До крајот на оваа година не се планира издавање нова Еврообврзница. Се она што беше планирано со Буџетот за 2026 година при неговото носење за обезбедување средства најпрвин за отплата на старите долгови е веќе реализирано и останува до крајот на годината обезбедување средства за финансирање на буџетскиот дефицит, изјави министерката за финансии Гордана Димитриеска-Кочоска во интервју за ТВ Сител.

– Согласно проекциите на буџетот и како беше проектирано со носењето на Буџетот така се одвива финансирањето. Сето она што значеше да обезбедиме средства најпрвин за отплата на старите долгови, сето тоа ние го направивме и дополнително на тоа она што треба да го обезбедиме до крајот на годината за сервисирање на буџетскиот дефицит. Тука имаме уште обврски или побарувања по основ на државни хартии од вредност или надворешно некаде меѓу 250 и 300 милиони евра со цел сето она што ни било планирано да се реализира, но секако дека дел од тоа салдо ќе се пренесе и во 2027 година – рече Димитриеска-Кочоска.

Таа додаде дека за годинава нема планирано издавање нова еврообврзница и потсети дека Еврообврзница веќе се издаде во јануари со која се отплати Еврообврзницата издадена во 2020 година од 700 милиони евра и дека минатата недела е исплатена во целост.

Притоа додаде дека во текот на денот е пристигнат приливот од кредитот од странски банки во износ од 260 милиони евра и се пристигнати средствата согласно Реформската агенда со што потенцира дека се што е планирано е реализирано.

– Ние оваа година имаме огромни обврски и секоја следна и  постојано тоа го комуницираме. Тоа значи дека првин треба да обезбедиме пари да ги вратиме старите долгови. Не се случило во светот, освен Либан, да имала доцнење во сервисирање на своите обврски. Тоа е нешто најстрашно што може да се случи на една држава. Кога обврските ви се секоја година огромни вие првин имате фокус и задача да ги сервисирате тие обврски, а понатаму се трудите да обезбедите колку можете за покривање на буџетскиот дефицит од тековната година – рече министерката.

Таа посочи дека најголемата тежина на Министерството за финансии е што сите долгови се сконцентрирани во 4 години и дека секоја година сигурно ќе има потреба од издавање на еврообврзница, меѓутоа потенцира дека сигурно рочноста и структурата ќе се приспособи се со цел да не се повторат грешките на претходната Влада.

Осврнувајќи се дека јавниот долг во континуитет е на ниво околу 60% потенцира дека зголемвуањето на долгот или задолжувањето не е страшно ако е правилно насочено.

– Секој нов долг насочен кон одреден проект што ќе има додадена вредност за економијата во суштина ќе го намалува тој процент на јавен долг и во овој момент сметам дека Владата успешно тоа го менаџира затоа што состојбата што ја наследивме беше алармантна – Димитриеска-Кочоска.

 Таа дополни дека покрај другото како обврска е реализирана и отплата на првиот дел од солидарниот данок кон компаниите во износ од 1,5 милијарди денари или 25 милиони евра, што исто така е обврска наследена од претходната Влада.

Таа потенцира дека  Буџетот е тековен, ликвиден и нема никаков проблем со сервисирање на обврските.

Во гостувањето се осврна на растот на БДП во првиот квартал, податок којшто беше објавен од Државниот завод за статистика, кој според министерката е еден циклус на континуиран пораст или стабилен раст на БДП, што е резултат на економската активност што се случува и укажува дека имаме навистина позитивна клима која ќе продолжи и во наредниот период.

Димитриеска-Кочоска посочи дека покрај јавните инвестиции се случуваат и инвестиции во приватниот сектор што се гледа преку двоцифрениот раст на кредитите како и поддршката обезбедена од Владата со унгарскиот заем. Притоа истакна и дека се врши навремено и редовно повратот на ДДВ кон компаниите и дека заклучно со мај 2026 година има поголем поврат на ДДВ во однос на истиот период лани за 4,7%.

The post ПРИСТИГНАА 260 МИЛИОНИ ЕВРА ОД КРЕДИТОТ КАЈ СТРАНСКИТЕ БАНКИ Димитриеска-Кочоска тврди дека буџетот е ликвиден, а обврските се намирени appeared first on plusinfo.mk.

Министерството за финансии ја заокружи отплатата на еврообврзницата издадена во 2020 година во износ од 700 милиони евра, со што во целост е исполнета обврската кон инвеститорите, информираше министерката Гордана Димитриеска – Кочоска, нагласувајќи дека процесот е реализиран навремено, со претходно планирани средства и со заштеди на камати.

Димитриеска – Кочоска појасни дека отплатата е спроведена во неколку фази, при што дел од обврската е предвреме сервисирана, а остатокот исплатен согласно рокот на достасување.

– Официјално е заокружена исплатата на еврообврзницата издадена во 2020 година во вкупен износ од 700 милиони евра. Со тоа, во целост ја исполнивме оваа обврска кон инвеститорите. Средствата од наша страна беа исплатени уште минатата недела, а веќе денеска тие се пристигнати на сметките на инвеститорите – изјави Димитриеска – Кочоска.

Таа потсети дека во февруари годинава Владата пристапила кон предвремена отплата на дел од обврзницата, со цел да се намалат трошоците.

– Како што е познато, во февруари годинава предвреме отплативме дел од оваа еврообврзница во износ од 383,7 милиони евра. Нашата цел беше со средствата обезбедени преку еврообврзницата издадена во јануари 2026 година да извршиме предвремен откуп и на тој начин да оствариме заштеди по основ на камати. На тој начин во буџетот заштедивме 3,2 милиони евра – рече министерката.

Преостанатиот дел од долгот, како што посочи, не бил предвреме откупен поради одлука на дел од инвеститорите.

– Преостанатиот дел од еврообврзницата во износ од 316,3 милиони евра главница не можеше да биде предвреме откупен бидејќи дел од инвеститорите не ја прифатија таа можност и поради тоа, а согласно рокот на достасување, сега беа исплатени вкупно 327,9 милиони евра, од кои 316,3 милиони евра главница и 11,6 милиони евра камата – изјави Димитриеска – Кочоска.

Министерката посочи дека отплатата е дел од поширока стратегија за редовно сервисирање на обврските, во услови на економска неизвесност.

Таа информира дека од средината на 2024 година до денес се сервисирани значителни обврски.

– Она што е важно да го напоменам е дека од втората половина на 2024 година, кога ја презедовме одговорноста за управување со јавните финансии, па до денес, сервисирани се обврски во вкупен износ од 4,6 милијарди евра. Од нив, во втората половина на 2024 година беа исплатени 786 милиони евра, во текот на 2025 година 2,198 милијарди евра, а во текот на 2026 година 1,571 милијарди евра – изјави министерката.

Во однос на идните обврски, Димитриеска – Кочоска посочи дека државата ќе се соочи со значајни износи за отплата во следните години.

– И во наредниот период продолжува процесот на управување со обврските коишто доспеваат за отплата и се во износ од 9 милијарди евра, односно, во 2027 година 1,4 милијарда евра, во 2028 година 1,9 милијарди евра, 2029 година 1,1 милијарда евра, 2030 година 1,7 милијарди евра и 2031 година 1,2 милијарди евра – рече таа.

Министерката нагласи дека средствата за отплатата биле однапред обезбедени. Таа посочи дека економската политика се темели на внимателно задолжување и поддршка на развојот.

– Задолжувањата што ги реализираме се внимателно планирани и се насочени кон две цели – сервисирање на постојните обврски и обезбедување средства за развојни проекти и инвестиции. Тоа е концептот врз кој ја темелиме економската политика – рече Димитриеска – Кочоска.

The post ИСПЛАТЕНА Е ЕВРООБВРЗНИЦАТА ОД 700 МИЛИОНИ ЕВРА Димитриеска-Кочоска информира дека следните 4 години ќе треба да се отплатат 9 милијарди евра appeared first on plusinfo.mk.

Нашиот фокус останува заштитата на животниот стандард на граѓаните и ребалансот нема да оди надвор од тие рамки, вели министерката за финансии Гордана Димитриеска-Кочоска во интервју за МИА во контекст на започнатите разговори за ребалансот на Буџетот.

Според Димитриеска-Кочоска, граѓаните треба да бидат спокојни дека Буџетот е ликвиден, се сервисираат сите обврски, редовно се исплаќаат платите и пензиите и обврските кон економијата.

– Во овој контекст, нема да бидат засегнати ставките кои придонесуваат за економски раст и кои се реализираат согласно планираната динамика, особено капиталните инвестиции, како и мерките за поддршка на граѓаните насочени кон унапредување на животниот стандард – вели Димитриеска-Кочоска.

Таа вели дека при ребалансот се има предвид и тоа дека нашата економија не е имуна на случувањата надвор и затоа се практикува внимателен пристап во креирањето на политиките кои ќе обезбедат стабилност, отпорност и одржлив развој на македонската економија.

-Пристапот при разговорите со министрите е заснован на реално завршените проекти и на реалните очекувања за нивна понатамошна реализација до крајот на годината, со цел средствата да се насочат кон приоритети кои се изводливи, мерливи и имаат конкретен ефект – вели Димитриеска -Кочоска.

Според неа, со ребалансот на Буџетот ќе се остане во основата на среднорочната фискална рамка утврдена со Фискалната стратегија за периодот 2027–2031 година.

Согласно со објавените податоци во првиот квартал годинава јавниот долг во апсолутен износ изнесува 10,747 милијарди евра или 59,7 % од БДП и, посочува министерката, бележи намалување за 1,5 п.п. во споредба со состојбата на 30 јуни 2024 година или кога ја преземавме власта.

– Имаме многу внимателен пристап во управувањето со јавниот долг и севкупно со јавните финансии и сме силно посветени на создавање услови за остварување повисоки и одржливи стапки за развој – вели министерката за финансии.

The post СЕ ПОДГОТВУВА РЕБАЛАНС НА БУЏЕТОТ Димитриеска-Кочоска вели дека приоритет се проектите кои обезбедуваат економски раст и мерките за поддршка на граѓаните appeared first on plusinfo.mk.

Министерството за финансии останува посветено на градење поотпорен, постабилен и поефикасен систем на јавни финансии. Унапредувањето на фискалната рамка е во интерес на економската стабилност и долгорочниот развој на државата.

Ова го порача министерката за финансии Гордана Димитриеска – Колоска на стручна расправа на тема „Ефикасноста на јавните финансии и улогата на фискалните правила во Северна Македонија”, во организација на Фискалниот совет.

– Современото управување со јавните финансии бара долгорочна визија, јасни правила и институционална стабилност коишто овозможуваат предвидливост, дисциплина и одговорност во носењето на одлуките. Фискалната политика во наредниот период ќе се соочи со комплексен предизвик на балансирање меѓу потребата од консолидација и потребата од развој. Затоа е неопходно внимателно управување, силни институции и доследна примена на фискалните правила- рече Димитриеска-Кочоска.

Таа посочи дека денешната расправа се одвива во фазата на усвојување на Фискалната стратегија за период 2027-2031 година како клучна рамка за среднорочното управување со јавните финансии.

-Оваа стратегија е резултат на јасна определба за одговорно и дисциплинирано управување со јавните средства во услови на зголемени глобални ризици, енергетска нестабилност и потреба од зачувување на макроекономската стабилност. Таа има за цел да обезбеди стабилен и предвидлив фискален пат, без да се наруши економската активност и социјалната сигурност на граѓаните – рече Димитриеска-Кочоска.

Со фискалната стратегија се предвидува постепено намалување на буџетскиот дефицит од 3,5% од БДП во 2027 година на 3% во 2028 година, а потоа на 2,8% во 2029 година, ниво што се задржува и во 2030 и 2031 година.

Ова, според министерката за финансии, претставува јасен сигнал за постепена фискална консолидација и усогласување со европските фискални стандарди, како и за зајакнување на кредибилитетот на фискалната политика.

Таа појасни дека во насока на постигнување на овие цели, Владата ќе спроведува континуирани мерки и на приходната и на расходната страна на буџетот, со цел да се обезбеди одржливост, ефикасност и поголема транспарентност во управувањето со јавните финансии.

– Особено внимание се посветува на зајакнување на наплатата на буџетските приходи преку системски мерки за намалување на сивата економија и подобрување на даночната дисциплина, а се работи на рационализација на расходната страна преку намалување на несуштинските трошоци кај буџетските корисници, со цел јавните средства да се насочат кон политики и проекти со најголем јавен интерес и развоен ефект. Политиките за плати и пензии ќе се водат на начин кој обезбедува зачувување на нивната реална вредност. Стриктната примена и контролата на Законот за јавните набавки треба да обезбеди повисок степен на транспарентност и значајни заштеди на јавни средства – рече  Димитриеска-Кочоска.

Паралелно со ова, додаде таа, се унапредуваат процесите на планирање и реализација на капиталните инвестиции, на кои има се дава приоритет според нивната подготвеност и според нивниот придонес кон економскиот раст и подобрувањето на квалитетот на животот на граѓаните.

Министерката ја истакна и улогата на Фискалниот совет во креирањето на фискалната политика преку своите анализи и мислења.

-Министерство за финансии, ја гледа оваа улога како важен партнерски елемент во креирањето на фискалната политика. Независната експертиза и критичката анализа ја прават политичката одлука  поквалитетна и поодржлива – рече Димитриеска-Кочоска.

The post УЧЕСТВОТО НА БУЏЕТСКИОТ ДЕФИЦИТ ВО БДП ЌЕ СЕ НАМАЛИ НА 2,8% ДО 2030 ГОДИНА Димитриеска-Кочоска вети одговорно и дисциплинирано управување со јавните финансии appeared first on plusinfo.mk.

Министерката за финансии Гордана Димитриеска-Кочоска вели дека состојбите со цените се следат и оти ќе се носат соодветни одлуки. Податокот дека сме трета држава во Европа според износот на средства за мерки од буџетот за справување со кризата, како што оцени денеска, покажува дека се грижиме за граѓаните.

– Со податокот што го даде Меѓународниот монетарен фонд (ММФ) на состанокот, на кој бевме јас и гувернерот како претставници од Македонија со сите европски земји, беше многу јасно презентирано дека Македонија е трета земја по однос на износот што го издвојува од буџетот за мерки и по нас веќе сите други земји имаат многу помал процент. Тоа јасно кажува дека ние се грижиме за граѓаните. Состојбата ја следиме и во моменти кога има услови, се донеле одлуки да се врати стапката на ДДВ-то на 10%, што не значи дека е конечна одлука. Ќе се разговара повторно, ќе се следат состојбите со цените и понатаму ќе се носат одлуки – изјави Димитриеска-Кочоска на новинарско прашање по состанокот на Комитетот за јавни инвестиции.

Димитриеска-Кочоска, коментирајќи го најновиот извештајот на Светската банка, посочи дека државата и од ММФ и од СБ е поздравена во консолидирањето на буџетот.

–  И на Запад веќе состојбите не се такви како што беа, гледате какви се случувањата оти се очекува, според некои проекции што ги имаат меѓународните финансиски институции, во следните 10-15 години, големи европски земји, околу десет, да банкротираат. Тоа значи дека нашите луѓе што живеат во Европа гледаат каква е состојбата, што не можеме да го кажеме за нас. Напротив, ние сме поздравени од страна и на Меѓународниот монетарен фонд и од Светската банка во однос на консолидирањето на буџетот, особено кога станува збор за примарниот буџетски дефицит затоа што, точно, кај нас големо оптоварување се каматните трошоци, меѓутоа особено кај примарниот буџетски дефицит се гледа консолидирањето. Тоа е она што нив ги интересира и ние како Влада она што го ветуваме го испорачуваме – рече Димитриеска-Кочоска.

Во однос на тоа каква е состојбата со дефицитот, рече дека имаме 7,9 милијарди денари поголеми каматни трошоци во однос на минатата година, речиси 130 милиони евра, затоа што, потенцира, предвреме вративме дел од обврзницата што ја зел некој друг.

– Кога зборуваме за буџетот, имаме 200% повисока реализација на капиталните расходи и 37% поголема реализација на субвенциите. Тоа се одлуки на министрите, кои сметаат дека во првиот квартал треба да се исплатат обврските наместо во вториот или третиот. Тоа се планирани расходи, кои одлучуваат кога ќе се исплатат. Но тоа не значи дека до крајот на годината тие ќе добијат дополнителни пари на расходната страна затоа што нивните обврски ги сервисирале во првиот дел од годината – рече Димитриеска-Кочоска.

До овој момент, посочи, сè што е планирано во буџетот како прилив, односно позајмување, го реализираме и нема одредени промени. Доколку се констатира дека се потребни дополнителни средства, тоа ќе биде направено со ребаланс во Собранието – изјави министерката за финансии Димитриеска-Кочоска. 

The post ПАРИТЕ ИЗДВОЕНИ ОД БУЏЕТОТ ЗА МЕРКИТЕ ПОКАЖУВААТ КОЛКУ СЕ ГРИЖИМЕ ЗА ГРАЃАНИТЕ Димитриеска-Кочоска вели дека состојбата со цените ќе се следи и ќе се носат потребни одлуки appeared first on plusinfo.mk.

Многу е лесно да донесете сет мерки, но треба да внимавате да не ја подгреете инфлацијата. Мерките треба да бидат внимателно анализирани. Не случајно тргнавме со намалување на ДДВ. Како ќе налагаат потребите, така ќе реагираме – изјави денеска министерката за финансии Гордана Димитриеска-Кочоска на првиот панел одржан во рамките на меѓународната конференција, што во Скопје ја организира Народната банка.

– Треба внимателно да ги следите состојбите и секогаш да гледате колку имате простор во буџетот. Многу е едноставно, ако одлучиме денес да направиме буџетски дефицит од 8% како што имавме некогаш, но тоа некој во иднина треба да го плати. Сметам дека една одговорна влада треба да ги таргетира внимателно мерките и да одлучува навремено. Ова е момент кога и светските експерти зборуваат дека треба да се штеди. Треба да штедат и компаниите и домаќинствата, треба да штедат сите затоа што никој не знае колку ќе трае. Она што мене ме измачува е колку време ќе треба да се вратат во првобитната состојба капацитетите што сега се уништени, каде што се произведува нафтата. Можеби војната ќе заврши за една недела од денес, можеби ќе успeат да се договорат, но никој не знае точно каква е состојбата со капацитетите, а бројките покажуваат дека повеќе од 7% од капацитети се уништени и тоа е сериозна бројка, која очигледно ќе има влијание во еден подолг период – рече Димитриеска-Кочоска.

Таа додаде дека одлучено е првин да се оди со намалување на ДДВ за гориво затоа што тука биле најповолни можностите и порача дека очекувано е да се зголемат цените, но дека секој треба да биде општeствено одговорен и да даде свој придонес.

– Ова е состојба во која секој треба по малку да учествува и да даде свој придонес затоа што на крајот на денот државата била тука, како и во изминатите години, така и сега, преку разни механизми ги помагала компаниите. Знаете колку пари дадовме на приватниот сектор преку унгарскиот кредит и субвенции преку законот за државна помош. Во вакви критични моменти компаниите треба да реагираат и да помогнат. Засега нема некое позначајно влијание на цените. Во периодот што следува како држава ќе ги следиме состојбите, меѓутоа останува фактот дека, од една страна, имаме ограничување во буџетот, ни претстојат сериозни обврски – имаме обврска за фискална консолидација, стабилни јавни финансии се приоритет. Како држава одлично се справуваме со состојбите – истакна Димитриеска-Кочоска.

The post ЗНАЕТЕ КОЛКУ ПАРИ ДАДОВМЕ НА КОМПАНИИТЕ, СЕГА ТИЕ СЕ НА РЕД ДА ПОМОГНАТ Димитриеска-Кочоска оцени дека кризата може да трае долго appeared first on plusinfo.mk.

Буџетот е ликвиден. Пари се обезбедени навреме и има простор за мерки доколку се потребни. Ова го истакна министерката за финансии Гордана Димитриеска-Кочоска

– Работевме посветено во изминатиот период и испорачуваме како што сме испланирале. Граѓаните можат да бидат спокојни. Пари обезбедивме навреме. Условоите по кои ги обезбедивме беа многу поповолни. Издадовме Еврообврзница со убедливо најниска камата – рече Димитриеска-Кочоска во гостување во Само интерву” на ТВ Канал 5.

При тоа, додаде, дека има огромен  предизвик, но радува фактот дека има раст кај бруто домашниот производ.

– Тоа е важно затоа што сите бројки, вклучително и јавниот долг го гледаме како процент од БДП и колку е тој поголем тоа значи дека јавниот долг ни се намалува, а со тоа се  отвора простор за дополнителни задолжувања доколку има потреба. Важно е како ја водите целокупната политика. Да, еден дел е со помошта што би требало да се даде преку форма на намалување на акцизи, даноци, што би значело намалени приходи во буџетот, но ќе реагираме соодветно, простор за одредени реакции има се уште – рече таа.

Димитриеска-Кочоска очекува политиките и одлуките што оваа Влада ги носи сега да се почувствуваат реално подоцна, затоа што вели, во економијата постои нешто што се нарекува временско задоцнување, односно дека растот во економијата бара континуитет во повеќе години.

Во интервјуто посочи дека не смета дека проекциите за прихдоите се преоптимистички и  направи споредба на приходите во 2025 и 2017 кои што се со реализација 95,91% од планираното за 2025 и 95,81% за 2017 година.

Во однос на расходната страна потенцира дека нема нереализирани расходи, односно дека се исплатени сите обврски, вклучително и налозите за реализација на капиталните расходи.

-Се што стига како налог во Трезорот во МФ се исплаќа редовно и согласно упатството – појасни министерката.

The post БУЏЕТОТ Е ЛИКВИДЕН Се што стига како налог во Трезорот во МФ се исплаќа редовно appeared first on plusinfo.mk.

Апслотуно состојбата е во ред и ние ја следиме. Нема никаков проблем и нема потреба од создавање паника кај граѓаните дека нема да има нафта, рече денеска министерката за финансии Гордана Димитриеска-Кочоска.

Одговорајќи на новинарски прашања по панелот за растот на економијата во Владата, Димитриеска-Кочоска информира дека вчера во Министерството се одржал состанок со нафтените компании и ниту една од нив не кажала, како што рече, дека има каков било проблем со залихи на нафта. Инспекторите во однос на цените и евентуални поскапувања, напомена, се на терен. Повеќе од 100 бензински пумпи биле посетени од Државниот пазарен инспекторат во тек на едно деноноќие.

Ако се оцени дека има потреба, вели министерката, Владата ќе прогласи кризна состојба и Министерството за финансии ќе ги активира инструментите согласно законот.

Таа упати прашањата за цените на бензините и нафтата да се упатуваат до Регулаторната комисија за енергетика (РКЕ) која, информира, ќе заседава в понеделник.

–  Вчера  сите нафтени компании, беа прашани една по една и сите рекоа дека се е во ред. Ако газдите не знаат каква е ситуацијата, не може ние да викаме дека не е како што треба. Нема потреба од создавање паника, а законите имаат предвидено се и институциите ќе постапат. Сите ја следиме состојбата и соодветно ќе реагираме. Во законот за акцизи има автоматски стабилизатори. Тоа значи, ако се прогласи кризна состојба во државата, по автоматизам министерот за финансии носи одлука за промена на цената на акцизата. Ако е цената на нафтата оди нагоре, намалувањето е 1, 2 и 4 денари зависно од тоа во кој праг влегуваме. Но, состојбата ја следиме, се е под контрола. Нема потреба граѓаните да чувствуваат паника. В понеделник, РКЕ, која е надлежна за цените, ќе се состане. Таа одлучува како независен орган. Ние како Министерство сме ги вградиле автоматските стабилизатори и ако има потреба, Владата ќе прогласи кризна состојба и ние веднаш ќе постапиме. Во однос на претходни кризи и искуства гледаме дека ситуацијата е многу постабилна, но ние не сме експерти за нафта, најсоодветно е за тоа да ги прашате РКЕ – порача  Димитриеска-Кочоска.

Министерката не кажа дали има и други, нови инспекциски контроли. За тоа е најдобро, рече, да се праша Министерството за енергетика.

– На неколку пумпи е забележано, зашто од главните складишта не биле испорачана нафта или бензин до пумпите. Но, тоа е во рамки на организацијата на самите компании, кажаа сите вчера дека нема никаков проблем и дека ова може да се случи во кои било услови и дека им требаат неколку часа за транспорт на нафтата од складиштето до пумпата. Во однос на кризна состојба, повторно ќе кажам,  не можам да се согласам дека можеме да предвидиме, денеска цените се стабилни и имаше намалување за еден долар во однос на вчера- потенцира Димитриеска-Кочоска. 

The post НЕМА ПОТРЕБА ОД ПАНИКА, СОСТОЈБАТА СО ГОРИВАТА Е СТАБИЛНА И СЕ СЛЕДИ Димитриеска-Кочоска најавува мерки, ако состојбата се промени appeared first on plusinfo.mk.

Со промената на власта се подобри и економијата – во првите два квартала од 2024 просечниот раст на БДП беше 2,3%, а во следните два кваратала 3,6%. Не случајно го кажувам ова. Ние во последниот квартал имавме раст од 3,8%о, односно два квартала по ред 3,8 отсто, што покажува дека со промената на власта економијата очекува позитивни сигнали од Владата. Тоа се потврдува во овие повеќе од година и половина со фактот дека последниот квартал имаме 3,8% раст, што е повеќе од просечниот раст што сме го имале во првите два квартала од промената на власта, рече денеска министерката за финансии Гордана Димитриеска-Кочоска на панелот „Раст на економијата – економска сигурност на граѓаните“ што се одржува во Владата.

Димитриеска-Кочоска напомена дека за целиот период на претходната власт просечниот раст на БДП беше 1,9%, а во десетте години владеење на ВМРО-ДПМНЕ изнесуваше 3,2%.

-Македонските компании функционираат во услови на глобална неизвесност која во речиси сите европски земји создава надолни резултати кога станува збор за БДП. Имаме и економски партнери што влегуваат во минус, а нашата економија покажа дека е стабилна и многу отпорна, жилава на глобалните предизвици – оцени министерката.

Според неа, клучот што ги промени економските текови и ги подобри резултатите е унгарската кредитна линија што ја зема Владата.

– Бројките зборуваат дека унгарската линија е земена во прав момент. Приватниот сектор доби кредити по многу поволни услови, 224 милиони евра се комплетно повлечени и тоа е она што е инвестирано , тие инвестиции успеаја да ја одржат економијата и да додадат вредност со што ги остваруваме стапките на раст. Вториот клучен момент со промената на власта е тоа што во континуитет корпоративните кредити бележат раст од 15% – потенцира Димитриеска-Кочоска.

На панел дискусијата свои излагања имаат и вицепремиерот и министер за транспорт Александар Николоски, како и министерот за земјоделство, шумарство и водостопанство, Цветан Трипуновски. 

The post НЕ Е ИСТО ПРОСЕЧЕН РАСТ НА БДП ОД 3,2% И ОД 1,9% Димитриеска-Кочоска направи споредба меѓу владеењето на ВМРО-ДПМНЕ и СДСМ appeared first on plusinfo.mk.

Растот на економијата во 2025 година е најголем показател дека политиките и во услови на неизвесност може да се креираат и да остваруваат резултати – рече денеска министерката за финансии Гордана Димитриеска-Кочоска осврнувајќи се на најновите податоци што ги објави Државниот завод за статистика.

Кочоска на прес-конференција напомена дека БДП во четвртиот квартал од 2025 забележал раст од 3,5%, што е потврда, како што рече, за позитивните економски движења во земјата и покажува континуитет во остварување позитивни резултати, кои шест квартали по ред го задржуваат ова темпо и создаваат услови за постигнување повисоки стапки на раст.

Значајно е, дополни, што растот се надоврзува на високиот раст од 4,3% во истиот квартал минатата година.

-Во споредба со државите од регионот и ЕУ, Македонија повторно е меѓу земјите со највисок раст. За четвртиот квартал од 2025 повисок раст е забележан само на Малта, на Кипар и во Полска. Ако споредуваме со земјите во регионот, растот во Србија изнесува 2,2%, во Хрватска 3,6, во Бугарија 3, во Словенија 2 отсто. Кумулативно, реалниот раст во 2025 година достигна 3,5%, што е во линија со проекциите на Министерството за финансии, а номиналниот раст е нешто повисок од очекуваниот, што е потврда за внимателноста и сериозниот пристап при планирање и водење на фискалната политика. Буџетскиот дефицит за 2025 година е во рамките на очекуваното, 4% од БДП, а кај јавниот долг има намалување и изнесува 59,3% од БДП – потенцира министерката.

Според неа, растот не економската активност во четвртиот квартал е на широка основа, при што речиси сите сектори забележаа раст.

– Силната динамика во градежништвото продолжи со раст од 14,6 проценти, а тоа се должи на зголемената активност во нискоградбата, која забележа реален раст од 12,5 отсто во четвртиот квартал. Ова е уште една потврда дека силната посветеност на Владата на реализација на капиталните инвестиции и оптимизацијата на нивните трошоци, динамика и услови за градба, придонесе за динамизирање на економската активност. Висок раст од 8,1 отсто е забележан кај стручни и научни дејности, трговијата и транспортот бележат раст од 4,4 отсто, преработувачката индустрија 3,6 отсто… Земјоделството забележа благо намалување од 0,4 отсто – истакна Димитриеска-Кочоска.

Особено охрабрува, оцени министерката, високиот раст на извозот на стоки и услуги од 9,7 %, што упатува на натамошно закрепнување на извозната активност, почната од почетокот на годината, по намалувањето во изминатите години.

– Приватната потрошувачка остана стабилна, со реален раст од два отсто, поддржана од растот на платите. Бруто-инвестициите забележуваат намалување од три отсто во услови кога има висок раст на корпопративното кредитирање и раст во градежништвото. Треба да се има предвид дека минатата година имавме рекорден раст на бруто-инвестициите во последниот квартал, од 23,7%. Македонската економија изминатиот период е под силно влијание на случувањата надвор, но тоа е предизвик што стои пред Владата и онака како што и досега во изминатите 20 месеци покажавме како се работи на економски план, така и ќе продолжиме, ќе создаваме мерки и политики од интерес на стопанството и граѓаните, истовремено имајќи ја предвид состојбата на меѓународно ниво – порача министерката.

The post МАКЕДОНИЈА ПОВТОРНО Е МЕЃУ ЗЕМЈИТЕ СО НАЈВИСОК РАСТ НА БДП Продолжуваат позитивните движења во македонската економија appeared first on plusinfo.mk.