Европската унија отвори повеќеслојна истрага против технолошката платформа на Илон Маск, откако нејзиниот четбот „Грок“ бил искористен за создавање сексуално експлицитни дипфејкови со ликови на жени и малолетници.

Претседателката на Европската комисија, Урсула фон дер Лајен, остро ја осуди појавата.

– Згрозена сум што оваа технолошка платформа им овозможува на корисниците дигитално да ги соблечат жените и децата. Ова е незамисливо однесување, а штетата предизвикана од овие дипфејкови е многу реална – изјави таа за „Политико“.

Фон дер Лајен додаде дека ЕУ нема да ја препушти заштитата на децата на компаниите од Силиконската долина.

– Ако тие не дејствуваат, ние ќе дејствуваме – порача таа.

Од почетокот на јануари, илјадници жени и тинејџерки низ Европа пријавиле злоупотреби преку „Грок“, кој автоматски генерирал фотографии во бикини или со разголени тела.

Европската комисија побара од „Икс“ да ги задржи сите внатрешни документи поврзани со работата на „Грок“, заради сомнежи дека компанијата го прекршила европскиот Закон за дигитални услуги.

Иако „Икс“ ја ограничи употребата на функцијата за вештачко генерирани слики само за платени корисници, портпаролот на Комисијата, Томас Рение, потврди дека истрагата ќе продолжи.

Случајот е нов тест за способноста на Унијата да го контролира влијанието на Маск и на големите американски технолошки корпорации. Само еден месец претходно, „Икс“ беше казнет со 120 милиони евра за прекршување на европските закони за дигитални услуги.

Во Обединетото Кралство, регулаторот Ofcom објави дека отвора посебна истрага против „Икс“.

– Постојат длабоко загрижувачки извештаи дека четботот „Грок“ е користен за создавање и споделување сексуализирани слики од деца. Ова потенцијално претставува материјал за сексуална злоупотреба – се наведува во нивното соопштение.

Ofcom веќе побарал од компанијата објаснување за преземените чекори и поставил строг рок до 9 јануари. По добиените одговори, регулаторот одлучил да премине во официјална истрага.

Случајот добива континентална димензија – истраги се отвораат во Брисел, Даблин, Париз и Лондон.

Владата на Велика Британија ќе воведе ново кривично дело оваа недела насочено кон создавање интимни слики без согласност, изјави министерката за технологија Лиз Кендал.

The post ИСТРАГИ ПО СКАНДАЛОТ НА ГРОК СО ЕРОТСКИ ДИПФЕЈКОВИ Неколку европски земји најавија забрани за технологијата appeared first on plusinfo.mk.

Управата за јавни приходи ја известува јавноста дека денеска, 30.12.2025 година, со почеток од 16:00 часот, ќе има привремен прекин во функционирањето на електронските услуги кои Управата (УЈП) ги нуди кон даночните обврзници.

Се очекува прекинот да трае до доцните попладневни часови, по што услугите повторно ќе бидат достапни.

Управата за јавни приходи ги замолува даночните обврзници за разбирање.

The post ЌЕ ИМА ПРЕКИН НА ДИГИТАЛНИТЕ УСЛУГИ НА УЈП Ќе трае до доцна навечер appeared first on plusinfo.mk.

Процентот на отчитување на броилата е зголемен на 95 отсто на тримесечно ниво, односно на 90 отсто на месечно ниво, а дополнително се таргетирани 10.000 потрошувачи кои во изминатите две години поднеле приговори или поплаки поврзани со фактурирањето, со кои е започната етапна телефонска комуникација.

Ова се дел од активните мерки што, по налог на Регулаторната комисија за енергетика, водни услуги и услуги за управување со комунален отпад (РКЕ), ги презеде операторот на електро-дистрибутивниот систем „Електродистрибуција ДООЕЛ“ Скопје.

Во пресрет на зимските месеци, по иницијатива на РКЕ беше одржан координативен состанок со раководството на „Електродистрибуција“, на кој беа презентирани мерките насочени кон подобрување на услугата и воспоставување поефикасна двонасочна комуникација со потрошувачите, со цел јакнење на довербата, транспарентноста и отчетноста.

Како што соопштија од РКЕ, регулаторите посочиле дека од клучно значење е редовното отчитување на броилата да продолжи и во првите недели од јануари. Од „Електродистрибуција“ информирале дека, земајќи ги предвид искуствата од претходните години и зголемениот број поплаки за време на празниците, се организирани вонредни екипи кои ќе работат и за време на празници и викенди.

Целта, како што посочуваат од компанијата, е потрошувачите да добиваат сметки со реална, а не со прогнозирана потрошувачка.

Дополнително, од 1 декември годинава, „Електродистрибуција ДООЕЛ“ ги прошири дигиталните услуги за потрошувачите, со воведување на нова услуга за онлајн корекција на фактури. Воедно, вработените се мобилизирани да им помагаат на граѓаните при креирање кориснички профили и користење на дигиталните алатки.

На располагање остануваат и претходно воведените услуги, како „Пријави состојба“, „Е-фактура“, како и јасната ознака на фактурите со „О“ – отчитана состојба или „М“ – проценета состојба, со што потрошувачите имаат целосна информација дали сметката е базирана на реална или проценета потрошувачка.

Од РКЕ и „Електродистрибуција“ упатија апел до граѓаните и во текот на зимскиот период да продолжат со одговорно и рационално користење на електричната енергија.

The post ПОВЕЌЕ РЕАЛНИ СМЕТКИ, ПОМАЛКУ ПОПЛАКИ Електродистрибуција и РКЕ со нов сет мерки appeared first on plusinfo.mk.

Премиерот Христијан Мицкоски, денеска го отвори Западнобалканскиот дигитален самит 2025 во Скопје, каде што покрај него присуствуваа претставници на Европската Унија, министри од регионот и бројни експерти од областа на технологијата. Самитот има за цел да ги промовира дигиталните иновации и да ја истакне важноста на дигитализацијата како мотор за економски развој и подобрување на квалитетот на животот на граѓаните.

– Добредојдовте во Скопје! Денес не зборуваме само за технологии, туку за тоа како дигитализацијата ја менува иднината на нашите граѓани, бизниси и држави. Западен Балкан не смее да биде заостанат агол на Европа. Нашата иднина е поврзаност, иновации и знаење – истакна Мицкоски.

Премиерот нагласи дека дигитализацијата не е прашање на избор, туку на опстанок и напредок. Тој потенцираше дека со дигитализацијата ќе се намали бирократијата, ќе се овозможи побрз и поефикасен пристап до услуги за граѓаните, ќе се создаде еднаквост помеѓу оние со и без пристап до информации, а малите компании ќе добијат можност да се натпреваруваат на глобалната сцена.

– Дигитализацијата е економска моќ. Таа отвора пазари, носи нови инвестиции и ја зголемува конкурентноста. Во иднината ќе има само два вида на компании – дигитални и оние што повеќе не постојат – рече Мицкоски, додавајќи дека целта е Македонија да стане центар на дигитални иновации во регионот и земја која ќе привлече инвеститори и ќе задржи таленти.

Како значаен пример за напредок, премиерот го презентираше дигиталниот паричник „М-Услуги“, кој ќе овозможи сите документи и услуги на едно место, со целосна транспарентност, безбедна размена на податоци и брз пристап до јавни услуги.

Мицкоски потенцираше дека дигитализацијата е за граѓаните: мајките кои сакаат побрзо да ги запишат децата во градинка, пензионерите кои сакаат лесно да ја добијат својата пензија, студентите кои сакаат пристап до знаење и книги онлајн, како и за компаниите кои сакаат развој и конкурентност.

Во дел од говорот, премиерот се осврна и на своето професионално искуство со алгоритми и вештачка интелигенција, нагласувајќи дека знаењето стекнато надвор од државата ќе го користи за да ја позиционира Македонија како лидер во дигиталната трансформација на регионот.

– До крајот на овој мандат, сите јавни услуги ќе бидат достапни онлајн. Секој граѓанин ќе има дигитален идентитет и пристап до сите институции преку мобилен телефон. Нашата цел е да изградиме генерации со дигитални вештини и систем за сајбер-безбедност што ќе гарантира доверба во дигиталното општество – нагласи Мицкоски.

Самитот во Скопје е симбол на регионалната соработка и пријателството со Европската Унија, а дигитализацијата, како што рече премиерот, е мост кон Европа, штит против корупцијата и шанса за изградба на поефикасна и поправедна држава.

The post ДИГИТАЛНА РЕВОЛУЦИЈА ЗА МАКЕДОНИЈА Премиерот најави целосен дигитален идентитет за граѓаните appeared first on plusinfo.mk.

Новите правила се однесуваат на социјални мрежи се Фејсбук, Инстаграм, ТикТок, Икс (поранешен Твитер), Јутјуб, Снепчет, Линкедин и Пинтерест, но и на Амазон, Букинг, АлиЕкспрес, Заландо, Гугл Шопинг, Гугл Срч, Гугл Мапс, Бинг, Википедија, како и на онлајн продавниците за апликации на Гугл и Епл. Станува збор за интернет платформи, кои според статитичките податоци, месечно ги посетуваат над 45 милиони Европејци.

Согласно новите правила, како што јави специјалниот известувач на МИА од Брисел, социјалните мрежи и платформите ќе мора веднаш да ги отстранат содржините кои со европските и националните законодавства на членките на ЕУ се оквалификувани како „нелегални“, на пример фотографии од сексуална злоупотреба на деца, а ќе можат и да ги блокираат корисниците кои често објавуваат нелегални содржини. Дополнително, онлајн продавниците ќе треба да „направат најдобри напори“ за да спречат продажба на фалсификувани луксузни марки и опасни играчки за деца.

Компаниите ќе мора да проценат и да предложат конкретни мерки за „справување со можните ризици што платформите ги претставуваат за општеството“, меѓу кои и ширењето дезинформации и онлајн малтретирање. Социјални медиуми и пребарувачите ќе мора да ги приспособат своите услуги за да го спречат ширењето на лажни вести во случаи на елементарни непогоди, војни или пандемии.

За таа цел тие ќе треба до Комисијата да достават детален годишен извештај за т.н. „системски ризици што ги претставуваат за Европејците“, како и да преземат мерки за ограничување на идентификуваните ризици, преку прилагодување на нивните алгоритми, создавање алатки што ќе им овозможат на родителите да контролираат што гледаат нивните деца, воведување инструменти за потврдување на возраста на корисниците, како и јасно назначување на содржините, како фотографии или видеа, генерирани од алатки за вештачка интелигенција.

Во случај на блокада или суспензија на корисник или отстранување на некоја негова содржина, социјалните мрежи ќе мора му ги образложат причините за таквата одлука, при што корисниците ќе имаат право да ги оспоруваат одлуките на платформите преку вонсудски тела, а во крајна инстанца и на суд.

Дополнително на платформите ќе им биде забрането да таргетираат луѓе со онлајн реклами засновани на нивните лични податоци, како верска припадност, сексуални преференци, здравствени информации и политички убедувања, како и да собираат лични податоци на деца и тинејџери.

Онлајн компаниите ќе мора да бидат потранспарентни за начинот на нивното функционирање, преку објавување на своите и ревизорските извештаи за проценка на нивните ризици по општеството, вклучително и за закани за слободата на говорот, јавното здравје и изборните процеси, а регулаторните тела ќе имаат право на пристап до податоците и алгоритмите на компаниите и до нивните деловни документи.

Со Законот, за непочитување на утврдените правила, Европската комисија ќе може да изрекува казни во висина до 6 отсто од годишниот глобален приход на компанијата, но ќе може и времено да ја забрани работата на одредена социјална мрежа, платформа или пребаравач во блокот во случаи на „сериозна неусогласеност“. Големите онлајн платформи и пребарувачи, исто така, ќе мора да плаќаат и такса во износ од 0,05 отсто од нивните глобални приходи за финансирање на извршната работа на Комисијата.

The post ЕУ ИМ ОБЈАВИ ВОЈНА НА ЛАЖНИТЕ ВЕСТИ, ФАЛСИФИКАТИТЕ, ОНЛАЈН МАЛТРЕТИРАЊЕТО… Од утре нови правила за 19 онлајн платформи и пребарувачи appeared first on plusinfo.mk.

– Четворица од десет Македонци наведуваат дека нивните навики станале подигитални или се претежно дигитални, како резултат на пандемијата. За половина од испитаниците, приватното време е најдигиталниот аспект од нивниот живот. Една третина велат дека е работата, а за 15 отсто одговорот е забава, поради големото време поминато на останатите стриминг платформи, а само пет отсто ја користат за здравје, што подразбира закажување вакцинации и лекарски прегледи, онлајн обуки или следење на здравјето преку апликација – стои во истражувањето.

Речиси половина од учесниците во анкетното истражување ја имаат посочено „брзината” како најважен фактор при одлучувањето за користење на виртуелни услуги (49 отсто), потоа „едноставноста” со 27 отсто, „пристапноста” со 22 отсто и на крај „безбедноста” со помалку од еден отсто.

Денешниот потрошувач, покажува истражувањето, е подготвен да им даде приоритет на личната благосостојба и слободното време, наместо да прави сѐ пеш. На прашањето кој дел од нивниот живот значително ќе се подобри со поголема употреба на апликации и онлајн платформи, четворица од десет испитаници ја посочиле јавната администрација.

Во иднина, над една третина од испитаниците мислат дека нивните дигитални навики ќе се зголемат во работите поврзани со работата. На второ место се транспортот и здравјето (24 отсто) и финансиските услуги (20 отсто), како и купувањето, со истиот процент. Ова покажува дека Македонците се прилагодиле на дигиталните светски трендови и сакаат да ги вклучат практичноста и придобивките од дигиталната технологија во нивниот секојдневен живот, стои во истражувањето.

Меѓу главните платформи, секој втор испитаник најчесто користи е-банкарство и дигитални плаќања (51 отсто), платформите за стриминг се на второ место (30 отсто), а потоа следат апликациите за нарачка и испорака на храна (17 отсто), додека само еден процент од популацијата користат апликации за транспорт со такси.

The post СЀ ПОВЕЌЕ МАКЕДОНЦИ ВО ДИГИТАЛНИОТ СВЕТ Секој втор користи онлајн услуги повеќе пати во денот, а сите преку смартфон appeared first on plusinfo.mk.