Основното јавно обвинителство Скопје до судијата за деца при Основниот кривичен суд Скопје поднесе Барање за поведување подготвителна постапка за вкупно пет деца во судир со законот, бидејќи презеле дејствија кои се предвидени како кривично дело – Насилство од член 386 од Кривичниот законик.

Станува збор за малолетници, на возраст од 14 и 15 години, заедно со уште едно дете кое не наполнило 14 години и не може кривично да одговара, кои во група извршиле грубо насилство врз двајца други 14-годишници.

Настанот, како што се наведува во соопштението од Јавното обвинителство, се случил на 12 декември во дворот на ОУ „Дитурије“ во Сарај. Двете деца – жртви на насилството тргнале да си одат дома кога на излезот од училишниот двор ги пресретнале напаѓачите. Започнале да ги удираат со тупаници и со клоци по главата и по телото. Едното оштетено дете се здобило со површинска рана на главата, додека на другото дете му нанеле тешки телесни повреди – контузија на главата, скршеница на носот и хематоми по целото тело.

Со насилството сторителите предизвикале чувство на несигурност и страв и кај други деца кои во тој момент излегувале од училиштето.

Имајќи ја предвид возраста на децата во судир со законот, но и потребата да се обезбеди непречено водење на постапката, јавниот обвинител на судијата му предложил да определи мерки на претпазливост – јавување во суд, одземање на патната исправа и забрана за приближување и остварување какви било контакти со оштетените деца.

ВОЗНЕМИРУВАЧКО ВИДЕО ОД САРАЈ Ученици во жестока пресметка, другите стојат и снимаат и никој не реагира

The post НА ЕДНОТО ДЕТЕ МУ ГО СКРШИЛЕ НОСОТ, А ДРУГОТО ИМА РАНА НА ГЛАВАТА За тепачката во Сарај ќе се отвори постапка против 5 деца appeared first on plusinfo.mk.