Македонија уште од 2023 година има државен ИКТ центар за чување податоци и за опоравување од катастрофи. Објектот вреден 11,5 милиони евра се наоѓа на околу 2 километри од Прилеп. Неговата задача е да ги заштити критичните државни информатички системи при сериозни инциденти.

Станува збор за еден од најзначајните државни проекти од ваков тип на Балканот, чија главна цел е обезбедување дополнителна заштита на критичните податоци и информатичката инфраструктура.

Написите доаѓаат по најавите на Владата дека планира државен дата центар финансиран со европски грант како дел од Реформската агенда со ЕУ. Идејата е тој, заедно со „национален клауд“ на информации да биде единствен систем за процесирање на информациите од сите државни институции, а поврзан со, како што изјави премиерот, секундарниот дата-центар кој веќе го имаме во Прилеп за зачувување на податоците.

Во моментот, центарот во Прилеп го овозможува зачувувањето податоци. Проектиран е за заштита при земјотреси, пожари, вандализам, тероризам и дефекти во електричната мрежа.

Проектот е дело на белградското „1Х2 Студио“, предводено од архитектот Зоран Абадиќ. Архитектурата е подредена на едно барање, максимална физичка заштита на опремата и на податоците.

Серверите се во „соба во соба“

Најинтересниот дел се крие во срцето на објектот. Серверската просторија е изградена според концептот „соба во соба“.

Околу неа се протега заштитен прстен со машински, електрични и телекомуникациски системи. Таму се сместени и просториите за провајдерите.

Посебен дел е наменет за мрежните техничари, операторите и за обезбедувањето. Центарот функционира 24 часа дневно, седум дена во неделата.

Уште понеобична е неговата конструкција. Таванот, ѕидовите и покривот се изведени без отвори. Објектот има двојни масивни армиранобетонски ѕидови. Меѓу нив се вградени материјали за изолација и за противпожарна заштита.

До серверите не се стигнува лесно

Безбедноста продолжува и надвор од бетонските ѕидови. Комплексот е ограден, под постојан видео-надзор и има вооружено физичко обезбедување.

Пристапот е строго контролиран. Во објектот можат да влезат овластени лица, а посетите се организираат во официјални рамки.

The post 📷 МАКЕДОНИЈА ИМА ДАТА-ЦЕНТАР УШТЕ ОД 2023 ГОДИНА Еве како изгледа и што содржи appeared first on plusinfo.mk.

Американска компанија планира да вложи околу 530 милиони евра во дата-центар во Мостар. Центарот би имал моќност од 100 мегавати и би бил еден од најголемите проекти од ваков вид во Босна и Херцеговина.

Зад проектот стои AAFS Infrastructure and Energy. Компанијата ја проширува инвестициската офанзива во БиХ, чија вкупна вредност би надминала две милијарди евра, пишува Блумберг Адриа.

Плановите опфаќаат гасоводи, 3 гасни електрани и модернизација на аеродромите во Сараево и во Мостар.

Компанијата е основана пред една година. Меѓу основачите се Џеси Бинал, поранешен адвокат на американскиот претседател Доналд Трамп, и Џозеф Флин, брат на поранешниот советник за национална безбедност Мајкл Флин, објавил „Блумберг“.

Сто мегавати за Мостар

Планираниот дата-центар би имал моќност од 100 мегавати. Проектот предвидува и изградба на придружна инфраструктура.

AAFS планира парите да ги обезбеди преку американски развојни институции и меѓународни фондови.

Босна и Херцеговина веќе има 3 помали дата-центри. Новиот проект би ја ставил земјата во сосема друга категорија.

Балканот влегува во трката

Дата-центрите веќе стануваат голема инфраструктурна тема низ регионот.

Србија има  развиено својот Државен дата-центар во Крагуевац, чиј капацитет во април 2026 година беше зголемен на 14 мегавати со пуштање во употреба на нови модули и втор суперкомпјутер.

Албанија развива проект кој треба да се зголеми од почетни 32 до 100 мегавати.

Црна Гора има комерцијални центри и планира државен дата-центар.

Бугарија потпиша меморандум со германскиот инвеститор Brinell Compute пза почеток на градба на масивен дата-центар за вештачка интелигенција во индустриската зона Раковски кај Пловдив на простор од дури 809 хектари, чија прва фаза стартува наесен 2026 година.

The post МОСТАР ЌЕ ДОБИЕ ДАТА-ЦЕНТАР ОД 530 МИЛИОНИ ЕВРА Неколку балкански земји планираат сопствена инфраструктура appeared first on plusinfo.mk.

Со новите законски решенија за урбанистичко планирање и градење, надмината е досегашната правна празнина и создадена е рамка за изградба на дата центри во државата. Иако сè уште нема конкретни иницијативи од приватниот сектор, државата сериозно размислува за изградба на државен дата центар со цел заштита на институциите и зголемување на сајбер безбедноста, посочи министерот за транспорт и вицепремиер Александар Николоски денеска по увидот во реконструираната улица Лазар Димитров во општина Кисела Вода.

Одговарајќи на новинарски прашања за локациите на овие центри и усогласувањето на подзаконските акти, тој нагласи дека примарната цел е да се фати чекор со светските трендови во оваа област, која досега воопшто не била регулирана.

– Сакавме да фатиме чекор со времето, имајќи предвид дека ова е она што го прави светот, бидејќи кај нас законската регулатива воопшто го немаше предвидено. Бевме во една сива зона, ниту беше забрането, ниту беше дозволено и сметавме дека е добро да ја уредиме оваа материја. Досега од приватен инвеститор не дошла иницијатива за ваква инвестиција. Се надевам дека ќе дојде во следниот период. Инвестицијата може да е државна и може да е приватна. Мислам дека е паметно за Македонија во идниот период да размислува за една државна инвестиција за да ги заштитиме државните институции. Се сеќавате што се случуваше на пример со Фондот за здравство пред некоја година. Така што од безбедносни причини мислам дека е паметно за нас како држава да се заштитиме и да имаме систем којшто целосно го контролира – посочи Николоски.

Во однос на обезбедувањето на просторот и начинот на реализација, Николоски појасни дека пристапот ќе зависи исклучиво од тоа дали станува збор за државен или за приватен проект.

– Доколку правиме таков државен дата центар, тогаш секако локацијата ќе ја обезбеди државата. А доколку се работи за приватна инвестиција, тогаш целокупната инвестиција и во купување на земјиште и во урбанизација ќе биде на приватниот инвеститор. А како што кажав досега немаме таков инвеститор, што значи дека и ние кога го носевме законот, иако знам дека остави кај некој впечаток дека наменски го носиме, не го носевме наменски, туку сакавме да создадеме правна рамка за потенцијални и инвеститори и инвестиции. Дали тие ќе дојдат за една година, за пет или за десет… Ние сега рамката ја имаме – вели Николоски.

Прашан дали идејата е ваквата инфраструктура да биде наменета за државната администрација и за образовните институции за поевтино користење, тој истакна дека процесот би требало да биде во надлежност на Министерството за дигитализација, потенцирајќи ја неопходноста од организиран безбедносен систем наместо досегашната практика на изнајмување ресурси.

– Мое мислење е, секако на ниво на Влада треба да донесеме одлука дека процесот би го водело Министерството за дигитализација, но мислам дека е паметно да размислуваме во оваа насока, затоа што сега ние сите изнајмуваме, а изнајмуваме најчесто од Мајкрософт или Телеком. Начелно тоа е во ред, но никогаш не се знае, повторувам, знаете што се случи со Фондот за здравствено осигурување, а имаше и одредени други такви ситуации. Дел институции сами прават заштита и нема еден организиран систем. Така што е паметно како држава, безбедноста не е само во војска и во полиција, туку е и тука да ние се заштитиме. Со ова веќе имаме правна рамка да се заштитиме како држава – рече Николоски.

The post ИДЕЈАТА Е ДРЖАВЕН ДАТА ЦЕНТАР ДА ГИ ШТИТИ ИНСТИТУЦИИТЕ Правна рамка за градење има, инвестицијата може да биде и приватна appeared first on plusinfo.mk.