Со еден договор што Доналд Трамп го нарече „најголемата нафтена зделка во историјата”, САД обезбедија долгорочна контрола врз експлоатацијата на 65 милијарди барели венецуелска нафта. Енергетскиот пакт меѓу Вашингтон и Каракас ќе важи 25 години и треба да им обезбеди на американските компании пристап до најбогатите нафтени резерви на планетата.

Договорот предвидува формирање нова компанија во која американската страна, според досега објавените информации, ќе има мнозинска оперативна контрола. Таа ќе развива 17 постојни нафтени полиња со проценет потенцијал од 65 милијарди барели, а поширокиот план опфаќа и осум нови блокови на кои допрва треба да почнат истражувања и експлоатација. Се очекува дополнителните договори со приватните оператори, меѓу кои и „Шеврон”, да бидат потпишани наскоро.

Привремената претседателка на Венецуела, Делси Родригез, тврди дека државата ја задржува сопственоста врз природните богатства и целосниот суверенитет врз нафтата. Но, Трамп го опиша договорот со многу поинаков речник: САД обезбедиле мнозинска контрола врз 65 милијарди барели, без трошок за американските даночни обврзници. Правно, нафтата останува венецуелска, но економски и оперативно, нејзината експлоатација во значителна мера преминува во американски раце.

Стратешка инвестиција на САД

За САД ова е многу повеќе од обична инвестиција во странски нафтени полиња. Американската страна ќе може да ја купува произведената нафта по производствена цена и да ја користи за домашните рафинерии, за обновување на Стратегиските нафтени резерви и за потребите на војската. Нафтата од Венецуела е тешка и кисела, токму од типот за кој се приспособени големите рафинерии на американскиот брег на Мексиканскиот Залив.

Венецуела располага со над 300 милијарди барели докажани резерви, односно со приближно 17 проценти од светските резерви. Сепак, денес произведува само околу 1,25 милиони барели дневно, драматично под својот потенцијал. Причините се повеќедецениското недоволно инвестирање, лошото управување со државната компанија ПДВСА, заминувањето на стручните кадри, распадот на инфраструктурата и американските санкции.

Обновувањето на запоставениот систем на експлоатација ќе трае со години

Првата цел е производството на полињата опфатени со договорот да се зголеми на најмалку 1,5 милиони барели дневно. За тоа ќе бидат потребни околу 100 милијарди долари приватни инвестиции, нова опрема, санација на нафтоводите, терминалите и рафинериите и враќање на странската експертиза. Затоа ефектот врз понудата и цената на нафтата нема да биде моментален: обновувањето на запоставениот систем ќе трае со години.

За Венецуела зделката е обид за економско оживување по долг период на хиперинфлација, недостиг, санкции и масовно иселување. Родригез проценува дека државата во текот на проектот може да наплати околу 209 милијарди долари приходи и даноци, при референтна цена од 65 долари за барел. Според нејзиното објаснување, околу 19 долари од секој произведен и продаден барел треба директно да завршуваат кај венецуелската држава.

Цената што Каракас ја плаќа е откажување од еден од темелите на чавистичкиот економски модел – државниот монопол врз нафтата. Родригез претходно ја отвори индустријата за приватен капитал, со што практично се повлекува линија под национализациите и конфискациите од времето на Уго Чавез. Владата добива пари и технологија, но станува зависна од американските компании, лиценци, пазари и политички одлуки.

Кина е најголемиот геополитички губитник

Најголемиот геополитички губитник може да биде Кина. Пекинг со години ѝ позајмуваше десетици милијарди долари на Венецуела, а дел од долгот се отплаќаше со испораки на нафта. Во периодите на најстроги американски санкции, Кина стана главна крајна дестинација за венецуелските барели, често продавани преку посредници и со големи попусти. Со американската контрола врз производството и продажбата, тој привилегиран пристап може значително да се намали.

Договорот му дава на Вашингтон можност да одлучува каде ќе оди голем дел од идното производство. Тоа значи дека САД можат да ги пренасочат барелите од Кина кон сопствените рафинерии и резерви, да ја ограничат способноста на Каракас да ги користи како отплата на кинески долгови и да го потиснат Пекинг од енергетскиот сектор на Латинска Америка. Останува нерешено прашањето што ќе се случи со старите кинески побарувања, како и со побарувањата на американските компании чии средства беа национализирани.

 Трамп ја намалува и моќта на Русија и на другите извозници од ОПЕК

Зделката ја менува и пошироката нафтена сметка. Дополнителното венецуелско производство би можело постепено да ја намали американската зависност од нестабилните маршрути од Блискиот Исток, да ја зголеми сигурноста на снабдувањето во западната хемисфера и да создаде притисок врз цените. Тоа би ја намалило пазарната моќ на другите извозници, вклучувајќи ги Русија и дел од членките на ОПЕК, иако Венецуела самата останува членка на картелот.

Со оваа зделка, Трамп обезбеди долгорочен оперативен пристап до огромни резерви нафта, на само неколку дена пловидба од американските рафинерии. За Венецуела договорот е шанса повторно да заработува од богатството што со години остануваше под земја. За светот, тоа е пресврт во кој една од најголемите нафтени сили се оддалечува од Кина и повторно влегува во американската економска и безбедносна орбита.

The post ТРАМП ЈА ОСВОИ ВЕНЕЦУЕЛСКАТА НАФТА Договорот меѓу Вашингтон и Каракас гарантира експлоатација и снабдување во следните 25 години appeared first on plusinfo.mk.

Бројот на загинати во двата разорни земјотреси што ја погодија Венецуела се искачи на 589 лица, додека 2.980 луѓе се повредени, соопшти денеска вршителката на должноста претседател Делси Родригез.

Родригез, опкружена со владини претставници и припадници на армијата, го поздрави пристигнувањето на меѓународните спасувачки тимови кои веќе се вклучуваат во потрагата по преживеани.

– Ќе ги спасиме луѓето што се заробени. Неуморно работиме на оваа задача – изјави Родригез.

Според неа, најтешко погодена е венецуелската држава Ла Гваира, каде што последиците од двата силни земјотреси со магнитуда од 7,2 и 7,5 степени се најголеми.

Таа посочи дека ситуацијата во регионот е ставена под контрола на армијата, додека спасувачките екипи продолжуваат со интензивна потрага по преживеани под урнатините и паралелно дистрибуираат храна, вода и друга неопходна помош за погоденото население.

Надлежните предупредуваат дека бројот на жртви може дополнително да расте, бидејќи спасувачките операции продолжуваат во повеќе тешко погодени подрачја.

The post 589 ЛИЦА ЗАГИНАА ВО ВЕНЕЦУЕЛА Речиси 3.000 повредени по двата катастрофални потреси appeared first on plusinfo.mk.

Мапа на Венецуела, прекриена со американското знаме, осамна на профилот на Доналд Трамп на платформата Трут Соушал. Објавата содржеше само кратка порака, „51-ва држава“, но веднаш предизвика политички потрес.

Наследничката на Николас Мадуро, Делси Родригез, категорично ја отфрли можноста Венецуела да стане дел од САД.

– Венецуелците ја ценат независноста повеќе од сè и никогаш нема да прифатат да станат дел од друга држава – изјавила Родригез.

Според извори од Вашингтон, Трамп сериозно размислувал за сценарио во кое Венецуела би влегла под американско влијание по евентуално соборување на Николас Мадуро. Главниот мотив за операцијата, според неговите изјави, останува нафтата. Во интервју за „Фокс Њуз“, Трамп тврдеше дека Венецуела располага со резерви вредни 40 трилиони долари.

Американската администрација со месеци ги убедувала големите енергетски компании повторно да инвестираат во венецуелската нафтена индустрија. Тие заминале од Венецуела по национализацијата што ја спроведе Хуго Чавез.

Во текстот се тврди дека извозот на нафта повторно надминал 1 милион барели дневно, првпат од 2018 година. Се додава и дека „Шеврон“ останала единствената голема американска компанија што континуирано работела во Венецуела.

Трамп исто така најави дека ќе ги ослободи сите политички затвореници во Венецуела.

Не е првпат Трамп да зброува за анексија. Тој претходно „ги меркаше“ Гренланд, Панама, Куба и Канада, која исто така ја нарекуваше 51. држава на САД.

The post 📷„ВЕНЕЦУЕЛА, 51. ДРЖАВА НА САД“ Трамп шокираше со мапа, Родригез му возврати appeared first on plusinfo.mk.

Соединетите Американски Држави вчера ги укинаа санкциите врз венецуелската вршителка на должноста претседателка Делси Родригез, според објава на веб-страницата на Министерството за финансии на САД, додека Вашингтон продолжува постепено да ги ублажува мерките врз Каракас.

Првично не беше наведена причина за одлуката.

САД и привремената влада предводена од Родригез се согласија да ги обноват дипломатските односи откако САД го соборија авторитарниот лидер Николас Мадуро на почетокот на годината.

Родригез, која беше потпретседателка на Мадуро, беше меѓу голем број лица во таканаречениот „внатрешен круг“ на поранешниот лидер кои беа санкционирани од Министерството за финансии во 2018 година, за време на првиот мандат на американскиот претседател Доналд Трамп.

„Одлуката на претседателот Трамп е значаен чекор во вистинската насока за нормализирање и зајакнување на односите меѓу нашите земји“, рече Родригез во објава на платформата „X“.

„Веруваме дека овој напредок и решителност на крајот ќе доведат до укинување на дополнителните активни санкции врз нашата земја. Ова ќе овозможи брз економски развој, инвестиции и ефективна агенда за билатерална соработка во корист на нашите народи“, напиша таа.

Јужноамериканската земја е во фаза на политичка транзиција по соборувањето на Мадуро. Администрацијата на Трамп бара посилна соработка во проширувањето на производството на нафта и суровини.

Покрај златото, Венецуела поседува и најголеми докажани резерви на нафта во светот.

The post ДЕЛСИ РОДРИГЕЗ СИМНАТА ОД „ЦРНАТА ЛИСТА“ НА САД В.д. претседателката на Венецуела не е веќе под санкции appeared first on plusinfo.mk.

Најмалку 80 лица, кои водечката венецуелска организација за човекови права ги смета за политички затвореници, се ослободени денеска од затвори низ целата земја.

Информацијата ја соопшти Алфредо Ромеро, директор на организацијата „Форо Пенал“, кој преку објава на социјалната мрежа Икс најави дека процесот на ослободување сè уште трае.

– Луѓе се пуштаат од затвор во различни делови на земјата и се очекуваат уште ослободувања – напиша Ромеро.

Привремената претседателка на Венецуела, Делси Родригез, завчера изјави дека вкупно 626 лица биле пуштени од затвор, но не наведе конкретни датуми ниту детали за идентитетот на ослободените.

Од „Форо Пенал“, пак, претходно потврдија дека од 8 јануари досега се ослободени само 156 политички затвореници, што отвора сомнежи околу точноста на официјалните бројки.

Родригез најави дека утре ќе разговара со високиот комесар на Обединетите нации за човекови права, Фолкер Турк, со цел ОН да ги потврди списоците на досега ослободените лица.

The post ВЕНЕЦУЕЛА ГИ ПРАЗНИ ЗАТВОРИТЕ Ослободени најмалку 80 политички затвореници appeared first on plusinfo.mk.

Длабоко под лондонските улици, во трезорите на Банката на Англија, сјаат златни прачки чија вредност надминува две милијарди долари. Но тие не ѝ припаѓаат на Британија — туку на Венецуела, држава што веќе години ја тресе судска, политичка и геополитичка бура.

По апсењето на претседателот на Венецуела, Николас Мадуро, повторно се отвори прашањето кое ја мачи меѓународната заедница: кој ја контролира државната ризница на една нација кога таа останува без признат лидер?

Светлина во трезорот

Од 1980-тите, Венецуела складирала дел од своето злато во Лондон, вкупно околу 31 тон, што претставува петтина од нејзините девизни резерви. Судските документи од 2020 година ја процениле вредноста на овие залихи на 1,95 милијарди долари, но со двојниот раст на цената на златото, денес тие вредат значително повеќе.

Сепак, по спорните избори во 2018 година и санкциите на администрацијата на Доналд Трамп, Каракас не може да го репатрира златото. Лондон, под влијание на Вашингтон, ја призна опозицијата предводена од Хуан Гваидо, а не владата на Мадуро.

„Бесрамно пиратство“

Делси Родригез, поранешната потпретседателка на Мадурo, го нарече одбивањето на Банката на Англија „пиратство“, тврдејќи дека средствата биле потребни за борба со пандемијата.

Родригез беше вмешана и во скандал во Шпанија, „Делсигејт“, поврзан со наводна продажба на 68 милиони долари вредно злато.

Родригез ја презеде власта по апсењето на Мадуро. Западните медиуми напишаа дека претседателот на САД Доналд Трамп ја прифатил проценката на ЦИА Родригез да биде оставена за привремена управителка на Венецуела, со оглед на тоа што нејзиното сменување може да предизвика масовни протести.

Сегашната британска министерка за надворешни работи, Ивет Купер, изјави дека Лондон сè уште не ја признава новата венецуелска власт, нагласувајќи дека „целта е транзиција кон демократија“. Банката на Англија, пак, одбива да коментира.

Злато, нафта и моќ

По падот на Мадуро, вниманието на светот повторно се насочува кон богатството на Венецуела, држава со најголеми резерви на нафта во светот и со рудници што кријат огромни количества злато.

Но, додека политичките ветришта менуваат насоки, една работа останува иста  златото, под Лондон сè уште не може да се допре.

The post МАДУРО ПАДНА, ЗЛАТОТО ОСТАНА…КАДЕ? Оваа банка ја чува венецуелската ризница како тајна на векот appeared first on plusinfo.mk.

Тајна проценка на ЦИА ја сменила логиката на Вашингтон кон Венецуела, пишува „Волстрит Џурнал“. Весникот вели дека аналитичарите на ЦИА процениле дека во случај по апсењето на претседателот Николас Мадуро, единствено неговиот внатрешен круг би можел да спречи хаос, граѓански судири и ширење на нарко-картелите во државата.

Со други зборови, тоа е причината што САД ја поставија потпретседателката Делси Родригез како најсоодветна за привремено водство. Таа, заедно со влијателните министри Диосдадо Кабељо и Владимир Падрино, има контрола врз безбедносните и воените структури, клучен елемент за ред во држава обременета со криминални групи и корупција.

Иако сите тројца се под американски санкции, Вашингтон смета дека токму нивниот авторитет може да ја задржи државата функционална додека се договара нов политички процес, се вели во текстот.

 Жестока социјалистка, поддржувачка на Чавез

Родригез е родена во Каракас во 1969 година и е правничка и ќерка на убиениот левичар Хорхе Антонио Родригез. Политичката кариера ја започнала со Хуго Чавез, каде што служела како министерка за комуникации, а потоа и како министерка за надворешни работи (2014–2017). Позната е по острата антиамериканска реторика и по жестоката одбрана на социјалистичката идеологија на Чавизмот.

По доаѓањето на Николас Мадуро, Родригез стана едно од највлијателните лица во власта. Од 2018 година е потпретседателка на Венецуела и беше претседателка на Националниот уставотворен совет — инструмент за зацврстување на режимот.

Зошто не Мачадо?

Марија Корина Мачадо, симболот на демократската опозиција и добитничка на Нобелова награда за мир, ја изгуби поддршката на Трамп поради слабата организација и недостиг на влијание во војската. Иако американскиот Сенат и дел од администрацијата ја гледаат како легитимна наследничка, разузнавачките извори оцениле дека нејзиното движење нема реална контрола врз институциите, па ризикот од колапс е преголем.

Мачадо го поздрави апсењето на Мадуро како „голем чекор за човештвото“ и побара САД за привремен шеф на државата да го назначат поранешниот дипломат Едмундо Гонзалес Урутија. Тој е 76-годишен поранешен дипломат и претседателски кандидат од 2024 година.

Но, во моментот, САД се потпираат на луѓето на Мадуро.

Операцијата „Делта Форс“ и пресвртот во Белата куќа

Апсењето на Мадуро од страна на единицата „Делта Форс“, поддржано со информации од внатрешен извор на ЦИА, го означи најголемиот американски потфат во Латинска Америка по Панама.

Веднаш потоа Трамп одлучил да не ја предаде власта на опозицијата, туку да го прифати предлогот на ЦИА за внатрешна транзиција со Родригез како технички лидер.

„Магичен реализам“ и американски прагматизам

Експертите предупредуваат дека очекувањето демократијата веднаш да се врати е илузија. Професорот Дејвид Смилде од Универзитетот Тулан вели дека „секој што мисли дека опозицијата може едноставно да ја преземе власта, верува во магичен реализам“.

Во меѓувреме, Белата куќа испраќа контрадикторни пораки — државниот секретар Марко Рубио најавува поморска блокада на венецуелските танкери, додека Трамп зборува за „директен пристап до нафтата и ресурсите“.

Опозицијата како „губитник“ во очите на Трамп

Поранешниот советник Хуан Круз открива дека Трамп го изгубил трпението кон опозицијата уште во својот прв мандат, кога ниту армијата ниту народот не се кренаа против Мадуро.

– Трамп ја гледа опозицијата како губитници што ветија повеќе отколку што можеа да испорачаат – вели Круз.

The post ПО МАДУРО, ЦИА СЕ ПОТПИРА НА ЛУЃЕTO НА МАДУРО Делси Родригез е последниот глас на Чавез во Каракас appeared first on plusinfo.mk.

Венецуелската опозициска лидерка Марија Корина Мачадо изјави дека „3 јануари ќе остане запишан како ден кога правдата ја победи тиранијата“, откако американските сили го уапсија Николас Мадуро и неговата сопруга Силија Флорес.

Операцијата, според „Фокс Њуз“ и ДПА, се одвила во ноќта меѓу петокот и саботата, кога американски војници изведоа воздушен и копнен напад во близина на претседателската резиденција во Каракас.

„Ова е пресвртница, не само за Венецуела, туку за човештвото, за слободата и човечкото достоинство“, објави Мачадо на платформата Икс.

Таа додаде дека Венецуела наскоро ќе стане главен сојузник на САД во безбедноста, енергијата и човековите права, ветувајќи дека нема да дозволи нов авторитарен режим.

Гонзалес, дипломатот што треба да ја спаси земјата

По апсењето на Мадуро, Мачадо јавно побара Едмундо Гонзалес Урутија, 76-годишен поранешен дипломат и претседателски кандидат од 2024 година, да биде назначен за привремен претседател.

Тој беше единствениот опозициски кандидат кому му беше дозволено да се кандидира, откако Мачадо беше исклучена од изборите.

Меѓународните набљудувачи потврдија дека изборите во 2024 година биле нарушени со бројни неправилности и обвинувања за измама.

„Ќе почекате за избори“

Американскиот претседател Доналд Трамп изјави дека не очекува нови избори во Венецуела во следните 30 дена, јави ДПА.

– Прво мора да ги поправиме работите во земјата. Не можете да имате избори – изјави тој за американската телевизија Ен-Би-Си Њуз.

„Ќе потрае некое време“, рече тој, додавајќи: „Мора да ја вратиме земјата во добра состојба“.

Делси Родригез ја презема власта, Мадуро сè уште „легитимен“

Во Каракас, лојалната заменичка Делси Родригез положи заклетва како вршителка на должноста претседателка.
Таа изјави дека „Мадуро останува законски избран лидер“, нарекувајќи го апсењето „чин на агресија против суверена држава“.

„Американците извршија државен удар. Венецуела нема да се покори“ – порача Родригез во обраќањето до нацијата.

„Мисијата е завршена, правдата победи“

На брифинг во Белата куќа, претседателот Доналд Трамп изјави дека „САД ја ослободија Венецуела од диктатурата“ и најави дека Мадуро ќе одговара пред федерален суд за наркотероризам и трговија со дрога.

„Никогаш повеќе во Западната хемисфера нема да владее диктатор“ – рече Трамп, додавајќи дека „светот ја гледа моќта на правдата“.

The post АПСЕЊЕТО НА МАДУРО Е ГОЛЕМ ЧЕКОР ЗА ЧОВЕШТВОТО Венецуелската опозиционерка го фали Трамп, бара дипломат да ја води земјата appeared first on plusinfo.mk.

Американскиот претседател Доналд Трамп денеска изјави дека венецуелската потпретседателка Делси Родригез би можела „да плати повисока цена“ од соборениот лидер Николас Мадуро, „ако не го стори она што е исправно“.

– Обновата на земјата не е лоша работа. Венецуела е банкротирана. Оваа земја е катастрофа во секој поглед. Ако Родригез не сака да го прави она што е исправно, ќе плати многу висока цена, веројатно повисока од цената што ја плати Мадуро – изјави Трамп во телефонско интервју за списанието „Атлантик“.

По вчерашниот напад врз Венецуела и грабнувањето на Мадуро, Трамп првично ја пофали Родригез и изјави дека таа ќе соработува со Соединетите Американски Држави. Кратко потоа, Родригез му одговори дека нејзината земја ќе ги заштити своите природни ресурси.

Во интервјуто за „Атлантик“, американскиот претседател ја бранеше својата одлука за насилно заробување на Мадуро, истакнувајќи дека промената на режимот е подобра од актуелната состојба.

– Реставрацијата и промената на режимот, како и да ја наречете, се подобри од она што го имаме таму во моментов. Не може да биде полошо – рече Трамп.

Тој, исто така, изјави дека и други земји, особено Гренланд, би можеле да бидат цел на интервенција од страна на САД.

– На другите е сами да проценат што значи американската воена акција во Венецуела за Гренланд. Апсолутно ни е потребен Гренланд. Потребен ни е за одбрана – рече Трамп, зборувајќи за островот кој е дел од Данска, членка на НАТО.

The post ЌЕ ЈА СНАЈДЕ ПОЛОША СУДБИНА ОД МАДУРО Трамп ѝ се закани на потпретседателката што ја презеде Венецуела appeared first on plusinfo.mk.

Венецуелскиот претседател Николас Мадуро и неговата сопруга Силија Флорес се префрлени во Њујорк по голема американска воена операција спроведена во Венецуела.

Мадуро е задржан во притворен центар во Бруклин, каде што го очекува судење по обвиненија за трговија со дрога и оружје. Во меѓувреме, американскиот претседател Доналд Трамп изјави дека Соединетите Американски Држави ќе ја водат земјата сè додека не се постигне трансфер на власта и воспоставување контрола врз огромните нафтени резерви на Венецуела.

Во исто време, Врховниот суд на Венецуела ја именуваше потпретседателката Делси Родригез за вршител на должноста претседател. Меѓу венецуелските граѓани, според американските медиуми, владее мешавина од радост, надеж и вознемиреност поради драматичниот развој на настаните.

Maduro, tras llegar detenido a Brooklyn: “Happy new year” https://t.co/jhvqXQS3ZQ pic.twitter.com/TQJ1WJrvC1

— EL PAÍS (@el_pais) January 4, 2026

JUST IN: Close up video of Nicolás Maduro being escorted out of a plane by US authorities in New York.

pic.twitter.com/SNP9KHDBxO

— BRICS News (@BRICSinfo) January 4, 2026

The post 📽️ МАДУРО ВО ПРИТВОР ВО ЊУЈОРК Контролата врз Венецуела привремено ја преземаат САД appeared first on plusinfo.mk.