Срамота е после 34 години независност на Македонија ние повторно да зборуваме за опасност од инциденти на денот на изборите, порача денеска претседателот на Собранието Африм Гаши на брифинг со новинарите.

– Јас немам никакви индиции, ниту до мене, како претседател на Собранието и член на Советот на безбедноста стасале информации за можни инциденти и проблеми при локалните избори – рече Гаши.

Собранието на седницата в петок, на 12 септември, ќе усвои декларација за фер и демократски избори, која е прва ваква декларација што е иницирана во законодавниот дом. Традиционално, декларација за фер и демократски избори се потпишува во Државната изборна комисија, од страна на учесниците.

– Со ова што го правиме, целта е да нема инциденти и декларацијата е во таа насока. Секој кој не го испочитувал својот потпис после би требало да сноси одговорност. Сакаме да дадеме тежина на страната на фер и демократски извори и да оставиме помалку простор на тие што сакаат инциденти – рече Гаши одговарајќи на новинарско прашање дали е можно да има инциденти и проблеми на изборите и покрај декларацијата, со оглед на острата реторика на кандидатите за градоначалници во Чаир, која е – да се биде или не, што, пак, лесно може да создаде инциденти и во Чаир, но и во другите општини каде се водат главните изборни битки меѓу партиите од албанскиот блок.

– Изборите се најдобриот индикатор за развојот на демократијата. На локалните избори не смее во никој случај да се загрози правото на ниеден граѓанин да ја изрази својата волја да гласа за кого сака. Ние како Собрание правиме сè што можеме сите актери во изборите да го слушнат овој глас – дека политичката битка не вклучува инциденти. Зошто да има инциденти? Јас не се согласувам дека овие избори се толку битни, секако битни се за локалните теми и проблеми, но, не можеме секои избори да ги сведеме на историски. Овие се за локални проблеми, за канализација, водовод, хигена, чист воздух, за развојни проекти итн. Не се согласувам изборите да се сведат на „да се биде или не“ и немам никаква индиција дека се подготвуваат инциденти. Од 2 ноември сите институции редовно ќе работат, сонцето ќе изгрее … – рече претседателот Гаши.

Тој повика на максимална смиреност и побара сите фактори да се однесуваат одговорно – политичките партии, активистите, граѓанското општество и медиумите.

The post „ОВА СЕ ЛОКАЛНИ, А НЕ ИСТОРИСКИ ИЗБОРИ“ Гаши не очекува инциденти на гласањето и ги повикува партиите на фер процес appeared first on plusinfo.mk.

Собранието нема да одржува пленарни седници за време на изборната кампања за локалните избори, со цел да не се злоупотребува собраниската говорница, соопшти денеска претседателот на Собранието Африм Гаши на редовниот брифинг со новинарите. Ќе се одржат две седници, на 2 и на 12 септември.

Гаши истакна дека оваа постапка веќе е традиционална во Собранието и во предизборието не се одржуваат редовни седници и комисиски расправи, со цел законодавниот дом да не се вовлече во кампањата. Координаторите на парламентарните партии на денешната координација со Гаши начелно се согласиле законите што стигнале до денеска да бидат распределени на двете пленарни седници.

– Повеќето од нив се во прво читање, а идејата е до почетокот на кампањата да бидат целосно разгледани – рече Гаши.

Локалните избори се распишани за 19 октомври, а изборната кампања почнува на 29 септември.

На тие две собраниски седници не се очекува да има нов обид за измени на Изборниот законик, а до изборите нема да се избере нов претседател на Државната комисија за спречување на корупцијата, ниту пак, Народен правобранител.

На седницата на 12 септември претседателот Гаши ќе предложи пратениците да изгласаат Декларација за фер и демократски избори. На истата седница ќе има и пратенички прашања.

Вообичаено, таква декларација потпишуваат учесниците на избори во Државната изборна комисија. Според Гаши, ова ќе биде прв пат декларација за фер избори да се донесе во Собранието.

– Текстот на декларацијата ќе биде со општи термини. Партиите ќе се обврзат дека ќе ги почитуваат законите и правилата на изборниот процес. Тоа ќе биде една силна и обврзувачка порака и до граѓаните и до сите политички актери – рече претседателот Гаши.

Работата на пратениците официјално продолжи денеска, на 25 август, по летниот одмор кој претходно беше прекинат на 16 август, поради итна седница за измените на Изборниот законик по скратена постапка. Тогаш предлогот не помина поради недостиг на Бадентерово мнозинство, затоа што пратениците од ДУИ гласаа против измените.

Гаши рече дека ако не ја свикале седницата на 16 август тоа ќе значеше дека Собранието не се обидува да ги донесе измените на Изборниот законик и немало да се знае кој е за, а кој против. На новинарско одговори дека причината на свикувањето на седницата не била за политички маркетинг на власта, туку дека сакале да направат последен обид за донесување на измените. Со тие измени требаше да се регулира колкав процент потписи од вкупниот број избирачи во Изборната единица треба да соберат независните кандидати за да учествуваат на овие локалните избори. По ова Државната изборна комисија со правилник пресече дека ќе мое да се кандидира за градоначалник и да поднесе листа за советници секој што ќе собере најмалку 2 потписа.

Прашан дали има сознанија за тајно сценарио меѓу опозициските СДСМ и ДУИ за предизвикување хаос на изборите, како што претходно објави премиерот Христијан Мицкоски, Гаши вели дека такви информации не стигнале до него.

– Но ако има такви индиции, Декларацијата би била уште една потврда партиите да се обврзат на фер и демократски избори. Проблемот е што ние секои избори ги правиме како да се последни, како да се за живот или смрт. Локалните избори треба да бидат за тоа што градоначалниците треба да им понудат на граѓаните  – рече претседателот на Собранието, Африм Гаши.

The post СОБРАНИЕТО ЌЕ ДОНЕСЕ ДЕКЛАРАЦИЈА ЗА ФЕР И ДЕМОКРАТСКИ ИЗБОРИ Пратениците нема да држат пленарни седници за време на кампањата appeared first on plusinfo.mk.