Алтернатива за Германија (АФД) достигна највисока поддршка откако постои, покажува најновата анкета на ARD-DeutschlandTrend. Според истражувањето, за АФД би гласале 28 проценти од испитаниците, што е рекорд за партијата и 1 процентен поен повеќе од претходниот месец. Во исто време, демохристијанскиот блок ЦДУ/ЦСУ на канцеларот Фридрих Мерц падна на 21 процент, што е негов најнизок рејтинг во ова истражување и разлика од 7 процентни поени зад АФД.

Добрата вест за Мерц, ако воопшто нешто има добро во овие бројки, е дека редовниот термин за следните парламентарни избори во Германија е почетокот на 2029 година. Но, да не заборавиме дека изборите во 2025 година беа предвремени, бидејќи коалицијата на Олаф Шолц се распадна. Новиот Бундестаг се конституираше на 25 март 2025 година. Според германскиот Устав, редовните избори мора да се одржат 46 до 48 месеци по конституирањето на парламентот. Но, аналитичарите го поставуваат и прашањето до кога ќе издржи коалицијата предводена од Мерц, во услови на стромглаво паѓање на нејзиниот рејтинг.

Владејачкиот блок паѓа, а паѓаат и социјалдемократите, Зелените, Левица и другите  

Резултатите се објавени во време кога владата на Фридрих Мерц се обидува да ја стабилизира поддршката по неодамнешната реконструкција на кабинетот. Наместо закрепнување, истражувањето покажува продолжување на падот на довербата во владејачкиот блок.

Анкетата покажува дека Социјалдемократската партија (СПД) останува далеку зад двете најсилни политички сили, додека Зелените, Левица и останатите партии не бележат промени што би можеле значително да ја изменат рамнотежата на политичката сцена. Со тоа, Германија влегува во период во кој најголемата опозициска партија, АФД, дополнително ја зацврстува својата позиција.

Политичките аналитичари предупредуваат дека анкетите не се изборни резултати, но истовремено укажуваат дека ваквите бројки можат силно да влијаат врз однесувањето на партиите и врз јавната дебата. Во Германија веќе подолго време се водат расправи за тоа како останатите партии треба да одговорат на растечката поддршка за АФД.

До кога ќе трае „ветото“ за соработка со АФД?

Едно од прашањата што повторно се отвора е дали дел од покраинските организации на ЦДУ треба да ја преиспитаат досегашната политика на целосно исклучување на каква било соработка со АФД. Засега официјалниот став на демохристијаните останува непроменет, но ваквите анкети неизбежно ги засилуваат внатрепартиските дебати.

Истражувањето покажува дека безбедноста, миграцијата и економската состојба остануваат меѓу темите што најмногу ги загрижуваат германските граѓани. Истовремено, повеќе од половина од анкетираните сметаат дека се потребни суштински политички промени во земјата.

За германската политика ова значи дека притисокот врз владината коалиција дополнително ќе расте. Доколку ваквиот тренд продолжи и во следните месеци, владејачките партии ќе бидат принудени да бараат поубедливи одговори на прашањата што најмногу ги засегаат гласачите, особено во економијата и миграциската политика.

Политичката сцена во Германија драматично се менува

Од друга страна, високата поддршка за АФД не значи автоматски дека партијата би можела да формира влада. Германскиот политички систем се темели на коалиции, а повеќето парламентарни партии и натаму исклучуваат можност за коалицирање со АФД. Затоа, евентуалното претворање на анкетната предност во извршна власт останува неизвесно.

Најновиот DeutschlandTrend, сепак, покажува дека политичката сцена во Германија продолжува да се менува. Ако сегашниот тренд потрае, земјата би можела да се соочи со една од најнеизвесните политички пресметки во последните години, во која распределбата на силите ќе биде многу поинаква од онаа што доминираше во изминатите децении.

The post ВО ГЕРМАНИЈА СЕ СПРЕМА ПОЛИТИЧКИ ЗЕМЈОТРЕС Стасаа најновите анкети, АФД растура! appeared first on plusinfo.mk.