Јапонската детска поп-ѕвезда Хирата Руна почина на само осум години. Таа била членка на програмата за млади таленти на јапонскиот идол-проект DIANNA Project, а нејзината смрт била последица од миокардитис, односно воспаление на срцевиот мускул, поврзано со грип.

Руна починала на 25 септември околу 4 часот наутро по локално време, објавило нејзиното семејство преку нејзиниот профил на мрежата X.

DIANNA Project на 28 септември соопштил дека причината за смртта бил „миокардитис како последица на грип“.

Особено потресен е податокот дека само пет дена пред смртта, на 20 септември, осумгодишната Руна настапила на концертот „DIANNA Project Regular Live Vol. 70“. По настапот објавила фотографија и им се заблагодарила на луѓето што ја поддржувале, пишувајќи дека убаво си поминала. Тоа бил нејзиниот последен јавен настап.

Миокардитисот е воспаление на срцевиот мускул. Може да има различни причини, меѓу кои и вирусни инфекции. Во зависност од тежината, може да влијае врз способноста на срцето нормално да пумпа крв и да предизвика нарушувања на срцевиот ритам. Иако грипот најчесто поминува без вакви компликации, во ретки случаи може да биде поврзан со воспаление на срцевиот мускул.

Од DIANNA Project изразиле благодарност до сите фанови и луѓе кои ја поддржувале Руна, а јавноста ја замолиле да ја почитува приватноста на семејството. Погребот бил одржан во присуство на најблиските.

Семејството исто така им се заблагодарило на нејзините колеги, фановите и луѓето од агенцијата кои ѝ помогнале во остварувањето на сонот да стане идол. Побарале Руна да биде запаметена како „вечен идол“.