Потпишан е Колективниот договор за вработените во јавните установи за социјална заштита од страна на министерот за социјална политика, демографија и млади, Фатмир Лимани, и Синдикатот на работниците од управата, правосудните органи и здруженијата на граѓани на Република Македонија (УПОЗ), претставуван од претседателот Трпе Деаноски, како и Самостојниот синдикат за образование, наука и култура (СОНК), претставуван од претседателот Јаким Неделков.

Со овој Колективен договор се овозможува зголемување на платите за 20% за сите вработени, вклучително и за директорите на јавните установи за социјална заштита.

Покрај финансиските бенефиции, договорот ги унапредува и правата од работен однос, ги засилува механизмите за заштита на работниците и го продлабочува социјалниот дијалог меѓу Владата и синдикатите.

– Ова е признание за трудот, посветеноста и хуманата мисија на сите вработени во системот на социјална заштита. Верувам дека со подобри услови за работа, ќе обезбедиме и подобри услуги за граѓаните – истакна министерот Лимани по денешното потпишување на Колективниот договор.

The post ЗА 20% ЌЕ СЕ ПОКАЧАТ ПЛАТИТЕ ВО ИНСТИТУЦИИТЕ ЗА СОЦИЈАЛНА ЗАШТИТА Се потпиша нов Колективен договор appeared first on plusinfo.mk.

Околу 12 илјади граѓани нема повеќе да чекаат потврда за ослободување од партиципација преку поврзување на системите на социјална и здравствена заштита. Министерството за социјална политика, демографија и млади ја известува јавноста дека граѓаните – корисници на права од системот на социјална заштита кои се ослободени од партиципација за користење на здравствена заштита, можат непречено да ги остваруваат своите права без притоа тоа да го докажуваат со потврда од Центарот за социјална работа.

Досегашните административни бариери се веќе надминати, преку поврзување на системите на социјална и здравствена заштита односно Министерството за социјална политика, демографија и млади во соработка со Фондот за здравствено осигурување и тоа за вкупно 11.943 корисници на права од системот на социјална заштита.

Како што соопшти МСПДМ, во оваа група спаѓаат осигурените лица со попреченост, според прописите за детска заштита и социјална заштита, корисниците на гарантирана минимална помош, кои се лица неспособни за работа и корисници на вон-семејна заштита, според прописите за социјална заштита, корисници на надоместок за помош и нега од друго лице кои не се по друга основа здравствено осигурени, корисници на право на социјална сигурност на стари лица и корисници на право на посебен додаток.

The post 12.000 ГРАЃАНИ ЌЕ ЗДИВНАТ Нема веќе да се чека потврда за ослободување од партиципација appeared first on plusinfo.mk.

„Земајќи ја предвид сензитивноста на работните задачи на вработените во центрите за социјална работа кои се секојдневно изложени на ризик по сопственото здравје и живот, а во насока на нивна заштита Министерството и пред да се случи немилиот настан во Центарот за социјални работи Прилеп, ја започна постапката за физичко обезбедување на сите центри и јавни установи за социјална заштита на ниво на држава. Оваа постапка е во завршна фаза, што значи дека наскоро ќе биде објавен и јавниот оглас за јавна набавка“, соопшти Министерството.

Оттаму апелираат до сите институции навремено и ефикасно да преземаат дејствија кои се во рамки на нивните надлежности, а во насока на обезбедување на безбедност и сигурност на работните места на сите вработени.

Министерството изразува жалење за немилиот настан во Центарот за социјални работи во Прилеп и на повредената вработена ѝ посакува брзо закрепнување.

Во понеделникот, избеган штитеник од психијатриската болница во Демир Хисар пукаше во вработена во Центарот за социјални работи во Прилеп и ја рани.

ПУКАНО ВО ВРАБОТЕНА ВО ЦЕНТАР ЗА СОЦИЈАЛНИ РАБОТИ ВО ПРИЛЕП Напаѓачот ја демнел подолго време

НАПАЃАЧОТ ВО ПРИЛЕП МУ ВПЕРИЛ ПИШТОЛ И НА ДИРЕКТОРОТ Никој не ги известил за неговото бегство од психијатриската болница

The post ЦЕНТРИТЕ ЗА СОЦИЈАЛНА РАБОТА ЌЕ ДОБИЈАТ ОБЕЗБЕДУВАЊЕ Наскоро ќе се објави јавен оглас appeared first on plusinfo.mk.

Фатмир Лимани денеска ја презеде функцијата министер за социјална политика, демографија и млади од Фљакрон Беџети, државниот секретар во Министерството за труд и социјална политика кое со реорганизацијата на државната управа е преименувано во Министерство за социјална политика, демографија и млади. Од поранешното Министерство за труд и социјална политика, надлежностите за труд ги доби Министерството за економија.

Лимани во новата Влада влегува како кадар од Движењето Беса, кое е дел од коалицијата „Вреди“.

Фатмир Лимани е роден во Кичево на 14 јануари 1973 година, со моментално живеалиште во Општина Петровец, Скопје. Дипломирал на Филозофскиот факултет во Универзитетот во Тетово, каде се стекнал со звање дипломиран професор по историја. Неговото работно искуство почнува во 2005 година, како управител на бензиската пумпа „Голден оил“ во Кичево, по што во 2007 година станува претседател на Движењето „НДРИШЕ“, како и член на Надзорниот одбор на АД „МЕПСО“. Во 2011 година, Лимани станува заменик генерален директор и член на Управниот одбор на АД „ЕСМ“, каде поминува десет години. Лимани беше независен кандидат за градоначалник на Општина Кичево во 2021 година, додека во 2022 стана потпретседател на Движењето „Беса“. Во 2024 година добива мандат за пратеник во Собранието на Република Северна Македонија од редовите на Движењето „Беса“.

Во биографијата приложена до Собранието стои дека мајчин јазик на Лимани е албанскиот, додека има познавање од македонскиот, англискиот и германскиот јазик. Како што е наведено, тој поседува компјутерски вештини од „Microsoft Оffice – Word“, „Excel“, „Power Point“, „Internet Explorer“, „Windows“, „Outlook Express“ и други.

The post ЛИМАНИ ЌЕ ГО ВОДИ НОВОТО МИНИСТЕРСТВО ЗА МЛАДИ Ќе биде одговорен и за социјална политика и за демографија appeared first on plusinfo.mk.