Вкупниот обем на работењето на Групација Триглав во однос на првото тримесечје од минатата година се зголеми за 14 проценти, на 633,4 милиони евра, при што главно влијание имаше силниот раст на премиите на меѓународните пазари, соопшти Групацијата.

Деловниот резултат пред оданочување изнесуваше 49,3 милиони евра (54,3 милиони евра минатата година), а нето деловниот резултат 39,8 милиони евра (46,1 милион евра минатата година). Имајќи ги предвид очекуваните услови за работење до крајот на годината, Триглав проценува дека во 2026 година ќе го оствари планираниот годишен деловен резултат пред оданочување, во износ од 170 до 190 милиони евра.

Комбинираниот количник изнесуваше 93,0 проценти (минатата година 88,5 проценти), додека профитабилноста од нови склучени договори во сегментот Живот изнесуваше 14,8 проценти (минатата година 11,7 проценти). Годишниот поврат на капитал изнесуваше 15,6 проценти (минатата година 19,8 проценти).

Информација за работењето на Групација Триглав во првото тримесечје од 2026 година

Триглав во првото тримесечје ја потврдува својата прогноза за годишниот деловен резултат за 2026 година

Групација Триглав, во предизвикувачките услови оваа година, одржува стабилно и успешно работење.

Вкупниот обем на работењето на Групација Триглав во однос на првото тримесечје од минатата година (во понатамошниот текст: минатата година) се зголеми за 14 проценти, на 633,4 милиони евра, при што главно влијание имаше силниот раст на премиите на меѓународните пазари.

Деловниот резултат пред оданочување изнесуваше 49,3 милиони евра (54,3 милиони евра минатата година), а нето деловниот резултат 39,8 милиони евра (46,1 милион евра минатата година). Имајќи ги предвид очекуваните услови за работење до крајот на годината, Триглав проценува дека во 2026 година ќе го оствари планираниот годишен деловен резултат пред оданочување, во износ од 170 до 190 милиони евра.

Комбинираниот количник изнесуваше 93,0 проценти (минатата година 88,5 проценти), додека профитабилноста од нови склучени договори во сегментот Живот изнесуваше 14,8 проценти (минатата година 11,7 проценти). Годишниот поврат на капитал изнесуваше 15,6 проценти (минатата година 19,8 проценти).

На крајот на тримесечјето, адекватноста на капиталот беше во целниот опсег, кој е поставен меѓу 200 и 250 проценти.

Предлог-дивидендата за 2026 година изнесува 3,00 евра бруто по акција, односно вкупно 68,2 милиони евра, што е за 7 проценти повеќе од минатата година. Во согласност со политиката за дивиденди, тоа претставува половина од нето консолидираната добивка во 2025 година. Предвидениот датум за исплата на дивидендата е 17-ти јуни, 2026 година. Годинешното Собрание на акционери ќе се одржи на 2-ри јуни, 2026 година.

Претседателот на Управата на Заваровалница Триглав, Андреј Слапар, изјави:

„Задоволни сме од остварените тримесечни резултати; остваривме деловен резултат пред оданочување во износ од 49,3 милиони евра и, имајќи ги предвид очекуваните услови до крајот на годината, проценуваме дека оваа година ќе ја достигнеме неговата планирана висина.

Нашето работење во првото тримесечје од оваа година се одвиваше во попредизвикувачки услови отколку минатата година, главно поради нестабилните услови на финансиските пазари и нешто поголемите природни масовни штети. Во сегментот осигурување одржавме стабилно и профитабилно работење. Во инвестицискиот дел, бевме изложени на волатилноста на финансиските пазари, па со дополнително внимание управувавме со ризиците и со инвестициското портфолио. Успешно ја задржавме нашата капитална моќ и финансиска стабилност.

Во согласност со стратегијата, дополнително го зголемивме обемот на работење и неговото учество надвор од Словенија. На меѓународните пазари на осигурување, соработуваме со бројни партнери и динамично се приспособуваме на можностите и околностите, што може да придонесе обемот на работење да биде нестабилен од година во година.

Оваа година, му предлагаме на Собранието на акционери да исплати дивиденда која е во согласност со нашата одржлива политика за дивиденди. На тој начин, исто така, ја следиме нашата посветеност кон создавање вредност за акционерите.

Остануваме фокусирани на остварување на нашите стратешки амбиции. Би сакал да им се заблагодарам на нашите вработени, кои со својата посветеност и стручност значително придонесуваат за нивна реализација.“

Клучни индикатори за работењето во првото тримесечје од 2026 година (во милиони евра)

Триглав го зголеми својот вкупен обем на работење за 14 проценти, на 633,4 милиони евра. Пресметаната бруто полисирана премија од осигурување се зголеми за 15 проценти, на 612,1 милиони евра.

Што се однесува до деловните сегменти , најголем раст на деловниот обем, од 29 проценти, оствари сегментот Имот (412,1 милиони евра), главно поради високиот раст на премиите на меѓународните пазари. Обемот на работење на сегментот Реосигурување изнесуваше 104,8 милиони евра, што е за 12 проценти помалку отколку во истиот период минатата година, главно поради меѓугодишни флуктуации при обновувањето на одредени договори за реосигурување. Сегментот Живот оствари 68,5 милиони евра обем на работење, што е за 2 проценти помалку од минатата година; при висок раст на класичното животно осигурување на сите пазари, врз вкупниот обем на работење главно влијаеше падот на премиите кај животните осигурувања поврзани со инвестициски фондови. Сегментот Здравје го зголеми обемот на работење за 14 проценти, на 17,6 милиони евра, додека сегментот Управување со средства забележа раст од 2 проценти, на 30,3 милиони евра.

Триглав, во согласност со своите стратешки амбиции, го зајакна обемот на работење надвор од Словенија. Учеството на словенечкиот пазар се намали на 48 проценти (минатата година 55 проценти), учеството на пазарите во регионот Адриа, без Словенија, изнесуваше 17 проценти (минатата година 18 проценти), а учеството на меѓународните пазари порасна на 35 проценти (минатата година 28 проценти). Од тоа, 19 проценти од работењето беше остварено на меѓународните пазари на осигурување, а 17 проценти на меѓународните пазари на реосигурување.

Триглав го зголеми обемот на работење на сите пазари во регионот Адриа, освен во Црна Гора, каде што дојде до меѓугодишно колебање при обновувањето на одредени договори. На словенечкиот пазар растот изнесуваше 1 процент, а на останатите пазари во регионот Адриа 8 проценти. На меѓународните пазари на осигурување, обемот на работење порасна за 257 проценти, на 117,4 милиони евра, од кои 78 проценти беа остварени на италијанскиот пазар. На меѓународните пазари на реосигурување, обемот на работење се намали за 12 проценти, на 104,9 милиони евра.

Деловниот резултат пред оданочување на Групација Триглав изнесуваше 49,3 милиони евра (54,3 милиони евра минатата година), а нето деловниот резултат изнесуваше 39,8 милиони евра (46,1 милион евра минатата година). Врз деловниот резултат влијаеја зголемениот обем на работење, нешто понискиот инвестициски резултат и зголемениот број штети, како и поголемиот обем на масовни природни штети. Проценето е дека трите масовни штетни настани предизвикани од природни непогоди, чинеле 7,1 милион евра (2,0 милиони евра минатата година); невремињата во Словенија предизвикаа штета од 5,1 милион евра, а проценетите масовни штетни настани предизвикани од природни непогоди од реосигурување изнесуваа 2,0 милиони евра.

Триглав работеше профитабилно во сите сегменти, освен во сегментот Здравје. Најголемиот дел од деловниот резултат пред оданочување го оствари во осигурителниот дел од работењето. Неговата висина од 40,4 милиони евра е споредлива со минатогодишната, додека својот резултат го подобрија сегментите Имот и Живот. Деловниот резултат пред оданочување од инвестицискиот дел изнесуваше 7,4 милиони евра (минатата година 9,2 милиони евра), а во неосигурителната дејност 1,5 милиони евра (минатата година, исто така поради влијанието на еднократни настани, изнесуваше 4,7 милиони евра). Матичното друштво на Групација Триглав, Заваровалница Триглав, оствари деловен резултат пред оданочување од 30,7 милиони евра (минатата година 39,5 милиони евра) и нето деловен резултат од 25,0 милиони евра (минатата година 33,0 милиони евра).

Другиот сеопфатен принос изнесуваше -13,8 милиони евра (минатата година -1,4 милиони евра), а неговата пониска вредност е последица на влијанието на геополитичките превирања, што се одрази врз промените на каматните стапки и нивното влијание, пред сè, врз ревалоризацијата на инвестициите на крајот на тримесечјето. Капитализацијата на Групација Триглав на крајот на првото тримесечје беше во целниот опсег, кој е поставен меѓу 200 и 250 проценти.

Комбинираниот количник достигна поволна вредност од 93,0 проценти (минатата година: 88,5 проценти), а на споредлива основа, односно без влијанието од работењето на нашиот партнер Prima Assicurazioni на италијанскиот пазар, кое започна во јуни минатата година, изнесуваше 88,2 проценти. Количникот на природни масовни штети се зголеми повеќе од двојно, од 0,6 на 1,4 проценти. Штетниот количник се зголеми за 5,5 процентни поени, а неговиот раст беше присутен во сите три сегменти, односно во Имот, Реосигурување и Здравје, при што кај последниот беше најизразен. Расходниот количник се намали за 1,0 процентен поен, на 24,0 проценти, бидејќи растот на приходите беше поголем од растот на трошоците. Триглав на сите пазари во регионот Адриа ја подобри или ја одржа веќе поволната профитабилност на осигурителниот дел од работењето.

Вкупните средства под управување според составот останаа на споредливо ниво како на крајот од минатата година. Нивниот обем изнесуваше 6,2 милијарди евра, што е за 2 проценти помалку отколку на крајот од 2025 година. Врз вредноста на инвестициското портфолио негативно влијаеше зголемувањето на потребните приноси на обврзниците и падот на индексите на меѓународните берзи. Приносот на финансиските вложувања, без вложувањата во корист на осигурениците кои го преземаат инвестицискиот ризик, изнесуваше 2,2 процентни поени, што е за 0,4 процентни поени помалку од минатата година. Врз него позитивно влијаеја повисоките приходи од камати, додека нестабилните услови на финансиските пазари негативно влијаеја врз приносот од портфолиото на акции.

Работењето на групацијата триглав по сегменти

Членот на Управата на Заваровалница Триглав, Урош Иванц, изјави:

„Работењето во сите сегменти и понатаму го развиваме во согласност со стратегијата. Сегментот Имот останува клучен носител на растот, воден и од проширувањето на меѓународните пазари на осигурување. Во првото тримесечје го зајакнавме обемот на работење на овој сегмент и ја одржавме неговата профитабилност. Врз нешто понискиот деловен резултат на сегментот, влијаеја зголемените барања за надомест на штета поради влијанието на меѓународното работење и поголемиот обем на природни масовни штетни настани, додека врз инвестициското работење и вредноста на портфолиото влијаеја нестабилните услови на финансиските пазари.

Стратешки го зајакнуваме реосигурувањето, поради што сега го следиме како независен сегмент. Неговиот обем на работење е незначително намален во однос на истиот период минатата година, поради динамиката на работењето со одредени партнери, додека ја задржавме поволната профитабилност и го зголемивме неговиот деловен резултат.

Сегментите Живот и Управување со средства остануваат стабилни, но врз нивните резултати во ова тримесечје, влијаеја неповолните услови на финансиските пазари. Покрај тоа, сегментот Живот забележа раст на пазарите надвор од Словенија и поголема профитабилност од нови склучени договори, додека сегментот Управување со средства забележа стабилен раст на приходите од провизии.

Сегментот Здравје останува во интензивна фаза на развој и постепено градење доволна големина на портфолиото. Како што се очекуваше, во ова тримесечје беше остварен негативен деловен резултат.“

Сегмент Имот

• Вкупниот обем на работење е зголемен за 29 проценти, на 412,1 милиони евра.
• Комбинираниот количник изнесуваше поволни 92,7 проценти (минатата година 88,0 проценти).
• Деловниот резултат пред оданочување достигна 34,1 милион евра, што е за 6 проценти помалку од минатата година.

Вкупниот обем на работење се зголеми за 29 проценти, на 412,1 милион евра, а премијата за осигурување за 31 процент, со раст остварен кај повеќето видови имотни осигурувања. Од пазарна перспектива, раст од 257 проценти беше остварен на меѓународните пазари, каде што најголем обем беше пресметан на италијанскиот пазар (91,5 милиони евра). Во Словенија премиите пораснаа за 3 проценти, додека на останатите пазари во регионот Адриа пораснаа за 6 проценти.

Настанатите штети се зголемија за 111 проценти, на 254,5 милиони евра, главно поради растот на пријавените штети од зголеменото меѓународно портфолио и настаните со природни масовни штети. Количникот на природни масовни штети порасна на 1,2 проценти од минатогодишното нулто ниво.

Комбинираниот количник на сегментот Имот изнесуваше поволни 92,7 проценти. Во споредба со првото тримесечје од минатата година, се зголеми за 4,7 процентни поени, главно поради повисокиот штетен количник, кој е резултат на растот на пресметаните штети и полошиот резултат од реосигурување. Расходниот количник се намали, главно поради поголемиот раст на приходите во однос на трошоците и подобрениот развој на нето штетните настани. Без работењето на италијанскиот пазар преку Prima, комбинираниот количник би изнесувал 86,1 процент, што е за 1,9 процентни поени подобро од минатата година.

Деловниот резултат пред оданочување се намали за 6 проценти, на 34,1 милиони евра. Резултатот од осигурителниот дел од работењето значително се зголеми, главно поради поголемиот обем на работење и променетата структура на портфолиото. Истовремено, инвестицискиот резултат е намален, главно поради нереализираните загуби од финансиските средства (намалување на пазарната вредност на постојните инвестиции), и покрај повисоките приходи од камати.

Вкупниот обем на работење се намали за 12 проценти, на 104,8 милиони евра; премиите за осигурување исто така се движеа слично, главно поради меѓугодишни флуктуации во работењето со одредени поголеми партнери.

Комбинираниот количник на сегментот Реосигурување достигна поволни 87,5 проценти, што претставува зголемување од 1,4 процентни поени во однос на минатата година. Ова главно е последица на повисокиот штетен количник поради послабиот резултат од реосигурување, додека расходниот количник се намали како последица на побрзиот раст на приходите во однос на трошоците. Количникот на природни масовни штети се намали за 0,1 процентен поен, на 3,2 проценти.

Деловниот резултат пред оданочување се зголеми за 8 проценти, на 8,7 милиони евра. Резултатот од осигурителниот дел од работењето беше нешто понизок од минатата година, додека деловниот резултат од инвестицискиот дел беше поповолен поради позитивните курсни разлики од финансиските инвестиции.

Сегмент Живот

• Вкупниот обем на работење изнесуваше 68,5 милиони евра, што е за 2 проценти помалку од минатата година.
• Профитабилноста од нови склучени договори изнесуваше поволни 14,8 проценти (минатата година 11,7 проценти). Маржата на договорeни услуги (CSM) се зголеми за 3 проценти, на 295,0 милиони евра.
• Деловниот резултат пред оданочување изнесуваше 6,8 милиони евра, што е за 6 проценти помалку од минатата година.

Вкупниот обем на работење во износ од 68,5 милиони евра се намали за 2 проценти, како и премијата за животни осигурувања. Покрај високиот раст на класичните животни осигурувања, врз вкупниот обем на работење главно влијаеше падот на премијата кај животното осигурување поврзано со инвестиции, што е резултат на различната динамика на продажните активности во банкарскиот дистрибутивен канал.

Профитабилноста од нови склучени договори се зголеми за 3,0 процентни поени, на поволни 14,8 проценти, главно поради поголемиот обем на премии од новосклучени ризични животни осигурувања, кои имаат повисок принос од животните осигурувања поврзани со инвестиции.

Маржа на договорени услуги (CSM) во износ од 295,0 милиони евра, односно очекуваната идна добивка од веќе склучените договори за осигурување, се зголеми за 3 проценти, главно поради подобрената проценка на идните парични текови од постојното портфолио на осигурување.

Новосоздадената маржа на договорени услуги (CSM), односно очекуваната идна добивка од новосклучените договори за осигурување, претставува 4,1 процент од вкупната маржа на договорени услуги и се зголеми за 0,5 процентни поени. Нејзината вредност изнесуваше 12,0 милиони евра, од кои 39 проценти претставуваат капитални животни осигурувања. Ослободувањето на маржата на договорени услуги во деловниот резултат, односно постепеното признавање на оваа добивка со текот на времето, изнесуваше 10,6 милиони евра, во споредба со 9,3 милиони евра во истиот период минатата година.

Деловниот резултат пред оданочување на сегментот Живот се намали за 6 проценти, на 6,8 милиони евра. Деловниот резултат од работењето во осигурување се зголеми за 5 проценти, главно поради растот на пазарите надвор од Словенија. Резултатот од инвестицискиот дел се намали за 20 проценти, што е последица на намалувањето на вредноста на сопственичките вложувања поради состојбата на финансиските пазари.

Сегмент Здравје

По реструктурирањето на деловниот модел на сегментот во 2024 година, Триглав продолжува со активности за раст и развој на дополнителното здравствено осигурување во Словенија и на другите пазари во регионот. Се очекува работењето на сегментот Здравје да остане нестабилно и во иднина, бидејќи сегментот се наоѓа во фаза на висок раст и сè уште има релативно мал деловен обем.

Вкупниот обем на работење се зголеми за 14 проценти, на 17,6 милиони евра, а исто така се зголеми и премијата. Нејзиниот раст е остварен на повеќето пазари.

Комбинираниот количник на сегментот Здравје изнесуваше 130,2 проценти, додека во истиот период минатата година изнесуваше 111,6 проценти. Растот, главно е последица на повисокиот штетен количник.

Деловниот резултат пред оданочување изнесуваше -3,7 милиони евра (минатата година -1,1 милион евра). Негативниот резултат на сегментот главно произлегува од работењето со осигурување, врз кое влијаеја растот на настанатите штети поради поголемиот обем на портфолиото, бројот на барања за надомест на штета и повисоките цени кај давателите на здравствени услуги.

Сегмент управување со средстева

Вкупниот обем на работење се зголеми за 2 проценти, на 30,3 милиони евра. За растот придонесоа поголемиот обем на полиси за доброволно пензиско осигурување и повисоките приходи од управување со средства, односно провизии.

Деловниот резултат пред оданочување се намали за 10 проценти, на 3,3 милиони евра. За резултатот придонесоа за 6 проценти повисоките провизии и негативниот резултат од инвестицискиот дел, кој е резултат на повисоки резервации за случаи кога не се остварува гарантираниот принос кај одредени полиси за осигурување.

Вкупните средства под управување на Групација Триглав изнесуваа 6,2 милијарди евра на крајот на првиот квартал, што е за 2 проценти помалку отколку на крајот од 2025 година.

ПЛАН ЗА 2026 ГОДИНА И СТРАТЕГИЈА ДО 2030 ГОДИНА

(финансиски индикатори)

Деловен резултат пред оданочување:

• План за 2026 година: меѓу 170 и 190 милиони евра (во моментот на потврдување на проценката во првото тримесечје).
• Стратегија до 2030 година: од 250 до 300 милиони евра.

Вкупен деловен обем:

• План за 2026 година: над 2,4 милијарди евра.
• Стратегија до 2030 година: меѓу 2,5 и 3,0 милијарди евра.

Средства под управување:

Стратегија до 2030 година: над 10 милијарди евра.

Комбиниран количник:

• 2026 година: околу 95 проценти.
• Стратегија до 2030 година: под 95 проценти во стратешкиот период.

Поврат на капитал (ROE):

Стратегија до 2030 година: меѓу 12 и 13 проценти во 2030 година.

За повеќе информации обратете се во Службата за маркетинг и односи со јавност, Триглав Осигурување, бул. 3-та Македонска Бригада, бр. 36, 1000 Скопје, e-mail: pr@triglav.mk, web: www.triglav.mk.

Групација Триглав, со своето знаење, искуство и финансиска стабилност, веќе 125 години ја оправдува довербата на клиентите и другите засегнати страни. Таа е најголемата осигурителна и финансиска групација во регионот Адриа и една од водечките во југоисточна Европа, работи во шест земји и на седум пазари, а на меѓународно ниво е присутна преку партнерства со посреднички, застапнички и реосигурителни компании. Клучните столбови на нејзиното работење се осигурувањето и управувањето со средства. Групацијата има повеќе од 5.000 вработени. Нејзината мисија е градење на побезбедна иднина. Главните вредности на групацијата се агилност, едноставност и доверливост. Нејзината визија е насочена кон зајакнување на својот идентитет и видливост како меѓународна осигурителна и финансиска групација. Со одржлив деловен пристап, Триглав создава развојно ориентирана средина за своите вработени, гради силни партнерства и претставува стабилна, сигурна и профитабилна инвестиција за инвеститорите. Матичната компанија на Групација Триглав, Заваровалница Триглав, е издавач на примарниот пазар на Љубљанската берза.

Целиот извештај на следниот ЛИНК.

The post ГРУПАЦИЈАТА „ТРИГЛАВ“’ ВО ПРВОТО ТРИМЕСЕЧЈЕ ЈА ПОТВРДУВА СВОЈАТА ПРОГНОЗА ЗА ГОДИШНИОТ ДЕЛОВЕН РЕЗУЛТАТ ЗА 2026 ГОДИНА Во предизвикувачки услови одржува стабилно и успешно работење appeared first on plusinfo.mk.

Со стабилни продажни резултати и зајакната позиција на домашниот фармацевтски пазар, „Реплек АД Скопје“ ја стартува 2026 година. Во првиот квартал од годинава компанијата оствари вкупни продажби во сегментот Фармација од 7,2 милиони евра, при што домашниот пазар бележи изразен раст од 20%. На акционерското Собрание кое се одржа на почетокот на април беше донесена одлука за зголемување на дивидендата за 25%, а сите останати предложени одлуки беа едногласно усвоени, што претставува потврда за довербата на акционерите во стратегијата за управувањето со компанијата.

Од вкупните продажби, пет милиони евра се реализирани на странските пазари, додека 2,2 милиони евра се остварени на домашниот пазар. Овој значаен раст на домашниот пазар од 20% е резултат на зголемената побарувачка за дел од клучните производни линии, како и на континуираното зајакнување на пазарната позиција на компанијата, што дополнително ја потврдува довербата кај потрошувачите и партнерите.

– Остварените деловни резултати во првиот квартал ја потврдуваат стабилноста на нашето работење, при што особено нè охрабрува растот на домашниот пазар. Двоцифрената стапка на раст е резултат на континуираното унапредување на портфолиото, инвестициите во иновации, модернизацијата на производствените капацитети, како и зајакнувањето на односите со партнерите и пациентите. И натаму ќе останеме силно посветени и на странските пазари, зголемувањето на извозот и на освојувањето нови пазари. Одлуката за зголемување на дивидендата е потврда за стабилната финансиска позиција на ‚Реплек’ и на нашата посветеност кон создавање силна вредност за акционерите – изјави Душан Пецовски, генерален директор на „Реплек“.

Во текот на првиот квартал дел од извозните активности се одвиваа со изменета динамика, пред сè како резултат на глобалните предизвици во синџирите на снабдување, што во комбинација со геополитичките фактори доведе до поместување на дел од планираните испораки кон почетокот на вториот квартал и беше причина за благо намалување на продажбите во странство за околу осум отсто. Притоа, побарувачката на клучните извозни пазари останува стабилна, а компанијата продолжува со реализација на договорените активности согласно утврдената динамика. Извозните пазари и натаму имаат доминантно учество од околу 75% во вкупните приходи, додека домашниот пазар учествува со приближно 25%, што обезбедува стабилност и диверзификација на приходите.

Акционерите на „Реплек“ годинава ќе добијат дивиденда во бруто износ од 500 денари по акција, што претставува зголемување за 25% во однос на претходната година и е над нивото предвидено со дивидендната политика. Оваа, заедно со сите други предложени одлуки од Управниот одбор на компанијата беа усвоени едногласно од акционерите, што е јасна потврда за нивната доверба во стратегијата и управувањето со компанијата.

Компанијата продолжува со реализација на својата стратегија за долгорочен раст и ќе остане посветена на проширување на присуството на меѓународните пазари, со зајакнување на регулаторното присуство преку нови регистрациски постапки на тие пазари. Фокус ќе биде ставен и на развој на нови производи, унапредување на производствените капацитети и континуирана модернизација, како и дигитализација и оптимизација на деловните процеси. Сите натамошни активности ќе имаат за цел да обезбедат одржлив раст на приходите и профитабилноста на среден и долг рок, како и дополнително зајакнување на конкурентската позиција на компанијата.

The post „РЕПЛЕК“ СО РАСТ НА ДОМАШНИОТ ПАЗАР ОД 20% ВО ПРВИОТ КВАРТАЛ ОД ГОДИНАВА Дивидендата зголемена за 25% appeared first on plusinfo.mk.

Комерцијална банка АД Скопје на 27.3.2026 година го одржа своето редовно Годишно собрание на акционери.

Акционерите потврдија дека Банката ја заврши 2025 година со бруто-добивка во износ од 5.632,5 милиони денари. По пресметување на данокот на добивка од 555,2 милиони денари (9 милиони евра), нето-добивката на Банката изнесува 5.077,3 милиони денари (82,5 милиони евра).

Акционерите на Банката донесоа Одлука за употреба и распоредување на нераспределената добивка во износ од 5.077,3 милиони денари и ја утврдија дивидендата за обичните акции во висина од 135% од номиналната вредност на акцијата, односно по 1.350 денари на една акција. Исплатата на дивиденда ќе започне на 4.5.2026 година.

Поради зголемување на вкупниот капитал на Банката и на книговодствената вредност на акциите на Банката, акционерите одлучија дел од добивката во износ од 1.600,5 милиони денари да се издвои во резерви. Дел од добивката во износ до 400 милиони денари се распределува во задржана добивка за инвестициски вложувања во 2026 година, која исто така го зголемува вкупниот капитал на Банката.

Собранието ги усвои финансиските извештаи и консолидираните финансиски извештаи, Годишната сметка на Банката и Консолидираната годишна сметка на Банката за 2025 година и Годишниот извештај за работењето на Банката во 2025 година.

The post ДОБИВКА ОД 82,5 МИЛИОНИ ЕВРА ЗА КОМЕРЦИЈАЛНА БАНКА ЗА 2025 ГОДИНА Банката го одржа годишното собрание на акционери appeared first on plusinfo.mk.

Управниот одбор на АЛКАЛОИД АД Скопје на седницата одржана на ден 26.02.2026 година донесе Предлог-Одлука со која му предлага на Собранието на акционери исплата на дивиденда за 2025 година во износ од 720,00 денари бруто односно 648,00 денари нето по акција, што во однос на исплатената дивиденда по акција за претходната година од 630,00 денари бруто односно 567,00 денари нето е поголема за 14,3%.

За исплатата на дивиденда и персонален данок на личен доход компанијата ќе издвои над 1 милијарда денари.

Во согласност со предлог одлуката, исплатата на дивидендата ќе започне од 13.05.2026 година.

АЛКАЛОИД АД Скопје објави дека седницата на годишното Собрание на акционери на Друштвото ќе се одржи на ден 30.03.2026 година со почеток во 08:00 часот во деловните простории на Друштвото, Бул. Александар Македонски бр. 12, Скопје, Република Северна Македонија.

The post АЛКАЛОИД АД ЌЕ ИСПЛАТИ ЗА 14,3% ПОГОЛЕМА ДИВИДЕНДА ОД ЛАНИ За исплатата на дивиденда и данок на доход се предвидени над милијарда денари appeared first on plusinfo.mk.

Американскиот претседател Доналд Трамп денеска најави дека федералната влада ќе им исплати „дивиденда“ на граѓаните од најмалку 2.000 долари по лице. Според неговата објава на платформата Truth Social, само граѓани со високи приходи ќе бидат исклучени од оваа мерка, без да наведе кога точно ќе почне исплатата.

Во истата објава, Трамп ја пофалил економијата на САД и изјавил дека новите царини ќе донесат „трилиони долари“ кои, според него, ќе можат да се искористат за намалување на државниот долг.

„Луѓето кои се против царините се будали!“, напиша тој, додавајќи дека САД се „најбогатата и најпочитуваната земја во светот“, со „речиси никаква инфлација и рекорден берзански индекс“.

Претседателот и порано зборувал за идејата владата да им исплаќа пари на граѓаните, но досега не ја реализирал. Според економските аналитичари, мерката би можела да има силен политички ефект во пресрет на изборната кампања за 2026 година.

The post СИТЕ ОСВЕН БОГАТИТЕ АМЕРИКАНЦИ ЌЕ ДОБИЈАТ ПО 2.000 ДОЛАРИ Трамп вели дека парите се плод од новите царини appeared first on plusinfo.mk.

Првиот квартал од 2025 година Реплек АД го заврши со раст на приходите од продажба во сегментот Фармација од 26%, во споредба со истиот период во 2024. Со ваквиот резултат, компанијата го надмина бизнис планот за овој период од тековната година за 2,5%.

Од 1 јануари до 31 март 2025 година, Реплек АД реализираше приходи од продажба во фармацевтскиот сегмент во висина од 7,8 милиони евра, од кои 1,8 милиони евра отпаѓаат на домашниот и 6 милиони евра на странските пазари. Овие податоци покажуваат дека во споредба со првиот квартал лани, на домашниот пазар е остварен значителен раст од 61,4%, а на меѓународните пазари од 18,2%.

– Горди сме на високиот раст во првиот квартал од 2025, кој е уште една потврда за континуитетот на исклучителните финансиски резултати и најава за уште една успешна година на нашата компанија. Цврсто сме посветени на иновациите во фармацевтската индустрија и на проширувањето на производното портфолио, активно вложувајќи во технолошки напредок, оптимизација на производството и целосна дигитална трансформација. Можам да најавам значителни новини во овој правец годинава, кои ќе донесат нова вредност за потрошувачите, за нашиот тим и за акционерите на Реплек – изјави Душан Пецовски, главен и извршен директор на Реплек АД.

Реплек останува посветен и на транспарентната и одговорна политика кон своите акционери. Во согласност со објавената дивидендна политика, Управниот одбор на Реплек АД поднесе предлог-одлука за распределба на добивка, која ќе биде разгледана на претстојното собрание на акционери на 16 април 2025 година. Предлогот предвидува распределба на бруто дивиденда за финансиската 2024 година во износ од 400 денари по акција, што претставува зголемување од 33% во однос на дивидендата исплатена за 2023 година.

The post РЕПЛЕК ЌЕ ИСПЛАТИ ДИВИДЕНДА ЗА 2024 ГОДИНА Првиот квартал од 2025 година е со висок раст на приходите appeared first on plusinfo.mk.

Комерцијална банка АД Скопје на 3.4.2025 година го одржа своето редовно Годишно собрание на акционери. Акционерите потврдија дека Банката ја заврши 2024 година со бруто-добивка во износ од 5.482,1 милиони денари. По пресметување на данокот на добивка од 557,3 милиони денари, нето-добивката на Банката изнесува 4.924,8 милиони денари, односно 80 милиони евра, соопшти банката.

Акционерите донесоа Одлука за употреба и распоредување на нераспределената добивка во износ од 4.924,8 милиони денари и ја утврдија дивидендата за обичните акции во висина од 125% од номиналната вредност на акцијата, односно по 1.250 денари на една акција. Исплатата на дивиденда ќе започне на 7.5.2025 година. Заради зголемување на вкупниот капитал на Банката и на книговодствената вредност на акциите на Банката, акционерите одлучија дел од добивката во износ од 1.915,5 милиони денари да се издвои во резерви. Дел од добивката во износ до 160 милиони денари се распределува во задржана добивка за инвестициски вложувања во 2025 година, која исто така го зголемува вкупниот капитал на Банката“, соопшти Комерцијална банка.

Собранието ги усвои финансиските извештаи и консолидираните финансиски извештаи, Годишната сметка и Консолидираната годишна сметка на Банката за 2024 година и Годишниот извештај за работењето, се додава во соопштението.

The post ДОБИВКАТА НА КОМЕРЦИЈАЛНА БАНКА ЗА ЛАНИ Е 80 МИЛИОНИ ЕВРА Акционерите ќе добијат дивиденда во мај appeared first on plusinfo.mk.

Полицијата му поднесе кривична пријава за делото измама при работењето со хартии од вредност и удели.

„Одделот за сузбивање на организиран и сериозен криминал, единица за финансиски криминал во соработка со Одделот за криминалистичка полиција, поднесе кривична пријава против Ф.Е. од Скопје, поради основано сомнение за сторено кривично дело „измама при работењето со хартии од вредност и удели по член 275 став 3 од Кривичниот законик. Пријавениот во својство на член на надзорен одбор на банка од Скопје, злоупотребил внатрешна информација која се однесува на висината на дивидендата за 2023 година, која како член на надзорен одбор ја дознал во текот на 2024 година. На тој начин користејќи ја ценовно чувствителната информација истиот се стекнал со 500 обични акции, по просечна цена на чинење на акција од 16.400 денари или вкупно за акциите платил 8.200.000 денари“, соопшти полицијата.

Кривично пријавениот, се додава во соопштението, сензитивните информации ги пренел и на трети лица, поточно, на членови на негово потесно семејство.

„И тие ја искористиле информацијата на начин што купиле 701 акција на банката, по цена пониска од цената која што ја достигнала хартијата од вредност. Односно, за акциите бил платен вкупен износ од 11.520.967 денари, а тоа овозможило да се стекнат со вкупна корист од 639.000 денари по основ на ценовната промена на акцијата, како и вкупно 646.100 денари по основ на дивиденда. Со ова лицето Ф.Е прибавил противправна имотна корист за себе и за членовите на неговото семејство и на тој начин сторил кривично дело измама при работењето со хартии од вредност“, соопшти полицијата.

The post ЗЛОУПОТРЕБИЛ ЧУВСТВИТЕЛНА ИНФОРМАЦИЈА И СИ КУПИЛ ПОЕВТИНИ АКЦИИ Банкар доби кривична пријава за измама appeared first on plusinfo.mk.

Вкупниот бруто износ определен за дивиденда е 2.212.067.762 денари ( 35,97  милиони евра) или секој акционер со право на дивиденда ќе добие по  25,65 денари по акција бруто (со сите даноци).

Право на дивиденда, според соопштеното, имаат сите акционери кои се евидентирани во Книгата на акционери на Македонски Телеком 12.7.2024 година.

„ Последен ден на тргување со право на дивиденда за 2023 година е 10.07.2024 година, додека прв ден на тргување без право на дивиденда за 2023 година е 11.07.2024 година. Исплатата на дивидендата ќе почне на 26.9. 2024 година“, се наведува во соопштението.

Според процентот кој го поседуваат во акции најголем дел од парите ќе одат за „Дојче Телеком“ односно неговата фирма „Камени мост комуникации“ која поседува 55% од акциите. Кај него ќе завршат повеќе од  19,8 милиони евра во бруто износ.

Како втор по големина акционер со 35% од акциите државата ќе добие дивиденда во износ од повеќе од 12,6 милиони евра бруто.

Во Телеком има о повеќе од 3.300 акционери домашни физички лица. Ним им остануваат за распределба 720.000  бруто.

The post МАКЕДОНСКИ ТЕЛЕКОМ ЌЕ ПОДЕЛИ 35,9 МИЛИОНИ ЕВРА ДИВИДЕНДА Колку ќе добие државата која поседува 35% од акциите? appeared first on plusinfo.mk.

Акционерите на Банката донесоа Одлука за употреба и распоредување на нераспределената добивка во износ од 3.581,4 милиони денари и ја утврдија дивидендата за обичните акции во висина од 91% од номиналната вредност на акцијата, односно 910 денари за една акција. Исплатата на дивиденда ќе започне на 25.04.2024 година.

Заради зголемување на вкупниот капитал на Банката и на книговодствената вредност на акциите на Банката, акционерите одлучија дел од добивката во износ од 1.377,4 милиони денари да се издвои во резерви. Дел од добивката во износ до 130 милиони денари се распределува во задржана добивка за инвестициски вложувања во 2024 година, која исто така го зголемува вкупниот капитал на Банката.

Собранието ги усвои и финансиските извештаи и консолидираните финансиски извештаи, Годишната сметка на Банката и Консолидираната годишна сметка за 2023 година, Годишниот извештај за работењето во 2023 година и именуваше членови на Надзорниот одбор на Банката за следните четири години.

The post ДОБИВКАТА НА КОМЕРЦИЈАЛНА БАНКА ЗА 2023 ГОДИНА Е 3,5 МИЛИЈАРДИ ДЕНАРИ Исплатата на дивидендата ќе почне на 25 април appeared first on plusinfo.mk.