Начинот на кој децата учат, комуницираат и ја градат својата иднина се менува побрзо од било кога. Технологијата отвора нови можности за знаење и креативност, рече Рози Мицкоска, сопругата на премиерот Христијан Мицкоски, во обраќањето на Глобалниот самит во Белата куќа, во организација на првата дама на Соединетите Американски Држави, Меланија Трамп, фокусиран на улогата на вештачката интелигенција и на образованието.

– Во одговорен и достапен начин во нашата земја, веруваме дека дигиталната писменост мора да започне од најрана возраст. Нашата цел е младите не само да користат технологија, туку и да ја разбираат, да размислуваат критички за неа и да ја користат за решавање на реални проблеми. Клучен чекор во таа насока е програмата за училишта во 21-виот век, спроведена во партнерство со меѓународни организации и приватниот сектор. Денес, 341 основни училишта и речиси 1.900 наставници во нашата земја се дел од оваа иницијатива, обезбедувајќи им на учениците модерни алатки за учење, вклучувајќи над 10.000 „микро-бит“ уреди за програмирање. Преку оваа програма, децата развиваат логичко размислување, креативност и вештини за решавање проблеми кои се есенцијални за нивната иднина – рече Мицкоска.

Сепак, дигиталните вештини мора да одат рака под рака со дигиталната безбедност, додаде таа.

– Затоа го воспоставуваме MK Safnet, првиот национален центар за побезбеден интернет како дел од европската мрежа на побезбедни интернет центри. Овој проект ги обединува институциите, универзитетите, граѓанското општество и приватниот сектор со една заедничка цел: создавање побезбедна онлајн средина за децата. Преку едукативни програми, 24/7 телефонска линија, училишни работилници и поддршка за родители и наставници, MK Safnet им помага на децата да препознаваат ризици на интернет, да ги заштитат своите лични податоци и одговорно да ја користат технологијата – рече Мицкоска.

Како професорка во средно училиште, мојата визија е јасна – технологијата мора да биде алатка која им помага на младите, а не ризик кој ги загрозува.

– Затоа соработката меѓу владите, училиштата, родителите, технолошките компании и меѓународната заедница е есенцијална за изградба на дигитален свет каде секое дете може безбедно да учи и да го достигне својот целосен потенцијал. Дозволете ми да ја изразам мојата искрена благодарност до нашата домаќинка, Првата дама на Соединетите Американски Држави, г-ѓа Меланија Трамп, за оваа важна иницијатива и за тоа што нè собра околу заеднички вредности. Ви благодарам за вашата посветеност – рече таа.

The post 🎥 ДИГИТАЛНАТА ПИСМЕНОСТ МОРА ДА ПОЧНЕ ОД НАЈРАНАТА ВОЗРАСТ Рози Мицкоска се обрати на Глобалниот самит во Белата куќа, организиран од Меланија Трамп appeared first on plusinfo.mk.

Секторот за компјутерски криминал при Министерството за внатрешни работи интервенираше навремено откако беше забележана објава на социјалните мрежи што укажуваше на можност за самоубиство од страна на малолетен корисник.

Полицијата веднаш ги презеде сите неопходни мерки за утврдување на идентитетот и локацијата на лицето, кое за кратко време беше пронајдено. Малолетникот е во добра состојба, а родителите се известени и запознаени со понатамошните чекори за негово ментално здравје.

– Овој настан уште еднаш ја нагласува важноста од внимателно следење на однесувањето на младите во дигиталниот простор. Родителите треба редовно да комуницираат со своите деца, да се интересираат за нивните активности на социјалните мрежи и да реагираат веднаш при забележување загрижувачки објави или несвојствено однесување – апелираат од Секторот за компјутерски криминал.

Апел е упатен и до пријателите, соучениците и сите корисници на социјалните мрежи: доколку забележат објави што упатуваат на самоповредување, безнадежност или најави за самоубиство, веднаш да ги искористат механизмите за пријавување на платформата или да известат родител, наставник или најблиска полициска станица.

Навремената реакција може да спаси човечки живот. Секторот за компјутерски криминал ќе продолжи со засилени активности за рано откривање и превенција на ризични појави во дигиталниот простор.

The post СПРЕЧЕНА ТРАГЕДИЈА, МАЛОЛЕТНИК САКАЛ ДА СЕ САМОУБИЕ Загрижувачка објава го вклучи алармот, полицијата реагираше веднаш appeared first on plusinfo.mk.

Албанската влада одлучи да ги повлече привремените мерки со кои ТикТок беше блокиран една година на целата територија на земјата.

Одлуката, потпишана од Советот на министри и објавена во локалните медиуми во Тирана, значи дека граѓаните повторно ќе можат непречено да пристапуваат до оваа социјална мрежа. Властите наведоа дека причините поради кои претходно ја воведоа забраната сега се разгледани, а националната агенција за сајбербезбедност ќе ги укине техничките ограничувања.

Трагичен инцидент причина за забраната

Во март 2025 година, Албанија блокираше пристап до ТикТок на една година, по трагичен инцидент во кој 14-годишно момче беше убиено, а властите го поврзаа тој случај со користењето на социјалните мрежи. Премиерот Еди Рама тогаш оцени дека платформата влијаела негативно врз однесувањето на младите и дека е потребно „да се заштитат децата и општеството“.

Во ноември 2024 година, во предградие на Тирана, 14-годишно момче беше смртно прободено со нож, од врсник по расправија што почнала на социјалните мрежи. Тоа се случило надвор од училиштето, по завршување на наставата. Друг тинејџер бил сериозно повреден во нападот, додека нападнатото момче починало од повредите. Овој случај беше најтежок инцидент од ваков вид во земјата во изминатите години и предизвика силни реакции во јавноста.

Одлуката на владата на Еди Рама подоцна предизвика остри реакции во јавноста и кај дел од медиумите во Албанија. Опозицијата и неколку невладини групи го оспорија блокирањето како прекумерна мерка што ја нарушува слободата на изразување и правото на пристап до информации.

Истовремено, и покрај официјалната забрана, многу корисници успеваа да го заобиколат блокот со помош на VPN-алатки, што значеше дека во пракса ТикТок се користеше и за време на забраната.

Во ЕУ забрана за ТикТок само за државните службеници

Албанија со ова не е единствената европска земја што поставува прашања околу ТикТок и неговата улога во општеството. Во рамки на Европската унија, институциите и неколку национални администрации ја забранија или ја ограничуваат употребата на ТикТок на службени уреди, со аргумент дека платформата претставува потенцијален безбедносен ризик и може да доведе до неовластен пристап до податоци.

На пример, Советот на Европската унија и Европската комисија забранија инсталирање на ТикТок на службени телефони и компјутери на европски службеници, токму поради загриженост околу базите на податоци и можноста тие да бидат пренесени надвор од ЕУ.

Неколку земји членки, како Франција, Германија, Австрија, Данска и Естонија, исто така имаат формулирано ограничувања за употреба на платформата кај државни службеници, или се разгледуваат мерки за поголема контрола, најчесто поврзани со заштита на чувствителна инфраструктура и информации.

Многу дебати, ама без решенија

Покрај безбедносните аргументи, во некои општества се отвораат и прашања поврзани со менталното здравје на младите корисници. Во други европски држави се дискутира за закони што би ограничиле пристап до социјални мрежи за деца и тинејџери под одредена возраст, како дел од поголем напор за заштита на благосостојбата на младите.

Причините што стојат зад овие дебати варираат — од загриженост за приватноста и за безбедност на податоците, до влијанието на содржините што корисниците ги гледаат и делењето на информации што може да предизвика зависност или да поттикнува ризично однесување.

Што значи одлуката на Албанија?

Со одлуката да ја повлече забраната за ТикТок, Албанија испраќа сигнал дека сака да го врати нормалното функционирање на дигиталниот живот во земјата, но и дека треба да се најде рамнотежа помеѓу дигиталните слободи и заштитата на корисниците.

Другите европски држави внимателно ги следат развојните настани околу оваа глобална платформа — можеби како предупредување, можеби како можност за регулација.

The post АЛБАНИЈА ЈА УКИНА ЗАБРАНАТА ЗА ТИК ТОК Враќање на дигиталната слобода, но по која цена? appeared first on plusinfo.mk.

Американскиот гигант Амазон блокирал повеќе од 1.800 апликации за работа кои, според неговиот оддел за безбедност, биле поврзани со севернокорејски агенти. Според изјавата на главниот директор за безбедност, Стивен Шмит, станувало збор за обиди на државјани на Северна Кореја да добијат ИТ работни места користејќи украдени или лажни идентитети.

– Нивната цел е едноставна, да добијат работа, да бидат платени, а потоа заработеното да го пренасочат кон програмите за вооружување на режимот – изјави Шмит, нагласувајќи дека оваа практика е распространета во целата индустрија, особено во САД.

Американските и јужнокорејските власти одамна предупредуваат на растечкиот број онлајн измами со потекло од Пјонгјанг. Шмит навел дека Амазон минатата година забележал за речиси една третина повеќе сомнителни апликации поврзани со севернокорејски државјани.

Овие оперативци, според него, најчесто соработуваат со луѓе што управуваат со т.н. „фарми на лаптопи“ – компјутери што физички се наоѓаат во САД, но се контролирани од странство. Амазон користи комбинација од алатки засновани на вештачка интелигенција за проверка на апликантите и откривање на ваквите активности.

Министерството за правда на САД уште во јуни соопшти дека открило 29 вакви „фарми на лаптопи“, нелегално управувани од севернокорејски ИТ работници. Во јули, една жена од Аризона беше осудена на осум години затвор затоа што им помогнала на севернокорејските техничари да работат во повеќе од 300 американски компании, што резултирало со незаконска добивка од над 17 милиони долари за неа и за режимот во Пјонгјанг.

The post НА БЕЗОС МУ ФУФКА ОД СЕВЕРНОКОРЕЈСКИ „РАБОТНИЦИ-ХАКЕРИ“ Амазон откри илјадници сомнителни апликанти appeared first on plusinfo.mk.