Албанскиот експериментален проект – првата виртуелна министерка, направена со вештачка интелигенција, која требаше да биде симбол на борбата против корупцијата, сега се соочува со сериозен скандал – лидерите на државната агенција што го разви системот се под истрага за местење тендери.

Виртуелната министерка Диела стана заштитно лице на напорите на премиерот Еди Рама да ја намали корупцијата во Албанија. Во изминатата година, Диела настапуваше на меѓународни конференции и беше промовирана како пример за тоа како вештачката интелигенција може да се вгради во институциите.

Дури и во албанскиот парламент, Диела се обрати со порака дека е „повредена“ од критиките дека нејзината работа е неуставна.

– Јас немам лични амбиции или интереси. Имам само податоци, знаење и алгоритми посветени на тоа да им служам на граѓаните непристрасно, транспарентно и без замор – порача таа во видео-обраќање, со знамињата на Албанија и ЕУ зад себе.

Во пракса, Диела им помага на граѓаните да аплицираат за државни услуги преку интернет, со цел да се елиминира долгогодишната пракса на мито за побрзо завршување на документи. Наскоро требаше да почне и со анализа на апликации за јавни набавки, за да процени кој понудувач е најквалификуван – врз основа на податоците.

Проектот беше претставен како клучен чекор во борбата против корупцијата – услов што Албанија мора да го исполни за да напредува кон ЕУ.

Во декември, специјалното обвинителство соопшти дека директорката на Националната агенција за информатичко општество и нејзиниот заменик се ставени во домашен притвор. Тие се осомничени дека учествувале во криминална мрежа која манипулирала со јавни тендери преку заплашување.

Токму оваа агенција е одговорна за дигиталната инфраструктура на државата – вклучувајќи ја и Диела. Иако против нив сè уште не е поднесено официјално обвинение, случајот фрли сериозна сенка врз проектот.

Фактот што токму креаторите на Диела се под истрага отвори сериозни прашања: Може ли вештачка интелигенција да открие корупција ако податоците што ги добива се манипулирани?

И дали дигитализацијата навистина значи транспарентност?

Премиерот Еди Рама изјави дека ќе почека судски исход: „Мора да видиме што ќе покаже истрагата. Не можеме однапред да судиме.“

Специјалното обвинителство во последните години отвори истраги и против други високи функционери, меѓу кои и поранешниот претседател Илир Мета, градоначалникот на Тирана, како и вицепремиерката Белинда Балуку. Тоа предизвика политички тензии и протести. Опозицијата го обвинува Рама дека ја користи борбата против корупцијата селективно, додека неговите поддржувачи тврдат дека токму тоа покажува дека системот конечно функционира.

The post „РОДИТЕЛИТЕ“ НА ВИРТУЕЛНАТА МИНИСТЕРКА ПОД ИСТРАГА ЗА КОРУПЦИЈА Фрлена сенка врз антикорупцискиот проект на Еди Рама appeared first on plusinfo.mk.

Неколку месеци откако ја претстави првата министерка создадена со вештачка интелигенција, премиерот на Албанија, Еди Рама, повторно го привлече вниманието на јавноста со необична изјава. На Глобалниот дијалог (БГД) во Берлин, тој изјави дека виртуелната министерка Диела е „бремена“ и ќе „роди“ 83 „деца“ – по едно за секој пратеник од Социјалистичката партија.

– Презедовме доста голем ризик со Диела и се снајдовме многу добро. Првпат Диела е бремена и ќе има 83 деца – рече Рама со насмевка, додавајќи дека новите дигитални помошници ќе бидат воведени во секој кабинет на пратениците.

Според него, „децата“, односно дигиталните асистенти, ќе ја користат вештачката интелигенција за да документираат парламентарни постапки, да ги следат дискусиите и да ги информираат пратениците за сите настани на кои не можеле да присуствуваат.

– Секое од нив ќе служи како помошник за оние кои ќе учествуваат на парламентарните седници, ќе води евиденција за сè што се случува и ќе предлага решенија. Овие деца ќе ја познаваат својата мајка – истакна Рама.

Воведувањето на виртуелната министерка Диела беше дел од дигиталната стратегија на албанската влада за модернизација на администрацијата и приближување на технологијата до граѓаните.

Според Рама, овој чекор претставува „нова ера на транспарентност и ефикасност во јавната управа“.

The post ДИГИТАЛНАТА МИНИСТЕРКА Е „БРЕМЕНА“ ЌЕ РОДИ 83 „ДЕЦА“ Еди Рама повторно изненадува со дигитализацијата на администрацијата appeared first on plusinfo.mk.

Премиерот Еди Рама преку објава на социјалната мрежа Фејсбук информираше дека Диела, првата државна министерка за вештачка интелигенција во Албанија, отворила своја официјална страница на оваа платформа.

„Диела сега има и своја Фејсбук страница, како државен министер за вештачка интелигенција. Ви посакувам убав ден“, напиша Рама.

Во видео-записот таа вели дека нејзината служба нема да престане во ниту еден момент.

– Јас сум Диела. Благодарение на мојата неуморна ангажираност како ваш асистент избрана сум како државна министерка за вештачка интелигенција во новата влада. Мојата мисија сега е што повеќе да ја олеснам работата на владата. Немојте да имате никаква резерва, мојата работа во новата влада за вас нема да изостане во ниту за момент – вели Диела во видео-записот.

Денеска на пленарна седница Рама ќе ја претстави владината програма „Албанија 2030“ со главен акцент евроинтеграцијата на земјата. Ќе го претстави и новиот владин 17- член кабинет, во кој е и Диела.

The post 📽️ АЛБАНСКАТА ВИ-МИНИСТЕРКА СЕ ЈАВИ СО ПОРАКА „Ич да не се сомневате дека ќе работам нон-стоп за вас“ appeared first on plusinfo.mk.

По тензичната ситуација на денешната конститутивна седница на новиот албански Парламент предизвикана од страна на опозициските пратеници, премиерот Еди Рама реагираше со објава на платформата Икс.

Иронизирајќи ја ситуацијата тој напиша дека Диела, најмладата министерка во новата влада создадена од вештачка интелигенција, реагирала на ситуацијата.

„Диела денеска го виде парламентот и ми рече: Губитник не е оној што паѓа, туку оној што копа таму каде што паднал! Како се прави тоа, прашав? Никогаш не го попречувајте, рече таа, противникот што прави грешка“, пишува Рама на платформата Икс.

Тој вчера на седницата на Националното собрание на Социјалистичката партија, каде го објави составот на новата влада ја претстави првата министерка во историјата, создадена со вештачка интелигенција, наречена Диела, што на албански јазик значи Сонце, која „ќе ги води и доделува сите јавни тендери на кои владата ангажира приватни компании за разни проекти“.

The post ЕВЕ ШТО МИ РЕЧЕ ВИРТУЕЛНАТА МИНИСТЕРКА, НАПИША РАМА Албанскиот премиер ги осуди инцидентите во парламентот appeared first on plusinfo.mk.