Надворешната канцеларија за криминалистички работи Свети Николе поднесе кривична пријава против поранешниот градоначалник на Свети Николе Сашо Велковски (55) поради постоење основи на сомнение за сторено кривично дело „злоупотреба на службената положба и овластување“.

Пријавениот, во својство на градоначалник на општина Свети Николе, во текот на 2021 година, пречекорувајќи ги границите на своите службени надлежности, постапил спротивно на одредбите од Законот за градење и Правилникот за начинот на издавање на одобренија за градење на тој начин што лично изготвил, потпишал и издал одобрение за градење, кое не било евидентирано во електронскиот систем на Сектор за урбанизам, заштита на животната средина, комунални работи и оттуѓување на градежно земјиште при општина Свети Николе.

Ваквото одобрение, кое е правно неважечко, било искористено од изведувач од Скопје, кој изградил објект во вредност од 15.488.118 денари, за кој износ со наведеното дејствие е причинета штета на нарачателот. Дополнително, наведениот објект не е впишан во Агенцијата на катастар на недвижности Свети Николе, бидејќи претставува бесправно изграден објект.

The post БИВШ ГРАДОНАЧАЛНИК НА СВЕТИ НИКОЛЕ ДОЗВОЛИЛ ДА СЕ ИЗГРАДИ ДИВОГРАДБА Кривична пријава за Сашо Велковски appeared first on plusinfo.mk.

Екипи на секторот за инспекциски работи на Општина Гази Баба утрово урнаа дивоградба во населбата Керамидница, изградена на државно земјиште. Акцијата беше спроведена со присуство на надлежните служби, со цел да се заштити јавниот интерес и да се воспостави урбан ред.

Градоначалникот Бобан Стефковски порача дека институциите нема да прават компромиси кога станува збор за бесправното градење.

– Урната е уште една дивоградба и испраќаме јасна порака дека бесправното градење нема да се толерира. Законот важи подеднакво за сите и ќе се применува доследно и без исклучоци – изјави Стефковски.

Тој нагласи дека во изминатиот период биле реализирани повеќе акции за отстранување бесправно изградени објекти во различни населени места низ општината, додавајќи дека станува збор за континуирана стратегија за заштита на јавните површини и обезбедување планска изградба.

– Апелирам до граѓаните да не започнуваат градежни активности без одобрение за градење, бидејќи секоја бесправна градба ќе биде санкционирана согласно закон – истакна градоначалникот.

Од општината најавуваат дека ваквите активности ќе продолжат и во наредниот период, со цел спречување на узурпација на државно земјиште и воспоставување ред во просторот.

The post БАГЕРИТЕ ИЗЛЕГОА НА ТЕРЕН ОД РАНО УТРО Урната дивоградба на државно земјиште во Гази Баба appeared first on plusinfo.mk.

Кривична пријава ја затвори шемата околу дивоградба во Радовиш, каде што надзорот се претворил во профит. Полицијата утврдила дека станбен објект се градел без одобрение, а надзорниот инженер сепак ја наплатил услугата, иако бил свесен дека градбата е незаконска.

Со таа наплата, како што соопшти полицијата, инженерот се стекнал со противправна имотна корист од околу 2.215 евра.

СВР Струмица преку ОВР Радовиш поднела кривична пријава против правно лице од Радовиш и против Ж.А. 64 години од Радовиш поради сомнение за кривично дело бесправно градење. Дополнително, пријава е поднесена и против Љ.Е. 55 години од Радовиш поради сомнение за бесправно градење и за злоупотреба на службената положба и овластување.

Според полициските наоди, правното лице и одговорното лице во текот на 2024 година започнале изградба на станбена зграда за домување на катастарска парцела без соодветно одобрение за градење.

The post ИНЖЕНЕРОТ ЗНАЕЛ, ПАК НАПЛАТИЛ Зел 2.200 евра за надзор на дивоградба во Радовиш appeared first on plusinfo.mk.

Од раните утрински часови денеска, во скопското село Инџиково започна акција за уривање на бесправно изграден објект, откако сопственикот не постапил по решението за стопирање на градбата.

Акцијата почнала во 5 часот наутро, со асистенција на полицијата, а на терен биле ангажирани општинските служби на Гази Баба. Објектот бил во почетна, карабина фаза – приземје, но, според надлежните, постоела јасна намера да се надгради уште еден кат.

Градоначалникот на Гази Баба, Бобан Стефковски, информираше дека инвеститорот продолжил со градежните активности и покрај тоа што претходно му било изречено решение за затворање на градилиштето.

– Во моментот на акцијата, објектот беше во приземје – карабина фаза, со јасна намера за надградба на уште еден кат. И покрај донесеното решение од градежниот инспектор за стопирање на градбата и затворање на градилиштето, субјектот не постапил по решението и продолжил со градежни активности. Почитувајте ги законите и не започнувајте градба без добиено Одобрение за градење. Ред, закон и еднаквост за сите – порача првиот човек на Гази Баба.

The post 📽️ БУДЕЊЕ СО БАГЕРИ ВО ИНЏИКОВО Нема милост за дивоградбите, предупредува градоначалникот Стефковски appeared first on plusinfo.mk.

Општина Центар ја урна нелегално изградената доградба на деловен објект на улица Орце Николов број 139, која без одобрение за градење го узурпираше просторот наменет за граѓаните.

„Продолжува акцијата за воспоставување ред на јавните површини“, напиша градоначалникот на Центар Горан Герасимовски.

Тој додава дека општината продолжува со засилени инспекциски, контроли и со активности за расчистување на бесправно изградени и нелегално поставени објекти.

„Целта е јасна – заштита на јавниот интерес и враќање на јавниот простор на сите граѓани“, порачува Герасимовски.

The post 📷 ОТСТРАНЕТА ДИВОГРАДБА НА УЛИЦА ОРЦЕ НИКОЛОВ Продолжува акцијата за воспоставување ред на јавни површини appeared first on plusinfo.mk.

Општина Кисела Вода денес изврши рушење на дивоградба во населбата 11 Октомври. Се работи за поранешен деловен објект во сопственост на ГП „Пелагонија 5 – Градилиште механизација“ кој е во стечај и за кој не постои потребна техничка документација. Објектот никогаш не бил евидентиран во Агенцијата за катастар.

Градоначалничката Стаменкоска Трајкоска истакна дека институцијата ќе постапува исклучиво според закон и правда.

– Општина Кисела Вода ќе работи законски, почитувајќи ги сите закони и правила. Нема да има двојни стандарди за никого и нема да дозволиме прекршување на било каков закон – рече таа.

Трајкоска нагласи дека за секој објект каде ќе се утврдат неправилности ќе биде издадено решение за отстранување.

– Тоа е единствениот начин да воспоставиме ред и правичност и да го заштитиме јавниот интерес – посочи градоначалничката.

Оваа акција доаѓа како дел од континуираните напори на општината да ги елиминира нерегуларните објекти и да ја зајакне контролната улога на институцијата врз просторот на територијата на општината.

The post ЗАИГРА БУЛДОЖЕРОТ ВО 11 ОКТОМВРИ Општината срамни дивоградба до темел appeared first on plusinfo.mk.

Нелегално градилиште во индустриската зона Визбегово, Општина Бутел, денеска беше затворено од надлежен инспектор, градежните работи се запрени, а против инвеститорот ќе биде покрената пријава за нелегално градење и злоупотреба на државно земјиште, информира градоначалникот на Гази Баба Дарко Костовски на својот профил на Фејсбук.

Костовски најави дека дивоизградениот објект ќе биде урнат.

„Покрај постапката за отсранување на овој објект ќе следи и содветна пријава за дивоградба и узурпација на државно земјиште. Никој не смее да биде над законите“ – напиша градоначалникот Костовски.

The post ЗАПРЕНА ДИВА ГРАДБА НА ДРЖАВНО ЗЕМЈИШТЕ ВО ВИЗБЕГОВО Изграденото ќе биде урнато appeared first on plusinfo.mk.

Општина Аеродром информира дека тревната површина до ТЦ „Капитол мол“ повторно ќе биде целосно отворена и вратена на користење на сите граѓани.

„Утринава започна отстранувањето на објектот кој со години беше поставен на тревникот покрај булеварот „Јане Сандански“. Овој објект функционираше врз основа на Решение за поставување урбана опрема, издадено пред десетина години од Град Скопје, но чија важност е истечена.

Бидејќи објектот нема важечко одобрение, тој ќе биде целосно демонтиран и просторот конечно ќе се ослободи за користење. По отстранувањето, Општината ќе пристапи кон уредување на локацијата со современа урбана опрема, зелени површини и ново, модерно детско катче.

Со овој чекор, тревникот повторно ќе стане пријатно, безбедно и заедничко место за рекреација, игра и дружење – токму онака како што заслужуваат жителите на Аеродром“ – се вели во соопштението на Општина Аеродром.

The post СЕ ДЕМОНТИРА ДИВОГРАДБА ПОКРАЈ „КАПИТОЛ МОЛ“ ВО АЕРОДРОМ На негово место ќе има игралиште за деца appeared first on plusinfo.mk.

Основното јавно обвинителство Струга оформило предмет во врска со уривањето на спомен-куќата на Владо Малески, при вршење градежни работи во близина на објектот од страна на лице од Велешта.

Јавен обвинител, како што соопшти денеска Основнот јавно обвинителство, на 16 октомври извршил увид на лице место во присуство на вешто лице од градежната струка.

„Наредено е вештачење, а се преземаат и други дејствија за испитување на околностите под кои се случил настанот“, се вели во соопштението на ОЈО.

При изведба на градежни работи на индивидуален објект во старото градско јадро беше срушен јужниот ѕид и дел од кровната конструкција од куќа заштитена како културно наследство.

Министерот за култура Зоран Љутков најави изработка на проект за обнова и реставрација на спомен куќата на Малевски со цел да се зачува автентичниот изглед и историјскиот дух.

The post ОФОРМЕН ПРЕДМЕТ ЗА УРИВАЊЕТО НА СПОМЕН-КУЌАТА НА ВЛАДО МАЛЕСКИ Обвинител од Струга извшил увид и наредил вештачење appeared first on plusinfo.mk.

Левица објавува нови сомнежи за работењето на контроверзниот универзитет на Рамиз Мерко во Струга.

„Станува збор за објектите во кој е сместен Меѓународниот универзитет Струга, формално во сопственост на блискиот соработник на Рамиз Мерко, Армен Кадриу. Сомнежите се дека овие бесправно изградени објекти биле легализирани со Решение за легализација во 2012 година (иако факултетот постои од 2009 г.) Скандалозното е што објектите во кои е сместен универзитетот се легализирани како семејни куќи (А1), наместо како објекти со намена-образование. Со други зборови, контроверзниот факултет на градоначалникот во заминување урбанистички е заведен како семејна куќа. Со ваквата легализација, Мерко ја оштетил општина Струга (каде тогаш бил власт) со неплатени комуналии од дури 90.000 евра“, се наведува во соопштението од Левица.

Левица ја прашува министерката за образование Весна Јаневска зошто молчи по спроведениот инспекциски надзор во овој универзитет и дали се работи за предизборни договори и пазарења помеѓу ВМРО-ДПМНЕ и Рамиз Мерко?

Левица ги повикува надлежните институции да ги испитаат сомнежите дали овој универзитет впрочем е легализирана дивоградба како „семејна куќа“, како и да се провери дали оваа образовна установа има одобрен ПП елаборат, одобрена техничка документација и дали постои одобрен проект за образование со потребните елаборати и согласности.

„ВМРО-ДПМНЕ и Мицкоски повеќе од една година се централна власт и токму тие се најповикани да стават крај на незаконитостите на струшкиот универзитет. Наместо Мицкоски да шири празни флоскули дека расчистува со криминалот на ДУИ, време е неговите министри да преземат реални акции за откривање и санкционирање на бруталното безаконие, кое позади себе го остави токму Рамиз Мерко“, порачуваат од Левица.

The post ЛЕВИЦА ПРАШУВА ДАЛИ УНИВЕРЗИТЕТОТ НА МЕРКО ИМАЛ НАМЕНА „СЕМЕЈНА КУЌА“ Ако е така, ја оштетил државата со 90.000 евра неплатени комуналии, пресметала партијата appeared first on plusinfo.mk.