Во втората половина од 2025 година евидентирани се 5.237 закупи што е  за 14,2% повеќе во однос на истиот период од претходната година. Најголем број од овие закупи припаѓаат на станови, 2.156 (41%) и на деловни простории, 1.651 (32%), покажуваат податоците на Агенцијата за катастар на недвижности.

Според овие податоци, можат да се забележат големи разлики на висината на закупнините. Така, во скопската општина Центар е остварен највисок износ на закупнина од 230.450 денари (3.741 евро), а во Струмица минимум на цена на месечни закупнини по станбени единици од само 83 денари (1,34 евра).

Најмногу закупи на станови во втората половина од 2025 година има во Центар – 502, по што следуваат Штип –  356, Аеродром –  301, Карпош – 257.

Највисока вкупна вредност на остварена цена од закуп на станови постигната е во Центар, 11.413.380 денари (185.282 евра), Аеродром, 5.898.230 денари ( 95.750 евра), и  Карпош 5.742.485 денари (93.222 евра).

Во скопските општини, највисоката просечна месечна закупнина на стан има  во Центар 22.736 (369 евра)  а најниска во Бутел 3.489 денари (56,6 евра). Во Карпош изнесува 22.344 денари ( 363 евра), Аеродром, 19.595 денари (318 евра), Ѓорче Петров, 16.714 денари (271 евро ) и во  Гази Баба, 15.799 денари (256,5 евра).

Од Катастарот појаснуваат дека  високото учество во бројот на закупи на становите,  кои во второто шестмесечје на 2025 година изнесуваат 2.156 закупи со вкупно остварена цена во висина 553,100 евра, што претставува пораст во споредба со приближно 1.865 закупи и вкупно остварена цена во висина 465.700 евра во 2024 година.

Податоците на Катастарот покажуваат дека значителен раст забележан е и кај категоријата деловни простории, каде бројот на закупи во 2025 година е 1.651 и вкупна цена од 1.182.700 евра, додека во 2024 година тој број изнесувал 1.444 закупи и вкупна цена од 938,700 евра.

Овој раст, според Катастарот, може да се поврзе со зголемена економска активност,  повеќе компании започнуваат или го прошируваат своето работење, и доверба на бизнисите во економските услови и пазарот.

Од другите закупи во втората половина од 2025 година се издвојуваат куќите кои  учествуваат со 13% или со 699 закупи, земјоделското земјиште и шумите со 10% или 515 закупи, градежното земјиште со 1% или 66 закупи, индустриските објекти со 2% или 95 закупи, гаражите со 0,5% или 25 закупи, а останатите недвижности со 1% или 30 закупи од вкупниот пазар на закупи на недвижности.

Кај категоријата куќи, има благ пораст на побарувачата на закупување. Бројот на закупи во 2025 година е 699 и вкупно остварена цена од 184.800 евра, а во 2024 изнесувал околу 684 закупи со вкупна цена од 165.600 евра.

Раст е забележан и кај категоријата земјоделско земјиште и шуми, каде бројот на закупи е зголемен од 384 во 2024 година на 515 закупи во 2025 година.

Кај индустријата, бројот на закупи останува релативно стабилен, со благ пад во 2025 година или вкупно 95, додека во 2024 година тој број изнесувал 99.

Според АКН, во категориите градежно земјиште, останати недвижнини и гаражи, бројките покажуваат умереност, што укажува на широката употреба на овие типови недвижности, иако нивното вкупно учество е значително пониско во споредба со главните категории.

The post ВО МАКЕДОНИЈА СЕ ИЗНАЈМУВА СТАН ЗА 1,3 ЕВРО И ЗА 3.740 ЕВРА Највисоки се кириите во општина Центар appeared first on plusinfo.mk.

Основното јавно обвинителство Скопје отвори истражна постапка против едно лице за кривично дело бесправно градење, по член 244-а од Кривичниот законик. Објектот, станбена зграда со деловен простор и катност По+П+6+Пк, почнал да се гради нелегално во 2024 година на државно земјиште на улицата „Кемал Сејфула“ во општина Чаир.

Како што информираат од обвинителството, постапката е покрената по кривична пријава од група граѓани, по што бил извршен увид и ангажиран градежен вештак, кој утврдил дека објектот е веќе изграден до шестиот кат со целосно избетонирана армирано-бетонска конструкција и делумно ѕидање на надворешни и внатрешни ѕидови.

„По спроведена првична истрага и извршена експертиза од овластен судски вештак, јавниот обвинител донесе Наредба за спроведување истрага против едно лице кое, како управител на правно лице, се јавува и како инвеститор на објектот. Доставен е и предлог до судот за определување мерки на претпазливост, вклучително и забрана за изведување градежни работи“, изјавија од Основното јавно обвинителство Скопје.

Покрај забраната за продолжување на градбата, обвинителството бара и одземање на патната исправа на осомничениот, како и обврска редовно да се јавува кај службено лице.

Градоначалничката на Скопје, Данела Арсовска, неодамна преку социјалните мрежи повика Јавното обвинителство да влезе во Општина Чаир, тврдејќи дека таму се уништува документација поврзана со дивоградбите:

– Во Чаир има повеќе од 150 документирани, утврдени дивоградби кои се спротивно на закон градени сега, а не во 2011 година, без или со фалсификувани документи – рече Арсовска.

Градоначалникот на Чаир, Висар Ганиу, возврати дека Арсовска прави шоу и се однесува како истражен орган. Тој најави тужби за клевета, но призна дека во Чаир има дивоградби, иако, според него, во помал број од некои други скопски општини.

– Дивоградби има како и во сите скопски општини, но не ја уништуваме никаква документација – изјави Ганиу.

Во одбрана на Ганиу застана и првиот вицепремиер и лидер на Влен, Изет Меџити, кој ја обвини Арсовска дека по налог на ДУИ има за цел дестабилизација на албанските општини, најавувајќи кривична пријава против неа.

Засега од кабинетот на скопската градоначалничка нема потврда дали до Обвинителството е доставена нова документација во врска со наводни фалсификувани документи и нови дивоградби.

The post ОТВОРЕНА ИСТРАГА ЗА ДИВОГРАДБА ВО ЧАИР Се бараат мерки за претпазливост за управителот кој градел на државно земјиште appeared first on plusinfo.mk.

– Уште еднаш, 21.000 евра месечно, 10 години! Во превод 252.000 годишно, вкупно 2.520.000. Исто така, за годинава Лотарија предвидела речиси милион евра, над 970.000 евра, за наем и реконструкција на деловен простор!

Објектот – рентан од Лотарија, е на ХЕЈ ДООЕЛ. Тоа е компанија којашто во 5 месеци прави чудо од бизнис. Основана на 02 февруари годинава, на 22 март купува објект од речиси 3.000 квадрати, во мај се пријавува на тендер на Лотарија во мај, и на 5 јули добива договор тежок 2,6 милиони евра! За пет месеци од формирање до бизнис тендер од 2,6 милиони евра!

Е сега малку за актерите! Лотарија ја води Перпарим Бајрами, шеф на кабинетот на Груби во министерството за политички систем. ХЕЈ ДООЕЛ е регистрирано на уште еден млад, со визија од ДУИ, Армин Машовиќ, познат како бизнис партнер со Ерџан Сулкоски, ортакот на зетот на Али Ахмети, Куштрим Смајлај! Машовиќ ја отвора компанијата како консалтинг и маркетинг, и како и секој бизнисмен со визија има и свој интернет портал ХЕЈ.мк.

Порталот пак е регистриран еден месец пред фирмата да започне, значи во јануари, од Шабан Азмовски Хамза, инаку член на Управниот одбор на акционерското друштво на Државна лотарија, и вработен во министерството на Артан Груби!

Значи. Појасно не може. ДУИ го шири коцкарскиот бизнис со државни пари.

Директорот на Лотарија изнајмува за 2,6 милиони евра од фирма каде дел е член на Управниот одбор на Лотарија. Двајцата се од кабинетот на Артан Груби. Појасно од ова не може.

Артан Груби, но и Спасовски, Грковска, па и Ковачевски мора да одговорат, како тоа Перпарим директор од Лотарија најмува простор од фирма каде дел е и Шабан Хамза, член на Управниот Одбор на Лотарија?

Дали Перпарим од Лотарија ќе каже дали знаел или не знаел дека Шабанн Азмовски Хамза го регистрирал името на порталот ХЕЈ на фирмата каде ќе истурат државни 2,6 милиони евра?

Артан Груби мора да каже како тоа во Лотарија завршиле и Перпарим Бајрами и Шабан Азмовски Хамза од неговиот кабинет.

А Али Ахмети и Димитар Ковачевски мора да одговорат како сите големи државни тендери се вртат околу зетот на Ахмети и неговиот бизнис ортак Ерџан Сулкоски?

И секако СДС да одговори до кога молкум ќе слугува на криминалниот клан?

Институциите како ЈО за организиран криминал, ЈО, полицијата може слободно да продолжат да молчат, и онака за кратко ќе бидат дел од предмети за злоупотреби заради делување или неделување – рече Стоилковски.

The post „ДУИ ГО ШИРИ КОЦКАРСКИОТ БИЗНИС“ Стоилковски отвора афера за изнајмен простор за 2,6 милиони евра appeared first on plusinfo.mk.

– Сметам дека со ова се решаваат сите прашања со соседите и Македонија како држава има една тапија. Со Договорот од Преспа Грција ни стана пријател, лобира за нас, а со Охридскиот договор, Албанците станаа лојални граѓани затоа што државата стана лојална кон нив. И со Србија се реши прашањето за црквата. Со уставните измени македонскиот народ само ќе добие. Ако државата е во статус кво, таа назадува и тоа не е добро – рече Груби.

Тој одговори и на прозивките на опозицијата за купениот деловен простор на неговиот брат.

– Брат ми има бизнис во туризмот веќе 20 години и нема никаква врска со политиката. Деловниот простор на улица „Македонија“ го купил со хипотекарен кредит од 100 илјади евра на негово име од друго физичко лице – рече Груби.

Тој не кажа за колку пари го купил брат му просторот, но рече дека зел кредит зашто киријата во сегашниот дуќан му се зголемила од 800 на 1500 евра.

Тој го повика обвинителството да отвори истраги и за купувањето на дуќанот и за обвинувањата од ВМРО-ДПМНЕ дека фирма блиска до Груби и на неговиот брат ги баждарела бензинските пумпи.

The post СО УСТАВНИТЕ ИЗМЕНИ МАКЕДОНИЈА МОЖЕ САМО ДА ДОБИЕ Артан Груби за вметнување на Бугарите во Уставот appeared first on plusinfo.mk.

Иако се обидовме телефонски да контактираме со него, не го добивме, па прашања му ги испративме по СМС порака и преку апликацијата Вајбер и му дадовме доволно време да одговори. Во нашата редакција сѐ уште не се стигнати одговорите.  Испратените прашања ги објавуваме во целост и сметаме дека директорот Трајчевски има обврска на нив да одговори, со оглед на фактот дека раководи со акционерско друштво во државна сопственост.

Ова се нашите прашања до него:

„Во врска со случајот на злоупотреба на магацински простор на ГТЦ за активности за копање на криптовалути од страна на син на поранешен пратеник, ве молиме да ни одговорите на следните прашања:

1. Дали магацинскиот простор во кој се вршени овие активности, а кој според наши информации е на површина од 72 метри квадратни, е во приватна сопственост и ако е, кој е сопственик и од кога?

2. Дали магацинскиот простор, за кој имаме информација дека е во сопственост на ГТЦ, е издаден под закуп на приватно лице или на фирма? Ако е тоа сторено, ве молиме да ни презентирате договор за закуп и докази за извршени уплати на закупнина од страна на закупецот,

3. Од ЕВН сме информирани дека за целокупната потрошена електрична енергија на ГТЦ, компанијата фактурира директно на ГТЦ, а не на сопствениците на дуќаните и на другите закупци на деловен и магацински простор. Во магацинските простори на ГТЦ не постојат приватни броила за електрична енергија, а според нашите информации ни посебни броила под контрола на ГТЦ. Ве молиме да ни презентирате докази колку електрична енергија е плаќана за наведениот магацински простор и кој ја плаќал?“

Директорот на ГТЦ, Ѓоко Трајчевски, во текот на вчерашниот ден во изјава за ТВ21 рече дека од медиумите дознал за случајот со нелегалното копање криптовалути, што беше откриен во магацински простор во сутеренот на ГТЦ.

– Најодговорно тврдам дека не може да се контролира ситуацијата, бидејќи се работи за 500 до 600 дуќани, магацински и деловен простор и друг вид на простории – изјави Трајчевски за случајот.

Инаку, Ѓоко Трајчевски на функцијата директор на ГТЦ од страна на владата беше назначен во август 2017 година, каде што го замени Аго Абазовски, кој беше дел од партијата на Амди Бајрам.

Скопјанецот Ѓоко Трајчевски е дипломиран инженер и пред да стане директор, своето работно искуство го поминал токму во ГТЦ, каде 18 години бил раководител на оделот за одржување.

The post НИ ТРАГА НИ ГЛАС ОД ДИРЕКТОРОТ НА ГТЦ Како е можно да не знае што му се случувало под носот? appeared first on plusinfo.mk.

Шведска планира да ги претвори деловните простории во станбени, со намера да го реши долгогодишниот проблем со недостиг од станови. Смената кон купување преку интернет и работа од дома предизвика големи проблеми за многу деловни субјекти, но ѝ даде шанса на нордиската нација да се справи со хроничниот недостиг на станови.

Владата анализира дали слободната комерцијална недвижност по пандемијата на ковид-19 може да се пренамени за да се надополни недостигот од околу 140.000 домови.

Пазарот на домување одамна е ахилова пета на шведската економија, јавија шведски медиуми.

Комплексни регулативи ги прават трошоците за изградба едни од највисоките во Европа. Даночни олеснувања за хипотека, нула данок на имот и високо регулиран пазар за изнајмување ги зголемија цените на купувачите на станови и драматично ги зголемија цените на становите, а централната банка редовно предупредува на ризикот што ѝ се заканува на економската стабилност.

Шведската управа за домување е задолжена за поедноставување на сложените правила за градење, да помогне во плановите за пренамена на имотот и ќе ги извести владините претставници кон крајот на февруари.

– Пандемијата значи дека сѐ повеќе сектори разгледуваат решенија за работа на далечина и работа од дома што би биле трајни и тоа значи дека има локации што можат да се користат за домување – рече шведскиот заменик министер за финансии Пер Болунд.

The post Шведска ќе го пренамени вишокот канцеларии во станови appeared first on plusinfo.mk.