Фејсбук по повеќе од 15 години ќе стави крај на една од своите најпрепознатливи функции – копчето „лајк“, но само во неговата надворешна форма.

Компанијата Мета соопшти дека од 10 февруари 2026 година ќе ги укине сите т.н. социјални плагони — копчињата „лајк“ и „коментар“ што веб-страниците низ светот ги имаа вградено за директна интеракција со Фејсбук.

Со тоа, ерата во која милиони портали им дозволуваа на читателите со еден клик да „лајкнат“ некоја статија ќе стане историја.

Од Мета објаснуваат дека одлуката доаѓа како дел од процесот на модернизација и расчистување на старите технологии кои речиси веќе не се користат.

Во официјалниот блог на компанијата се наведува дека овие социјални приклучоци биле популарни пред десетина години, но дека денес корисниците споделуваат содржини на други начини – преку мобилни апликации и интегрирани алатки. Технички, старите копчиња ќе исчезнат постепено, без да предизвикаат грешки на страниците што сè уште ги имаат вградено.

Иако веста звучи драматично, важно е да се нагласи дека класичното копче „лајк“ во самата апликација на Фејсбук нема да се укине. Корисниците и натаму ќе можат да лајкнуваат објави, фотографии и видеа во рамките на платформата. Промената се однесува исклучиво на надворешните веб-страници што користат приклучоци за лајкови и коментари.

„Сакаме да ја насочиме енергијата кон развој на нови начини за поврзување, а не кон одржување на застарени алатки“, соопштија од Мета, објаснувајќи дека иднината на комуникацијата е во спојувањето на Фејсбук, Инстаграм и Тредс, а не во старите копчиња кои некогаш беа симбол на дигиталната ера.

Копчето „лајк“ беше воведено во 2009 година и брзо стана културен феномен. Само неколку години подоцна, беше вградено во милиони интернет-страници, а многумина го сметаа за еден од симболите на интернетот од втората деценија на 21 век. Но, со појавата на мобилните апликации и новите начини на комуникација, популарноста на овие приклучоци постепено опадна.

Со укинувањето на копчињата „лајк“ и „коментар“ од веб-страниците, Фејсбук симболично затвора едно поглавје од својата историја. Иако новите генерации корисници веројатно и не се сеќаваат дека некогаш можеше да се „лајкне“ и надвор од самата платформа, за старите интернет-ентузијасти тоа е уште еден знак дека дигиталниот свет брзо ги менува своите симболи.

The post ФЕЈСБУК ГО „ГАСИ“ ЛАЈК-КОПЧЕТО, НО НЕ ЦЕЛОСНО Што ќе значи тоа за корисниците? appeared first on plusinfo.mk.