Во Македонија има повеќе од 307.000 ненаселени станови, но тоа не го спречува квадратниот метар да достигнува рекордни цени. Напротив, на најатрактивните локации во Скопје и Охрид веќе се надминуваат и 3.000 евра за квадратен метар.

На прв поглед, бројките изгледаат како целосен парадокс. Ако понудата е голема, зошто цените не паѓаат?

Одговорот не може да се сведе само на тоа колку станови постојат и колку луѓе бараат дом. Македонскиот пазар на недвижности во голема мера го движат и инвестициите, дијаспората, купувачите со готовина и оние кои имотот го гледаат како начин за чување и зголемување на капиталот, пишува порталот Бизнис вести.

Податоците од пописот во 2021 година покажуваат дека во Македонија имало вкупно 839.174 станови. Од нив, 531.987 биле населени, додека 307.187 биле ненаселени.

Тоа значи дека 36,6 отсто од целиот станбен фонд немал постојани жители.

Но, станбениот фонд во меѓувреме продолжил да расте.

Од 2020 до 2025 година во земјата биле изградени 36.281 станбена единица, а само во јуни 2026 година биле издадени одобренија за изградба на уште 754 станови.

Сепак, наместо намалување на цените поради поголемата понуда, пазарот продолжува да бележи раст.

Во вториот квартал од 2026 година биле регистрирани 6.221 продажба на недвижности, што претставува годишен раст од 20,2 отсто.

Во првите шест месеци од годината, пак, вкупната вредност на купопродажбите достигнала 625,7 милиони евра, што е за 21,3 отсто повеќе во споредба со истиот период минатата година.

Значи, пазарот не само што не забавува, туку напротив – се зголемува и бројот на трансакции и вредноста на продадените недвижности.

Клучот за разбирање на пазарот можеби лежи токму во прашањето – кој има пари да купува?

Еден дел од купувачите се млади семејства и луѓе кои се преселуваат во Скопје или во други поголеми градови. Но, тие не се единствените кои ја создаваат побарувачката.

Станот сè почесто се купува и без намера веднаш да се живее во него.

За дел од граѓаните недвижноста претставува своеобразна „штедна книшка во бетон“ – начин парите да се сочуваат, а имотот со текот на времето евентуално да добие поголема вредност.

Тука се и купувачите кои инвестираат во недвижности за изнајмување или за подоцнежна препродажба, како и оние кои имаат доволно капитал за да купат имот без станбен кредит.

Тоа создава специфичен пазар на кој цената не мора да биде достапна за просечното македонско домаќинство за да постои купувач кој ќе ја плати.

Овој тренд значително ја менува логиката на пазарот.

За младо семејство, станот е основна животна потреба и најчесто најголемата финансиска одлука во животот.

Но, за купувач кој располага со вишок капитал, станот може да биде инвестиција, заштита од инфлација, имот за децата или недвижност која ќе се продаде во момент кога цената ќе биде повисока.

Така се создава ситуација во која еден дел од населението тешко може да си дозволи и 50 квадратни метри, додека друг дел купува втор, трет или четврти имот.

Токму затоа големиот број ненаселени станови не значи автоматски и голема реална понуда за луѓето кои бараат дом.

Ако сопственикот не сака да го продаде станот, не го изнајмува и никој не живее во него, тој формално постои во статистиката како станбен простор, но практично не е достапен за купувачите и станарите.

На македонскиот пазар значајна улога има и дијаспората.

Човек кој заработува во Германија, Швајцарија, Австрија, САД или Канада има сосема поинаква куповна моќ од човек кој истиот имот треба да го финансира со македонска плата и станбен кредит.

За некого кој заработува во странство, стан од 100.000 или 150.000 евра може да претставува сериозна, но остварлива инвестиција.

За просечно македонско домаќинство, истата сума може да значи долгогодишна, па и повеќедецениска отплата.

Затоа цената на недвижностите во Македонија не мора да се движи само според домашните плати. На пазарот влегува и капитал заработен во странство.

Колку високо може да оди цената покажуваат и најскапите регистрирани трансакции.

Во првата половина од 2026 година, во скопската Општина Центар е регистрирана продажба на стан од 50 квадратни метри за 168.000 евра, односно околу 3.360 евра за квадратен метар.

Во Охрид е регистрирана продажба на стан од 66 квадратни метри за 211.200 евра.

Овие трансакции не се показател за просечната цена во целата земја, но јасно покажуваат до каде стигнува пазарот на најбараните и најатрактивните локации.

Во првата половина од 2026 година, само становите учествувале со 289,1 милиони евра во вкупната вредност на купопродажбите.

Токму тука економскиот парадокс станува и социјален проблем.

Во земја во која повеќе од една третина од становите се ненаселени, дел од младите семејства се соочуваат со сè поскап квадрат и сè поголема потреба од кредит за да дојдат до сопствен дом.

А кредитот не значи само плаќање на цената на станот. Во неа влегуваат и каматите, долгогодишната отплата и ризикот приходите на домаќинството да не растат со исто темпо како цените на недвижностите.

Затоа бројката од 307.187 ненаселени станови не значи дека исто толку станови можат утре да се појават на пазарот и да ги намалат цените.

Дел од нив се во места од кои населението се иселува, дел се наследени имоти, дел се во сопственост на иселеници, а дел се инвестиции кои сопствениците немаат причина да ги продаваат.

Во исто време, најатрактивните локации продолжуваат да привлекуваат капитал.

И токму затоа вистинското прашање за македонскиот пазар на недвижности не е само „зошто квадратот поскапува кога има толку празни станови?“

Прашањето е колку од тие станови навистина се достапни за оние на кои им треба дом – и колку од побарувачката ја создаваат луѓето кои станот не го купуваат за да живеат во него, туку како инвестиција.

The post 307.000 ПРАЗНИ СТАНОВИ, А КВАДРАТОТ ОДИ НАД 3.000 ЕВРА Кој ги купува скапите имоти во Македонија? appeared first on plusinfo.mk.

И покрај зголемениот број барања за лични документи во летниот период, МВР информира дека издавањето пасоши се одвива непречено, а термин за поднесување барање во редовна постапка граѓаните добиваат за еден до два дена.

Во текот на јули биле примени околу 55.000 барања за издавање лични документи, меѓу кои и патни исправи. Од Министерството за внатрешни работи велат дека, и покрај зголемениот број барања во летните месеци, постапката се одвива без подолги застои.

Термин за поднесување барање во редовна постапка во моментов се добива во рок од еден до два дена, додека изработените документи граѓаните ги добиваат за најмногу седум дена.

Од МВР нагласуваат дека ова е првпат во јули и август, период кога во земјава престојува голем број македонски иселеници, постапката да се одвива со ваква динамика и без подолги рокови на чекање.

Според Министерството, подобрувањето на услугите е резултат на преземени организациски мерки и оптимизација на работните процеси.

Летните месеци традиционално носат зголемен број граѓани од дијаспората кои престојуваат во Македонија, а дел од нив престојот го користат и за вадење или обновување на личните документи и пасошите.

МВР им препорачува на граѓаните од дијаспората навремено да ја проверат важноста на своите документи и, доколку имаат потреба од нов пасош, барањето да го поднесат веднаш по пристигнувањето во земјава.

Од Министерството посочуваат дека во случаи кога постојат итни и оправдани причини поврзани со патување во странство, се постапува согласно законските можности за итно издавање патни исправи.

Од 18 февруари 2025 година, отсеците за управни работи при Одделот за граѓански работи на МВР работат согласно ново работно време.

Одделението за управни работи во Скопје и Отсекот за управни работи во Тетово од понеделник до петок работат во две смени, од 7:30 до 19:30 часот.

Отсеците за управни работи во Битола, Велес, Куманово, Охрид, Струмица и Штип од понеделник до петок работат од 8 до 18 часот.

Истото работно време важи и за подрачните единици во Прилеп, Кавадарци, Кичево, Струга, Гостивар и Кочани.

Во останатите подрачни единици работното време е од 8 до 16 часот.

МВР посочува дека со преземените мерки целта е граѓаните да добиваат побрзи и поефикасни услуги, особено во периодот кога бројот на барања за лични документи е зголемен.

Во Скопје, во реконструираниот дел од Одделението за управни работи, претходно беа преземени мерки за подобрување на условите и забрзување на постапките за издавање лични документи.

Тогашниот министер за внатрешни работи Панче Тошковски истакна дека целта е граѓаните да добиваат брзи и ефикасни услуги, без непотребно чекање и на начин што го зачувува нивното достоинство.

Со реконструкцијата беа опфатени и кабините за фотографирање, шалтерската сала и просториите во кои се вршат постапките за издавање пасоши, лични карти, возачки дозволи, уверенија за државјанство и други документи.

The post ПАСОШИТЕ ЛЕТОВО БЕЗ ЗАСТОЈ Термин се добива за ден-два, документот за најмногу седум дена appeared first on plusinfo.mk.

„Македонија и покрај одреден напредок сè уште значително заостанува зад земјите членки на Европската Унија, поради што се неопходни длабоки реформи, побрз економски раст и поефикасни институции, изјави главната извршна директорка на „Македонија 2025“.

Ова беше дел од говор на Никица Мојсоска Блажевски, на денешниот брифинг со новинарите за претсојниот Самит 2026.

Таа информираше дека годинава Самитот „Македонија 2025“ има цел да понуди конкретни решенија и јасни пораки за економскиот и за  општествениот развој на земјата во однос на макроекономијата и економскиот раст, како и фокус на инвестициите, инфраструктурата и на лидерството.

Мојсоска Блажевски посочи дека иако податоците за странските инвестиции не се поволни, меѓународните анализи сепак препознаваат одреден исчекор на земјата кон инвестиции со поголема додадена вредност, што, според неа, треба да биде насоката и во иднина.

Во рамки на Самитот ќе се разговара и за инфраструктурниот развој, со учество на претставници на Владата и Министерството за транспорт и врски, а програмата ќе биде прилагодена на современите формати – со пократки и поинтерактивни сесии, интервјуа и директни разговори.

Блажевски најави дека програмата ќе опфати теми поврзани со лидерството, дигитализацијата и вештачката интелигенција, како и панели со говорници од корпоративниот, граѓанскиот и дипломатскиот сектор. Самитот ќе биде затворен со пораки од високи владини претставници.

Говорејќи за идните планови на организацијата, Мојсоска Блажевски нагласи дека „Македонија 2025“ влегува во нова стратешка фаза со стратегија до 2030 година, заснована на три клучни столба – економски развој, образование и лидерство, и дијаспората.

– Без економски раст не можеме да зборуваме за ништо друго. Но, исто толку важно е вложувањето во луѓето и поврзувањето со дијаспората, која претставува голем неискористен потенцијал за земјата – рече таа.

Организацијата, како што посочи, продолжува со соработката со Владата во неколку области, меѓу кои дигитализацијата, воспоставувањето национален научно-технолошки парк и развојот на услуги за дијаспората. Воедно, најави и промоција на нова дигитална платформа наменета за поврзување на дијаспората со Македонија.

Мојсоска Блажевски потенцираше дека „Македонија 2025“ е независна и непартиска организација, која критички, но конструктивно придонесува во јавниот дискурс, а сите вклучени работат на волонтерска основа.

Оваа година на самитот се очекуваат околу 700 учесници и над 300 компании вклучени во различни активности.

Самитот „Македонија2025“ е водечка регионална платформа која ги здружува глобалните бизнис лидери, креаторите на политики, инвеститорите, иноваторите и членовите на дијаспората за да ја обликуваат иднината на економскиот раст и лидерството во Југоисточна Европа.

The post БЕЗ ЕКОНОМСКИ РАСТ НЕ МОЖЕМЕ НИКАДЕ „Македонија 2025“ најави стратегија за развој, образование и за дијаспората appeared first on plusinfo.mk.