На 66-годишна возраст почина Нури Бајрами, поранешен заменик-претседател на Државната комисија за спречување на корупцијата (ДКСК), долгогодишен новинар, главен уредник на ТВ2 и дипломиран правник.

Тажната вест ја соопшти неговиот син Арианит Бајрами преку објава на својот профил на Фејсбук.

Бајрами беше член на ДКСК од 2019 година до февруари 2024 година, каде што ја извршуваше функцијата заменик-претседател на Комисијата.

Покрај ангажманот во антикорупциската комисија, зад себе остави богата професионална кариера. Речиси една деценија работеше како новинар и главен уредник во ТВ2, а беше активен и во државната администрација.

Во текот на кариерата работеше во Генералниот секретаријат на Владата како виш соработник за подобрување на соодветната и правичната застапеност, во Министерството за правда како виш соработник за односи со јавноста и службено лице за посредување со информации од јавен карактер, како и во Општина Гостивар, каде што беше раководител на Одделението за управување со човечки ресурси и службено лице за посредување со информации од јавен карактер.

Од семејството информираа дека погребот ќе се одржи денес, по попладневната молитва.

The post ПОЧИНА НУРИ БАЈРАМ Беше долгогодишен новинар и поранешен антикорупционер appeared first on plusinfo.mk.

Поранешната претседателка на Државната комисија за спречување на корупцијата, Татјана Димитровска, доби условна затворска казна од една година. Основниот кривичен суд Скопје ја прогласи за виновна за одавање службена тајна и за компјутерски фалсификат.

За првото дело судот ѝ утврди 8 месеци затвор. За второто ѝ утврди уште 6 месеци.

Двете казни судот ги спои во единствена условна казна од една година. Таа нема да се изврши ако Димитровска во следните 3 години не стори ново кривично дело. Ревизорот Миле Столевски, исто така, беше прогласен за виновен за компјутерски фалсификат.

Тој доби условна казна од 6 месеци затвор. Казната нема да се изврши ако во рок од 2 години не стори ново дело.

Третообвинетата Билјана Петровска-Мантева беше ослободена. Судот оцени дека Обвинителството не ја докажало нејзината вина надвор од разумно сомневање.

Судијата Илија Трпков нагласи дека одавањето службени информации го урива интегритетот на Антикорупциската комисија.

– Претседателот на ДКСК не само што раководи со работата на Комисијата, туку е и олицетворение на довербата во јавноста – рече Трпков.

Според обвинението, Димитровска му откривала службени информации на поранешниот директор на ТЕЦ „Неготино“, Небојша Стојановиќ. Стојановиќ е обвинет во предметот „Адитив“.

Обвинителството тврдеше и дека Столевски во нејзино име го полагал тестот за безбедносен сертификат. Сертификатот овозможува пристап до класифицирани информации.

Обвинителството побара осудителна пресуда и ја посочи функцијата на Димитровска како отежнителна околност. Одбраната бараше ослободување поради недостиг од докази.

Пресудата не е правосилна. Странките имаат право на жалба до Апелацискиот суд во рок од 8 дена.

The post УСЛОВНА КАЗНА ЗА ЕКС-ШЕФИЦАТА НА АНТИКОРУПЦИСКА Според судот, Димитровска оддала службена тајна appeared first on plusinfo.mk.

Обвинителството во завршните зборови за предметот во кој е обвинета поранешната претседателка на Државната комисија за спречување на корупцијата (ДКСК) Татјана Димитровска, побара Судот како отежнителна околност да ја цени нејзината функција во времето на извршување на делата, оценувајќи дека во текот на постапката биле докажани и двете кривични дела што ѝ се ставаат на товар. По изнесувањето на завршните зборови, Судот ја закажа објавата на пресудата за 14 јули годинава во 13 часот.

Обвинителката Наташа Поп Трајкова денеска изјави дека обвинетата ги сторила делата како претседател на институција чија основна задача е заштита на јавниот интерес и спречување на корупцијата.

– Обвинителството смета дека ги докажа и двете кривични дела сторени од страна на обвинетата. Како отежнителна околност е тоа што истата овие дела ги сторила како претседател на Државната комисија за спречување на корупцијата – истакна Поп Трајкова.

Во однос на обвинението за компјутерски фалсификат поврзано со добивањето безбедносен сертификат, обвинителката посочи дека ваквото постапување претставува закана за системот на издавање сертификати за пристап до класифицирани информации.

– Обвинителството смета дека со ваквото постапување се нарушува целиот систем на добивање безбедносни сертификати, особено имајќи ја предвид сензитивноста на класифицираните информации, како и фактот дека државата е членка на НАТО и институцијата што ги издава сертификатите мора да постапува согласно правилата и начелата што ги воспоставува НАТО- рече Поп Трајкова.

Одговарајќи на новинарско прашање зошто Обвинителството смета дека делата биле сторени со умисла, таа нагласи дека особено за делото одавање службена тајна умислата произлегува од материјалните и вербалните докази изведени во текот на судскиот процес.

Според неа, од екстрахираните пораки презентирани како доказ произлегува дека обвинетата била свесна за доверливоста на информациите што ги споделувала со Небојша Стојановиќ.

– Особено индикативни се неколку пораки во кои таа му наведува „Ова е доверливо и не го споделувај со никој“. Изведовме и пораки во кои обвинетата знае и е свесна дека овие податоци претставуваат службена тајна. Свесноста и умислата произлегуваат и од формата во која податоците биле доставени – рече обвинителката.

Таа додаде дека во текот на постапката било утврдено оти податоците не биле јавно достапни во формата во која биле споделувани.

– Се наметнува прашањето зошто Небојша Стојановиќ би ги барал овие информации од тогашниот претседател на ДКСК ако тие биле јавни. Ако биле јавни, секој, па и тој самиот, би можел да дојде до нив – посочи Поп Трајкова.

Одбраната, пак, оцени дека во завршните зборови на Обвинителството не биле презентирани аргументи што би го поткрепиле постоењето на кривичните дела за кои се гони обвинетата.

Адвокатот Владимир Туфегџиќ по денешното рочиште изјави дека завршниот збор на јавниот обвинител повеќе се темелел на етички отколку на кривично-правни аспекти на случајот.

– Денеска го слушнавме завршниот збор на јавниот обвинител. Слушнавме повеќе или помалку едно театрално излагање кое ја допре суштината, а суштината беше анализа на етичките правила и етичкиот кодекс. Не беше понудено ништо што во законска смисла значи припишување инкриминација и постоење на кривичните дела за кои е обвинет мојот клиент – истакна Туфегџиќ.

Тој додаде дека очекува Судот да донесе, како што рече, праведна и правилна одлука.

– Сметам дека Судот ќе донесе праведна одлука, правилна одлука, за нас ослободителна пресуда секако, и тоа го очекуваме во терминот кога е закажано изрекувањето на пресудата – рече Туфегџиќ.

Бранителот на обвинетиот Миле Столевски, пак, оцени дека Обвинителството не успеало да го докаже кривичното дело компјутерски фалсификат што му се става на товар на неговиот клиент.

Образложувајќи ја споредбата што ја направи во завршниот збор со користење платежни картички и внесување туѓи податоци, адвокатот посочи дека целта била на сликовит начин да ја доближи правната проблематика до секојдневниот живот.

– Таква е споредбата затоа што наоѓа аналогија во секојдневниот живот. Поентата на секое законско регулирање на која било материја е не да го отежни, туку да го олесни животот на граѓаните и да го стави во одредени рамки и ред. Обвинителството направи обид дејствијата на обвинетиот да ги подведе под кривичното дело компјутерски фалсификат. Токму затоа ги дадов тие примери, бидејќи во спротивно многу наши сограѓани би можеле во иднина да паднат под опфат на тоа кривично дело, иако законот не ги предвидува на таков начин – изјави бранителот на Столевски.

На прашањето дали смета дека Обвинителството не го докажало делото што му се става на товар на Столевски, адвокатот рече дека завршниот збор на Обвинителството бил повеќе насочен кон реторика отколку кон правни аргументи.

– Доколку човек се труди да даде објективна оцена и за самиот завршен збор, би кажал дека за првпат, барем во мојата кариера, Обвинителството го правеше она што вообичаено е задача на одбраната. Денеска Обвинителството најмалку зборуваше за право, а повеќе беше театар во однос на завршниот збор, изјави тој.

Бранителката на обвинетата Билјана Петровска-Мантева, адвокатката Надица Фундукли, во изјава по завршните зборови оцени дека во текот на постапката не бил презентиран ниту еден решителен доказ што надвор од разумно сомневање би ја потврдил вината на нејзината клиентка за кривичното дело одавање службена тајна.

– На денешната главна расправа, а особено преку завршните зборови и на Јавното обвинителство и на одбраната, сметам дека објективно не постои ниту еден решителен доказ на товар на обвинетата дека го сторила кривичното дело одавање службена тајна надвор од разумно сомневање – изјави Фундукли.

Таа нагласи дека Петровска-Мантева не можела да располага со информации кои имаат статус на класифицирани информации согласно законските прописи.

– Обвинетата Билјана не била во состојба да го стори таквиот вид кривично дело, бидејќи не се стекнала со информации кои се класифицирани согласно Законот за класифицирани информации. Посебно, двата документа доставени од МВР и Бирото за јавна безбедност немаат никаков степен на класификација – истакна Фундукли.

Според одбраната, станува збор за документи кои и претходно биле доставувани од АД ЕСМ до неговите подружници, а потоа и до повеќе раководни лица вклучени во подготовка на документација за потребите на постапките пред органите на прогонот.

Поранешната претседателка на ДКСК е обвинета за две кривични дела – одавање службена тајна на поранешниот директор на ТЕЦ „Неготино“, Небојша Стојановиќ, обвинет во предметот „Адитив“, како и за компјутерски фалсификат, односно дека ревизорот Миле Столевски во нејзино име го полагал тестот за добивање безбедносен сертификат за пристап до класифицирани информации.

Покрај неа, во предметот обвинети се и ревизорот Столевски, како и Билјана Петровска-Мантева, која се товари за одавање службена тајна.

The post НА 14 ЈУЛИ ПРЕСУДА ЗА ПРЕДМЕТОТ ПРОТИВ ЕКС-ШЕФИЦАТА НА ДКСК Обвинителката вели дека вината е докажана appeared first on plusinfo.mk.

Членовите на Државната комисија за спречување на корупција на денешната 33 седница донесоа вкупно 69 одлуки, од кои најголемиот дел се за советници, градоначалници, директори на училишта, градинки, комунални претпријатија, декани на факултети но и пратеници кои по анонимни пријави, но и по сопствена иницијатива на ДКСК се оформени предмети за неподнесување на анкетен лист за имотната состојба. За дел од предметите е утврдено дека лицата кои вршат јавни функции не поднеле изјави, со што доставени им се прекршочни платни налози, а по плаќањето на глобата и поднесувањето на изјавите, предметите се затвораат.

Софија Спасова Медарска, член на ДКСК, побара од страна на ДКСК да се достави допис до Нотарската комора и до Министерството за правда дека сите нотари треба да достават изјави за имотната состојба. Овој заклучок беше донесен по пријавата од непознат подносител во општина Куманово, според која 14 нотари не ја исполниле оваа законска обврска. Но, по проверката на податоците од 14 нотари само двајца ја исполниле својата законска обврска.

За дописот за службено лице во Национален парк, кое било и претседател и на Здружение, а во службените простории организирал настан поврзан со здружението и користел службено возило за приватни цели, членовите на ДКСК констаираа дека за ова лице веќе се водат постапки од други надлежни институции.

Членовите на ДКСК го разгледуваа и предметот за судир на интереси кај ректор и еден проректор на универзитет. Во пријавата се наведува дека е можно вклучување како партнер во меѓународен проект на институт кој е во сопственост на ректорот на универзитетот и вклучување како стратешки партнер на конференции на Институтот за истражување и јадрански студии, кој е во сопственост на проректорот. Станува збор за  меѓународен проект на кој се јавиле и универзитетот и приватен институт, во кој еден од сопствениците се јавува и ректорот на универзитетот.

– Чекори кои се преземени од страна на универзитетот, а кои се однесуваат на споменатиот проект дадена е согласност на проектна документација и назначување на контакт лице на меѓународниот проект „Дронови за регионална оптимизација и иновации во јадранско-јонската област“, со оваа седница претседавал ректорот. Дадена е согласност за кофинансирање со 15% за наведениот проект, исто така со оваа седница претседавал ректорот. Донесена е одлука за давање согласност на проектна апликација и назначување контакт лице, оваа одлука е потпишана од страна на ректорот на универзитетот. Донесена е одлука за давање согласност за кофинансирање, исто така оваа одлука е потпишана од страна на ректорот. Со потпишување на овие акти, а кои со однесуваат на проект „Дронови за регионална оптимизација и иновации во јадранско-јонската област 2“, во кој проект како еден од партнерите се јавува и Гаус Институт, кој, чиј сопственик видно од тековната состојба на субјектот е и ректорот на универзитетот, ова лице се нашло во состојба на судир на интереси, а што согласно член 2 став 3 од Законот за спречување на корупцијата и судирот на интереси подразбира состојба во која службеното лице има приватен интерес, што влијае или може да влијае врз непристрасното вршење на неговите јавни овластувања или службени должности. Именуваниот, иако знаел дека постојат околности што укажуваат на постоење на судир на интереси, се нема иземено и нема запрено со своето постапување-реферираше член на ДКСК.

Од ДКСК наведуваат и дека  според констатираната фактичка состојба која произлезе од пријавената документација, службеното лице има сторено прекршок од член 75 став 1 од Законот за спречување на корупцијата и судирот на интереси, а казна по член 107 став 1 алинеја 2 од истиот закон.

-ДКСК согласно своите надлежности за констатираниот прекршок состави записник за констатиран прекршок, издаде прекршочен налог, го издаде на лицето, од страна на лицето е доставен доказ до ДКСК за уплата на пропишаната глоба за извршениот прекршок. За сторената повреда ДКСК не може да покрене иницијатива за утврдување одговорност на службеното лице бидејќи тоа е од прекршочна, не може да покрене иницијатива согласно член 72 став 4 од Законот за спречување на корупција и судир на интереси, бидејќи на лицето согласно член 107 став 5 од Закон за спречување на корупција му е изречена мерка за сторениот прекршок-вели член на ДКСК.

Што се однесува за  наводите за судир на интереси кај проректорот, ДКСК не може да утврди повреда на член 75 за Закон за спречување на корупција и судир на интереси. Согласно сите исцрпени  можности за постапување согласно Законот за спречување на корупција и судир на интереси се запре оваа постапка од страна на ДКСК.

На денешната седница се разгледуваа и предмети во кои граѓани имаат пишувано за можна корупција и во приватни фирми, како и за државни институции без да наведат конкретни докази. Ваквите предмети беа затворени, бидејќи ДКСК не е надлежна да постапува по ваквите предмети

The post НОТАРИТЕ НАЈЧЕСТО „ЗАБОРАВААТ“ ДЕКА ТРЕБА ДА ДОСТАВАТ ИЗЈАВИ ЗА ИМОТНА СОСТОЈБА Антикорупциска днесе 69 решенија за непополнети анкетни листови и судир на интереси appeared first on plusinfo.mk.

ДКСК не е надлежна да се меша во работата на Обвинителството, рече денеска претседателот на Државната комисија за спречување на корупцијата (ДКСК), Адем Чучуљ, во врска со одлуката на Јавното обвинителство за запирање на истрагата околу набавките на мазут за ТЕЦ Неготино.

Чучуљ укажа на потребата од поголема соработка меѓу двете институции, ДКСК и Обвинителството.

– Не би ја коментирал одлуката на Јавното обвинителство за случајот со мазутот, имајќи предвид дека Државната комисија не е надлежна да се меша во работата на Обвнителството. Ние сме на став дека треба да има поголема соработка на ваквите тела, како Комисијата со Обвинителството, особено и во фазата на подготвување на иницијативите, за тие да бидат поиздржани – истакна Чучуљ, одговорајќи на новинарско прашање, дали е изненаден од ваквата одлука на Обвинителството.

И во врска со иницијативата на ДКСК за случајот со мазутот која беше отфрлена, Чучуљ потенцира дека таква е одлуката на Обвинителството.

– Тоа е одлука на Обвинителството, а и иницијативата беше од претходниот состав на ДКСК. Не би се впуштал да ја коментирам одлуката на Обвинителството – нагласи претседателот на Државната комисија за спречување на корупцијата.

The post ЧУЧУЉ НЕ ЈА КОМЕНТИРА ОДЛУКАТА НА ЈО ЗА ТЕЦ НЕГОТИНО Антикорупциска побара подобра координација со Обвинителството appeared first on plusinfo.mk.

Државната комисија за спречување на корупцијата (ДКСК) не утврдиа судир на интереси кај директорот на Службата за општи и заеднички работи (СОЗР), Ивица Томовски и фирмата „Сити аутсорсинг“, за која СДСМ тврдеше дека му припаѓа на неговиот татко и дека добивала тендери од државни институции.

Постапката што ја водеше Антикорупциската комисија е запрена.

Софија Спасовска-Медарска, член на ДКСК, вели дека во минатото постоела повзраност на членови на семејството на актуелниот директор со тоа трговско друштво, но во моментов таква поврзаност нема.

– Нема ниту сопственичка, ниту управувачка поврзаност на службеното лице или на член на неговото семејство. Од електронскиот систем на јавни набавки се гледа дека не се наведени податоци за договори склучени меѓу наведеното трговско друштво и институцијата со која раководи службеното лице – изјави Спасовска-Медарска.

Претходно, СДСМ обвини дека 161 тенедер наводно добила фирма на блиско лице на директорот на владината служба. Томовски ги отфрли обвинувањата и велеше дека никој од неговото потесно семејство нема сопствеништво во компанијата посечена од опозициската партија. Тој ги повика ДКСК и Јавното обвинителство да покренат случај и што побрзо да го решат.

ДКСК поведе постапки за 234 советници избрани во општините кои не ја исполниле законската обврска за поднесување изјава за имотна состојба и интереси во законски утврдениот рок.

СКАНДАЛ СО ИМОТНИ ЛИСТОВИ ВО ОПШТИНИТЕ Дури 234 советници не ја исполниле законската обврска, следуваат казни

The post НЕМА СУДИР НА ИНТЕРЕСИ КАЈ ИВИЦА ТОМОВСКИ И ФИРМАТА „СИТИ АУТСОРСИНГ“ Антикорупциската комисија не најде поврзаност appeared first on plusinfo.mk.

Членовите на Државната комисија за спречување на корупцијата (ДКСК) денеска едногласно донесоа одлука да се поведат постапки против 234 советници избрани во општините во државава, кои не ја исполниле законската обврска за поднесување изјава за имотна состојба и интереси во законски утврдениот рок.

Како што образложи претседателот на Комисијата, Адем Чучуљ, анализата на електронската евиденција покажала дека околу една петтина од советниците во општинските совети не ја доставиле задолжителната изјава, што претставува прекршување на одредбите од Законот за спречување на корупцијата и судирот на интереси.

Тој додаде дека во оваа бројка не се вклучени советниците од Општина Куманово, за кои, како што посочи, претходно е утврдено непочитување на обврската и за кои веќе се изречени соодветни прекршочни налози.

Според извршената анализа на Секторот за контроли при ДКСК, советници од 61 општина не ја доставиле изјавата, поради што Комисијата ќе постапува поединечно за секој предмет.

За лицата кои нема да го платат изречениот прекршочен налог во рок од осум дена, ќе бидат иницирани прекршочни постапки пред надлежната Комисија за прекршоци.

Чучуљ потсети дека ДКСК редовно објавува податоци за извршените контроли, повредите на законот и изречените глоби на својата веб-страница, па така и имињата на овие советници ќе бидат јавно достапни кога ќе започнат постапките.

The post СКАНДАЛ СО ИМОТНИ ЛИСТОВИ ВО ОПШТИНИТЕ Дури 234 советници не ја исполниле законската обврска, следуваат казни appeared first on plusinfo.mk.

Државната комисија за спречување на корупцијата (ДКСК), констатирала дека 35 поранешни и 19 новоизбрани градоначалници не ја испочитувале законската обврска за пријавување имотната состојба.

Од ДКСК појаснуваат дека согласно со член 82 став 1 од Законот за спречување на корупцијата и судирот на интереси сите избрани градоначалници на Локалните избори 2025 година имаат обврска, најдоцна во рок од 30 дена од денот на изборот, да поднесат изјава за имотна состојба и интереси. Исто така, согласно со член 82 став 3 од наведениот закон, по престанокот на функцијата градоначалник, истите имаат обврска да поднесат изјава за имотна состојба.

„ДКСК изврши проверка во регистерот на имотна состојба и интереси и ја констатира следната состојба: 35 лица по престанок на функцијата – градоначалник, немаат поднесено изјава за имотна состојба и интереси и 19 лица по изборот на функцијата – градоначалник, немаат поднесено изјава за имотна состојба и интереси, за кои ќе иницира постапки согласно закон, со издавање прекршочен платен налог“ – се наведува во соопштението.

ДКСК најавува дека ќе ја следи состојбата и за сите наведени лица, кои и понатаму нема да ја исполнат законската обврска за доставување изјави, ќе иницира постапки за проверка на нивната имотна состојба и интереси.

The post 35 ПОРАНЕШНИ И 19 СЕГАШНИ ГРАДОНАЧАЛНИЦИ НЕ ПРИЈАВИЛЕ ИМОТНА СОСТОЈБА Еве кои имиња се на листата на ДКСК appeared first on plusinfo.mk.

Адем Чучуљ е новиот претседател на Државната комисија за спречување на корупцијата (ДКСК), откако денеска го доби единственото можно доверување на Собранието – сите 82 пратеници што гласаа го поддржаа.

Пратеникот Ѓорѓија Сајкоски од ВМРО-ДПМНЕ го поддржа кандидатот, истакнувајќи дека „Чучуљ навистина може да ги зајакне капацитетите и репутацијата на ДКСК“.

Чучуљ е дипломиран правник со положен правосуден испит и актуелен генерален секретар на Комисијата, каде што работи речиси две децении. Комисијата за селекција му додели највисоки оценки – 96,5 бодови, поради неговото искуство во борбата против корупцијата, разбирањето на судирот на интереси и јасната визија за развојот на ДКСК.

Тој доаѓа на местото на Татјана Димитровска, која поднесе оставка поради обвиненија во случајот „Адитив“ за оддавање службена тајна и компјутерски фалсификат.

Исто така, на денешната седница беа избрани и нови членови на Националниот совет за високо образование и научно-истражувачка дејност: Ана Тромбева Гавриловска, Марко Спасов, Мурат Алиу, Бертон Сулејмани, Агим Хазири и Никица Мојсоска Блажевски. Собранието одлучи и да објави јавен оглас за избор на членови на Комисијата за спречување и заштита од дискриминација.

Седницата продолжи со расправа за предлог одлука за основање Анкетна комисија која ќе ги испита околностите за трагедиите и несреќите во Македонија, потврдувајќи дека парламентарците се фокусираат и на нови истражувачки механизми за заштита на граѓаните.

The post АДЕМ ЧУЧУЉ НА ЧЕЛО НА ДКСК Ново поглавје во борбата против корупцијата appeared first on plusinfo.mk.

Адем Чучуљ, дипломиран правник и долгогодишен вработен во Антикорупциска, ќе биде предложен за нов претседател на Државната комисија за спречување на корупцијата (ДКСК), откако доби највисоки оценки од селекциската комисија.

Комисијата за прашања на изборите и именувањата едногласно одлучи до Собранието да го предложи Чучуљ за прв човек на Антикорупциска. Според информациите од законодавниот дом, гласањето за оваа предлог-одлука ќе се најде на пленарна седница на почетокот на декември.

Чучуљ, кој е дипломиран правник со положен правосуден испит, во моментот ја извршува функцијата генерален секретар на ДКСК и таму работи цели 19 години. На селекцијата за претседател на Антикорупциска доби убедливи 96,5 бодови, највисока оценка меѓу сите пријавени.

Според Комисијата за селекција, тој покажал „значајно практично искуство во спречување корупција и судир на интереси“, како и јасна визија за развојот на институцијата.

Огласот за нов претседател беше распишан уште летово, но процесот беше прекинат за време на локалните избори. На конкурсот се пријавија 13 кандидати, од кои 10 беа селектирани во потесен круг, а интервјуата започнаа во вторникот.

Нов претседател ќе биде избран по оставката на претходната претседателка Татјана Димитровска, која беше обвинета во случајот „Адитив“ за оддавање службена тајна и компјутерски фалсификат. Обвинението наведува дека Димитровска му давала информации од предмет на обвинето лице во истиот случај и дека за неа друг го полагал електронскиот испит за сертификат за државна тајна.

The post ЧУЧУЉ ЕДНОГЛАСНО ПРЕДЛОЖЕН ЗА ПРЕТСЕДАТЕЛ НА АНТИКОРУПЦИСКА По скандалот со Димитровска, доаѓа човек со повќе од декада искуство appeared first on plusinfo.mk.