Новиот филм Дигер (Digger), во кој Том Круз игра нафтен магнат во црна сатира за еколошка катастрофа, би можел да предизвика финансиска загуба од дури 250 милиони долари. Проценката, објавена од американскиот портал „The Wrap“, ги вклучува и очекуваните приходи по завршувањето на киноприкажувањето.

Ако прогнозата се оствари, тоа би била најголемата финансиска загуба во кариерата на Круз и една од најголемите во поновата филмска индустрија.

Претходните проценки предвидуваа загуба од околу 125 милиони долари, но слабите резултати на стартот на прикажувањето дополнително ја влошиле финансиската слика. Дигер заработил само осум милиони долари во Северна Америка во првиот викенд, додека светската заработка изнесувала околу 21 милион долари.

Продукцијата чинела околу 173 милиони долари, а за маркетинг биле издвоени дополнителни 100 милиони долари. Значителен дел од промотивните активности бил поврзан со Том Круз, кој го претставувал филмот пред публиката.

Според извори на „The Wrap“ од компанијата Скајденс (Skydance), се очекува вкупната заработка на филмот од кинобилетите да не надмине 40 милиони долари на светско ниво. Од Ворнер брос (Warner Bros.), продукциската куќа зад филмот, не сакале да ги коментираат овие наводи.

Во филмот, Круз го толкува Дигер Роквел, богат нафтен магнат чии ископувања предизвикуваат еколошка катастрофа со глобални последици. Актерот е речиси непрепознатлив под маската и протезите, со кои е трансформиран во остарен, дебел и ќелав милијардер. Неговиот лик живее опкружен со препарирани животни и со својата болна мачка.

Критичарите имаат поделени мислења за филмот. Дел го оценуваат како збунувачки и претерано необичен, додека други ја пофалуваат неговата смела сатира и црниот хумор.

Дигер првично се сметаше за амбициозен проект и поради соработката меѓу Круз и режисерот Алехандро Гонзалес Ињариту, двократен добитник на Оскар за режија. Филмот беше и важен дел од новата соработка на актерот со Ворнер брос.

Сепак, високите трошоци и слабиот интерес на публиката во првиот викенд ги намалија изгледите проектот да ги оправда вложените средства.

Круз во меѓувреме има и друг голем проект во најава. Тој ќе се врати во продолжението на филмот Денови на грмотевицата (Days of Thunder), во кое ќе глуми заедно со Ен Хатавеј. Филмот е најавен за 2028 година, а режијата ќе ја потпише Џонатан Левин.

The post 📽️ ФИЛМОТ НА ТОМ КРУЗ МОЖЕ ДА ЗАГУБИ 250 МИЛИОНИ ДОЛАРИ Дигер доживеа дебакл уште на стартот appeared first on plusinfo.mk.

Една обична пауза на работа за една вработена во кујна се претворила во сцена која веројатно долго ќе ја раскажува. Жената седела со наведната глава и гледала во телефонот, кога покрај неа поминал Том Круз.

Од негова перспектива, ситуацијата веројатно изгледала сосема поинаку. Положбата во која седела му оставила впечаток дека е вознемирена, па актерот се вратил назад за да провери дали е добро.

Снимката од надзорната камера покажува како Круз ѝ приоѓа одзади и нежно ја допира за да ѝ го привлече вниманието. Кога жената ја подига главата, веднаш сфаќа кој стои пред неа па го поздравува, а тој сфаќајќи дека таа само скролала по телефонот, срдечно се смее.

Подоцна таа објаснила дека „doomscrolling“-от, односно бескрајното скролање низ лоши, вознемирувачки или негативни вести и објави, направило да изгледа како да има лош ден.

Жената признала дека во моментот била толку изненадена што едвај успеала да реагира кога сфатила дека ѝ се обраќа токму Том Круз.

Подоцна повторно се сретнале и таа успеала да направи и фотографија со него.

 

View this post on Instagram

 

A post shared by Entrepreneur Archived (@entrepreneurarchived)

Снимката за кратко време стана вирална, а вниманието не го привлече само фактот дека жената налетала на еден од најпознатите холивудски актери, туку на социјалните мрежи се коментираше неговата реакција – наместо само да продолжи по својот пат, тој застанал затоа што помислил дека на жената ѝ треба помош.

Сепак, не беа сите реакции исти. Дел од корисниците се прашуваа дали објавувањето на снимката токму во периодот кога Круз го промовира својот нов филм „Digger“ можеби има и промотивна страна. „Гардијан“ го забележа и тој скептицизам, иако за самата средба нема доказ дека била однапред организирана, особено со оглед на тоа што целата средба е снимена од надзорната камера.

Луѓе кои тврдат дека работеле со Круз оставиле коментари дека ваквото однесување не им е непознато. Еден поранешен колега споделил дека актерот и порано покажувал слично внимание кон луѓето околу себе. Други го опишале како човек кој знае да одвои време за обожавателите и колегите.

The post 📽️ ПОМИНА, ПА СЕ ВРАТИ ДА ЈА ПРАША ДАЛИ Е ДОБРО Том Круз сакал да утеши жена која изгледала вознемирено, а таа само „скролала“ на телефон appeared first on plusinfo.mk.

Кејт Мидлтон за малку ќе паднеше при пристигнувањето на светската премиера на новиот филм на Том Круз, „Digger“, во Лондон. Принцезата од Велс се симнува од ескалаторот кога Клер Таверние, претседателка на „Film and TV Charity“, случајно го нагази задниот дел од нејзиниот долг фустан, поради што Кејт за момент ја загуби рамнотежата.

Таверние веднаш ја крена раката во знак на извинување, но Кејт очигледно не ѝ забележа и откако ја врати рамнотежата, почна да се смее.

Кејт на премиерата пристигна со принцот Вилијам, а вниманието го привлече и со впечатливиот фустан во боја на слива од британската дизајнерка Џени Пакам. Носеше и ѓердан на кралицата-мајка и бисерни обетки кои некогаш ѝ припаѓале на принцезата Дијана.

Премиерата на „Digger“ во Лондон беше дел од „Royal Film Performance“, настан чиј приход е наменет за британската „Film and TV Charity“. На црвениот тепих Кејт и Вилијам се сретнаа со Том Круз, а беа забележани и во друштво на Дејвид Бекам и неговите синови Ромео и Круз.

Филмот го режира Алехандро Г. Ињариту, а покрај Том Круз во него играат и Риз Ахмед, Џон Гудман, Џеси Племонс, Џенифер Конели и други.

The post 📽️ НА ПРИНЦЕЗАТА Ѝ ГО ПОДГАЗИЈА ФУСТАНОТ Кејт Мидлтон за малку ќе паднеше на премиерата на „Digger“ во Лондон appeared first on plusinfo.mk.

Принцот Вилијам и Том Круз повторно се сретнаа, овојпат на светската премиера на „Digger“ во Лондон, а нивната средба привлече внимание и на социјалните мрежи. Додека принцот Вилијам сподели фотографии и моменти од вечерта на својот Фејсбук профил, Круз објави фотографии од премиерата на Инстаграм.

Односот меѓу принцот и холивудската ѕвезда не е само протоколарен. Нивната јавна блискост особено доаѓа до израз во 2022 година, кога Вилијам и Кејт присуствуваа на британската премиера на „Top Gun: Maverick“ во Лестер Сквер. Круз тогаш откри дека со Вилијам имаат многу заедничко – и двајцата ја сакаат Англија и се љубители на летањето.

Пред официјалната премиера на филмот, Круз дури го покани Вилијам на приватна проекција на „Top Gun: Maverick“, откако дозна дека принцот е голем обожавател на оригиналниот филм од 1986 година. На премиерата во 2022 година Круз ѝ помага и на Кејт при качувањето по скалите, момент што тогаш привлече големо внимание.

Круз има и постари врски со британското кралско семејство. Со принцезата Дијана се сретна во 1992 година на премиерата на филмот „Far and Away“, на која присуствуваше со тогашната сопруга Никол Кидман. Актерот подоцна беше и на погребот на Дијана во 1997 година. Во 2017 година се сретна и со принцот Филип на настан во Бакингемската палата.

На премиерата на „Digger“, Вилијам и Кејт повторно се сретнаа со Круз и со режисерот Алехандро Гонзалес Ињариту. Кога Вилијам му пријде на актерот во црно кадифено сако, Круз му дофрли: – Одлично сако. Вилијам, пак, потсети на нивната претходна средба со зборовите дека последниот пат Круз бил „со кацига и во костим за летање“.

Круз пред нивното пристигнување зборуваше со голема наклонетост за кралската двојка.

– Јас едноставно ги сакам. Тие се прекрасни луѓе и имам огромна почит кон нив – рече актерот. Подоцна на самиот настан им се заблагодари за поддршката на филмот и за она што го прават за уметноста и културата.

Кејт на премиерата се појави во долг виолетов фустан од „Jenny Packham“, во комбинација со обетки што ѝ припаѓале на принцезата Дијана и накит на кралицата мајка. Круз повторно ѝ ја подаде раката додека се симнуваа по скалите кон салата, а Вилијам и Кејт подоцна се фотографираа и со Дејвид Бекам и неговите синови Круз и Ромео.

 

View this post on Instagram

 

A post shared by David Beckham (@davidbeckham)

Премиерата на „Digger“ воедно е 73. „Royal Film Performance“, настан организиран во соработка со „The Film and TV Charity“. Средствата собрани од вечерта се наменети за поддршка на луѓето што работат во филмската, телевизиската и кинематографската индустрија, вклучително и преку советување, финансиска помош и други програми за благосостојба.

 

View this post on Instagram

 

A post shared by Tom Cruise (@tomcruise)

Во „Digger“, Круз го игра нафтениот магнат Дигер Роквел, кој се обидува да го спаси човештвото од катастрофа предизвикана од неговата сопствена компанија. Филмот е црна сатирична комедија во режија на Алехандро Гонзалес Ињариту, а во актерската екипа се и Риз Ахмед, Џон Гудман, Сандра Хулер, Мајкл Стулбарг, Џеси Племонс и Ема Дарси.

The post 📽️ ПРИНЦОТ СЕ ПОФАЛИ СО СРЕДБАТА СО ТОМ КРУЗ НА ФЕЈСБУК, А АКТЕРОТ НА ИНСТАГРАМ Вилијам и Кејт имаа срдечна средба со холивудската ѕвезда на премиерата на „Digger“ appeared first on plusinfo.mk.