко меѓународно право и, како што се вели, би претставувало значајна дипломатска победа за иранскиот народ.

Овој предлог договор усвоен на два часа пред крајот на ултиматумот на Трамп донесе двонеделно примије по што очекувањата се дека конечно ќе заврши војната на Блискиот исток.

Најавите за прекин на војната резултираше со нагло намалување на цените на суровата нафта на светските берзи.

The post ТРАМП СОГЛАСЕН ЗА „ПОГОЛЕМ ДЕЛ“ ОД ТОЧКИТЕ Иран бара крајниот договор да стане обврзувачка резолуција на ООН appeared first on plusinfo.mk.

Цената на нафтата утрово падна под 100 долари за барел откако американскиот претседател Доналд Трамп изјави дека се согласил на двонеделно примирје со Иран, кое предвидува итно и безбедно повторно отворање на Ормускиот Теснец.

Фјучерсите на Брент паднаа за 14,51 долари, или 13,3%, на 94,76 долари за барел, додека WTI падна за 17,16 долари, или 15,2%, на 95,79 долари за барел.

Пресвртот на Трамп дојде кратко пред неговиот рок за Иран да го отвори Ормускиот Теснец, каде што транзитира 20% од светската нафта, или да се соочи со широки напади врз неговата цивилна инфраструктура.

„Ова ќе биде двостран прекин на оган!“, напиша тој на социјалните мрежи, откако претходно во вторникот објави дека „цела цивилизација ќе умре вечерва“ ако неговите барања не бидат исполнети.

Иран изјави дека ќе ги запре нападите ако престанат нападите против него и дека безбедниот транзит низ Ормускиот Теснец ќе биде можен две недели во координација со иранските вооружени сили, според изјавата на министерот за надворешни работи Абас Аракчи.

Сепак, повеќе земји од Персискиот Залив идентификуваа лансирања на ракети и напади со беспилотни летала или издадоа предупредувања до цивилите да се засолнат.

„Дури и со мировен договор, Иран може да се охрабри почесто да се заканува на Ормускиот Теснец во иднина, а пазарот ќе го процени зголемениот ризик за Ормускиот теснец во иднина“, рече аналитичарот на MST Marquee, Саул Кавоник.

Војната меѓу САД и Израел со Иран го забележа најстрмниот месечен пораст на цената на нафтата во историјата во март од повеќе од 50%.

– Примирјето е добар почеток и може да го отвори патот за потрајно повторно отворање на теснецот, но има уште многу „ако“ што треба да се решат – рече аналитичарот на IG, Тони Сикамор.

WTI ја задржа својата ценовна премија во однос на Брент, во пресврт на типичните ценовни шеми поради тоа што неговиот договор за испорака е за мај, додека Брент е за јуни, што одразува дека барелите со претходен датум на испорака имаат повисока цена.

The post ЦЕНАТА НА НАФТАТА ПАДНА ПОД 100 ДОЛАРИ ЗА БАРЕЛ Договорот за примирје веднаш се почувствува на берзите appeared first on plusinfo.mk.

Во време кога енергетскиот пазар се соочува со ценовни флуктуации и неизвесност, компаниите сè повеќе ја препознаваат важноста на стабилен и сигурен снабдувач. Со цел да одговори на овие предизвици, ЕДС ја лансираше својата нова кампања која нуди договор на 24 месеци со фиксна цена на електрична енергија, обезбедувајќи им на компаниите долгорочна предвидливост и контрола врз трошоците.

Како дополнителен бенефит, клиентите добиваат инвертер клима уред во вредност од 25.000 денари, што претставува практична инвестиција во енергетска ефикасност.

– Во вакви услови, компаниите не бараат само пониска цена – тие бараат сигурност. Нашата понуда е насочена токму кон тоа – да им овозможиме стабилност и доверлив партнер во време кога тоа е најпотребно – изјави Александар Сарџовски, главен извршен директор на ЕДС.

Тој додава дека изборот на снабдувач денес претставува стратешка одлука, која директно влијае врз финансиската стабилност на компаниите.

Повеќе информации за новиот договор на 24 месеци со фиксна цена на струјата може да најдете на следниот ЛИНК.

The post СТАБИЛНОСТ ВО ВРЕМЕ НА НЕСТАБИЛНОСТ – ЗАМРЗНЕТЕ ЈА ЦЕНАТА НА ВАШАТА СТРУЈА Понуда од ЕДС за две години фиксна цена на струјата, плус подарок инвертер-клима appeared first on plusinfo.mk.

Американскиот претседател Доналд Трамп синоќа, според неговите објави, го одложи ултиматумот упатен до Иран за дополнителни 24 часа, поставувајќи нов краен рок во вторник во 20 часот по источно американско време, што одговара на 2:00 часот наутро во среда по средноевропско време.

„Вторник, 20 часот по источно време“, напиша Трамп на својата платформа „Truth Social“.

Претходно истиот ден, Трамп изрази уверување дека САД имаат добри шанси да постигнат договор со Иран пред истекот на рокот. Во интервју за „Fox News“, тој предупреди дека во спротивно може да следуваат напади врз инфраструктурата.

„Без договор, ќе видите како мостови и електрани се уриваат низ целата земја“, изјави Трамп, повторувајќи ја својата закана.

Според претходните најави, на 26 март тој веќе го одложи рокот за десет дена, до 6 април во 20 часот. Во истото интервју, Трамп додаде дека им гарантира „имунитет“ на иранските преговарачи за тие да не бидат цел на евентуални американско-израелски напади.

The post ЧЕКАМЕ ДО ВТОРНИК 20 ЧАСОТ (2 ЧАСОТ В СРЕДА СРЕДНОЕВРОПСКО) Трамп го помести ултиматумот до Иран appeared first on plusinfo.mk.

Министерството за здравство и Град Скопје го потпишаа Договорот за изградба на паркинзи во рамки на Клиничкиот центар „Мајка Тереза“. Договорот е на 15 години, со 10 отсто закупнина од вкупно остварениот промет. Во првата фаза е предвидена изградба на два современи монтажни паркинга, со најмалку 500 паркинг места, кои се очекува да бидат ставени во функција до втората половина на наредната година. Паркинзите ќе бидат наменети за пациентите и за вработените во Клиничкиот центар. Планирано е едниот паркинг да биде кај Клиниката за гинекологија, а другиот кај црквата во Клинички.

Како што најавија министерот за здравство Азир Алиу и градоначалникот Орце Ѓорѓиевски пред потпишувањето на Договорот, ако има потреба, ќе биде изграден и трет монтажен паркинг, а доколку се утврди дека капацитетите овозможуваат да се паркираат и приватни резиденти, ќе се овозможи и таква опција.

– Околу три милиони евра ќе предвиди Градот Скопје во првата фаза за изградба на монтажни паркинзи, но приоритет ќе имаат двата монтажни паркинга во комплексот клиники „Мајка Тереза“. Цените за паркирањето на Клинички ќе останат исти во наредниот период, а откако ќе се изградат монтажните паркинзи ќе биде утврден за дополнителните позиции нов правилник, но тоа нема да значи покачување на цените, туку утврдување на односите поврзани со наплатата – рече Ѓорѓиевски.

Тој соопшти дека онколошките пациенти и граѓани со одредени дијагнози бесплатно ќе ги користат паркинг услугите.

Паркинзите ќе имаат нов систем за евиденција и наплата преку кои ќе се врши детекција на слободни места и ќе се овозможи полесен и побрз пристап, а пациентите ќе ги користат по истите цени и по повластени услови.

Ова, според Алиу и Ѓорѓиевски, е капитален проект не само за Скопје, туку за цела Македонија и со него ќе се реши досегашниот децениски хаос со паркирањето во Клиничкиот центар.

– Договорот за давање под закуп на недвижни ствари со непосредна спогодба со Град Скопје предвидува организирање, управување, уредување и одржување на паркиралиштата во комплексот на Клиничкиот центар „Мајка Тереза“. Град Скопје има обврска во следните 60 дена да достави акциски план за спроведување на активностите со конкретни рокови за имплементација. Договорот е на 15 години, со закупнина во висина од 10 отсто од вкупно остварениот промет, а Град Скопје ќе почне со проектирање и изградба на катни гаражи и инфраструктурно уредување. Проектот значи модернизација и значително зголемување на капацитетите за паркирање за околу 50 отсто. Закупецот е должен пред Советот на Град Скопје да предложи ценовник за паркирање со билети за корисници за комерицијална употреба на здравствени услуги, за пациенти со малигни заболувања и за вработените во Клинички. Проектот ќе предвидува комплетен мониторинг на паркирањето и дигитален водич за граѓаните, хортикултурно уредување на просторот, паметен паркинг-систем со сензори за детекција на слободни паркинг-места, мобилна апликација, поврзување со фискален систем… – истакна министерот Алиу.

Според градоначалникот Ѓорѓиевски, наместо приватен инвеститор, паркинзите ќе ги гради Град Скопје што ќе оневозможи поскапување на билетите и остварување бизнис профит.

– Во минатото беа планирани други цели за паркингот на Клинички, особено јавно-приватно партнерство со што интересот на граѓаните ќе беше во втор план зашто кога ќе се случи ЈПП и кога ќе влезе приватен инвеститор и цените ќе се зголемат. Дојдовме до соломонско решение. Наместо приватен, инвеститор ќе биде Град Скопје. Наредната недела, в четврток, ќе правиме ребаланс на Буџетот, а една од точките ќе бидат монтажните паркинзи, два во првата фаза со најмалку 500 паркинг места за почеток. Ако се покаже дека има потреба од повеќе, ќе биде изграден и трет монтажен паркинг. Тоа ќе биде генерално решавање на хаосот што владее со години на Клинички. Ако се утврди дека капацитетите овозможуваат да се паркираат и приватни резиденти, ќе овозможиме и таква опција, но фокусот ќе биде задоволување на потребите на пациентите и на вработните во Клинички. Планираме по ребалансот да биде распишана тендерска постапка – проектирање и изведба. Операторот што ќе го добие тој проект, ќе треба да го заврши во рок што ќе го утврдиме со Министерството, но тоа нема да биде повеќедецениски проект. Се надевам дека до втората половина на наредната година двата монтажни паркинга ќе бидат ставени во функција. Ќе бидат ултра современи, со нов систем за евиденција и наплата, точно ќе се врши детекција на слободни места, ќе се овозможи полесен и побрз пристап и ќе се спречат дополнителните нервози кај граѓаните – подвлече Ѓорѓиевски.

The post ЌЕ СЕ ГРАДАТ ДВА МОНТАЖНИ ПАРКИНГА НА КЛИНИЧКИ, А АКО ИМА ПОТРЕБА И ТРИ Потпишан договор на 15 години appeared first on plusinfo.mk.

Договорената рамка за реципрочна, фер и балансирана трговија меѓу Северна Македонија и Соединетите Американски Држави претставува значаен чекор во унапредувањето на билатералните економски односи и потврда за заедничката определба за продлабочување на стратешкото партнерство.

Во официјалното соопштение на Канцеларијата на трговскиот претставник на Соединетите Американски Држави (USTR) се наведува дека рамката ги поставува темелите за договор за реципрочна трговија, со цел унапредување на економското партнерство и отстранување на административните пречки за американските земјоделци и производители.

– Трговската агенда на претседателот Доналд Трамп ги продлабочува нашите трансатлантски врски со клучен партнер во балканскиот регион. Оваа објава ги поставува темелите за договор за реципрочна трговија со цел да се унапреди нашето економско партнерство, истовремено отстранувајќи ги административните пречки за американските земјоделци и производители. Му благодарам на министерот за надворешни работи на Северна Македонија, Тимчо Муцунски, за неговиот конструктивен ангажман во насока на ребалансирање на трговските односи и создавање нови можности за американските работници и бизниси – изјави Џејмисон Грир, трговски претставник на САД.

Рамката предвидува проширување на пазарниот пристап за извозниците од двете земји, јакнење на економската соработка и отворање нови можности за инвестиции, иновации и одржлив раст. Преку постепено тарифно и регулаторно усогласување, договорот има потенцијал да ја зголеми конкурентноста на македонската економија, да ја зајакне интеграцијата во трансатлантските економски текови и да придонесе за поголема отпорност на синџирите на снабдување.

Соработката опфаќа повеќе области, меѓу кои енергетиката, дигиталната економија, заштитата на интелектуалната сопственост, како и унапредувањето на еколошките и трудовите стандарди, што дополнително ја потврдува заедничката ориентација кон модерна и предвидлива деловна средина.

Двете земји ќе продолжат со активности за финализирање на договорот, со очекување неговото стапување во сила да донесе долгорочни економски придобивки и дополнително да ја продлабочи трансатлантската поврзаност.

The post ОТВОРИВМЕ НОВИ МОЖНОСТИ ЗА ИНВЕСТИЦИИ, ИНОВАЦИИ И ОДРЖЛИВ РАСТ Џејмисон Грир, трговскиот претставник на САД, му се заблагодари на Муцунски appeared first on plusinfo.mk.

Соединетите Американски Државии Република Северна Македонија постигнаа Рамковен договор за реципрочна, фер и балансирана трговија за зајакнување билатерални економски односи, што ќе им обезбеди на извозниците на двете земји проширен пристап до пазарите на другите, објави синоќа Брлата куќа.

– Договорот ќе ги зајакне нашите трговски односи, ќе ги поддржи заедничките стратешки интереси, ќе го промовира економскиот раст и ќе го продлабочи нашето трансатлантско партнерство, се наведува во зaедничката изјава.

Клучните услови на Договорот ќе вклучуваат:

• Северна Македонија ќе ги укине царинските давачки за сите американски индустриски и земјоделски стоки извезени во Северна Македонија.

• Соединетите Американски Држави ќе ги одржат на 15 проценти реципрочните тарифи, како што е наведено во Извршната наредба 14257 од 2 април 2005 година, како што е изменета, за стоки со потекло од Северна Македонија, а исто така ќе ги идентификуваат производите од листата наведена во Анекс III на Извршната наредба 14346 од 5 септември 2025 година, Потенцијални прилагодувања на тарифите за усогласени партнери, како што е изменета, за да добијат реципрочна царинска стапка од нула проценти. Соединетите Американски Држави и Северна Македонија можат да разгледаат други модификации на тарифите по склучувањето на Договорот, земајќи ги предвид трговските биланси и други соодветни фактори.

• Соединетите Американски Држави и Северна Македонија ќе работат на решавање на загриженоста на САД во врска со нетарифните бариери наметнати од Северна Македонија, кои влијаат на билатералната трговија во приоритетните области.

• Соединетите Американски Држави и Северна Македонија се обврзуваат да одржат консултации за решавање и спречување на бариерите за американските земјоделски производи на македонскиот пазар.

• Соединетите Американски Држави и Северна Македонија се обврзаа да ја зајакнат економската и националната безбедносна соработка за да ја подобрат отпорноста на синџирот на снабдување и иновациите преку комплементарни активности за справување со непазарни политики на други земји, како и за борба против избегнувањето на давачки и соработка во прегледите на инвестициите и контролата на извозот. Оваа обврска вклучува соработка за да се обезбеди дека меѓународните обврски за набавки ќе им користат само на оние земји кои ги презеле истите обврски.

• Соединетите Американски Држави и Северна Македонија ја забележуваат својата намера да ги олеснат и подобрат трговските врски.

• Во врска со можностите во енергетскиот сектор, Соединетите Американски Држави и Северна Македонија ја земаат предвид изградбата на важен нов гасен интерконектор помеѓу Северна Македонија и Грција, што ќе ѝ овозможи на Северна Македонија да ја подобри енергетската безбедност и да ги диверзифицира изворите на енергија, вклучително и преку купување на американски течен природен гас (LNG).

• Северна Македонија ќе започне со купување на американски LNG по завршувањето на новиот гасен интерконектор.

• Северна Македонија се обврзува да усвои и одржува високо ниво на заштита на животната средина и ефикасно да ги спроведува своите закони за животна средина.

• Соединетите Американски Држави и Северна Македонија ќе разговараат за обврските за заштита и спроведување на интелектуалната сопственост, вклучително и за географските ознаки.

• Соединетите Американски Држави и Северна Македонија ќе се ангажираат за решавање на прашања поврзани со трудот.

• Соединетите Американски Држави и Северна Македонија ја препознаваат важноста на обврските со високи стандарди за дигитална трговија со цел да се поттикне отворена и конкурентна дигитална економија. Северна Македонија се обврза да не наметнува данок на дигитални услуги и да поддржи усвојување на траен мораториум на царински давачки за електронски преноси во Светската трговска организација (СТО).

• Соединетите Американски Држави и Северна Македонија ја препознаваат важноста на олеснувањето на трговијата со услуги. Северна Македонија ја потврдува својата посветеност на Заедничката иницијатива на СТО за домашна регулатива за услуги.

Соединетите Американски Држави и Северна Македонија ќе работат на финализирање на Договорот, подготовка на Договорот за потпишување и преземање на домашни формалности пред стапувањето во сила на Договорот, се наведува во соопштението од Белата куќа.

The post САД И MAKEДОНИЈА ПОСТИГНАА ДОГОВОР ЗА РЕЦИПРОЧНА, ФЕР И ИЗБАЛАНСИРАНА ТРГОВИЈА Еве што содржи appeared first on plusinfo.mk.