– Ова се постапки на кои јавните обвинители работеа напорно во изминатите месеци. Верувам дека јавноста ќе биде многу заинтересирана – рече државниот обвинител Коцевски на брифинг со новинарите.

Тој не откри повеќе детали за какви кривични дела против животот и телото се работи. Во оваа група кривични дела се убиства, тешки повреди, помагање при самоубиство, противправно прекинување на бременост и др.

Коцевски рече дека има ново упатство за работа со кое во ЈО се дава приоритет на постапките за коруптивни кривични дела, затоа што граѓаните, но и Европската Унија итно очекуваат резултати од борбата против корупцијата.

– Согласно упатството веќе во следните десетина дена ги очекувам првите информации од пониските јавни обвинителства во врска со досегашниот тек на таквите постапки, кои се воочените проблеми и кои се предлозите за нивно надминување. За сите сознанија јавноста транспарентно ќе ја известуваме – изјави Коцевски.

Тој информираше дека спроведувањето на финансиските истраги во предметите каде ќе бидат детектирани приноси од кривично дело во иднина ќе бидат правило, а не исклучок.

– Со поддршка на САД опремени се истражните центри во ОЈО Скопје и ОЈО за гонење на организиран криминал и корупција. Тие сега имаат навистина современи можности за преземање истражни дејствија. Во тек е оглас за припадници на МВР за пополнување на позиции во истражните центри. Во функција се истражните центри во Куманово и во Тетово, а до крајот на година ќе се формираат и во Битола и во Штип. Со сите овие чекори очекувам резултати и тоа на краток рок. За граѓаните ќе бидат видлива правдата и ќе биде јасна улогата на Обвинителството во испорачувањето на правдата – нагласи Коцевски.

Коцевски, на почетокот на денешниот брифинг на кој присуствуваа повеќе јавни обвинители, како и шефовите на ОЈО ГОКК Ислам Абази и на ОЈО Скопје Гаврил Бубевски, посочи дека јакнењето на транспарентноста е еден од основните приоритети во неговиот мандат. Со транспарентноста, додаде, ќе ја зајакнува и отчетноста, а со тоа и одговорноста на јавните обвинители.

Коцевски додаде и дека во Собранието укажал дека не е исполнета законската обврска да им се доделат 0,4 проценти од Буџетот. Минатата година им биле одобрени 0,2 и годинава, исто така, 0,2 проценти.

– Проблемите и понатаму ќе останат, такви какви што се. Со оглед дека има само 360 јавно-обвинителски службеници, а треба над 1.100. Во моментов имаме помалку од 95 јавни обвинители – рече Коцевски.

The post ОБВИНИТЕЛСТВОТО ЌЕ ИСПОРАЧА ПРАВДА, УВЕРУВА КОЦЕВСКИ Наскоро резултати од сложени предмети за тешки дела против животот и за финансиски криминал appeared first on plusinfo.mk.