По децении контроверзии, Меѓународната федерација за дијабетес (IDF) во 2025 година официјално го призна петтиот тип дијабетес. Сега повикува и други здравствени организации, како Светската здравствена организација (СЗО), да го направат истото.
За дијабетесот тип 5 ретко се зборува и тој сè уште е недоволно истражен, иако се проценува дека погодува дури 25 милиони луѓе ширум светот, особено во земјите со низок и среден доход, каде што пристапот до храна и здравствена заштита е ограничен, пишува Science Alert.

Состојбата е поврзана со долготрајна неухранетост, a првпат била опишана во 1955 година на Јамајка. СЗО ја вклучила во класификацијата во 1985 година, под називот дијабетес поврзан со неухранетост, но во 1999 година ја отстранила поради недостиг на доволно докази дека станува збор за посебна форма на болеста. Оттогаш, научниците продолжиле да дебатираат за нејзиното постоење, причините и начинот на лекување.

Дијабетесот тип 5, познат и како дијабетес поврзан со неухранетост (MRDM), се разликува од почестите форми на болеста. Кај дијабетесот тип 1, имунолошкиот систем ги уништува клетките во панкреасот што произведуваат инсулин. Кај типот 2, организмот не реагира соодветно на инсулинот. Кај типот 5, пак, се смета дека долготрајниот недостиг на хранливи материи, особено во детството и адолесценцијата, може да го наруши развојот на панкреасот и неговата способност да произведува доволно инсулин.

Истражувањата покажуваат дека луѓето со оваа форма на дијабетес имаат недостиг на инсулин, но, за разлика од пациентите со тип 2, не мора да имаат и инсулинска резистенција. Токму затоа, погрешното утврдување на типот на болеста може да доведе до несоодветно лекување. Според стручњаците, кај некои пациенти преголема количина инсулин може да предизвика опасно намалување на шеќерот во крвта.

Состојбата најчесто се поврзува со земји во Азија и Африка, каде што дел од населението се соочува со долготрајна неухранетост и ограничен пристап до здравствена заштита. Сепак, истражувачите предупредуваат дека сè уште не може со сигурност да се утврди колку луѓе ја имаат болеста, токму затоа што таа не се препознава секогаш и понекогаш се дијагностицира како друг тип дијабетес.

Во 2025 година, Меѓународната федерација за дијабетес формирала работна група предводена од ендокринологот Мередит Хокинс. Нејзината задача е да подготви дијагностички критериуми и насоки за лекување, да воспостави меѓународен регистар за истражувања и да помогне во едукацијата на здравствените работници. Научниците сметаат дека подоброто препознавање на оваа форма на дијабетес може да овозможи попрецизна дијагноза и посоодветна терапија.

The post ОФИЦИЈАЛНО ПРИЗНАЕН ДИЈАБЕТЕС ТИП 5 Се проценува дека би можеле да бидат погодени од 20 до 25 милиони луѓе appeared first on plusinfo.mk.