Цените на бензинот и на дизелот во Европската Унија оваа недела ги достигнаа највисоките нивоа во изминатите 20 години, откако се следат податоците.

Според податоците на Европската комисија, полнењето резервоар од 50 литри со бензин сега чини околу 103 евра, додека полнењето со дизел чини 108 евра.

Високите рафинериски маржи се главен двигател на поскапувањата. Експертите од Европската централна банка (ЕЦБ) проценуваат дека маржите за дизелот нема да го достигнат својот врв пред октомври, што сугерира дека цените би можеле да останат високи.

Цените на горивата на бензинските пумпи нагло пораснаа по избувнувањето на конфликтот на Блискиот Исток во февруари, дополнително засилувајќи ги инфлаторните притисоци. ЕЦБ објави дека инфлацијата кај енергенсите во еврозоната скокнала на 14,3 отсто во август, од 10,3 отсто во јули.

На 14 септември просечната цена по литар бензин во ЕУ изнесувала 2,063 евра, додека цената на дизелот била 2,159 евра. Ова се највисоките цени регистрирани откако Комисијата почна да ги следи податоците во 2005 година. Претходниот рекорд за бензинот беше поставен во 2022 година, додека цените на дизелот последен пат се приближија до сегашните нивоа во април оваа година.

Цените значително варираат меѓу земјите-членки. Најевтин бензин има во Малта, каде што литар чини 1,34 евра, додека најскап е во Данска, со цена од 2,56 евра. И дизелот исто така е најевтин во Малта, со цена од 1,21 евро за литар, а најскап во Финска, со 2,51 евра.

Податоците се земени од неделниот билтен за нафта на Европската комисија, објавен на 17 септември, и ги одразуваат цените регистрирани на 14 септември, вклучувајќи ги даноците и акцизите.

Цените растат веќе неколку месеци – од почетокот на војната во Иран кон крајот на февруари, што ги попречи енергетските текови низ Ормускиот Теснец. На врвот на конфликтот, цената на суровата нафта од типот „Брент“ надмина 126 долари за барел. Во петокот, барел нафта за испорака следниот месец се тргуваше по цена над 104 долари. Пред војната, цената изнесуваше околу 72 долари.

Ситуацијата со снабдувањето во Европа дополнително се усложни откако „Сауди Арамко“ извести најмалку две европски рафинерии дека нема да ги добијат договорените испораки на нафта во октомври. Според „Блумберг“, кој се повикува на извори запознаени со ситуацијата, одлуката се однесува на сите европски купувачи, а следува по нападот што пред неколк дена го извршија јеменските Хути врз клучен саудиски нафтовод што води кон Црвеното Море.

Сепак, цената на суровата нафта на светските пазари не е единствениот фактор што го поттикнува поскапувањето. Трошоците за преработка на нафтата значително пораснаа, како и маржите за преработка, што дополнително ги зголеми цените на бензинските станици. Маржата за преработка ја претставува разликата помеѓу цената на суровата нафта и цената на финалните производи, како што се бензинот и дизелот.

Европската централна банка соопшти дека очекува маржите за дизел да го достигнат врвот дури во октомври.

Од почетокот на 2026 година, просечната цена на бензинот во ЕУ е зголемена за приближно 29 отсто, а на дизелот за речиси 40 отсто.

Според анализата на ЕЦБ од јули, промените во цените на суровата нафта генерално целосно се пренесуваат на цените на горивото пред оданочување во рок од еден до два месеца.

Во јули, цената на суровата нафта учествуваше со помалку од една четвртина во цената на горивото во еврозоната. Остатокот се состоеше од трошоци за преработка и за дистрибуција, маржи и даноци, што ги објаснува значителните разлики во цените меѓу земјите. Во тоа време, акцизите и ДДВ учествуваа со околу 44 отсто во цената на дизелот и 52 отсто во цената на бензинот.

The post ЛИТАР БЕНЗИН ВО ДАНСКА Е 2,56 ЕВРА, ЛИТАР ДИЗЕЛ ВО ФИНСКА Е 2,51 ЕВРА Цените на горивата во Европа уриваат рекорди appeared first on plusinfo.mk.

Украина продолжи да ги напаѓа руските рафинерии и покрај предупредувањето од американскиот претседател Доналд Трамп да престане да го прави тоа. Украинските сили синоќа ја погодиле рафинеријата во Јарослављ, како и воен аеродром во Ростовската област.

„Синоќа, во заедничка операција на Безбедносната служба на Украина, Силите за беспилотни системи, Разузнавачката служба на Министерството за одбрана и Службата за надворешно разузнавање, била погодена рафинерија за нафта во Јарослав“, објави украинскиот претседател на социјалната мрежа Икс.

Тој додаде дека Безбедносната служба на Украина извршила напад врз воениот аеродром во Ростовската област, при што е  потврдена штета врз авиони Ан-12 и два Ан-26, како и на три хеликоптери.

Зеленски, исто така, соопшти дека украинските сили постигнале „добри резултати“ во Црното Море.

The post 🎥 ЗЕЛЕНСКИ НЕ ГО СЛУША ТРАМП, УКРАИНА ПАК НАПАДНА РУСКА РАФИНЕРИЈА Дрон ја погоди рафинеријата во Јарослављ appeared first on plusinfo.mk.

Во услови на глобална енергетска криза, цените на горивата во Македонија се убедливо најниски во Европа, при што владините мерки значително го намалуваат ударот врз стандардот на граѓаните – изјави премиерот Христијан Мицкоски во гостување во централниот дневник на МРТ.

– Во моментот во светот се случува најголемата енергетска криза којашто човештвото не ја памети. Во овие услови цената којашто ја имаат горивата во Македонија е најниска во Европа — кога велиме најниска, е убедливо најниска во Европа. Ако се направи споредба со соседството, со Грција, со Албанија, со соседна Србија или ако одиме посеверно накај БиХ, Црна Гора, Хрватска, Словенија и така натаму, ќе видите дека цената на горивата кај нас е од 20 до 50% поевтина споредена со тоа што е во соседството – рече Мицкоски.

Премиерот Мицкоски во своето гостување посочи дека без владините мерки, дизел-горивото би било поскапо за 11 до 11,5 денари по литар, истакнувајќи дека тоа значи директна заштеда од повеќе од 250 илјади евра дневно за граѓаните.

– Ќе ви дадам една пресметка, еве на пример, за дизел-горивото. Дизел-горивото, кога не би биле овие мерки на Владата, би било поскапо за 11 до 11,5 денари по литар. Што значи тоа во пари? Тоа значи повеќе од 250 илјади евра на ден. Толку е заштедата со мерките на Владата што ја прават граѓаните – кога зборувам за заштеда, зборувам за директната заштеда. Кога на тоа ќе го додадеме и безоловниот 95- и 98-октански бензин, тогаш ќе дојдеме до повеќе од 300 илјади евра на ден директна заштеда кај граѓаните”, истакна Мицкоски.

Мицкоски оцени дека пониските цени на горивата имаат ефект и врз инфлацијата, бидејќи се намалуваат трошоците во целиот економски синџир.

– Тоа понатаму во синџирот имплицира ниско ниво на инфлација, а тоа ниско ниво на инфлација е меѓу најниските во Европа за јули и за август и е во рамките од 2 до 3% – нешто што денеска претставува природна инфлација според оние пораки коишто ги испраќаат Меѓународниот монетарен фонд и Светската банка – вели Мицкоски.

Според претседателот на Владата, Мицкоски, владините мерки во следните две недели ќе обезбедат директна заштеда во буџетот на граѓаните од 4 до 4,5 милиони евра, додавајќи дека земјава има доволно резерви и стабилно снабдување со гориво.

– Така шт,о она коешто го прави Владата во моментот, во следните две недели ќе значи директна заштеда во буџетот на граѓаните помеѓу 4 и 4,5 милиони евра. Ќе ја следиме ситуацијата – со резерви сме доволно снабдени, продуктоводот што го поврзува солунското пристаниште со рафинеријата е полн, не воведовме забрана за извоз, дел од аеродромите во регионот се снабдуваат со керозин од нашите, би рекол, трговци, а нашите трговци снабдуваат дел и од соседните земји – истакна Мицкоски.

The post БЕЗ ВЛАДИНА ПОДДРШКА ЛИТАР ДИЗЕЛ БИ ЧИНЕЛ ПОВЕЌЕ ОД 11 ДЕНАРИ Мицкоски вели дека за граѓаните дневно се заштедуваат до 250 илјади евра appeared first on plusinfo.mk.

Премиерот Христијан Мицкоски најави дека владата ќе донесе мерка за намалување на ДДВ на дизелот од 18% на 10%. Оваа мерка ќе биде донесена на денешната владина седница која ќе се одржи онлајн, откако во петокот берзата затвори со околу 10 проценти повисока цена на нафтата и можеше да резултира со значително поскапување на горивата дома.

Со намалувањето на ДДВ и намалената акциза, која мерка е донесена претходно, се очекува да има ублажување на ценовниот шок.

– Ќе донесеме уште една мерка за намалување на ДДВ на дизел горивото од 18% на 10% со што очекуваме наместо да има драматично зголемување да има намалување на цената на дизел горивото. Секако дека тоа ќе има импликации врз буџетот, но наш интерес е да го штитиме стандардот на граѓаните – рече Мицкоски.

The post ДДВ НА ДИЗЕЛОТ ЌЕ СЕ НАМАЛИ ОД 18% НА 10% Мицкоски најави нова мерка за ублажување на ценовниот шок appeared first on plusinfo.mk.

Од ноќеска на полноќ цените на бензините ЕУРОСУПЕР БС-95 и ЕУРОСУПЕР БС-98 се зголемуваат за 3 денари, а на ЕУРОДИЗЕЛ (Д-Е V) за 6 денари за литар, одлучи Регулаторната комисија за енергетика.

Малопродажната цена на Екстра лесното масло за домаќинство (ЕЛ-1) се зголемува за 8 денари за литар, на Мазутот М-1 НС за 1,591 денари за килограм и сега ќе изнесува 46,001 денари за килограм.

Новата цена на ЕУРОСУПЕР БС – 95 ќе изнесува 97,00 денари за литар, ЕУРОСУПЕР БС – 98 ќе се продава за 99, ЕУРОДИЗЕЛ БС (Д-Е V) за 101 денар, Екстра лесното 1 (ЕЛ-1) за 105 денари за литар, а Мазут М-1 НС за 46,001 денари за килограм.

The post БЕНЗИНИТЕ ПОСКАПУВААТ ЗА ТРИ, ДИЗЕЛОТ ЗА ШЕСТ ДЕНАРИ Од полноќ нови цени на горивата appeared first on plusinfo.mk.

Македонија во моментов има најниски цени на бензинот и дизелот во споредба со соседните земји.

Од 25 август, Еуросупер БС-95 во Македонија се продава по цена од 93 денари за литар, што е околу 1,51 евро. Дизелот чини 101,5 денари, односно приближно 1,65 евра за литар.

Во Косово бензинот се продава по околу 1,53 евра, а дизелот по 1,79 евра. Слични се цените и во Бугарија, каде литар бензин чини околу 1,53 евра, а дизелот околу 1,77 евра.

Поголема разлика има во Србија. Таму бензинот се продава по околу 1,72 евра за литар, додека дизелот чини приближно 1,97 евра. Тоа значи дека литар дизел во Србија е за околу 32 евроценти поскап отколку во Македонија.

Уште повисоки се цените во Грција, каде бензинот и дизелот се движат околу границата од 2 евра за литар. Бензинот е околу 2 евра, а дизелот нешто под таа цена.

Најскапо гориво меѓу соседите има Албанија. Бензинот таму чини околу 2,04 евра за литар, а дизелот околу 2,23 евра. Во споредба со Македонија, разликата е околу 53 евроценти кај бензинот и речиси 58 евроценти кај дизелот.

Ако се пресмета резервоар од 50 литри, во Македонија за бензин би биле потребни околу 75,5 евра, додека во Грција околу 100 евра. Кај дизелот, 50 литри во Македонија чинат околу 82 евра, а во Албанија речиси 112 евра.

Разликите во цените не зависат само од движењето на нафтата на светските пазари, туку и од висината на акцизите, ДДВ и другите давачки што секоја држава ги пресметува во крајната малопродажна цена.

Според најновите достапни податоци, Македонија останува најевтина за точење гориво во регионот, иако дизелот веќе ја надмина границата од 100 денари за литар.

The post МАКЕДОНИЈА ИМА НАЈЕВТИНО ГОРИВО ВО РЕГИОНОТ Еве колку чини да се наполни резервоарот кај нас и преку граница appeared first on plusinfo.mk.

Регулаторната комисија за енергетика, водни услуги и услуги за управување со комунален отпад (РКЕ) донесе одлука со која од 18 август, од 00:01 часот, се зголемуваат максималните малопродажни цени на сите главни нафтени деривати.

Најголемо поскапување има кај дизелот, кој поскапува за 6,50 денари за литар и од понеделник ќе се продава по максимална цена од 98 денари за литар.

Бензините „Еуросупер БС-95“ и „Еуросупер БС-98“ поскапуваат за 4,50 денари за литар. Новата максимална цена на 95-октанскиот бензин ќе биде 91,50 денари, додека 98-октанскиот ќе достигне 93,50 денари за литар.

Поскапува и екстралесното масло за домаќинство. Неговата цена се зголемува за 6 денари за литар, па од понеделник максимално ќе се продава за 98,50 денари.

Кај мазутот зголемувањето е значително помало – за 0,188 денари за килограм, со што новата максимална цена ќе изнесува 43,726 денари за килограм.

Од РКЕ објаснуваат дека новото зголемување е последица пред сè на растот на референтните цени на нафтените деривати на светскиот пазар.

„Референтните цени во однос на претходната пресметка бележат значително зголемување. Кај бензините растот е 8,983 проценти, кај дизелот 10,979 проценти, кај екстралесното масло 9,801 процент, додека кај мазутот изнесува 0,871 процент“, наведуваат од РКЕ.

Врз пресметката влијаел и курсот на денарот во однос на американскиот долар, кој во периодот опфатен со пресметката е понизок за 0,2247 проценти.

И покрај растот на цените на светскиот пазар, РКЕ продолжува со примената на намалениот износ на акцизата. Кај бензините „Еуросупер БС-95“ и „Еуросупер БС-98“ акцизата е намалена за 2 денари по литар, додека кај „Еуродизел БС“ намалувањето изнесува 4 денари по литар.

Од Комисијата посочуваат дека утврдените цени се највисоки дозволени малопродажни цени. Тоа значи дека бензинските станици можат да ги продаваат горивата и по пониски цени од максимално утврдените.

Новите цени ќе важат од 18 август во 00:01 часот.

– Еуросупер БС-95: 91,50 денари/литар,

– Еуросупер БС-98: 93,50 денари/литар,

– Еуродизел БС: 98,00 денари/литар,

– Екстралесно масло ЕЛ-1: 98,50 денари/литар,

– Мазут М-1 НС: 43,726 денари/килограм.

The post БЕНЗИНОТ ПОСКАПУВА ЗА 4,5 ДЕНАРИ, А ДИЗЕЛОТ ЗА 6,5 Од полноќ на бензинските ќе се точи поскапо гориво appeared first on plusinfo.mk.

Продажбата на автомобили во Европската Унија нагло се забрза во јуни, со бран на побарувачка за електрифицирани модели и континуирано слабеење на европскиот интерес за бензински и дизел мотори, покажаа податоците од Европската асоцијација на производители на автомобили (ACEA) објавени денеска.

Во јуни, во Европската Унија се регистрирани вкупно 1,15 милиони нови возила, што е за 13,6% повеќе во однос на истиот месец минатата година. Во мај, продажбата на нови автомобили се зголеми за само 3,2% на годишно ниво.

Во групата од четири водечки пазари, Германците покажаа најголем апетит за купување возила, според скокот на продажбата за дури 15,7 % во споредба со минатогодишниот јуни. Двоцифрен раст е забележан и во Франција и Италија, за 11,4 и 10,6 проценти, соодветно.

Најблаг раст во големата четворка забележа Шпанија, за 7,8 проценти.

„Во услови на геополитички тензии, пазарот продолжи да ги жнее придобивките од силната побарувачка за низа електрифицирани технологии, поттикнати првенствено од мерките за поддршка на продажбата“, истакна ACEA.

Хибридните електрични автомобили беа најпопуларни во јуни, со пазарен удел од 35,25%, малку понизок во однос на претходниот месец. Продажбата скокна за 18,4%, со регистрирани 404.000 возила.

Според дефиницијата на ACEA, групата вклучува „целосни и делумни хибриди“ кои, во зависност од моќноста на батеријата, можат да возат во просек до 62% од времето само на електрична енергија.

Продажбата на електрични автомобили на батерии скокна најмногу во јуни, за дури 60,7%, со над 270.000 нови регистрации и пазарен удел од 23,57%.

Продажбата на plug-in хибриди, исто така, значително се зголеми, за 22,1%, со речиси 116.000 регистрирани нови возила и пазарен удел малку повисок од 10%.

Бензинските и дизел моторите исто така ја изгубија својата популарност, според падот на продажбата за 12,4 и за 16,1%. Пазарниот удел на бензинските возила малку се намали во јуни, на 21,33%, додека дизел возилата имаа удел од 6,7%.

Со зголемената побарувачка за електрифицирани возила меѓу Европејците, моделите од кинеските производители се сè попопуларни, а податоците на ACEA покажуваат дека продажбата на Leapmotor во јуни била речиси шест пати поголема отколку во истиот месец минатата година. Chery продал речиси четири пати повеќе возила на Стариот континент отколку минатата година, додека продажбата на BYD речиси се зголемила за трипати.

Силен раст на продажбата забележа и Tesla, со 72,1% повеќе испорачани возила отколку во јуни минатата година, покажаа податоците на ACEA.

The post ЕВРОПЕЈЦИТЕ СЕ СВРТИЈА КОН ЕЛЕКТРИЧНИТЕ АВТОМОБИЛИ Продажбата на автомобилите на батерии порасна за 60,7% appeared first on plusinfo.mk.

Регулаторната комисија за енергетика, водни услуги и услуги за управување со комунален отпад (РКЕ) донесе одлука за зголемување на малопродажните цени на нафтените деривати во просек за 5,88 проценти во однос на претходната одлука од 13 јули. Новите цени ќе важат од 21 јули 2026 година во 00:01 часот.

Најголемо поскапување има кај ЕУРОДИЗЕЛ (Д-Е V), чија цена се зголемува за шест денари по литар и од полноќ ќе изнесува 94 денари.

Цените на бензините ЕУРОСУПЕР БС-95 и ЕУРОСУПЕР БС-98 се зголемуваат за по три денари, па литар БС-95 ќе чини 90 денари, а БС-98 ќе се продава по 92 денари.

Поскапува и екстра лесното масло за домаќинство (ЕЛ-1), чија цена се зголемува за седум денари, на 93 денари за литар.

Новата цена на мазутот М-1 НС ќе изнесува 45,373 денари за килограм, што претставува зголемување од 3,205 денари.

Од Регулаторната комисија појаснуваат дека новата одлука е донесена поради растот на цените на светските пазари.

„Зголемувањето на цените е резултат на растот на референтните цени на нафтените деривати на светскиот пазар, кои во однос на претходната пресметка се повисоки кај бензините за 9,003 проценти, кај дизелот за 14,963 проценти, кај екстра лесното масло за 13,2 проценти и кај мазутот за 10,686 проценти“, соопштија од РКЕ.

Во Комисијата посочуваат дека во новата пресметка е вклучена и одлуката на Владата за намалување на акцизите, со која акцизата за бензините е намалена за еден денар по литар, а за дизелот за два денари по литар.

„Во пресметката е применета и одлуката на Владата за намалување на акцизата за бензините за 1 денар по литар и за дизелот за 2 денари по литар“, наведуваат од Регулаторната комисија.

Од РКЕ потсетуваат дека цените што ги утврдуваат се максимални малопродажни цени, а трговците можат да продаваат горива и по пониски цени.

„Утврдените цени се максимални, а трговците на големо и мало можат да формираат и пониски цени за одделни нафтени деривати и горива за транспорт“, додаваат од Комисијата.

The post ДРАСТИЧНО ЗГОЛЕМУВАЊЕ НА ГОРИВАТА ОД ПОЛНОЌ Дизелот поскапува за шест денари, бензините за три appeared first on plusinfo.mk.

Владата на денешната вонредна седница донесе Одлука за определување на видот на енергентите, временскиот период и начинот на пресметка на акцизата, со што се овозможува намалување на акцизите на бензинот и дизелот. Мерката има за цел да го ублажи растот на цените на горивата предизвикан од поскапувањето на суровата нафта и нафтените деривати на светските пазари.

Министерката за финансии Гордана Димитриеска-Кочоска информираше дека Владата продолжува со проактивен пристап во справувањето со последиците од кризата на Блискиот Исток.

– Внимателно ја следиме состојбата и реагираме навремено, со цел да ги заштитиме стопанството и животниот стандард на граѓаните – сподели Димитриеска-Кочоска на својот Фејсбук-профил.

Од Владата посочуваат дека во изминатиот период е забележан значителен раст на котациите на суровата нафта и нафтените деривати на светските берзи, поради што континуирано се прават дневни анализи и се преземаат мерки за намалување на ценовниот притисок врз граѓаните и економијата.

Според владините пресметки, без намалувањето на акцизата малопродажната цена на бензините би се зголемила за околу четири денари по литар, додека со донесената мерка се очекува поскапување од околу три денари по литар.

Кај дизел-горивото, без владината интервенција цената би пораснала за околу осум денари по литар, а со намалената акциза се очекува зголемување од околу шест денари по литар.

Владата очекува Регулаторната комисија за енергетика, согласно своите законски надлежности, да ја донесе одлуката за новите малопродажни цени на горивата, при што ефектите од оваа мерка треба да овозможат граѓаните да плаќаат пониски цени отколку што би биле без владината интервенција.

Министерката Димитриеска-Кочоска истакна дека интервенцијата во акцизата ќе придонесе за стабилизирање на цените на нафтените деривати, а индиректно и за одржување на стабилноста на останатите цени.

– Со ваков одговорен пристап ќе продолжиме и во наредниот период. Ќе ја следиме состојбата и ќе носиме навремени, конкретни и реални мерки за поддршка на економијата и граѓаните, со цел да го заштитиме животниот стандард и да ја зачуваме економијата, која од почетокот на нашиот мандат бележи тренд на забрзан раст – порача министерката.

Од Владата нагласуваат дека заштитата на животниот стандард на граѓаните, зачувувањето на економската стабилност и навременото реагирање во услови на нестабилности на меѓународните пазари остануваат врвен приоритет. Доколку состојбите на светските пазари тоа го наложат, најавуваат дека ќе бидат разгледани и дополнителни мерки во интерес на граѓаните и стопанството.

The post ВЛАДАТА ГИ НАМАЛИ АКЦИЗИТЕ ЗА ГОРИВАТА Се реагира навремено за да се заштитат граѓаните и стопанството appeared first on plusinfo.mk.