На маргините на самитот на Асоцијацијата на земјите од Југоисточна Азија (АСЕАН), Кулеба ги повика земјите од тој регион политички и материјално да ја поддржат Украина.

Тој рече дека светот треба да изврши притисок врз Русија да не се откаже од договорот за извоз на храна, „бидејќи украинските земјоделски производи се клучни во Африка и Азија”. Исто така ги обвини и руските инспектори за „тивка саботажа”, односно намерно одложување на испораките.

По потпишувањето на договорот со посредство на Обединетите нации и Турција, беше формиран тим од руски, украински, турски и инспектори на ОН за следење на извозот на храна.

– Русија треба, односно мора, да престане да игра игри со глад со светот – рече Кулеба.

Украина првпат беше поканета на самитот на АСЕАН, кој го сочинуваат Камбоџа, Филипини, Малезија, Индонезија, Лаос, Сингапур, Тајланд, Виетнам, Брунеи и Мјанмар. Сепак, на лидерите на Мјанмар не им е дозволено да учествуваат поради моменталната ситуација во земјата.

Неколку земји-членки на АСЕАН досега беа резервирани по прашањето за инвазијата, тие ја осудуваат војната, но исто така се обидуваат да избегнат осуда на руската страна.

Осум од 10-те земји на АСЕАН гласаа за резолуцијата на Генералното собрание на ОН за осуда на руската агресија, а Виетнам и Лаос беа воздржани.

The post РУСИЈА ИГРА ИГРИ СО ГЛАД Украински министер бара светот да го притисне Путин да го почитува договорот за житото appeared first on plusinfo.mk.