Полицаец-приправник пукал со службен пиштол во двор во Прилеп, а куршумите завршиле во соседна куќа. По инцидентот, против него и уште еден полицаец е поднесена кривична пријава.

Според информациите од Министерство за внатрешни работи, пријавата до Основно јавно обвинителство Прилеп ја поднел Одделот за внатрешна контрола. Осомничени се В.Ј. и А.Л. за повеќе кривични дела, меѓу кои „предизвикување општа опасност“ и „попречување на правдата“.

Инцидентот се случил на 8 декември 2025 година околу 23:40 часот. В.Ј., кој бил приправник во Надворешната канцеларија за криминалистички работи при ОВР Прилеп, во дворот на семејната куќа испукал два куршуми од службен пиштол. Оружјето, како што е наведено, му било дадено од А.Л., полицаец во Полициската станица Прилеп.

Двата проектили завршиле во соба од соседната куќа. Кога на местото пристигнале полициски службеници, приправникот земал еден од куршумите од соседниот дом и го преместил во својот двор, со цел да го отежне утврдувањето на фактите.

Според наводите, двајцата потоа се договориле преку телефонски пораки целосно да го негираат настанот.

Одделот за внатрешна контрола најави и дисциплинска постапка против полициските службеници, како и мерки за нивно отстранување од работното место.

The post ПУКАЛ СО СЛУЖБЕН ПИШТОЛ, КУРШУМИТЕ ЗАВРШИЛЕ КАЈ СОСЕДОТ Приправник и полицаец се обиделе да го прикријат настанот appeared first on plusinfo.mk.

Обвинителот Јован Цветановски се враќа на својата функција, откако Советот на јавни обвинители едногласно ја укина неговата суспензија и одлучи предметот да го врати на повторно разгледување. На истата седница Советот го прекина дисциплинскиот предмет против поранешниот виш јавен обвинител Мустафа Хајрулахи, бидејќи тој претходно поднел барање за престанок на функцијата.

Во изјава за медиуми по седницата, претседателот на СЈОРМ, Башким Бесими, изјави дека ги разгледале решението и жалбите и констатирале дека има пропусти во Првостепената комисија во предметот за Цветановски.

– Како Совет, ние не можеме да ги исправиме тие пропусти, бидејќи нашите надлежности не го дозволуваат тоа. Поради тоа предметот го враќаме назад со конкретни насоки, а потоа Комисијата ќе донесе нова одлука. Доколку повторно има жалба или по донесувањето на одлуката, ние ќе постапиме соодветно – рече тој.

Во однос на укинувањето на решението за суспензија, појасни дека согласно него, обвинителот се враќа на работа.

– Причините за оваа одлука се самиот факт дека во решението имаше многу пропусти. Со тоа се создава основа јавниот обвинител да се врати на работа. Како Совет го констатиравме тоа и затоа одлучивме суспензијата да се укине. Со оваа одлука обвинителот се враќа на својата функција – рече Бесими за обвинителот Цветановски.

Јован Цветановски беше јавен обвинител во Вишото јавно обвинителство Скопје. Тој стана познат поради неговата улога во предметот за бонусите исплатени во поранешното Специјално јавно обвинителство (СЈО). Цветановски беше суспендиран, а причината беше неговата одлука во врска со тој предмет. Тој тврдеше дека суспензијата е резултат на притисоци и обид за дискредитација, бидејќи одбил да донесе „незаконска одлука“ за бонусите. Во јавноста излезе со изјави дека врз него се вршени притисоци од други обвинители и дека суспензијата е дел од политички мотивирана хајка.

Во рамки на седницата беше разгледан и дисциплинскиот предмет за поранешниот виш јавен обвинител Мустафа Хајрулахи за кој Советот констатираше дека тој претходно поднел барање за престанок на функцијата, па предметот против него беше прекинат.

Хајрулахи беше суспендиран откако Основното јавно обвинителство Штип поднесе обвинителен акт за пет кривични дела „малтретирање во вршење на службата“ и едно за „злоупотреба на службената положба и овластување“, базирано на наводи дека во периодот од септември 2023 до октомври 2024 година, тој користел хиерархиска надреденост за континуирано психичко насилство и закани врз пет вработени жени, при што наводно им се заканувал дека „ќе ги дигнел на клоци“ или „ќе ги фрлел од 6-ти кат“ и се обидувал да ги принуди да потпишат изјави дека биле изманипулирани.

Хајрулахи категорично ги отфрли сите обвинувања, тврдејќи дека случајот е тенденциозен и политички монтиран со цел негово отстранување, поврзувајќи ја постапката со неговото постапување во врска со бонусите на СЈО.

Во однос одлуката по иницијативата на обвинителката Ленче Ристоска за надворешни влијанија и политички притисоци врз нејзината самостојност – односно нападите кои, според неа, потекнуваат од политички структури на ВМРО-ДПМНЕ, а како пример ги навела изјавите на премиерот и објавите на веб-страницата на партијата, Бесими изјави дека во говорот на премиерот не било спомнато името на обвинителката, па оттаму Советот не можел да утврди конкретно влијание врз нејзината работа.

На прашањето дали доколку било спомнато името на обвинителката Советот би постапил поинаку, тој одговори дека во таков случај предметот повторно би бил разгледан.

– Не сакам да прејудицирам, секој предмет си има своја тежина – рече Бесими.

Советот на јавни обвинители денеска претходно, на седницата едногласно ја одби иницијативата на обвинителката Ленче Ристоска. Комисијата оцени дека изјавите не се поврзани со конкретни дејства што би ја довеле во прашање нејзината независност, а Советот заклучи дека нема надворешно влијание врз нејзината работа ниту загрозување на професионалниот интегритет.

Покрај ова, Советот донесе одлуки за распишување огласи за избор на јавни обвинители во повеќе обвинителства во државата, меѓу кои во Ресен, Крива Паланка, Кочани и вишите јавни обвинителства во Битола и во Скопје.

По овие одлуки, републичкиот обвинител Ненад Савески, зеде збор и упати апел да се воспостави јавна комуникација за, како што рече, да се инспирираат колегите да се пријавуваат на огласите.

The post ОБВИНИТЕЛОТ ЈОВАН ЦВЕТАНОВСКИ СЕ ВРАЌА НА РАБОТА Дисциплинската против Хајрулахи прекината appeared first on plusinfo.mk.

Полицајка при Секторот за внатрешни работи Штип се најде во центарот на истрага поради сомнеж дека открила службена тајна.

Одделот за внатрешна контрола, криминалистички истраги и професионални стандарди при МВР поднесе кривична пријава против В.М., која работи како приправник во полицијата, откако утврдено е дека на 10 јули 2025 година ја открила операцијата со дрон за едно лице користејќи го телефонскиот број на својот брат. Операцијата била службена тајна, а тајноста е клучна за безбедноста и успешноста на полициските акции.

„Со ваквото постапување, кое може да предизвика штетни последици за службата, пријавената сторила кривично дело оддавање службена тајна. Истовремено, против неа ќе биде поведена и дисциплинска постапка“, стои во соопштението од Одделот за внатрешна контрола.

МВР додава дека ваквите дејства можат да го загрозат оперативното работење на полицијата и безбедноста на службите, поради што институциите го преземаат целосниот законски процес за утврдување на одговорноста.

The post ПОЛИЦАЈКА САБОТИРАЛА ОПЕРАЦИЈА Приправничка откри службена тајна и сега е пријавена appeared first on plusinfo.mk.

Полициските службеници З.Т. и К.Д. од кочанската станица  се осомничени дека во септември извршиле „малтретирање во вршење на службата“, откако нелегално употребиле физичка сила врз граѓанин во чиј двор влегле по пријава за гласна музика.

Според информациите од Одделот за внатрешна контрола, инцидентот се случил на 07.09.2025 година, кога двајцата службеници постапувале по дојава за нарушување на јавниот ред. Наместо да спроведат службена процедура, тие влегле во приватниот двор на пријавеното лице, иако не биле исполнети законските услови за такво дејствување.

Потоа, без одобрена основа и без исполнети услови за употреба на средства за присилба, полицajците употребиле физичка сила врз граѓанинот, нанесувајќи му телесна повреда.

Одделот за внатрешна контрола веќе поднесе кривична пријава до надлежното обвинителство за организиран криминал и корупција, а против осомничените ќе следи и дисциплинска постапка.

– Законот важи за сите, вклучително и за полициските службеници. Секое прекршување на овластувањата носи одговорност – велат од Министерството за внатрешни работи, најавувајќи дека двајцата ќе бидат отстранети од работно место до завршување на дисциплинската процедура.

The post СКАНДАЛ ВО КОЧАНСКАТА ПОЛИЦИЈА Двајца полицајци се суспендирани откако тепале граѓанин appeared first on plusinfo.mk.

Затворскиот живот на познатиот рапер Шон „Диди“ Комбс почна со неколку инциденти, иако тој се обидува да се излечи од зависноста со дрога. Раперот ги минува првите денови од својата казна во федералниот затвор „Форт Дикс“ со нова улога – работи во затворската капела и посетува програма за одвикнување од дрога.

Истовремено, е под дисциплинска истрага затоа што остварил недозволен телефонски повик, јави Си-Би-Ес.

Меѓутоа, според извештаите, Комбс во првата недела од престојот бил обвинет и дека пиел „домашно направен алкохолен напиток“, што тој категорично го негирал.

Притоа, Диди е дел од најинтензивната „Програма за лекување од злоупотреба на дрога“ (РДАП), која му овозможува можност да ја скрати затворската казна до една година. Неговата портпаролка истакна дека раперот „е активно вклучен во процесот на рехабилитација и целосно насочен кон позитивни промени“.

Од друга страна, според затворски извори, дисциплинскиот прекршок за телефонскиот повик може да резултира со привремена забрана за користење телефон и продавница во установата. Повикот, наводно, бил поврзан со неговиот правен тим и подготовка на соопштение за медиумите.

За време на судењето, Комбс изјави дека долгогодишната зависност од дрога и алкохол е причина за неговите погрешни одлуки и дека, првпат по 25 години, е трезен и решен да започне нов живот.

The post ДИДИ СЕ ЛЕЧИ ОД ДРОГА ВО ЗАТВОР, НО ПИЕ АЛКОХОЛ Затворските денови ги почна со инцидент appeared first on plusinfo.mk.

Одделот за внатрешна контрола при Министерството за внатрешни работи поднесе кривична пријава против Ф.Н., вработен во криминалистичката полиција во СВР Тетово, под сомнение за „попречување на правдата“. Случајот е доставен до Обвинителството за гонење на организиран криминал и корупција.

Според истрагата, на 4 октомври годинава, за време на полициска акција во која биле уапсени две лица осомничени за производство и трговија со дрога, пријавениот техничар — тогаш дежурен во крим-техника — му овозможил на свој колега, О.С., кој тој ден не бил на работа, но бил татко на еден од уапсените, да пристапи до службената документација и доказите.

Не само што му дозволил да разгледува и преместува службени материјали, туку и да присуствува при собирањето биолошки траги од приведените. Според наодите, токму тогаш билe заменети примероците на урина — оној што требало да го даде синот, всушност го дал таткото. Вештачењето подоцна ја потврдило замената.

Со овие постапки, пријавениот Ф.Н. се обидел да го прикрие вистинскиот доказ и да го отежне докажувањето на случајот. Министерството најави дека против него ќе биде поведена дисциплинска постапка и ќе биде отстранет од работа до нејзино завршување.

The post ЈА ЗАМЕНИЛ УРИНАТА ЗА ДА СПАСИ СИН НА КОЛЕГА, УАПСЕН ЗА ДРОГА Техничар во МВР сакал да „учини“, па доби кривична пријава appeared first on plusinfo.mk.

Европското јавно обвинителство соопшти дека покренало дисциплинска постапка против својата членка од Бугарија, Теодора Георгиева, врз основа на резултатите од повеќемесечната внатрешна истрага за прекршување на правилата на институцијата од нејзина страна.

„Главниот европски обвинител ги информираше Европскиот парламент, Советот на ЕУ и Европската комисија дека Колеџот на Канцеларијата на европскиот јавен обвинител (ЕППО) одлучи да покрене дисциплинска постапка против бугарскиот европски обвинител“, се наведува во соопштение на Обвинителството, чие седиште е во Луксембург.

Во соопштението се посочува дека за време на дисциплинската постапка нема да бидат објавени никакви детали или дополнителни информации за случјот. Во него се додава и дека без да биде нарушена презумпцијата на невиност, Георгиева ќе остане под суспензија за време на траењето на дисциплинската постапка.

Георгиева беше суспендирана од вршење на должноста во март годинава кога Европското јавно обвинителство започна административна истрага против, врз основа на, како што беше посочено, анонимни дојави и видео снимки за нејзини наводни средби со „добро позната личност од криминалните кругови“ во Бугарија.

Според наводите, по овие средби Георгиева решила да се повлече од истрагата за сомнежите за потенцијална корупција и изнуда при реализацијата на проектот за обнова на најголемото складиште за гас на Балканот во местото Чирен во северозападна Бугарија.

Истрагата за обновата на складиштето во Чирен започна во август 2024 година, откако Европското јавно обвинителство доби информации од „свиркачи“ за неправилности при реализација на проектот и потенцијален ризик по објектот. Врз основа на овие информации европските обвинители извршија претреси во бугарската државна енергетска компанија „Булгартрансгаз“.

За обновата на складиштето во Чирен беа издвоени 78 милиони евра од Европската агенција за клима, инфраструктура и животна средина (ЦИНЕА).

Георгиева изјави дека се повлекла од истрагата за Чирен затоа што „се чувствувала загрозена“ од бугарскиот пратеник, олигарх и лидер на Движењето за права и слободи (ДПС), Дељан Пеевски.

Пеевски, кон кого САД и Велика Британија имаат воведено санкции поради сомнежи за вмешаност во корупција, тогаш ги отфрли наводите на Георгиева.

Обвинителството во соопштението додава и дека одговорноста за проценка на дисциплинската постапка е на Европскиот парламент, Советот на ЕУ и Европската комисија.

„Независноста без сомнение е суштински услов за првичното назначување на европски обвинители и за нивната способност да ги извршуваат своите должности за време на нивниот мандат“, се нагласува во соопштението на Обвинителството.

Ова е прва дисциплинска постапка покрената против еден обвинител или обвинителка од Европското јавно обвинителство од почетокот на неговата работа во јуни 2021 година.

Канцеларијата на европскиот јавен обвинител е независно јавно обвинителско тело на Европската Унија, одговорно за истражување, гонење и покренување судски постапки за кривични дела поврзани со финансиските интереси на ЕУ. Европските обвинители ги назначува Советот на ЕУ.

The post БУГАРСКА ОБВИНИТЕЛКА СЕ СРЕЌАВАЛА СО ДОБРО ПОЗНАТА ЛИЧНОСТ ОД КРИМИНАЛНИТЕ КРУГОВИ Европското јавно обвинителство покренало дисциплинска постапка appeared first on plusinfo.mk.

Натпреварувачката комисија на Фудбалската федерација на Македонија (ФФМ) донесе одлука за суспензија на стадионот во Чаир на неодредено време, сè до носење на конечна одлука на Дисциплинската комисија.

Истовремено, против ФК Шкупи 1927 е покрената дисциплинска постапка и предметот е предаден на Дисциплинската комисија на ФФМ.

Причина за одлуката се сериозните инциденти на натпреварот од 7. коло во Прва МФЛ, меѓу ФК Шкупи и ФК Македонија ЃП, кога дел од домашната навивачка група запалија и фрлија факели на теренот и во делот каде беше сместена ТВ продукцијата на натпреварот, при што беше предизвикано сериозно оштетување на дел од опремата на Македонската телевизија (МТВ), која го реализираше директниот пренос.

И покрај реакциите на службите на ФФМ и делегатот на натпреварот до официјалните лица на ФК Шкупи за време на мечот, не беа преземени никакви мерки за спречување на дополнителна штета.

Македонската телевизија со официјален допис ја извести ФФМ дека штетата треба да биде надоместена и дека на стадионот во Чаир нема услови за непречено и професионално вршење на ТВ преноси, поради што нема да врши директни преноси од овој стадион сè додека не се создадат безбедни услови за работа.

Дополнително, дел од домашните навивачи запалија банер на гостинската навивачка група „Лавови“.

ФФМ уште еднаш апелира до сите клубови да преземат максимална одговорност и мерки за обезбедување ред и соодветни услови за работа, со цел создавање безбедна и спортска атмосфера на сите стадиони во земјата.

The post ШКУПИ ЗАРАБОТИ ДИСЦИПЛИНСКА ЗА ИНЦИДЕНТОТ СО ЗАПАЛЕНИ ФАКЛИ Стадионот во Чаир е суспендиран на неодредено време appeared first on plusinfo.mk.

Министерството за внатрешни работи информира дека Одделот за внатрешна контрола при МВР изврши проверка по објавено видео од претрес во Демир Хисар. Во текот на проверките е констатирано непрофесионално и неетично однесување на началник од ОВР Демир Хисар.

За наведеното лице е покрената дисциплинска постапка, а со цел целосна непристрасност и објективност на истрагата, началникот ќе биде разрешен од функцијата.

Министерството за внатрешни работи јасно го осудува секој облик на насилство, незаконско или непрофесионално постапување. Полицијата постои за да ги спроведува законите и да им служи на граѓаните.

СЛУЧАЈОТ СО ДИРЕКТОРКАТА ОД ДЕМИР ХИСАР ЈА ВКЛУЧИ ВНАТРЕШНАТА КОНТРОЛА НА МВР Под истрага е началникот кој бараше итен распит

The post РАЗРЕШЕН НАЧАЛНИКОТ ОД ДЕМИР ХИСАР Истрага за неетичкото и непрофесионалното однесување на службеникот appeared first on plusinfo.mk.

Скандалозната штипска обвинителка Татјана Кацарова, позната по истраги со „клонирани сведоци“ и прекршување на основните права на осомничени, конечно е предмет на дисциплинска постапка. Вишиот јавен обвинител од Штип поднел официјален предлог за нејзино санкционирање, поради сериозни повреди на законот и злоупотреба на службената положба – обвинувања кои досега беа игнорирани, и покрај судски утврдени незаконитости.

Во правосудните кругови, нејзиното име одамна е синоним за скандал, но и за недопирливост. Иако нејзините постапки веќе неколку пати беа јавно и правно оспорени – од фалсификати и повреда на права, до „патентирање“ на клонирани сведоци – сè до сега, никој институционално не се осмели да ја повика на одговорност.

Овој пат, иницијативата за дисциплинска одговорност доаѓа по серија шокантни наоди во предметот против осомничениот М.Н. од Штип, кого Кацарова го држела во притвор над 70 дена – иако, според доказите, случајот требало да биде завршен за помалку од 8 дена. Имено, со судско вештачење било утврдено дека оштетениот не се здобил со тешки телесни повреди, туку со полесна форма, што според законот бара скратена постапка. Наместо тоа, осомничениот останал зад решетки над два месеца и тоа без увид на бранителите во предметот, без известување за клучни дејства и без пристап до вештачења.

Фалсификати, временски парадокси и судска потврда за незаконитост

Судијката Јулијана Недкова од Основниот суд во Штип, постапувајќи по жалба од скопскиот адвокат Стеван Павлевски, детално утврдила дека обвинителката Кацарова прекршила низа членови од Законот за кривична постапка.

Според судското решение од 16 јуни 2025 година, таа не само што спречила увид во предметот, туку и доставувала наредби за вештачење датирани по денот кога вештачењето веќе било готово – што логично води до прашањето: дали располага со временска машина?

Дополнително, во предметот недостигаат потврди за доставување на наредбата до вештото лице, нема приемни печати, ниту докази кога вештачењето било вратено во обвинителството. Судот заклучил дека вештачењето е незаконито, а постапувањето на обвинителката е длабоко проблематично.

Кацарова и Хајрулахи: судир што ја разобличи системската заштита

Ова не е прво дисциплинско барање за Татјана Кацарова. Таа веќе беше мета на жестоки критики поради своето сомнително постапување во предметот против суспендираниот виш јавен обвинител Мустафа Хајрулахи, каде успеала – или со фалсификат или со клонирање – да испита четири различни сведоци во ист момент.

Кацарова, според бројни извори, ужива заштита од републичкиот јавен обвинител Љупчо Коцевски. Тој, како и вишиот обвинител Ристо Бојаџиски, до ден-денес не презема јавно видлива акција за контролирање на нејзината работа – и покрај поднесените претставки, барања за надзор и судски решенија кои укажуваат на флагрантна незаконитост.

Судот зборува, институциите молчат

Иако судското решение од Штип е јасно, реакцијата од системот е алармантно тивка. Адвокатот Стеван Павлевски, поранешен јавен обвинител, преку неспорни правни аргументи успеал да ја убеди судијата да утврди незаконитост. Но ниту ова не е доволно, кога се работи за обвинител под „чадорот“ на политичка или лична заштита.

Суспендираниот обвинител Хајрулахи, кој веќе подолго време води правна битка со Кацарова, и неговиот колега Јово Цветановски, се очигледно неугодни личности за актуелниот врв на Јавното обвинителство. Тие, како што јавноста памети, беа директно вмешани во истрагите околу бонусите на СЈО – предмет што отвори многу рани во правосудниот систем.

Прашањето што сега логично се наметнува е: ќе постапува ли републичкиот јавен обвинител Љупчо Коцевски согласно своите надлежности, ќе ја суспендира ли обвинителката Кацарова и ќе ја изземе од предметот што е предмет на дисциплинска постапка?

Или и овој случај ќе остане како многу други – потиснат, релативизиран и заборавен? Во систем во кој судот утврдува незаконитост, а институциите молчат, тешко е да се верува дека правдата е достапна за сите. Ако не важи законот за обвинителите, тогаш зошто би важел за обичните граѓани?

НОВО ОБВИНИТЕЛСКО ЧУДО ВО ШТИП Обвинителката Кацарова издала наредба за вештачење еден ден откако вештакот веќе го доставил својот наод?!

The post ДИСЦИПЛИНСКА ПОСТАПКА ЗА ОБВИНИТЕЛКАТА-ЧУДОТВОРКА ОД ШТИП Татјана Кацарова под лупа за незаконито постапување appeared first on plusinfo.mk.