Градоначалникот на општина Штип Иван Јорданов на вечерашната вонредна прес-конференција изјави дека нема простор за паника и дека се користат сите сили на противпожарната бригада за гаснење на пожарот кој изби на градот кај Плуждино.

Дополнително информираше дека побарал помош и од Свети Николе, Кочани и Кавадарци, а во контакт бил и со Дирекцијата за заштита и спасување и Центарот за управување со кризи.

Според планот на надлежните ќе се направи појаас за пожарот да не се шири. Ситуацијата зависи како ќе се одвива во ноќта во зависност од ветрот кој порано денеска направи вистински хаос и го предизвика овој пожар.

Според првичните информации пожарот најверојатно е предизвикан од гром. Телевизијата М Нет сподели снимка од гаснењето.

The post 📽️ ПЛАНОТ Е ДА СЕ НАПРАВИ ПОЈАС ОКОЛУ ПОЖАРОТ, ЗАВИСИ КАКО ВЕТРОТ ЌЕ ДУВА НОЌВА Градоначалникот на Штип побарал помош од Свети Николе, Кочани и од Кавадарци appeared first on plusinfo.mk.

Директорот на Дирекцијата за заштита и спасување, Стојанче Ангелов, најави дека ќе ангажира пензионирани полицајци и војници, како и лица кои на друг начин ги напуштиле полицијата и Армијата, за справување со пожарите во текот на летната сезона.

– Ќе побарам и полицајци, ова сѐ уште јавно не сум го објавил, ексклузивно го кажувам во вашата емисија. Станува збор за пензионирани полицајци или лица кои на друг начин ја напуштиле полицијата или Армијата, а кои ќе ракуваат со водните пумпи, односно со пумпите со кои се прскаат изгорените површини. За да немаме потреба од ангажирање локални пожарникари, бидејќи минатото лето на тие позиции поставувавме искусни пожарникари. Верувам дека по интензивната обука што ќе ја организираме и по учеството во помали и помалку ризични пожари, тие ќе стекнат доволно искуство за успешно да ја извршуваат оваа задача – изјави Ангелов во емисијата „За или против“ на Алфа телевизија.

Тој посочи дека освен пензионирани лица, можат да се пријават и поранешни вработени во полицијата и Армијата кои по друг основ ги напуштиле службите.

– Нека дојдат, нека помогнат на татковината и нека заработат средства кои воопшто нема да бидат за потценување – рече Ангелов.

Според него, во изминатите две години се набавени повеќе од 30 противпожарни возила и е зголемен бројот на пожарникари.

– Пожарите ќе почнат, но имаме доволно капацитети и нема потреба од паника. Ако се појават неколку пожари истовремено, државата има капацитет да испрати повеќе противпожарни единици и тие да бидат локализирани за неколку часа или денови. Проблемот настанува кога има голем број пожари во исто време. Се сеќавам на период кога имавме 66 пожари на отворен простор истовремено, а минатото лето бројката достигнуваше и до 45 или 46 пожари дневно. Околу 10 јуни секоја година започнува сезоната на сериозни пожари, иако бројот засега е мал. Откако овие лица ќе потпишат договори, секој од нив ќе задолжи конкретно возило. Така ќе имаме многу подобра организација, бидејќи секој што работи со едно возило најдобро ги познава неговите карактеристики и специфики – истакна Ангелов.

The post АНГЕЛОВ СО НОВ ПЛАН ЗА ПОЖАРИТЕ Директорот ги повика пензионираните полицајци и војници да се вклучат во битката со огнот appeared first on plusinfo.mk.

Дискотеката „Пулс“, но и други објекти во градот Кочани, не биле опфатени во плановите за надзор на Дирекцијата за заштита и спасување, беше посочено на продолжението на судењето за пожарот во кочанската дискотека.

Во судницата на денешното рочиште за пожарот во „Пулс“ беа презентирани планови за квартални инспекциски контроли, годишни програми и службени документи на Дирекцијата за заштита и спасување, потпишани со името на Шабан Салиу кој од 2012 до 2017 бил директор на институцијата.

Салиу реагираше дека дел од потписите на документите не се негови, иако на нив стои неговото име како директор.

Обвинителството посочи дека во 2015 година Кочани немало назначен инспектор, што се гледа и од доказите за годишните програми и распоредот на инспектори. И покрај тоа, во 2015 година инспектори од Скопје извршиле надзор само врз еден правен субјект со низок ризик, што обвинителството го оцени како селективно.

Во делот на угостителските објекти, програмата за 2012 до 2014 година предвидувала надзор врз поголеми хотели, ресторани и мотели, но кафулињата и дискотеките повторно не биле опфатени.

Александар Наунов од здружението „16 Март“ оцени дека денешното рочиште отвора уште посериозни прашања.

– Денес во судница слушнавме одбрана дека дел од потписите не биле на обвинетиот. Иако на документите стоело неговото име како директор, остана впечаток дека најголемото прашање повеќе не е кој ја водел институцијата, туку кој го држел пенкалото – истакна Наунов.

Тој додаде дека ако навистина некој друг потпишувал наместо директорот, тогаш тоа укажува на системски пропусти.

– Ако некој можел да става туѓ потпис, да поминуваат планови и извештаи без знаење на раководството, тогаш прашањето е каде била контролата. Директорската функција не е рамка за име на документ, таа носи одговорност за тоа што излегува од институцијата – нагласи Наунов.

Според него, јавноста оправдано се прашува чиј бил потписот, кој го дозволувал тоа и како таквата пракса можела да трае со години.

Во пожарот што избувна на 16 март 2025 година во дискотеката „Пулс“ во Кочани загинаа 63 лица, а над 200 беа повредени, дел од нив со тешки изгореници. Настанот предизвика широка јавна реакција и отвори прашања за безбедносните стандарди, инспекциските надзори и примената на прописите за работа на угостителските објекти. б

The post ДИСКОТЕКАТА „ПУЛС“ И ОБЈЕКТИ ВО КОЧАНИ НЕ БИЛЕ ВО ПЛАНОВИТЕ ЗА НАДЗОР Во судницата беа презентирани нови докази appeared first on plusinfo.mk.

Во предметот за пожарот во дискотеката „Пулс“ во Кочани, секој нов документ треба да се чита со посебно внимание. Не само затоа што станува збор за една од најтешките трагедии во поновата македонска историја, туку и затоа што правдата во вакви случаи не смее да биде ниту брза формалност, ниту широка политичка конструкција. Таа мора да биде точна, докажлива и насочена кон оние дејствија и пропусти што навистина стојат во причинско-последична врска со пожарот, неговото ширење и неможноста луѓето навреме да се евакуираат.

Токму затоа записникот за увид на Дирекцијата за заштита и спасување од 16 март 2025 година е документ кој не може да се чита површно, а кој беше презентиран на едно од последните судења за процесот. Тој е службен опис на фактичката состојба на лице место, изготвен веднаш по пожарот. А кога внимателно ќе се прочита, документот отвора сериозно прашање: дали обвинителната конструкција што опфаќа широк круг поранешни функционери, министри, градоначалници и службени лица навистина ја следи фактичката логика на настанот, или пак прави премногу широк скок од административна надлежност кон кривична вина и со тоа го успорува текот на целата судска постапка.

Паралелно, овој документ е важен затоа што ја враќа расправата од политичката и институционална генерализација, кон основното правило на кривичното право – вина не се претпоставува од функција, туку се докажува преку конкретно дејствие или пропуст.

Кои се клучните факти во записникот?

Записникот на ДЗС ја насочува суштината кон неколку конкретни точки: начинот на кој настанал пожарот, материјалите што биле во објектот, недостатокот на системи за автоматско откривање, јавување и гаснење пожар, недоволниот број излези, состојбата на противпожарната опрема, евакуацијата и фактот дека правното лице, односно инвеститорот, немале поднесено потребни барања и документи до надлежната служба за заштита и спасување.

Тоа е сосема различна правна и фактичка рамка од онаа во која вината би се распоредувала широко, низ повеќе години и низ повеќе институции, само затоа што во различни периоди некој потпишувал, одлучувал, бил на функција или бил дел од системот. Во кривичното право, функцијата сама по себе не е доволна за вина. Потребна е конкретна должност, конкретно дејствие или пропуст, сознание за опасноста и докажлива врска меѓу тој пропуст и последицата.

Во овој документ, причината за пожарот е поставена во сосема конкретна фактичка рамка. Според увидот, пожарот најверојатно настанал од употреба на пиротехнички средства, односно од надворешен извор на топлина кој ги запалил декоративните платна поставени на таванскиот дел над бината. Оттаму огнот се проширил по таванскиот дел на салата. Тоа е исклучително важен факт. Тој го поместува центарот на одговорноста од апстрактната институционална историја кон конкретната организација, конкретната вечер, конкретниот објект, конкретната опрема и конкретните услови во кои се одвивал настанот.

Министер, градоначалник или службено лице во некоја институција не поставува декоративни платна на таван, не употребува пиротехника во затворен простор, не ја организира евакуацијата во критичните минути, не одлучува дали вратата ќе биде проодна, не ја сервисира хидрантската мрежа и не поставува противпожарни апарати во салата. За да се стигне до нивна кривична одговорност, мора да постои многу повеќе од формална или политичка поврзаност со системот. Мора да постои доказ дека тие имале конкретна законска обврска токму за тие фактички состојби и дека со свој директен пропуст ја создале или дозволиле непосредната опасност што довела до трагедијата.

Не било поднесено барање за мислење до Дирекцијата за заштита и спасување

Записникот уште повеќе ја засилува оваа дилема кога ги набројува недостатоците во самиот објект. Во него се наведува дека во објектот не биле пронајдени системи за автоматско откривање, јавување и гаснење пожар. Не бил забележан систем за известување на присутните лица за евакуација. Не биле забележани панични светла. Не биле утврдени доволен број излези според намената и големината на објектот. Внатрешната хидрантска мрежа, според записникот, била неисправна, некомплетна и без проток на вода во моментот на увидот. Наместо потребниот број противпожарни апарати, биле најдени само два.

Ова се елементи што зборуваат за оперативна, техничка и непосредна безбедност на објектот. Тие не се политичка категорија. Тие се обврски на оној што управува со просторот, го одржува, го користи, организира настани во него и мора да обезбеди минимални услови за заштита на присутните. Тука се отвора суштинското прашање: дали е правно одржливо истата тежина на вина да се распредели и на оние што имале непосредна контрола врз објектот и вечерта на настанот, и на оние што во некој претходен период имале административна или политичка функција?

Посебно значаен е делот од записникот во кој се наведува дека инвеститорот, односно правното лице, немало поднесено барање за мислење и согласност до Дирекцијата за заштита и спасување (ДЗС) за потребните документи. Тоа е реченица со голема правна тежина. Таа не го насочува фокусот кон политички носител на функција, туку кон правното лице кое го користело или уредувало објектот. Ако не биле поднесени потребните документи, ако немало елаборат, ако немало проценка, ако немало план за заштита и спасување, тогаш треба точно да се утврди кој имал обврска тоа да го направи, кој не го направил и кој продолжил да работи и покрај тоа.

Секоја административна слабост не значи автоматски и кривична одговорност

Токму тука се јавува клучната линија на одбраната. Не може секоја институционална слабост автоматски да стане кривична одговорност на секој функционер што некогаш бил дел од системот. Одговорноста мора да биде индивидуализирана. Самото постоење на потпис во административна постапка не е доволно за да се изгради кривична вина за трагедија настаната години подоцна во услови на конкретни оперативни пропусти во објектот.

Истото важи и за општината. Ако општината нема надлежност да издава лиценца за ваков тип дејност, ако не е орган што одлучува за противпожарна согласност, ако не е субјект што управува со објектот, ако не организира настан и ако не ја контролира фактичката поставеност на внатрешноста на дискотеката, тогаш мора да се биде исклучително внимателен со секоја теза што градоначалничката функција ја претвора во кривична вина. Политичката одговорност, моралната одговорност и кривичната одговорност не се исто. Во ваков предмет, нивното мешање може да ја направи постапката поширока, но не и посилна.

Претходно разгледаните документи и сведочења веќе отворија слична линија: тезата за „верижна одговорност“ низ повеќе години е процесно ризична ако не е поддржана со конкретни докази за секој обвинет поединечно. Сега записникот на ДЗС дополнително ја стеснува фактичката слика. Тој зборува за пиротехника, декоративни материјали, затворен простор, недоволни излези, непостоечки алармни системи, нефункционална опрема и за пропуштени документи од страна на правното лице.

Се бара прецизна адреса за одговорноста

Во јавноста често постои потреба за брза праведност. Тоа е човечки разбирливо, особено кога последиците се толку тешки. Но правната правда не се мери според бројот на обвинети, туку според квалитетот на доказите. Ако обвинението е премногу широко, ако во ист кош се ставаат лица со сосема различни улоги, ако не се прави разлика меѓу непосредна и посредна одговорност, тогаш ризикот не е само за одбраната. Ризикот е и за семејствата, и за јавноста, и за самата правда. Затоа што процес што не успева да ја докаже вината таму каде што ја тврди, на крај може да остави впечаток дека никој не е доволно одговорен, иако можеби одговорноста била многу конкретна и докажлива кај помал број лица.

Записникот на ДЗС, прочитан внимателно, не ја разводнува одговорноста. Напротив, тој бара нејзино прецизирање. Тој покажува дека оваа трагедија не може да се разбере само како резултат на административна историја, туку како резултат на конкретна опасна состојба во конкретен објект. Декоративни материјали што можеле да се запалат, пиротехника во затворен простор, недоволна евакуациска логика, затворени или нефункционални излезни решенија, недоволна и неисправна противпожарна опрема, отсуство на системи за тревожење и спасување, тоа се факти што бараат прецизна правна адреса.

Во тој контекст, записникот на ДЗС е важен затоа што ја враќа постапката кон фактите. А фактите, барем според овој документ, ја водат анализата кон внатрешната состојба на објектот, кон начинот на користење, кон безбедносната неподготвеност, кон пропуштените обврски на правното лице и кон конкретната вечер кога пожарот започнал. Тоа е далеку потесна, но правно многу посериозна рамка од општата теза дека сите што некогаш биле дел од институционалниот синџир мора да носат иста кривична тежина.

Правдата за „Пулс“ не смее да биде симболична. Таа мора да биде докажана. Само така процесот може да биде и правично воден, и убедлив за јавноста, и одржлив пред судот.

The post НЕ МОЖЕ ЕДНИ ДА ПАЛАТ, А ДА ОДГОВАРААТ МИНИСТРИ, ГРАДОНАЧАЛНИЦИ И ФУНКЦИОНЕРИ БЕЗ ВИНА Записник ги открива конкретните причини за трагедијата во „Пулс“ appeared first on plusinfo.mk.

На Тумбе Кафе во Битола, на стотина метри од куќите, пронајдени се 1.067 неексплодирани убојни средства, рачни бомби и минофрлачки гранати, но има и тромблонски гранати останати од Првата Светска војна, изјави директорот на Дирекцијата за заштита и спасување (ДЗС), Стојанче Ангелов.

Во изјава за медиумите, Ангелов посочи дека според стручните лица на Дирекцијата за заштита и спасување се очекува да биде откриена поголема количина убојни средства и затоа локацијата е обележана и забранета за движење.

– На ова место пронајдени се 1.067 неексплодирани убојни средства, рачни бомби и минофрлачки гранати, но има и тромблонски гранати останати од Првата Светска војна, но очекуваме да пронајдеме уште толку, и поголема количина убојни средства бидејќи станува збор за некој импровизиран магацин или локација на која тие биле расфрлени бидејќи пиротехничарите пронашле измешани бомби со гранати. Отстранувањето се врши постепно и во фази бидејќи брзање не е потребно и затоа што безбедноста на граѓаните и нашите стручни лица е во прв ред. Пронајдените гранати се уредно складирани во наш магацин и чекаме одобрение од Министерството за одбрана, а потоа на полигонот Криволак, бомбите да бидат уништени – истакна Ангелов.

На средба со новинарите, Ангелов потврди дека екипи на ДЗС ќе продолжат да пронаоѓаат, а потоа и уништат и останатите убојни средства, а дотогаш, местото е обележано со зголемени патроли и присуство на полицијата.

– Апелирам до граѓаните да се избегнува движењето околу ова место и да нема движење околу оваа локација. Инаку, во овој момент ДЗС има само два пиротехничари, еден во Битола и еден во Штип кои ги користиме низ цела држава. Во наредниот период планираме набавка на специјално транспортно возило и прилагодување на постоечките возила што би ги исполнувале минималните безбедносни стандарди за транспорт на опасни неексплодирани средства – истакна Ангелов.

Отстранувањето на убојни средства на Тумбе Кафе го врши Ѓорги Стефанов од Битола кој потврди дека убојните средства се пронајдени на длабочина од 50 до 60 сантиметри од земјиштето на кое се гради приватен објект.

– Првата пријава за пронајдените убојни средства беше на 27 март за што бев информиран од СВР Битола, а по прегледување на теренот констатирав поголема количина бомби и гранати. Дневно отстрануваме по 300 до 400 убојни средства, работиме околу еден месец и извадени се 1.067 убојни средства. Голема е веројатноста дека има поголема количина и ние ќе продолжиме со отстранување, но внимателно, за да се отстранат сите ризици бидејќи со погрешно копање бомбата може да се активира. Целиот процес мора да се одвива рачно бидејќи на овој терен неможе да се работи со машина. Имајќи пред вид дека нема регулатива, јас би предложил да се забрани градба додека не се испита теренот, односно ако некој гради на овој терен, најнапред да се испита теренот со поддршка на пиротехничар. Во секој случај внимателноста мора да биде висока затоа што пред неколку недели добивме дојава од СВР Битола дека во градското шеталиште во Битола се пронајдени три атрилериски гранати од 75 мм кои потекнуваат од Првата Светска војна – изјави пиротехничарот Стефанов.

Гранатите, како што посочи тој, биле пронајдени од деца кои копале ров за да направат скокалници за велосипеди и при копањето пронашле три гранати, кои безбедно биле отстранети.

– Според моите информации во 2000 година на истото место биле пронајдени гранати, но постапката била прекината, а локацијата затрупана – рече Стефанов.

Локацијата на пронајдените бомби и гранати на Тумбе Кафе не е реткост на овој дел од градот бидејќи долги години тука опстојувале армиски касарни со воени магацини, а со новите урбанистички планови, просторот е трансформиран во населба „Златен Рид“.

The post 📷 1.067 СТАРИ НЕЕСКПЛОДИРАНИ БОМБИ НАЈДЕНИ ВО БИТОЛА Отстранувањето се врши постепено и во фази, велат од ДЗС appeared first on plusinfo.mk.

На денешното сведочење пред судот, Маја Тимовска, раководител на Секторот за превенција, планирање и развој во Дирекцијата за заштита и спасување (ДЗС), појасни дека сите учесници во системот за заштита и спасување на територијата на Република Северна Македонија се должни да достават четири документи: елаборат за заштита и спасување, правилник за заштита од пожари, процена на загрозеност од природни непогоди и други несреќи, како и план за заштита и спасување.

– Учесниците во системот во согласност со законот потребно е да достават четири документи,и тоа елаборат за заштита и спасување и тој по електронски пат преку електронскиот систем се доставува до Дирекцијата за заштита и спасување конкретно во Скопје и во сите 34 подрачни одделенија за заштита и спасување во зависност од тоа во кој регион припаѓа објектот што се гради, реконструира или пренаменува во однос на елаборатот. Понатаму, сите учесници се должни да изработат правилник за заштита од пожари, процена на загрозеност од природни непогоди и други несреќи и да изработат план за заштита и спасување – рече таа.

Тимовска додаде дека позитивно мислење се издава само доколку сите документи се целосно застапени, а во спротивно се посочуваат мерки и активности кои треба да се преземат.

Во врска со конкретниот случај со објектот „Пулс“ во Кочани, Тимовска нагласи „не би можела да кажам дали се поднесени вакви елаборати, бидејќи тоа се доставува директно до подрачното одделение во Кочани.“

Тимовска, која е дел од ДЗС од неговото основање во 2005 година, сведочеше и за начинот на функционирање на Дирекцијата.

Таа објасни дека програмата за работа ја одобрува директорот, а секоја година се доставува до Владата.

– Во табеларниот дел што ни се доставува како формат, секој сектор наведува конкретни активности, носител на активноста и со кого соработува – рече таа.

На прашање дали управителите на „Пулс“ имале обврска да ја достават документацијата, Тимовска одговори потврдно.

– Сите учесници во системот се должни да достават план, процена и правилник до Подрачното одделение за заштита и спасување Кочани, како и електронски елаборат преку општината – рече таа.

Прашана дали во годишниот план и програма може да се предвидуваат инспекциски надзори во подрачје каде што нема инспектор за заштита и спасување, таа одговори дека во годишната програма и извештајот не се наведуваат детално, само генерално е наведено дека се организираат и спроведуваат надзори но не и регионот и таму каде што има или нема, односно, како што рече, не се опишуваат согласно табелатниот преглед.

По ова прашање јавната обвинителка побара да ѝ се предочи исказот што Тимовска го дала во Обвинителството во април 2025 година, кој се разликува од денешното сведочење.

На вкрстени прашања од одбраната, Тимовска истакна дека методологијата за изработка на планската документација е донесена уште во 2006–2007 година и оттогаш не е изменета.

– Проценката, правилникот и планот не служат само за Дирекцијата да даде мислење, туку јасно ги пропишуваат мерките што секој субјект треба да ги преземе за спречување на ризици – подвлече таа.

Во врска со елаборатот за заштита од пожари, кој го нарече „круцијален документ“, рече дека во него јасно се пропишани мерките за заштита од пожари и тој служи како база за изработка на сите следни документи.

На прашање на Судот дали доколку инспектор има забележано или има добиено сознание дека некој објект нема поднесено барање преку општината до подрачната единица на ДЗС, дали може да реагира, самоиницијативно да изврши некој надзор или за тоа му треба некое одобрување, сведокот одговори „не би можела да служам, не е моја надлежност“.

Претходно на денешното судење сведок – технички советник, Верица Милевска-Стефановска, претседател на Комората на Република Македонија за приватно обезбедување сведочеше за законските процедури за добивање лиценца, обврските при склучување договори за обезбедување, како и овластувањата на работниците при контрола на влез и присуство на малолетници во објекти.

Во сведочењето таа посочи дека обезбедувањето требало да реагира за присуство на малолетници по полноќ, а пиротехниката била безбедносен ризик.

Судењето се наоѓа во доказна постапка и продолжува на 19 март со сослушување на сведоци на Обвинителството.

Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на земјата. Со денешното рочиште продолжува доказната постапка со изведување сведоци на предлог на Обвинителството, кое го застапува тим од 15 јавни обвинители.

The post ЧЕТИРИ ДОКУМЕНТИ СЕ ОБВРСКА ЗА СЕКОЈ ОБЈЕКТ На судењето за „Пулс“ сведочеше претставничка од ДЗС appeared first on plusinfo.mk.

Адвокатот Ѕвонко Давидовиќ, бранител на обвинетиот поранешен директор на Дирекцијата за заштита и спасување (ДЗС), Аднан Џаферовски, вo случајот „Пулс“ изјави дека таа институција не е надлежна за контроли на угостителски објекти, туку има сосема друга функција.

– Согласно законот, треба да се сфати дека Дирекцијата за заштита и спасување не е инспекциски орган кој прави контроли на кафулиња, кафани и ресторани. Таа е институција која опфаќа територијална одбрана и цивилна заштита на целата држава. Тука не се само пожари, туку и големи несреќи, шумски пожари. Под неа има Воздухопловна единица, а меѓу другото и Генерален инспекторат кој е надлежен да врши инспекциски надзор на територијата за која е назначен – рече тој во изјава за медиуми.

Тој посочи дека постојат јасни законски одредби кои го дефинираат инспекцискиот надзор и дека судот мора да се раководи според нив, без оглед на поединечни толкувања.

Според него, прашањето зошто и денес нема доволен број инспектори е проблем кој треба да се постави пред Владата, бидејќи за секое вработување е потребно одобрение од Министерството за финансии.

– Ова не е едноставен, туку комплексен проблем, кој засега, во односите во државата и начинот на кој се пополнуваат местата и како се гледаат определени работи и ситуации, се решава на многу тежок начин – рече тој.

Давидовиќ нагласи дека Советот на општината, МВР и други институции се надлежни да преземат мерки и да ги одржуваат средствата за заштита и спасување во кондиција, за да можат да ги исполнат обврските согласно законот.

– При одобрение за градба, доколку не поседувате вакво одобрение на планот за заштита, програмата за заштита и спасување, не треба да добиете одобрение за градба, ниту употребна дозвола – нагласи тој.

Изјавата следува по сведочењето на инспектор на ДЗС од подрачното одделение во Виница кој сведочеше дека по пожарот во клубот „Пулс“ во Кочани, увидната екипа на Дирекцијата за заштита и спасување утврдила сериозни пропусти – недостиг на противпожарни апарати, празен хидрант, и заклучена помошна врата.

Инспекторот сведочеше дека Општина Кочани повеќе од една деценија немала инспектор за заштита и спасување, а за надзор во друга општина е потребен писмен налог од раководството.

The post ДИРЕКЦИЈАТА ЗА ЗАШТИТА НЕ Е ИНСПЕКЦИСКИ ОРГАН ЗА КАФУЛИЊА Адвокатот Давидовиќ вели дека таа има сосема друга функција во државата appeared first on plusinfo.mk.

Во кањонот Матка има одрони на карпи, граѓаните треба да се исклучително внимателни.

Општината Сарај ги информира жителите, локалните и странските туристи, како и сите здруженија кои планираат активности во оваа област, дека врз основа на одлуката на Дирекцијата за заштита и спасување, при движењето по патеката на Матка треба да се внимава поради ризик од одрон на камења.

Општината информира и дека Дирекцијата за заштита и спасување постави знаци што означуваат одрон на камења во опасни подрачја.

Забраната стапува на сила веднаш и ќе трае до понатамошно известување.

„Се замолуваат сите граѓани и посетители да ја почитуваат одлуката за сопствена безбедност. Во спротивно, во случај на несреќа поради непочитување на правилата, одговорноста останува на оштетениот“, апелира Општина Сарај.

The post ВНИМАВАЈТЕ, КАРПИ ПАЃААТ НА ПАТЕКАТА ВО КАЊОНОТ МАТКА Опасни одрони во популарниот споменик на природата appeared first on plusinfo.mk.

Одбраната на обвинетите поранешни директори на Дирекцијата за заштита и спасување (ДЗС) Беким Максути и Џеват Селами се спротивстави на обвинителниот акт, во воведните зборови на денешното рочиште во судницата во Идризово.

Адвокатот Еленко Миланов, кој е бранител на Максути, истакна дека обвинението против него е неосновано и дека неговиот клиент не може да се доведе во причинско-последична врска со настанот. Адвокатот Јасмин Калач, пак, нагласи дека постапката против Џеват Селами се темели на нецелосни и погрешно утврдени факти.

Двајцата адвокати пред судот посочија дека нивните клиенти немаат законски надлежности ниту фактичка моќ да влијаат врз пожарот што се случи во дискотеката „Пулс“ во Кочани на 16 март, за време на концерт на групата ДНК и трагичниот исход со 63 загинати.

Бранителот Миланов истакна дека вистинските виновници за пожарот не се опфатени со обвинението.

– Вистината во ова обвинение е дека за тој што го предизвика пожарот немате обвинение. Според обвинението, причина е непромислено однесување на две лица од изведувачот на таа вечер, но за начинот на изведување и за употребата на пиротехничките средства знаеше целата група – рече тој.

Миланов нагласи дека трагедијата е последица на недозволена употреба на пиротехнички средства во затворен простор.

– Ќе докажеме дека непромисленост, недозволеност на употреба на пиротехнички средства во затворен простор е причина за пожарот… Нивната непромисленост ја платија на најгрубиот можен начин, со губење на своите животи. Но, ќе докажеме дека тие со себе повлекоа и повеќе од 50 недолжни лица, кои исто така ги изгубија животите, како и 200 лица кои се здобија со повреди – рече Миланов.

Од правен аспект, адвокатот потенцираше дека членот 288 (Предизвикување општа опасност) став 2 од Кривичниот законик не може да се примени врз службено лице.

– Нема никакви елементи на дејствија на сторување ниту пак елементи на причинско-последична врска од неговата функција директор на ДЗС – рече Миланов.

Адвокатот потсети дека од 2009 година во Кочани нема инспектор на ДЗС, но тоа, според него, нема никаква врска со пожарот. Истакна и дека до ДЗС никогаш не била доставена проектна документација за објектот „Кабаре Пулс“.

– Она што е обврска на Дирекцијата за заштита и спасување, а посебно на директорот, е да постои годишен план кој треба да се достави до Инспекцискиот совет. Ќе ви докажеме дека директорот ниту го изготвува, ниту го одобрува. Инспекцискиот совет овие планови ги има прифатено во периодот додека е директор Беким Максути – рече Миланов.

Во врска со тезата на Обвинителството за системски пропусти, Миланов беше дециден дека Максути е само извршител на системот.

– Теорија на случај која се обидува да ја докаже Обвинителството е системски пропусти на институции и на државни службеници, но кој е системот? Јас, вие, господо судечки совет и овде присутните државни службеници, сме извршители на законите кои ги донесува системот. За Беким Максути не можеме да зборуваме дека тој е извршител на системот – посочи Миланов.

На крај, адвокатот заклучи дека нема ниту еден факт кој го поврзува Максути со трагедијата.

– Каузалитет за ова што се случи како трагедија девет месеци по престанувањето на функцијата на Беким Максути нема. Нема каков било придонес за оваа трагедија за да може да опстојува во ова обвинение – нагласи тој.

Максути не даде дополнителни коментари и се согласи со воведниот збор на својот бранител.

Адвокатот Јасмин Калач, бранител на обвинетиот Џеват Селами, ја критикуваше обвинителната постапка, тврдејќи дека таа се темели на нецелосни и погрешно утврдени факти.

– Обвинението е со нецелосно и погрешно утврдени факти, суштински повреди на кривичниот закон и не обезбедува доволно докази кои би ја оправдале основаноста на сомневањето дека обвинетиот Селами го сторил кривичното дело што му се става на товар – рече Калач.

Тој нагласи дека обвинителниот акт не содржи конкретни дејствија или умисла.

Според одбраната, Селами воопшто не бил на местото на настанот и немал законски надлежности да постапи.

– Не постои ниту еден релевантен доказ кој го поврзува обвинетиот со кривично-правниот настан бидејќи тој воопшто не бил на местото на настанот ниту пак има законски надлежности врз основа на кои би требало да постапи кобната вечер – рече тој.

Калач истакна дека обвинетиот се товари за последици врз кои немал никаква моќ. И тој ги посочи нелегалната пиротехника и недозволената работа на објектот како вистински причини за трагедијата.

Во врска со кадровските ресурси, Калач нагласи дека ДЗС располагал со премал број инспектори и додаде дека Селами веднаш по стапувањето во функција презел мерки за нови вработувања.

Калач го оспори и квалитетот на доказите.

– Ова е историски процес, не дозволувајте одговорноста за неуспехот на целиот државен апарат да се сведе на овој човек – рече Калач.

Селами се согласи со воведниот збор на неговиот бранител без дополнителни коментари.

Бранителот на генералниот инспектор во ДЗС, Љупчо Грнчиштанов, адвокатот Дончо Наков, во воведниот збор укажа дека во текот на постапката преку законските одредби и прописи ќе докажат дека обвинетиот Грнчиштанов ги презел сите мерки и активности од оперативен, нормативен, организациски, надзорен и технички карактер на кои бил обврзан со закон во рамките на неговото, а не во рамките на туѓото постапување.

– Ќе докажеме дека истиот не сторил дејствија на пропуштање со кои преку теоријата на верижна одговорност би бил наводен сторител како соизвршител на ова дело. Ќе докажеме дека не го сторил делото – изјави Наков.

Љупчо Грнчиштанов се приклучи кон воведниот говор на неговиот бранител. На семејствата на загинатите им изрази сочувство, а на повредените им посака побрзо закрепнување.

The post ЧЛЕНОВИТЕ НА ДНК КОИ ЗАПАЛИЈА ПИРОТЕХНИКА СЕ ОДГОВОРНИ ЗА ПОЖАРОТ ВО „ПУЛС“ Директорите на Дирекцијата за спасување немаат надлежност за тоа што се случувало во дискотеката appeared first on plusinfo.mk.

Обвинението за пожарот во „Пулс“ е правно погрешно и без факти кои го поврзуваат со трагичниот пожар, истакна на денешното рочиште одбраната на поранешниот директор на Дирекцијата за заштита и спасување, Аднан Џаферовски. Неговата бранителка, адвокатката Сузана Јошевска Анастасовска предупреди дека ниту еден системски пропуст не создава индивидуална кривична одговорност. Џаферовски, пак, порача дека совеста му е апсолутно чиста и дека верува во чесноста на правдата и праведноста на судот.

Адвокатката Јошевска Анастасовска во воведниот говор истакна дека обвинението е погрешно конструирано и дека не постојат факти кои го поврзуваат нејзиниот клиент со трагичниот настан.

– Мојата единствена порака до вас денеска е дека јас и Аднан Џаферовски не сме ви непријатели. Ова обвинение вака конструирано ни става замка во која сите – ние, вие, судот, јавноста – мораме да се снаоѓаме во хаос кој не е создаден од факти, туку од погрешна правна рамка – рече Јошевска Анастасовска.

Таа нагласи дека обвинението против Џаферовски, кој беше директор на ДЗС во периодот од 2017 до 2020 година, „ја промашува адресата за кривична одговорност“.

– Обвинителството меѓу обвинетите како Аднан не бара кривична одговорност, туку системска грижа. Не прибирале докази кои би оделе нанапред кон резултатот, туку од списокот се одело наназад. Непристрасна истрага дозволува доказите да водат кон резултатот, но овде резултатот е прво поставен, па после се барало како да се состави приказната. Тоа не е правна логика, тоа е попис претворен во обвинителен акт – додаде таа.

Јошевска посочи дека ниту еден системски пропуст не создава индивидуална кривична одговорност без конкретна поврзаност на дејството со последицата, како што бараат правото, разумот и логиката.

– Правниот објект кој изгоре во 2025 година во правна смисла не постоел во времето кога на функција бил Аднан Џаферовски. Објектот бил реконструиран, што значи дека е нов објект. Што точно требал да преземе Аднан Џаферовски од 2017 до 2020 година за да спречи пожар во објект кој изгорел во 2025 година, а настанал во 2024 година? Не можете да обвинете некого за пропуст, ако не можете да докажете што пропуштил – истакна Јошевска.

Таа додаде дека „директорот не пишува планови и не ги оценува, не може да нареди вонредна инспекција без да добие информација, нема законска надлежност да знае за нелегални објекти“.

– Аднан Џаферовски како директор не знаел за реконструкцијата во 2024 година. Наводниот синџир на пропусти е прекинат со реконструкцијата во 2024 година. Ова не е случај во кој фактите се спорни, ова е случај во кој правото е погрешно применето и токму судот треба да биде последниот филтер на разумот – заклучи Јошевска.

Обвинетиот Аднан Џаферовски нагласи дека не чувствува вина за трагичниот настан.

– Не смееме да доволиме една трагедија, едно зло да го одмаздиме со друго и притоа да мислиме дека правдата е задоволена. Мене како човек совеста ми е апсолутно чиста. Обвинет сум за несторување со умисла во нефункционален систем. Јас бев само кратко време на чело на еден фрагмент од тој нефункционален систем кој пробав со моето знаење и умеење да го подобрам и сметам дека во голем дел успеав – рече Џаферовски.

Ги рабирам амбициите на луѓето, додаде тој, затоа што без амбиции човекот е како без сенка.

– Ги разбирам и амбициицте на некои јави обвинители да напредуваат во своите кариери. Ама никако нема да прифатам тоа да го прават на штета и со рушење на мојот интегритет. Тоа нема да им го дозволам – рече Џаферовски.

Тој додаде дека верува дека ќе го убеди судот за неговата невиност низ доказите кои ќе бидат презентирани.

– Чесен суде, јас не сум очајник за да се надевам на милост или да очекувам што ќе ми даде господ. Пред сè и над сè очекувам и верувам во чесноста на правдата, праведноста на судот – заврши Џаферовски.

Обвинителството ги гони директорите на Дирекцијата за заштита и спасување во периодот од 2012 до 10 март 2025 година, дека како службени лица „заеднички со особен придонес во извршување на делото, иако биле свесни дека поради нивното несторрување може да настапи штетна последица, се согласиле со нејзиното настапување на начин што не преземале мерки и активности за заштита на животите и имотот на луѓето од пожари со отстранување на причините за настанување на пожари, предвидени во член 68 од Закон за заштита и спасување.

АКО СИСТЕМОТ Е ВИНОВЕН ЗА ПОЖАРОТ, ЗАРЕМ ВОДАТА ЗА ГАСНЕЊЕ НЕ Е ВО ОБВИНИТЕЛСТВОТО? Бог да чува, ме обвинуваат дека сум се согласил за смртта на 63 луѓе, рече Салиу

The post ШТО ТРЕБАЛО ДА ПРЕЗЕМЕ ЏАФЕРОВСКИ ДО 2020 ЗА ОБЈЕКТ ШТО ИЗГОРЕ ВО 2025 ГОДИНА? Јошевска категорична дека обвинението е погрешно конструирано appeared first on plusinfo.mk.