Грчката аналитичка мрежа ИБНА во поставувањето на македонското државно знаме во кабинетот на Али Ахмети гледа редефинирање на политичкиот наратив и на ставот на ДУИ, премин од етничка мобилизација кон институционален кредибилитет и обид партијата повторно да се претстави како сериозен и кредибилен политички фактор.

Можеби анализата е точна. Можеби Ахмети навистина се обидува да му се приближи на премиерот Христијан Мицкоски. Можеби се подготвува за некоја идна коалициска комбинација. Можеби сака да испрати порака до странските амбасадори дека ДУИ повеќе не е само партија на етнички барања, туку политичка структура која го почитува државниот поредок.

Но постои и многу поедноставно објаснување. Знамето го поставил затоа што требало да биде таму. Затоа што така мора. Не затоа што Али Ахмети доживеал ненадејно политичко и државно просветлување. Не затоа што ДУИ преку ноќ се преобразила во граѓанска партија. Не затоа што државното знаме е новооткриен симбол на политичка умереност. Туку затоа што македонското знаме е знаме на државата во која Ахмети живее, дејствува, учествува во политичкиот живот, профитира од политиката и повеќе од две децении претендира да одлучува за нејзината сегашност и иднина.

Според објавените информации, државното знаме било поставено во неговиот кабинет дури по 24 години, и тоа по сугестија на странски амбасадори. Самиот Ахмети изјавил дека дипломатите му предложиле знамето да биде поставено во канцеларијата.

Токму тука се наоѓа вистинскиот проблем и големиот срам.

Зарем на лидер на политичка партија што толку долго учествувала во власта навистина му била потребна сугестија од странски дипломати за да го постави знамето на сопствената држава? Зарем амбасадорите требало да му објаснат дека, кога прима официјални претставници во партиско седиште, државното знаме не е непожелен декор, туку пред сè морална, политичка и државничка обврска? Зарем почитувањето на државата во која со години се користат државни функции, буџетски средства, институционални позиции и политичко влијание треба да зависи од дипломатско потсетување?

Ако е така, тогаш ова не е историски исчекор. Ова е крајно задоцнето исполнување на една основна морална, политичка и државничка обврска. Зарем треба да му се честита на човек затоа што по 24 години го поставил знамето на државата во која сака да владее? Како што не му се честита на министер затоа што дошол на работа, на пратеник затоа што се појавил во Собранието или на функционер затоа што ги почитува државата и институциите во кои дејствува. Тоа не е подвиг. Тоа е минимум почит кон сопствената држава и пред сè морална обврска.

Грчката анализа во овој потег гледа премин од етнички симболизам кон институционален кредибилитет. Но институционалниот кредибилитет не се стекнува со едно знаме поставено пред средба со амбасадор. Тој се стекнува со доследно почитување на државата, на нејзините институции и нејзиниот правен поредок, на грбот, знамето и химната, на службениот јазик на државата и на сите нејзини граѓани.

Знамето не смее да стане коалициски реквизит што се вади од плакарот кога партијата ќе остане надвор од власта. Овој случаен или изнуден „гест на добра волја“ не смее да биде сигнал упатен кон Мицкоски: еве, сега сме поприфатливи, сега сме подржавотворни, сега можеме повторно да разговараме за владина коалиција. Ако државното знаме се поставува само кога ДУИ треба политички да се репозиционира, тогаш не станува збор за почитување на државата, туку за користење на државниот симбол како средство за политичко пазарење.

Ахмети вели дека отсекогаш бил за унитарна држава. Добро е тоа конечно јавно да се слушне. Но унитарноста не се докажува со една изјава. Уште помалку со парче платно поставено зад работната маса. Унитарната држава се почитува така што нејзините институции не се третираат како етнички плен, партиски феуди или средство за лично богатење. Така што јавните функции не се делат како партиски и етнички привилегии. Така што граѓаните не се пребројуваат само според етничката припадност. Така што државата не се прикажува како механички договор меѓу две затворени етнички елити, туку како заеднички политички и правен дом на сите нејзини граѓани.

И тука неизбежно доаѓаме до македонскиот јазик.

Срамно е човек кој повеќе од две децении е еден од најмоќните политички актери во Македонија, кој учествувал во формирањето влади, поставувањето министри, креирањето закони и носењето одлуки од највисоко државно значење, упорно да не ѝ се обраќа на македонската јавност на македонски јазик. Особено ако јазикот го знае и го разбира.

Никој не му го оспорува правото да зборува албански. Албанскиот јазик е јазик на значаен дел од нашите сограѓани и неговата употреба е уставно и законски уредена. Почитувањето на македонскиот јазик не значи негирање на албанскиот, како што почитувањето на албанскиот не смее да значи потиснување на македонскиот јазик. Но правото да се зборува на сопствениот мајчин јазик не е оправдување за демонстративно избегнување на службениот јазик на државата во која се претендира на највисоко политичко влијание.

Уставниот поредок е јасен. На целата територија на државата и во нејзините меѓународни односи службен јазик е македонскиот јазик и неговото кирилско писмо. Друг јазик што го зборуваат најмалку 20 проценти од граѓаните, исто така, има службена употреба на начин утврден со закон. Законот за употреба на јазиците е во сила од 2019 година и ја уредува службената употреба на јазиците во институциите.

Да бидам правно прецизен: не постои одредба што го обврзува лидерот на една партија во секоја приватна или партиска изјава задолжително да зборува македонски. Но постои нешто што е подлабоко од заканата со парична казна. Постои уставна одговорност, политичка култура и елементарна почит кон граѓаните на кои им се обраќате и со кои сакате да владеете.

Политичар што сака да биде фактор на целата држава мора да биде способен директно да им се обрати на сите нејзини граѓани. Без преведувач. Без посредник. Без намерно создавање дистанца од соговорниците.

Јазикот не е само техничко средство за комуникација. Тој е порака за тоа кого го сметате за своја политичка јавност. Кога еден лидер со децении зборува исклучиво на јазикот на сопствениот етнички електорат, тој со тоа покажува дека првенствено се гледа како претставник на една заедница, а не како политичар кој претендира да ја води или да одлучува за целата држава. А уште помалку по она неговото „Pse jo за Скопје!’’ и по кампањата „Албанец за премиер’’, како премиерската функција да е етничка награда, а не државна должност и одговорност кон сите граѓани.

Затоа поставувањето на македонското знаме ќе добие вистинска тежина дури тогаш кога ќе биде проследено со промена во политичкото однесување. Кога Ахмети ќе ѝ се обрати на македонската јавност на македонски јазик. Кога ДУИ ќе престане секое прашање да го сведува на етничко пребројување. Кога државните институции ќе ги доживува како јавен сервис, а не како простор што треба да се освои и кадровски да се подели. Кога почитувањето на македонските државни симболи нема да зависи од тоа дали партијата е на власт или во опозиција. Кога Македонија нема да биде прифатлива само тогаш кога треба да обезбеди министерства, директори, тендери, вработувања и политичко влијание.

Ако ДУИ навистина го редефинира својот наратив и став, тоа треба да го покаже со дела. Со институционална одговорност. Со откажување од етничката ароганција. Со почитување на македонскиот јазик, македонското знаме и македонскиот грб. Со прифаќање дека државата не е привремена коалициска конструкција, туку траен политички дом. Во спротивно, знамето ќе остане само сценографија. Убаво наместено пред камерите, корисно за дипломатските средби и погодно за испраќање пораки до Мицкоски, но без вистинска промена во политичката суштина.

Македонското знаме не му припаѓа ниту на Мицкоски, ниту на Ахмети, ниту на која било партија. Тоа им припаѓа на граѓаните и на државата. Затоа неговото присуство во кабинетот на човек што сака да биде државник не смее да се толкува како великодушен гест. Тоа е обврска на секој граѓанин на оваа држава.

А на прашањето зошто Али Ахмети по 24 години го поставил македонското знаме во својот кабинет, одговорот може да се даде со една единствена реченица:

Затоа што така мора да биде.

The post Ахмети и 24-годишниот срам: Знамето го постави затоа што мора appeared first on plusinfo.mk.

Политички мотивираниот тероризам не смее да остане слепа точка во нашата заедничка безбедносна архитектура. Современите закани бараат координиран одговор, силни институции, цврсти партнерства и целосно почитување на владеењето на правото.

Вака објави на Фејсбук шефот на македонската дипломатија Тимчо Муцунски од Вашингтон. Муцунски, на покана на државниот секретар на САД, Марко Рубио, учествуваше и се обрати на министерскиот состанок посветен на заканите од подемот на политичкиот тероризам.

„Заедно со високи претставници од повеќе од 60 држави, разговараме за зајакнување на меѓународната соработка и институционалната подготвеност за справување со новите безбедносни предизвици. Настанот е значајна можност за продлабочување на соработката со САД и другите меѓународни партнери, преку поефикасна размена на безбедносни и оперативни информации и координиран пристап“, напиша Муцунски.

The post СОВРЕМЕНИТЕ ЗАКАНИ БАРААТ ЗАЕДНИЧКИ ОДГОВОР ОД СОЈУЗНИЦИТЕ Муцунски од Вашингтон предупреди на подемот на политичкиот тероризам appeared first on plusinfo.mk.

Американскиот потпретседател Џеј Ди Венс отфрли можност за испраќање масовни копнени сили во Иран. Според него, евентуалната промена на власта може да дојде само од иранскиот народ.

САД нема да испратат 150.000 војници во Иран за да урнат режим, порача американскиот потпретседател Џеј Ди Венс. Тој нагласи дека Вашингтон нема намера да води бесконечна воена кампања и дека иднината на иранската власт треба да ја одлучат самите Иранци.

Изјавата доаѓа во време кога дел од американските конзервативци бараат поостар пристап кон Техеран и отворено зборуваат за промена на режимот.

– Ако иранскиот народ сака да се крене и да ја промени својата влада, тоа зависи од нив. Но ние нема да испратиме 150.000 копнени трупи за да постигнеме промена на режимот, освен ако луѓето на терен не сакаат да го постигнат тој резултат. Нема да испраќаме трупи по секоја цена – изјави Венс.

Критика за „бесконечни војни“

Венс ги критикуваше политичарите кои бараат подолга и поширока воена кампања против Иран.

– Тие сакаат воената кампања да трае засекогаш. Притоа не можат јасно да објаснат што точно сакаат да постигнат. Некои од нив сакаат целосна промена на владата во Иран – рече американскиот потпретседател.

Тој оцени дека воениот притисок сам по себе не е доволен за решавање на кризата.

Покрај бомбите, потребна е и дипломатија

Според Венс, конфликтот со Иран не може да се реши исклучиво со воени средства.

Тој нагласи дека покрај бомбардирањето е потребна и дипломатија, која би помогнала да се најде политичко решение и да се избегне понатамошна ескалација на судирот.

The post САД СЕ ОТКАЖАА ОД КОПНЕНА ОПЕРАЦИЈА ВО ИРАН? Само народот може да го смени режимот, вели Ди Венс appeared first on plusinfo.mk.

Бугарија се повлекува од коалицијата на земји кои ја поддржуваат Украина во одбраната од руската агресија, објави бугарскиот претседател Румен Радев.

Одлуката претставува ново дистанцирање на Софија од дел од европските сојузници кои продолжуваат да ја поддржуваат Украина со воена и со финансиска помош.

– Ние не учествуваме во коалиција што инсистира на продолжување на финансиската и на воената помош за Украина – изјави Радев.

Бугарскиот претседател, кој со години е критичен кон испраќањето оружје за Киев, повторно нагласи дека не поддржува понатамошна ескалација на конфликтот.

– Решението за овој конфликт не лежи во неговото продолжување со воени средства, туку во силна дипломатска мисија што конечно ќе ја запре ескалацијата – рече Радев.

Иако Бугарија учествуваше на претходните состаноци на коалицијата, земјата не испрати свој претставник на средбата што се одржа во Париз.

Радев и претходно ги отфрлаше обвинувањата дека зазема проруски став, тврдејќи дека се залага за прагматични односи со Москва и за дипломатско решение на војната.

The post БУГАРИЈА СЕ ПОВЛЕКУВА ОД КОАЛИЦИЈАТА ЗА УКРАИНА Радев се залага за мирно решение за крај на војната appeared first on plusinfo.mk.

Ковчези со останките на убиениот ирански врховен лидер ајатолахот Али Хамнеи и неколку членови на неговото семејство се изложени во Техеран, додека Иран се подготвува за повеќедневните погребни церемонии, каде од 4 до 9 јули се очекува да присуствуваат милиони луѓе.

Хамнеи и членовите на неговото семејство беа убиени кон крајот на февруари во почетната фаза од војната меѓу Иран и САД и Израел. Иранските државни медиуми објавија дека телата на зетот на Хамнеи, Месбах-ол-Хода Багери, најстарата ќерка Сеједе Бошра Хосеини Хамнеи, снаата Захра Хадад Адел и 14-месечната внука Захра Мохамади Голпајгани беа меѓу оние што беа изложени во Големата џамија Имам Хомеини во Техеран. Сите ковчези се покриени со иранското знаме, а пред ковчегот со големина на бебе има фотографија од девојчето, објави Си-ен-ен.

Дипломатските активности се привремено запрени додека Техеран се подготвува за погребот. Тензиите меѓу САД и Иран остануваат високи. Иран издаде ново предупредување до бродовите да се држат до рутите што ги постави во Ормуската Теснина и ги предупреди САД и Израел да не извршуваат напади за време на погребот.

Главното прашање пред погребот е дали Моџтаба Хамнеи, новиот врховен лидер и син на убиениот ајатолах, ќе се појави да ја води молитвата за својот татко. Се верува дека Моџтаба бил сериозно ранет во истиот напад во кој загинаа неговата мајка и сопруга. Од почетокот на војната, тој се крие од јавноста и комуницира со своите поддржувачи само преку писмени изјави. Неговото појавување би било прво јавно појавување и би помогнало да се зацврсти неговиот легитимитет во земјата. Од друга страна, неговото отсуство ќе покрене сомнежи за неговото здравје и ќе го отвори прашањето кој навистина ја води земјата.

На погребот на ајатолахот Али Хамнеи ќе присуствуваат претставници на Кина, Индија и Пакистан. Пакистанскиот премиер Шехбаз Шариф, чија земја се етаблираше како клучен посредник меѓу Иран и САД, ќе отпатува во Иран за да „изрази сочувство“, потврди портпаролот на Министерството за надворешни работи. Кина ќе ја претставува Хе Веи, потпретседател на Постојаниот комитет на Националниот народен конгрес, додека заменик-министерот за надворешни работи Пабитра Маргарита и гувернерот на Бихар, Сејед Ата Хаснаин, ќе дојдат од Индија. Двајца високи талибански функционери, заменик-премиерот на Авганистан и вршителот на должноста министер за надворешни работи, исто така, ќе присуствуваат на испраќањето.

Портпаролот на иранското Министерство за надворешни работи, Есмаил Багаеи, рече дека Иран очекува „гости од околу сто земји“. Сепак, освен Шариф и грузискиот претседател Михаил Кавелашвили, се чини, дека на погребот ќе присуствуваат малку странски лидери. Повеќето земји, како што се Кина и Индија, испраќаат високи, но не и врвни функционери. За иранскиот режим, погребот е можност да ги истакне своите дипломатски врски и да проектира слика за стабилност и единство.

The post ПОЧНА ПОГРЕБНАТА ЦЕРЕМОНИЈА ЗА АЈАТОЛАХОТ АЛИ ХАМНЕИ Неговиот ковчег е изложен во Техеран appeared first on plusinfo.mk.

Американскиот државен секретар Марко Рубио порача дека САД не сакаат договор со Иран по секоја цена, предупредувајќи дека премногу компромиси би можеле да доведат до „тотален хаос“ во чувствителниот регион околу Ормускиот Теснец.

Зборувајќи за време на турнејата низ земјите од Персискиот Залив, Рубио во Бахреин истакна дека Вашингтон останува отворен за договор, но не по цена што би ја загрозила глобалната безбедност и слободата на поморскиот сообраќај.

– Дури и ако сакаме договор, не сакаме договор по секоја цена – рече Рубио.

Тој се осврна на можните економски мерки поврзани со Ормускиот Теснец, каде што Иран, според наводи, разгледува воведување такси или патарини за премин – потег кој САД категорично го отфрлаат.

– Ако прифатиме дека користењето на меѓународен воден пат може да се наплаќа само затоа што е блиску до нечија територија, тоа би можело да се прошири како глобален преседан – предупреди Рубио.

Во меѓувреме, Корпусот на Исламската револуционерна гарда претходно предупреди дека секое неовластено поминување низ Ормускиот Теснец ќе биде санкционирано, што дополнително ја зголемува тензијата во регионот.

Ормускиот Теснец останува клучна точка на несогласување меѓу Техеран и Вашингтон, особено по неодамнешните воени и политички тензии.

Според наводи на француски медиуми, во рамки на договорот за завршување на конфликтот било предвидено комерцијалниот бродски сообраќај низ теснината да биде слободен, но само во ограничен временски период од 60 дена.

The post РУБИО СО ОСТРА ПОРАКА ДО ИРАН Америка нема да прифати договор по секоја цена appeared first on plusinfo.mk.

Потпретседателот на САД Џеј-Ди Венс изјави на прес-конференција во Швајцарија дека Вашингтон ги постигнал целите што ги поставил во мировните преговори со Иран и дека разговорите донеле значителен напредок.

– Вчера беше многу, многу добар ден. Го постигнавме токму она што го сакавме – рече Венс, пренесуваат светските медиуми.

Тој посочи дека американската страна остварила четири главни цели во разговорите со иранската делегација, а како најзначајно достигнување го издвојува прифаќањето на Техеран да дозволи инспектори на Меѓународната агенција за атомска енергија да влезат во земјата и да вршат надзор.

Според Венс, во текот на преговорите имало закани дека Иран може да се повлече од разговорите.

– Имаше закани дека ќе ги напуштат преговорите, или барем такви пораки се појавуваа на социјалните мрежи. Но разговорите продолжија длабоко по полноќ, а нивниот технички тим и натаму е тука во Бургеншток и работи заедно со нашиот технички тим – изјави американскиот потпретседател.

Тој додаде дека американската делегација јасно им ставила до знаење на иранските претставници дека острите јавни пораки и меѓусебните обвинувања не можат да останат без одговор од страна на Вашингтон.

Венс оцени дека во текот на процесот имало „малку закани“ и „малку кукање“, но нагласи дека најважно е што разговорите продолжиле и што двете страни успеале да остварат значителен напредок.

The post „ИМАШЕ МАЛКУ ЗАКАНИ, МАЛКУ КУКAЊЕ, НО НА КРАЈОТ БЕШЕ МНОГУ УСПЕШНО“ Џеј-Ди Венс вели дека САД ги постигнале клучните цели во преговорите appeared first on plusinfo.mk.

Церемонијата за потпишување на меморандумот за разбирање меѓу САД и Иран, која беше закажана за утре во Женева, е откажана бидејќи документот веќе е потпишан по електронски пат и стапил во сила, соопштија дипломатски извори вклучени во процесот.

Пакистанскиот министер за надворешни работи Ишак Дар изјави дека повеќе нема потреба од свечена церемонија, поради што и пакистанскиот премиер Шехбаз Шариф го откажал патувањето во Швајцарија. Според Дар, следната фаза од процесот ќе се одвива преку одвоени технички разговори за прашањата опфатени со пошироката рамка на договорот, кои ќе бидат фокусирани на имплементацијата и деталното усогласување на одредбите.

Во меѓувреме, Белата куќа го доставила текстот на договорот до американскиот Конгрес. Документот, кој според дипломатски извори е насловен „Исламабадски меморандум за разбирање меѓу Исламската Република Иран и Соединетите Американски Држави“, предвидува прекин на воените операции, постепено укинување на американската поморска блокада врз иранските пристаништа и повторно отворање на Ормутскиот Теснец за слободен комерцијален сообраќај.

Во рок од 60 дена двете страни треба да продолжат со преговори за финален мировен договор кој би ги опфатил сите спорни прашања, вклучително и безбедносните гаранции, санкциите и статусот на нуклеарната програма на Иран.

Портпаролот на иранското Министерство за надворешни работи потврди дека текстот на меморандумот е официјално потпишан од претставници на двете држави, додека американски извори наведуваат дека документот бил финализиран неколку дена порано од првично планираното и бил потпишан по електронски пат.

Според објавените детали од договорот, двете земји се обврзуваат на итен прекин на непријателствата и воздржување од нови воени дејствија. Иран, според истиот текст, потврдува дека нема да развива нуклеарно оружје, додека прашањата за збогатениот ураниум и укинувањето на санкциите ќе бидат предмет на дополнителни преговори во следните два месеца.

Иако свеченото потпишување во Женева е откажано, дипломатски извори наведуваат дека контактите меѓу делегациите ќе продолжат, но во формат на работни и технички состаноци, кои ќе бидат насочени кон имплементација на меморандумот и подготовка на конечен мировен договор меѓу Вашингтон и Техеран.

The post ОТКАЖАНА ЦЕРЕМОНИЈАТА ВО ЖЕНЕВА, ДИГИТАЛНИОТ ПОТПИС ФИНАЛЕН? Иран и САД го активираа мировниот меморандум appeared first on plusinfo.mk.

Израелскиот ракетен напад врз Бејрут предизвика остра реакција од американскиот претседател Доналд Трамп, кој порача дека акцијата не требало да се случи во момент кога САД и Иран се блиску до мировен договор.

– Нападот утрово врз Бејрут не требаше да се случи, особено на овој посебен ден кога сме блиску до мировен договор со Иран – изјави Трамп.

Тој нагласи дека Израел има право на самоодбрана, но оцени дека нападот не треба да го загрози дипломатскиот процес.

Трамп, кој денеска го слави 80. роденден, ги повика Израел, Хезболах и „другите страни“ да престанат со напади и буквално напиша „дајте да не го расипеме мирот“.

„Израел има право да се брани од закани, но нападот на кој реагираше беше многу мал и бесмислен, никој не беше повреден, или убиен, и не треба да го наруши овој важен процес“, гласи дел од пораката на Трамп на Трут Соушл.

Според американскиот претседател, договорот со Иран може да донесе поширока стабилност на Блискиот Исток, вклучително и во Либан.

Во меѓувреме, Трамп потврди дека разговарал со израелскиот премиер Бенјамин Нетанјаху и побарал да нема дополнителни напади кои би можеле да го нарушат напредокот на преговорите.

Изјавите доаѓаат во време кога Вашингтон, Техеран и посредниците интензивно работат на финализирање на договорот, иако од Иран претходно порачаа дека потпишувањето можеби нема да се случи во рокот што го најави американската страна.

И покрај нападот, Трамп останува оптимист. Во изјава за „Фокс њуз“ тој рекол дека очекува договорот со Иран да биде потпишан многу брзо, дури и „во следните два до три часа“.

The post ДАЈТЕ СЕГА ДА НЕ ОПЛЕСКАМЕ КОГА ЧЕКАМЕ ДОГОВОР! Трамп бесен на Нетанјаху и на Хезболах поради нападите appeared first on plusinfo.mk.

На СДСМ му пречи сѐ што е во корист на државата. Не сакаат Македонија да напредува и да успее, затоа и им пречи дипломатскиот успех на Владата предводена од ВМРО-ДПМНЕ, кој во Скопје го потврди и претседателот на Европскиот Совет Антонио Кошта – се вели во соопштение на ВМРО-ДПМНЕ.

„Минатата недела од Македонија, Кошта испрати јасна порака дека државата има опиплив напредок во делот на исполнување на Реформската агенда, а дополнително тоа се потврди и со добивањето на 65,7 милиони евра од Планот за раст, што е за 50% повеќе од, како што ги нарекуваат, фронтранерите Црна Гора и Албанија.

Државата бележи и друг успех на меѓународен план, кој е постигнат благодарение на посветената и неуморна работа и активност на македонската дипломатија. За прв пат Македонија е избрана за членка на Економскиот и социјалниот совет на Обединетите нации – ЕКОСОК, за мандатниот период 2027-2029 година. Со ова Македонија ќе биде дел од едно од главните тела на системот на Обединетите нации.

Додека пак, нацрт-извештајот на Комитетот за надворешни работи на Европскиот парламент за Македонија за 2025 година, испраќа важна политичка порака и потврдува дека Македонија останува јасно препознаена како европска држава посветена на реформите, регионалната стабилност и стратешкото партнерство со ЕУ и НАТО.

Покрај тоа, имаме заедничка изјава со ЕУ во делот на одбраната и безбедносната политика, завршен е пост-мониторингот со Советот на Европа што е потврда дека ги исполнуваме сите демократски капацитети.

Македонската дипломатија посветено работеше и на полето за зацврстување на билатералните односи со државите и во тој правец се потпишаа стратешки договори со моќни европски и светски држави како САД, Обединетото Кралство, Хрватска, Унгарија.

Од друга страна, по долги години се стави крај на неработењето, коленичењето, понижувањето и потчинувањето на македонската дипломатија пред други држави, особено и во делот со Бугарија. Владата предводена од ВМРО-ДПМНЕ потпиша Ратификување на договор со Бугарија за реализација на Коридорот 8, што е од клучно значење за Европа, регионот и самиот Балкан.

Додека едните само се сликаа на автопатиштата со маички и си делеа провизии од анексите за работа на коридорите, додека потпишуваа бланко листови за да останат ден повеќе на власт на штета на македонските интереси, ВМРО-ДПМНЕ работи на достоинственото претставување на државата и со конкретни чекори кои даваат реални ефекти и резултати, посветено работи на евроинтегративниот процес.

Додека некои со предавнички однос кон државата и поданички кон странски држави, Владата на ВМРО-ДПМНЕ со државнички однос постигнува напредок кој денес го поздравуваат голем број претставници на земјите членки на ЕУ.

Сето ова е постигнато со многу труд, многу работа и голема посветеност Македонија достоинствено да се претставува на меѓународен план. Се работеше долго и напорно, без многу фалење, далеку од очите на јавноста и на крајот донесе конкретни и видливи позитивни резултати за Македонија.

Овој успех на македонската дипломатија и напредок на државата не го гледаат само СДСМ и Венко Филипче, кои под поимот успех и реформа, подразбираат само промена на Уставот и внесување на Бугарите, со крајна цел редефинирање на македонската историја по бугарски терк“ – се вели во соопштението на ВМРО-ДПМНЕ.

The post НА СДСМ И НА ФИЛИПЧЕ ИМ ПРЕЧАТ ДИПЛОМАТСКИТЕ УСПЕСИ НА МАКЕДОНИЈА Изборот за членка на Економско-социјалниот совет на ООН е плод на посветен труд appeared first on plusinfo.mk.