Министерот за надворешни работи и надворешна трговија Тимчо Муцунски престојува во работна посета на Вашингтон, Соединетите Американски Држави, каде што ја предводи високата владина делегација на втората сесија од стратешкиот дијалог меѓу двете земји, која ќе се одржи утре.

– Стратешкиот дијалог претставува значајна платформа за продлабочување на билатералната соработка и унапредување на партнерството со САД, со фокус на клучни области од заемен интерес, вклучително одбраната и безбедноста, сајбер-безбедноста и технолошката соработка, економијата, трговијата и енергетиката, како и заедничката борба против транснационалните закани и зајакнувањето на граничната безбедност, стои во соопштението на МНРиНТ.

Оттаму наведуваат дека со одржувањето на втората сесија од Стратешкиот дијалог се потврдува континуитетот на сојузништвото меѓу двете земји и заедничката посветеност кон унапредување на стабилноста, безбедноста и просперитетот во регионот и пошироко.

Во емисија „Еуро Фокус“ на Телма телевизија Муцунски претходно истакна дека ние ќе бидеме прва земја во Европа која во рамки на оваа администрација ќе има сесија на стратешки дијалог во Вашингтон. Тој изрази очекување дека Стратешкиот дијалог ќе отвори сериозни дискусии во областа на одбраната и безбедноста, трговската и економската соработка, како и дека ќе донесе конкретни бенефити за граѓаните.

The post ВИСОКА ВЛАДИНА ДЕЛЕГАЦИЈА ПРЕДВОДЕНА ОД МУЦУНСКИ ВО ВАШИНГТОН Втора сесија од Стратешкиот дијалог меѓу Македонија и САД appeared first on plusinfo.mk.

Соединетите Американски Држави и Русија се согласија да го продолжат воениот дијалог на високо ниво по состанокот меѓу рускиот и американскиот воен персонал во Абу Даби, соопшти Врховната команда на силите на НАТО за Европа.

Договорот беше постигнат по состаноците во Абу Даби меѓу генералот Алексис Гринкевич, врховен командант на силите на НАТО за Европа, и високиот руски и украински воен персонал, се наведува во соопштението од Врховната команда на силите на НАТО за Европа.

Гринкевич пристигна во главниот град на Обединетите Арапски Емирати на разговори меѓу претставниците на САД, Русија и Украина за завршување на војната во Украина.

„Комуникацискиот канал ќе обезбеди континуиран воен контакт додека страните продолжуваат да работат на постигнување траен мир“, се вели во соопштението од Врховната команда.

Воената комуникација меѓу Соединетите Американски Држави и Русија беше прекината во 2021 година, непосредно пред војната на Русија против Украина, потсетуваат светските агенции.

The post САД И РУСИЈА СЕ СОГЛАСИЈА ДА ГО ПРОДОЛЖАТ ВОЕНИОТ ДИЈАЛОГ Постигнат договор по разговорите за Украина во Абу Даби appeared first on plusinfo.mk.

Пораката на пратеникот Фатмир Битиќи дека критиката во партиите не смее да се третира како предавство доаѓа во вистински момент, но и отвора многу подлабока рана во македонската политика, проблемот не е само во односите меѓу партиите, проблемот е што сè почесто несогласувањето внатре во партиите се доживува како закана, наместо како потребен коректив.

Во демократски систем, различното мислење е знак на живот, кај нас пречесто е сигнал за прогон. Штом некој ќе се осмели да постави прашање, да укаже на погрешна одлука или да понуди поинаков правец, следува добро познатата шема, наместо расправа за аргументите почнува расправа за мотивите, критичарот станува „непријател одвнатре“, „човек на други центри“, „предавник“, со тоа дебатата умира уште пред да почне.

Видовме што им се случи и што им се случува на Шилегов, Деспотовски, Куновска, но и на сите други во СДСМ што се осмелија јавно да го критикуваат и поранешното и сегашното раководство, наместо аргументите да им се слушнат, тие беа јавно жигосани, прогласувани за проблем, а не за совест на партијата, не беа третирани како луѓе што предупредуваат, туку како луѓе што треба да се замолчат, тоа не беше политичка дебата, туку дисциплинирање преку страв, јасна порака до сите останати, секој што ќе крене глас, ќе биде ставен на столбот на срамот, во таква атмосфера различното мислење не се побива со аргументи, туку се казнува со изолација и етикети.

Ова не е идеолошки проблем, ова е проблем на политичка култура.

Кога лидерот се поистоветува со партијата

Коренот на оваа појава лежи во моделот на лидерство што доминира со децении, лидерот не е прв меѓу еднаквите, туку станува мерка за лојалност, кога една партија ќе се сведе на волјата на еден човек или на тесен круг околу него, секоја критика на одлука автоматски се толкува како напад врз авторитетот.

Но, партиите не се приватни фирми, тие се организирани заедници на луѓе со различни искуства, ставови и визии, обединети околу заеднички политички цели и идеологија, во кои внатрешниот дијалог и различното мислење се природен дел од демократското функционирање, кога тие разлики се замолчуваат, партијата престанува да се развива и почнува да стагнира, нема ништо поштетно од моментот кога лојалноста кон една индивидуа ќе стане поважна од компетентноста, а дисциплината и покорноста поважни од вистината.

Стравот зад тишината

Зад задушувањето на критиката ретко стои сила, почесто стои страв, страв од губење контрола, од внатрешна конкуренција, од можноста дека некој друг можеби има подобар аргумент, наместо да се соочи со тие аргументи, лидерите односно раководството избираат полесен пат, дискредитација. Но. да не заборавиме дека заканите од ,,анонимни’’ сопартијци се составен дел на оваа одамна вткаена патрица.

Така се создава атмосфера во која луѓето не молчат затоа што се согласуваат, туку затоа што се плашат, таму каде што владее страв нема искрен совет, нема предупредување дека нешто оди во погрешна насока, нема корекција на време, партијата почнува да живее во сопствена реалност.

Етикетата како средство за контрола

Етикетирањето не служи само за да се замолчи еден глас, тоа служи како порака до сите останати, кога ќе видат што му се случува на оној што зборувал гласно, другите учат лекција, „подобро да молчам“, така постепено се губат најискрените и најкритичките луѓе, токму тие што најмногу ѝ се потребни на една организација.

Околу лидерот остануваат тие што никогаш не поставуваат незгодни прашања, на краток рок тоа создава привид на единство, а на долг рок тоа е рецепт за сериозни грешки и тешки порази.

Лично искуство со двојни аршини

Ова не го зборувам како апстрактна анализа, ова сум го почувствувал лично, во периодот кога ВМРО-ДПМНЕ беше под раководство на Никола Груевски, само затоа што имав поинакви ставови и укажував на одредени погрешни политики и незаконити дејствија на дел од првите чуѓе во партијата. Тогаш бев изложен на обид за нестатутарно исклучување од партијата, не поради штета што сум ја направил, туку поради став што не се вклопуваше во тогашната линија. Пораката беше недвосмислена, критиката е непожелна, а лојалноста кон првите луѓе е над сè.

Кратко време по овие ,,демократски изливи на партиски вредности и правила’’ јавноста сведочеше на сериозни политички потреси, поделби и историски одлуки што доведоа пратеници од нашите редови да гласаат за промена на името на државата и за Преспанскиот договор. Дел од луѓето што имаа надреална моќ во тие процеси и кои беа креатори, мотиватори и наредбодатели за гласањето на пратениците, никогаш не беа јавно етикетирани како „предавници“ од сопствените редови. За нив важеше молк или внимателно одбирање зборови. Одговорноста на поранешните први луѓе на партијата за жал не беше именувана со истата жестина со која се напаѓаа внатрешните критичари, иако за воља на вистината извршителите и наредбодавачите на одлуката за гласање за промена на името и за Преспанскиот договор го извршија најголемото предавство не само на партијата, туку пред сè на државата и народот.

Од овој пример јасно може да се види и заклучи дека суштина на лесно залепливата етикета „предавник“ не се дели според тежината на последиците, туку според степенот на послушност.

Молкот како најголема опасност

Задушената дебата може краткорочно да донесе мир во „куќата“, нема јавни судири, нема отворени расправии, сè изгледа под контрола, но цената се плаќа подоцна, кога никој не смее да каже дека стратегијата е погрешна, дека луѓето се оддалечуваат или дека теренот испраќа лоши сигнали, грешките стануваат системски. Тогаш поразите доаѓаат како „изненадување“, иако предупредувањата одамна постоеле, но биле замолчени.

Критиката може да биде непријатна за лидерот и раководството, но молкот е опасен за иднината на партијата.

Демократијата почнува во сопствениот двор

Партиите често повикуваат на дијалог во општеството, на толеранција и почитување различни мислења, но тие вредности не можат да се бранат надвор ако не се живеат внатре, ако во партиските простории владее страв од збор, тогаш повиците за демократија звучат празно.

Вистинската зрелост на една политичка организација и нејзиниот лидер не се мери по тоа колку силно сите аплаудираат, туку по тоа колку слободно и гласно некој може да каже „Не се согласувам“ без да биде прогласен за непријател.

Во здрава партија, критичарот не е предавник, тој е сигнал дека сè уште постојат луѓе што размислуваат, што се грижат и што сакаат работите да бидат подобри, мудрите лидери не го казнуваат тој сигнал, тие го слушаат.

Досегашната историја на политичките партии недвосмислено покажа едно правило без исклучок, партиите не се распаѓаат од премногу зборување, туку од предолго и недозволиво молчење. Вистинската критика, онаа што предупредува и укажува на грешки, не е закана за партијата, туку нејзина крв и душа, без која секоја организација станува мртво тело. Лидерството без способност да слуша забелешки и аргументи е рецепт за побрзо фаќање удолница. Вистинската моќ не се мери со тоа кој молчи, туку со тоа кој има храброст да зборува и кој е спремен да ги слушне тие гласови, дури и кога тие гласови се непријатни, но неопходни.

The post Кога критиката станува „предавство“, а молкот – доблест appeared first on plusinfo.mk.

Американскиот претседател Доналд Трамп најави дека е подготвен да разговара со венецуелскиот претседател Николас Мадуро, но не ја исклучи можноста за испраќање американски трупи во Венецуела.

– Во одреден период ќе разговарам со него – изјави Трамп во Овалната соба.

На прашањето дали би ја исклучил воената опција, тој децидно рече дека „не исклучува ништо“. Потоа додаде дека мора „да се погрижат за Венецуела“, обвинувајќи ја владата во Каракас дека испраќа „стотици илјади луѓе од затвор во САД“.

Неколку часа подоцна, венецуелскиот лидер одговори во својата неделна телевизиска емисија дека е подготвен за „директен разговор, лице в лице“.

– Оваа земја ќе продолжи да живее во мир. Во САД, секој кој сака да разговара со Венецуела ќе разговара директно, без никакви проблеми – истакна Мадуро.

Администрацијата на Трамп веќе неколку месеци го засилува военото присуство во Карибите со образложение дека се бори против трговијата со дрога, поврзувајќи ја со латиноамерикански земји, меѓу кои и Венецуела.

Од септември, американските сили извршиле воздушни напади врз бродови кои наводно превезувале дрога, при што биле убиени најмалку 83 лица, објави АФП. Но, Вашингтон досега не презентирал докази дека жртвите биле трговци со дрога.

САД дополнително го обвинија Мадуро дека раководи со „терористички нарко картел“, што венецуелскиот претседател го негира. Од друга страна, Мадуро постојано тврди дека зголемувањето на американската војска во Карибите има за цел да го собори од власт.

Додека САД ја започнаа воената вежба „Јужно Копје“ на Карибите, на другата страна на готовс се 200.000 венецуелски војници.

The post ТРАМП СПРЕМЕН ЗА РАЗГОВОР, МАДУРО ОДГОВОРИ Карипското Море уште мириса на војна appeared first on plusinfo.mk.

Во рамки на официјалната посета на високата претставничка на ЕУ за надворешни работи и безбедносна политика, Каја Калас, денеска во Министерството за надворешни работи и надворешна трговија се одржа Првиот дијалог за безбедност и одбрана меѓу Европската Унија и Република Македонија.

Дијалогот е дел од Партнерството за безбедност и одбрана, потпишано во ноември 2024 година, и означува почеток на редовни политички и експертски консултации меѓу Скопје и Брисел.

Состанокот го отворија министерот за надворешни работи и надворешна трговија Тимчо Муцунски и високата претставничка Каја Калас, а свое обраќање имаше и министерот за одбрана Владо Мисајловски.

Министерот Муцунски нагласи дека државата останува целосно усогласена со Заедничката надворешна и безбедносна политика на ЕУ:

– Нашата 100-процентна усогласеност не е само техничка обврска, туку јасен одраз на нашата стратешка ориентација и споделени вредности. Го поддржуваме мирот во Европа и ја продолжуваме севкупната поддршка за Украина – вклучително и во воениот и одбранбениот аспект – изјави Муцунски.

Министерот за одбрана Владо Мисајловски ја истакна поддршката на ЕУ и заложбата на Македонија за одржување на стабилноста во регионот.

– Во моментов имаме најголем буџет за одбрана досега. Над 30 отсто од него се наменети за модернизација на Армијата – што директно влијае на развојот на нашите одбранбени капацитети – посочи Мисајловски.

На состанокот се разговараше и за актуелните безбедносни предизвици – со акцент на регионалната стабилност, војната во Украина, справувањето со хибридни и сајбер закани, борбата против дезинформации и улогата на жените во безбедносните процеси.

Македонската страна го изрази интересот за продлабочување на одбранбената соработка со ЕУ преку Европската агенција за одбрана (EDA), Постојаната структурална соработка (PESCO), како и преку идната Бела книга за европска одбрана.

Македонија, како земја членка на НАТО, има клучна улога во зајакнувањето на европската безбедносна архитектура, беше заклучено на првиот дијалог, кој ќе прерасне во редовен механизам за соработка во интерес на мирот, стабилноста и безбедноста на граѓаните.

The post СИЛНА ПОСВЕТЕНОСТ ЗА СТАБИЛНОСТ ВО РЕГИОНОТ Македонија и ЕУ го одржаа првиот Дијалог за безбедност и одбрана appeared first on plusinfo.mk.

-Не знам зошто има коментари дека сме биле во судир со синдикатите во однос на минималната плата. Бев многу јасна и кажав  – ќе се договорат работодавачите  и работниците колку едните можат да испорачаат, а колку другите можат да платат, а за нас ќе биде прифатливо сето тоа што ќе го договорат. Имаат дијалог меѓу себе и што ќе прифатат таму ние сме должни да го обезбедиме, а особено како Министерство за финансии, потенцира Димитриеска Кочоска во одговор на прашање по денешното потпишување Меморандум за соработка со Економскиот факултет во Скопје.

Не би дискутирала понатаму, додаде, да оставиме на дијалогот помеѓу двете страни.

-Што ќе договорат како министер за финансии ќе го почитувам – рече Димитриеска Кочоска.

The post ВЛАДАТА НЕ ГО МЕНУВА СТАВОТ ЗА МИНИМАЛНАТА ПЛАТА Остава да ја договорат синдикатите и работодавачите appeared first on plusinfo.mk.

– Ние треба како соседи да разговараме од гледна точка на духот на добрата верба, да зборуваме за прашања кои нѐ обединуваат, да престанеме да создаваме поделби и да престанеме да создаваме омраза. Логичниот и очигледниот начин како ќе се движиме напред со позитивна енергија и позитивен дух, е доколку се тргнат сите бариери коишто не содејствуваат со европските вредности. Затоа, не е прашањето дали во текот на утрешниот ден ќе се решат сите предизвици, верувам дека нема да се решат. За некои предизвици е потребно и време, потребни се разговори, потребен е дијалог, но сметам дека е можност за позитивен исчекор – изјави министерот Муцунски за МТВ.

Ова ќе биде прва средба на високи претставници на двете земји по изборот на новата Влада во Софија.

Министерот Муцунски е дел од делегацијата што ја предводи премиерот Христијан Мицкоски на Безбедносната конференција во Минхен, во чиј состав се и министерот за одбрана Владо Мисајловски, министерот за внатрешни работи Панче Тошковски и министерот за европски прашања Орхан Муртезани.

Премиерот Мицкоски денеска во Минхен се сретна со претседателот на Европскиот совет Антонио Кошта, со кого разговарале за европските интеграции, за напорите и отстапките кои беа направени на тој план, како и за потребата да се отворат вратите на ЕУ.

Како што соопштија од Владата, Мицкоски посочи дека земјава заслужува да оди напред и конечно да не биде заложник на билатерални спорови и препреки, какви имаше и во минатото многу.

The post ЗА НЕКОИ ПРЕДИЗВИЦИ Е ПОТРЕБНО ВРЕМЕ Муцунски за средбата со бугарскиот колега Георгиев appeared first on plusinfo.mk.

Министерството за надворешни работи изрази загриженост поради одлуката на властите во Република Србија да протераат македонски државјанин и да му забранат влез во земјата во период од една година. Според српските надлежни органи, лицето претставува „безбедносна закана“.

Во официјалната реакција, Министерството најави дека ќе побара објаснување за оправданоста на преземените мерки.

„Очекуваме дека преземените активности се во согласност со законските рамки на Република Србија, како и со европските и меѓународни стандарди за човекови права“, се наведува во соопштението на МНР.

Министерството исто така ја нагласи важноста од решавање на ваквите случаи преку дијалог.

„Искрено очекуваме овој случај да биде разрешен на соодветен начин, со добра волја од двете страни. Ова е од особено значење за задржување на пријателските и добрососедски односи помеѓу Македонија и Србија“, изјавија од Министерството за надворешни работи.

МНР посочи дека ќе продолжи да ја следи ситуацијата и да ги користи сите дипломатски канали за да обезбеди заштита на правата на македонските државјани.

Пред два дена Србија протера петмина хрватски државјани, а во групата протерани од Србија беше и Искра Росо, македонска државјанка, извршна директорка на здружението на граѓани Солем. Таа учествуваше на едукацијата на Ерсте фондацијата во Белград, а хрватските државјани присутни на оваа едукација, заедно со други учесници, беа протерани од Србија.

Искра Росо за Радио слободна Европа (РСЕ) вели дека добила забрана за влез во Србија за една година како дел од мерките за „заштита на безбедноста на Република Србија, со кои е утврдено дека престојот на именуваната државјанка на Северна Македонија претставува неприфатлив безбедносен ризик во Република Србија“.

Русо вчера поднела барање во македонското Министерство за надворешни работи (МНР) во кое бара објаснување од српските власти за причините за протерувањето. Од македонското МНР најавија дека ќе излезат со реакција во текот на денот.

Загреб веќе испрати протестна нота до Белград и им препорача на своите граѓани да ги одложат патувањата во Србија.

The post МАКЕДОНКА ПРОТЕРАНА ОД СРБИЈА, МНР БАРА ОБЈАСНУВАЊЕ Србите велат дека се работи за безбедносна закана appeared first on plusinfo.mk.

„Темата на овој дијалог е ‘Модернизацијата на НР Кина и новите перспективи и можности за соработка со земјите од Централна и Источна Европа: Придонесот на политичките партии’. Во рамки на првата сесија на Дијалогот, која се одржа вчера, како претставник на Левица, единствена партија од Република Македонија, се обрати Потпретседателот на партијата и пратеник во Собранието на РМ, Реџеп Исмаил. Исмаил, истакнувајќи ја важноста на соработката со НР Кина за целиот регион, подвлече дека искуството и модернизацијата на НР Кина е пример за успешноста на социјализмот наспроти либералниот капитализам кој ги разори поранешните социјалистичките земји од Источна и Централна Европа. Развојот на НР Кина е сведоштво и доказ за правилните одлуки на КПК, додека пак социјализмот со домашни карактеристики, како идеен темел, претставува светлост кон патот до праведно општество. Во своето излагање Исмаил се осврна на важноста на соработката со НР Кина на земјите од нашиот регион, идентификувајќи три предности во рамките и можностите на оваа соработа:
Политичка предност од соработката со НР Кина, поради принципите на заедничка корист, подеднаков, фер третман и целосна почит кон суверенитетот, кои ја карактеризираат соработката на НР Кина со другите земји.
Економската и финансиска предност поради веќе докажаната стабилна и просперитетна економија на НР Кина која е во корист на својот народ, но и другите околу него“, наведено е во соопштението.

И третата предност од соработката, посочено е таму, Исмаил ја идентификува во географската положба на регионот како мост на трговијата помеѓу целиот европски континент и НР Кина – со што на целиот регион му дава можност да ја зацврсти својата положба во меѓународните односи и да обезбеди благосостојба за своите граѓани.

„Крајно, земајќи ја предвид економската криза која се наговестува во ЕУ, логично е НР Кина да се наметне и да претставува важен партнер на Европа во развивањето на економијата и создавање на позитивни последици за сите земји на ЕУ, како и останати земји на континентот“, се вели во соопштението на Левица.

The post 📷 „ЛОГИЧНО Е КИНА ДА СЕ НАМЕТНЕ КАКО ВАЖЕН ПАРТНЕР НА ЕВРОПА“ Левица на гости кај Комунистичката партија во Пекинг appeared first on plusinfo.mk.

Српскиот вицепремиер и министер за внатрешни работи, Ивица Дачиќ, денеска изрази уверување дека посетата на српскиот претседател Александар Вучиќ на Њујорк, каде што ќе учествува на 79. седница на Генералното собрание на Обединетите нации и ќе се сретне со повеќе од 40 светски лидери, ќе биде многу успешна, пренесува српски РТВ.

– Генералното собрание на ОН е извонредна можност бидејќи на седницата доаѓаат сите, шефови на држави или влади на сите земји. Тоа е место каде што можете да остварите голем број контакти и затоа мислам дека оваа година ќе бидеме многу успешни за неа и за Србија, особено затоа што создадовме голем број на добри лични односи меѓу раководството на Србија, претседателот на Србија и лидерите на тие земји – рече Дачиќ.

Тој нагласи дека кога станува збор за Косово, главниот проблем е што „некој постојано вели дека Бриселскиот договор е проблемот“, а „проблемот не е Бриселскиот договор, туку неговото неспроведување“.

– Договорот од Брисел е направен, не падна од небо. Тоа беше последица на тоа што Генералното собрание на ОН донесе одлука дијалогот да се префрли во Брисел, а во него не учествуваше Вучиќ, туку Борис Тадиќ и Вук Јеремиќ – изјави министерот Дачиќ и потсети дека тогаш имало и дијалог на пониско ниво предводен од Борко Стефановиќ.

Како што нагласи, ни беше суштински важно Србите да имаат своја организација на Косово и врз основа на тоа од Заедницата на српските општини да произлезе српската полиција, српските обвинители, српските судии и сѐ друго.

Дачиќ потсети дека за бриселскиот договор гарантирале Кетрин Ештон, Медлин Олбрајт и Хилари Клинтон.

Според Дачиќ, со заминувањето на поранешната висока претставничка на Европската Унија за надворешни работи, Кетрин Ештон, со чие посредство Белград и Приштина го постигнаа првиот договор во Брисел, работите се променија со промената на администрацијата на ЕУ, што се покажа со недостигот на кредибилитет на меѓународната заедница и со толеранцијата на потезите на Приштина.

Министерот вели дека сега имаме 2 опции – да одиме во војна или да ги решаваме работите дипломатски и политички.

Србија е подготвена да реагира на секој начин за да ги заштити животите на своите граѓани и на својот народ на Косово, „само тоа не би било добро за никого“, рече Дачиќ.

– Сега ситуацијата се смени, знаете како се промени, сега сѐ што зборуваат западните земји е повторување на она што го кажа Вучиќ. За првпат се случи Америка и ЕУ и Русија и Кина да ги поддржат мерките на Вучиќ , односно она што го кажа за Косово и Метохија – рече Дачиќ.

На изјавата на новинарот дека Аљбин Курти рекол дека Србија профитира поради стравот на Западот дека целосно ќе оди на руска страна, Дачиќ вели дека Курти има своја агенда која гласи: „Ќе отворам уште еден мост на Ибар и сигурно ќе имам 50% на избори“.

На прашањето дали ќе се отвори мостот на Ибар во Косовска Митровица, Дачиќ одговори дека „целата меѓународна заедница вели дека нема“ и дека „мора да им веруваме“.

– Но, не сум сигурен дека целосно им веруваме. Дали се искрени во сето ова или сепак ќе го пуштат мостот и ќе кажат дека им е жал што се случило – рече тој и нагласи дека српските власти постојано кажуваат дека тоа што Србија е за дијалог е одраз на нивната сила и верба во дијалогот, а не на слабост.

The post СРБИЈА Е СПРЕМНА НА СЀ ЗА ДА ГИ ЗАШТИТИ СРБИТЕ ВО КОСОВО, НО ТОА НЕ Е ДОБРО ЗА НИКОГО Америка, ЕУ, Русија и Кина ги поддржаа мерките на Вучиќ за Приштина, изјави Дачиќ appeared first on plusinfo.mk.