Студентите во Албанија најавија промена на стратегијата на протестите по повеќе од 150 дена демонстрации. Отсега ќе организираат два национални протеста неделно – секоја среда и сабота, со почеток во 14 часот.

Студентското движење соопшти дека првиот протест според новиот распоред ќе се одржи в сабота, на 7 ноември, пред Министерството за образование, пренесува „Euronews Albania“.

Организаторите наведуваат дека повеќемесечните протести сè уште не донеле одговор од властите на нивното главно барање – оставка од албанскиот премиер Еди Рама.

„По повеќе од 150 дена непрекинати протести, власта во Албанија и понатаму го игнорира барањето на граѓанскиот бунт – оставка од премиерот Еди Рама“, се наведува во соопштението.

Студентите оценуваат дека политичката ситуација во земјата е обележана со автократско владеење и порачуваат дека се подготвени за долготрајна борба.

Како што истакнуваат, промената на стратегијата има цел да ја зајакне студентската мрежа и да ги мобилизира граѓаните, со цел протестите да имаат посилно и поконтинуирано влијание.

Во соопштението наведуваат и дека ќе продолжат да ги поддржуваат сите други граѓански протести против владата, без оглед на датумот на нивното одржување. Студентите порачуваат дека борбата за демократија во Албанија продолжува и дека нема да се откажат од своите барања.

„Борбата на Албанците за демократија продолжува. Автократијата ќе падне, исто како што падна и диктатурата“, порачаа организаторите на студентските протести.

The post 150 ДЕНА ПРОТЕСТИ, РАМА И ПОНАТАМУ МОЛЧИ Студентите ја менуваат стратегијата и најавуваат нови собири appeared first on plusinfo.mk.