Нова детска градинка почнува да се гради во населбата Дексион, општина Ѓорче Петров. Како што појаснија надлежните, предвидено е да се состои од приземје плус еден кат. Вкупната бруто површина на објектот изнесува 1.030 квадратни метри. Капацитетот е 6 групи на деца во различни возрасни категории. Рокот за завршување е 2 години од денот на воведување во работа.

Инвеститор е Општина Ѓорче Петров, изведувач „Вардарградба“ – ДОО, село Трубарево – Скопје, а надзор – „Диви Македонија“ – ДОО -Скопје. Вредноста изнесува 81.964.479 денари (1,3 милиони евра) – со ДДВ.

На официјалното започнување на градбата на градинката присуствуваа премиерот Христијан Мицкоски, заменик министерот за социјална политика, демографија и млади Ѓоко Велковски, градоначалникот на општина Ѓорче Петров, Александар Стојкоски и пратеникот Бојан Стојаноски.

-Неколку градинки одеднаш се градат овде и убеден сум дека за многу кусо време од денеска, листата на чекање веќе нема да биде листа на чекање, туку секое дете коешто ќе сака да оди во градинка, односно ќе има потреба од сместувачки капацитет, ќе го има истиот – подвлече Мицкоски, додавајќи дека тоа е во насока на просемејните политики на оваа Влада.

Со отворањето на оваа градинка, како што потенцираа надлежните, се очекува да се создадат нови 102 места за деца, што директно влијае на намалување на листите на чекање, да се подобри квалитетот на услугите за ран детски развој, да се отвори можност за вработување на повеќе воспитувачи, негуватели и стручни лица, да се подобрат условите за работа на постојните градинки преку растоварување на капацитетите, да се зголеми достапноста на предучилишните услуги за младите семејства во Дексион и околните населби.

The post СЕ ГРАДИ НОВА ДЕТСКА ГРАДИНКА ВО ЃОРЧЕ ПЕТРОВ Ќе може да згрижи 102 деца appeared first on plusinfo.mk.

Градоначалникот на Општина Бутел, Дарко Костовски, изрази револт поради обидот две лица да ја оштетат новата детска градинка во населбата Бутел 1. Тие беа фатени на дело додека со бонсек се обидувале да исечат дел од новата ограда пред влезот на градинката.

– Каков е тој порив кој те тера да оштетиш нова детска градинка!? До каде може да оди човечкиот памет!? – праша градоначалникот Костовски.

Според него, можно е овие лица да се исти кои претходно направиле голема штета на истата градинка. Полицијата веќе работи на расветлување на случајот, а градоначалникот ја пофали брзата и ефикасна реакција на новиот командир на Полициската станица.

– Апелирам до сите граѓани да го чуваме тоа што се гради. Општина Бутел се менува и напредува, затоа не треба да уништуваме нешто што треба да го оставиме на нашите деца – порача Костовски.

The post НОВА ГРАДИНКА НА МЕТА НА ВАНДАЛИ ВО БУТЕЛ Фатени додека се обидувале да ја сечат оградата со бонсек appeared first on plusinfo.mk.

Вандализирана новоизградена детска градинка во Бутел. Во септември требало да ги прими првите дечиња. Каков одговор треба да очекуваме од надлежните?

Под итно, откривање на сторителите.

Во изминатите неколку месеци во САД, заради нивни домашни причини, се рашири појава на вандализирање автомобили „Тесла“ од производителот чиј сопственик е Илон Маск. На седницата на Кабинетот на претседателот Трамп што се одржа вчера, 10 април, ваквата појава беше окарактеризирана како „домашен тероризам“. За сторителите следат затворски казни од најмалку 20 години.

Што ни се случува нам? Ја плаќаме ли цената за тоа што сè уште не сме слушнале за некаква разврска за вандализирањето на детско игралиште во општина Центар минатото лето? Дали е преземено нешто против вандалите и ако станува збор за малолетници, против нивните родители?

И да, кога САД, симболот на демократијата, може вандализирањето автомобили да го окарактеризира како тешко кривично дело „домашен тероризам“, можеме и ние да ја користиме истата квалификација за уништување на објекти наменети за подигнување на здраво потомство.

The post Домашен тероризам appeared first on plusinfo.mk.

Општина Ѓорче Петров и Министерството за социјална политика демографија и млади потпишале договор за изградба на нова детска градинка за 120 деца, објави на Фејсбук градоначалникот Александар Стојкоски.

Објектот на површина од 900 метри квадратни ќе чини 82 милион денари.

Во тек е изградбата и на градинката во населено место Стопански двор, а наскоро почнуваме  процесот за апликација за нова градинка во Александрија.

The post ЌЕ СЕ ГРАДИ НОВА ДЕТСКА ГРАДИНКА ВО ДЕКСИОН Катче за згрижување на 120 деца appeared first on plusinfo.mk.

Секогаш кога ќе се почнуваат вака убави работи за мене претставува тоа посебен ден и посебен момент и чест да бидам дел од сето тоа. Овде во Општина Ѓорче Петров веќе во неколку наврати во последниве недели отпочнуваме вакви активност, капитални објекти, како што и оваа детска градинка. Тука нема да се застане, ќе се продолжи во периодот којшто следи.

Вака премиерот Христијан Мицкоски го започна денешното обраќање во населбата Стопански двор во Ѓорче Петров, каде што започна изградба на нова детска градинка.

– Дозволете ми оваа прилика да ја искористам да му честитам на градоначалникот, на советниците коишто ја подржуваат работата на градоначалникот, се разбира администрацијата во општината без која можеби и сето ова и не би било така како што е сега, бидејќи тоа и многу важно во овој процес. Исто така би сакал да им честитам на пратениците коишто доаѓаат од Општина Ѓорче Петров, на членовите на Владата коишто овозможуваат овие проекти заедно со општината да бидат реалност. И се разбира да им посакам на граѓаните уште еден ваков набргу објект овдека да никне, да има повеќе дечиња и да можеме да се радуваме на повеќе вакви објекти, на повеќе дечиња да ги користат тие објекти. Така што еве навистина посебен момент и нека и за дарлија и нека има што е можно повеќе вакви објекти. А за техничките детали не би зборувал, тоа го кажа веќе градоначалникот за да не се повторуваме. Нека има што повеќе дечиња, нека има што повеќе вакви објекти, ние како Влада ќе работиме да овие објекти станат реалност – истакна Мицкоски.

The post 📷 УДРЕНИ ТЕМЕЛИТЕ НА НОВАТА ДЕТСКА ГРАДИНКА ВО СТОПАНСКИ ДВОР Еве како ќе изгледа објектот appeared first on plusinfo.mk.

Одделот за криминалистичка полиција презеде предистражни дејствија и во координација со СВР Скопје – Единица за економски и компјутерски криминал до ОЈО Скопје поднесе кривична пријава против М.Р., директорка на детска градинка во скопска општина  и против поранешен градоначалник на една скопска општина за кривично дело „злоупотреба на службената положба и овластувањата” од чл.353 од КЗ.

„Првопријавената М. Р., како директорка на детска градинка на 12. декември 2021, по објавен оглас за јавна набавка на стоки – електрична опрема за детска градинка – две машини за перење на алишта, со пречекорување на своите службени овластувања, знаејќи дека максималниот износ на набавката требало да биде во вредност од 1.300.000,00 денари без ДДВ, кои средства требало да бидат обезбедени од сопствената сметка на договорниот орган, како најповолен понудувач  избрала правно лице од  Скопје, иако понудило цена во износ од 1.329.800,00 денари без ДДВ. За што донела и Одлука за обезбедување на дополнителни средства и изменување на одлуката за јавната набавка, со кое склучила Договор за јавна набавка на вкупен износ од 1.569.164,00 денари со вклучен ДДВ, иако од истото правно лице не била доставена банкарска гаранција со самото склучување на договорот во износ од 156.916,00 денари. Добавувачот исто така не го испочитувал рокот за достава и набавените машини и наместо за 15 дена ги доставил со задоцнување од околу 150 дена од склучувањето на договорот. Првопријавената М.Р. со неизвршување на своите службени овластувања, наместо да го раскине склучениот договор со избраниот понудувач, да активира негативна референца во е-системот на Бирото за јавни набавки и да поведе постапка за наплата на договорената казна во износ од 81.596,00 денари, таа не го направила тоа“ – стои во известувањето од МВР.

The post ПОРАНЕШЕН ГРАДОНАЧАЛНИК НА СКОПСКА ОПШТИНА ОБВИНЕТ ЗА ЗЛОУПОТРЕБА НА СЛУЖБЕНА ПОЛОЖБА Кривична пријава доби и директорка на детска градинка во Скопје appeared first on plusinfo.mk.

Основното јавно обвинителство Скопје донесе Наредба за спроведување истражна постапка против 32-годишна негувателка во детска градинка за која постои основано сомнение дека сторила продолжено кривично дело – Запуштање и малтретирање на дете од член 201 став 1 во врска со член 45 од Кривичниот законик.

„Во временскиот период од 2022-2023 година, осомничената вработена во детска градинка во Радишани во повеќе наврати извршила психичко и физичко насилство спрема оштетено тригодишно дете кое ја посетувало јаслената група во градинката. На детето му се обраќала со погрдни зборови, го влечела и тегнела за коса, па тоа претрпело силен страв и стрес, што резултирало со губење на говор и страв од одење во градинка. Јавниот обвинител до судијата на претходна постапка од Основниот кривичен суд Скопје достави предлог за определување повеќе мерки на претпазливост кон осомниченото лице: забрана за напуштање на живеалиштето, односно престојувалиштето, обврска осомничената да се јавува повремено на определено службено лице или кај надлежен државен орган, привремено одземање на патна или друга исправа за преминување на државната граница, односно забрана за нејзино издавање, забрана за посетување на детската градинка и сите објекти кои се дел од истата детска градинка, забрана за приближување или воспоставување, односно одржување на контакти или врски со со оштетеното дете, со неговите родители и со сведоците, како и забрана за преземање на определени работни активности кои се поврзани со кривичното дело, односно оддалечување од работното место“, соопшти Јавното обвинителство.

The post 3-ГОДИШНО ДЕВОЈЧЕ ПРЕЖИВУВАЛО ХОРОР ВО ГРАДИНКАТА ВО РАДИШАНИ Лошата негувателка е под истрага appeared first on plusinfo.mk.

38-годишна негователка во детска градинка во Велес на децата им давала да користат електрична цигара. По пријавата на случајот против негователката е поднесена кривична пријава.

„Отсекот за економски криминал при СВР Велес поднесе кривична пријава против В.И.(38) од Велес поради постоење основи на сомнение за сторено кривично дело „несовесно работење” казниво по член 353 од Кривичниот законик. Пријавената, вработена како негувателка во детска градинка во Велес, овозможила на деца од градинката да користат електронска цигара“ – информираат од МВР.

The post НА ДЕЦА ВО ГРАДИНКА ИМ ДАВАЛА ЕЛЕКТРОНСКА ЦИГАРА Негователка од Велес доби кривична пријава appeared first on plusinfo.mk.

Ова, во утринското гостување на Сител ТВ, го истакна градоначалникот Муцунски. Тој објасни дека Општина Аеродром потрошила скоро една година за изработка на проекти за новите училишта и детски градинки и за подготовка на документацијата на „Зелената обврзница“, која повеќе од четири месеци, од политички причини, чека да дојде на ред за да биде разгледана и одобрена на седница на владата.

– Проектите се изработени и детските градинки и училишта може уште утре да почнат да се градат и тоа го направивме со сопствени средства, исто како што враќањето на средствата за зелената обврзница, инструмент што се користи насекаде низ светот, ќе биде направено со средства на Општина Аеродром, информираше Муцунски и додаде дека според информациите со кои тој располага, поради притисок од министрите на ДУИ, премиерот Ковачевски добил насока да се блокираат сите проекти во Општина Аеродром.

Изградбата на детска градинка на земјиште кое според Деталниот урбанистички план е превидена изградба на објекти од таков тип, преставувало ризик на националната безбедност на државата?! Тоа е образложението со кое општината добила негативно мислење од Агенцијата за разузнавање, институција која е во надлежност на претседателот Стево Пендаровски, за изградба на нова детска градинка во Аеродром.

– Како е можно четиригодишните дечиња со фудбалската топка и нивните родители можат да бидат безбедносен ризик за државата, а високите кули како „Џеваир” и другите околни згради, да не се безбедносен ризик за државата? – праша Муцунски и нагласил дека за истата локација и за истиот објект, претходно Министерството за одбрана веќе дало позитивно мислење.
Градоначалникот Муцунски потенцираше дека овие проекти со сигурност ќе бидат започнати и завршени по доаѓањето на ВМРО ДПМНЕ на власт, но тоа ќе биде со една година задоцнување и истакна дека во меѓувреме вината за недостатокот на места во детските градинки треба да се бараат во владата и политичките партии кои се дел од истата.

И покрај сите пречки со кој се соочува општината, активно се работи на решавање на проблемите со сместувањето на дечињата во Аеродром, а за тоа говори и градинката која се отвори минатата со капацитет од 200 дечиња и реконструкцијата на неколку градинки во текот на оваа година.

– Ние работиме за тие што гласале за нас, за тие што гласале за противникот и за тие што воопшто не гласале и сето тоа што ние сме го ветиле ќе го реализираме. Но, срамно е поради политички теми да се прави блокада на жителите, бидејќи избрале градоначалник од политичката партија која не е на власт –  истакна Муцунски.

The post НОВАТА ДЕТСКА ГРАДИНКА ВО АЕРОДРОМ БИЛА РИЗИК ЗА НАЦИОНАЛНАТА БЕЗБЕДНОСТ?! Еве како ДУИ и министрите од власта ги кочат развојните проекти во општина Аеродром appeared first on plusinfo.mk.

Директорката на градинката, Соња Јанчевска, во разговор за Плусинфо тврди дека се многу мали шансите децата да се заразиле со вирусот за време на нивниот престој во градинката, оти, како што објаснува таа, симптомите ги добиле за време на викендот, а не во текот на работната недела.

– Имаме само едно дете кое е заразено со коксаки вирусот и кое поседува соодветен документ дека е заразено. Сите останати деца се повлечени од градинката по барање на родителите. Од друга страна, симптомите на вирусот им се појавиле за време на викендот, а не во периодот додека децата биле во градинка. Родителите си ги носат своите деца на игралишта, на роденденски забави во игротеки и на разни други места, а не само во градинка. Колкава е веројатноста коксаки вирус да се шири во детска градинка? Во секој случај, ние веднаш направивме целосна дезинфекција на целиот објект. Ја дезинфициравме целата постелнина, креветчињата, играчките и сите други предмети – вели Јанчевска.

Во објавата на Слободен печат, родител на дете заразено со вирусот коксаки се жали на хигиената во градинката.

– Првите симптоми се појавија минатата недела и скоро сите мислевме дека е алергија. Моето дете се разболе во петокот. Детето се исфрли по телото со красти по нозете и на рацете. Матичната лекарка потврди дека се работи за коксаки и сите родители во групата беа известени. Нема никаква хигиена во градинката – обвинува мајката на детето.

Од Државниот санитарен и здравствен инспекторат, пак, информираат дека вчера бил извршен редовен инспекциски надзор во оваа градинка, при што е констатирано дека санитарно-хигиенската состојба во градинката е на солидно ниво, спроведени се мерки за дезинфекција, дезинсекција и дератизација, како и здравствено-санитарни прегледи за вработените, согласно законските рокови.

– Известен е и Центарот за јавно здравје-Скопје, кој ја следи состојбата во градинката и во текот на вчерашниот ден во просториите кои ги користи оваа група, извршено е вонредно механичко чистење по кое е спроведена дезинфекција на просторот и опремата. ЦЈЗ Скопје и ДСЗИ ја следат состојбата и доколку има потреба ќе се преземаат и дополнителни мерки – одговорија за Плусинфо од Министерството за здравство.

Комисијата за заразни болести сѐ уште не е запознаена со случајот, но како што ни изјави портпаролот д-р Злате Мехмедовиќ, појавата на коксаки вирусот во детските градинки воопшто не е невообичаена работа.

– Немаме информација дека постои поголема група бебиња којашто е заразена со коксаки вирусот, но секако дека веднаш ќе стапиме во контакт со Институтот за јавно здравје. Но, од тоа што го знаеме од минатото, коксаки вирусот е вообичаена појава во детските градинки и тој вирус отсекогаш се ширел помеѓу најмладите. Не би можел да кажам колку е опасен вирусот, но за секое инфективно заболување, пријавите пристигнуваат во Институтот за јавно здравје. Ќе ги провериме информациите и ќе ја известиме јавноста – изјави д-р Мехмедовиќ.

И епидемиологот Александар Стојанов објаснува дека коксаки вирусот најчесто ги напаѓа послабите организми, односно бебињата, но, како што потенцира, тој вирус не се смета за животозагрозувачки.

Брзо се шири од човек на човек, но не се смета за опасен вирус.

Д-р Александар Стојанов Епидемиолог

– Нема место за паника. Коксаки вирусот најчесто се пренесува преку воздух, преку допир со фецес, преку кашлање и преку кивање, а и преку храна. Неговата појава е честа особено во овој период на годината. Брзо се шири од човек на човек, но не се смета за опасен вирус. Тој најчесто ги напаѓа послабите организми, особено бебињата. Во поглед на лекувањето, тоа зависи од случај до случај. Постои симптоматска терапија, а не постои специфична терапија за лекување од вирус. Заразените најчесто креваат температура и им се појавува осип на кожата, а инфектолозите точно знаат каква терапија да припишат според симптомите – ни изјави д-р Стојанов.

The post КОКСАКИ ВИРУСОТ РАСПЛАКА 25 БЕБИЊА ВО ГРАДИНКА ВО ВЛАЕ Директорката на „Пролет“ не верува дека градинката е извор на заразата appeared first on plusinfo.mk.