Општина Центар ја урна бесправната доградба на деловен објект на улица Орце Николов бр. 139, во Дебар Маало, поставена без одобрение за градење и на јавна површина која е предвидена да им служи на сите граѓани. Доградбата, со димензии 15 x 5,7 метри, била изградена од страна на инвеститорот „Екотон Дизајн“, кој не постапил по решението за отстранување издадено од градежниот инспектор.

Градоначалникот на Општина Центар, Горан Герасимовски, посочи дека општината нема да дозволи узурпирање на јавниот простор.

– Јавните површини во Центар им припаѓаат на сите граѓани и нема да дозволиме да станат приватен имот поради самоволие – изјави Герасимовски.

Тој додаде дека секој бесправен објект ќе биде санкциониран со решенија и постапки за негово целосно отстранување.

Општинските служби интервенирале откако инвеститорот не ги почитувал ниту решението, ниту неколкуте опомени.

– Ова е порака дека редот мора да важи за сите. Продолжуваме со акцијата за расчистување на дивоградби низ општината – нагласи Герасимовски.

Во рамките на пошироката стратегија за уредување на урбаниот простор, Општина Центар спроведува засилени инспекциски контроли со цел заштита на јавниот интерес и враќање на просторот назад кај граѓаните.

The post УРНАТА ДИВОГРАДБА ВО ДЕБАР МААЛО Герасимовски најави засилени контроли и нови акции appeared first on plusinfo.mk.

Во рамките на акцијата за отстранување дивоградби, Општина Центар ја урна нелегалната доградба на ресторанот „Мечка” во Дебар Маало, која го блокираше тротоарот, дел од коловозот и пешачкиот простор.

– Нема да дозволиме узурпирање на јавен простор поради приватни интереси. За секој објект каде што ќе утврдиме нерегуларности ќе издадеме решение за негово отстранување – изјави градоначалникот на Општина Центар Горан Герасимовски.

Тој додаде дека по неколку опомени и непостапување по издадените забелешки, механизацијата излезе на терен, во координација со инспекциските служби, и ја отстрани незаконски поставената конструкција, која го попречуваше нормалното движење на пешаците и функционирањето на сообраќајот.

Жителите на Дебар Маало ја поздравија акцијата и ослободувањето на просторот што подолго време беше бесправно узурпиран.

– Во тек е обемна и континуирана акција за воспоставување ред на јавните површини, со засилени инспекциски контроли и активности за расчистување на нелегално поставени објекти. Целта е да се заштити јавниот интерес, како дел од пошироката стратегија за воспоставување ред во општината – информира Герасимовски.

The post УРНАТА НЕЛЕГАЛНА ДОГРАДБА НА РЕСТОРАНОТ „МЕЧКА“ ВО ДЕБАР МААЛО Го попречуваше нормалното движење на пешаците appeared first on plusinfo.mk.

Движењето ЗНАМ – За Наша Македонија денеска одржа прес-конференција пред ресторанот „Мечка“ во Дебар Маало, обвинувајќи ја општината Центар и градоначалникот Горан Герасимовски за нов урбанистички скандал и толерирање на дивоградба во срцето на Скопје.

Портпаролот Никола Мемов истакна дека објектот се проширил буквално преку ноќ, зафаќајќи јавен простор, тротоар и дел од коловозот, со што е узурпиран дел што припаѓа на граѓаните.

– Пред само неколку недели ресторанот „Мечка“ никна со нов дел на јавен простор. Узурпиран е дел наменет за пешаци, за граѓаните, простор кој треба да биде достапен за сите, а сега е дел од приватен бизнис – изјави Мемов.

Мемов праша дали градоначалникот Герасимовски и инспекторатот на Општина Центар воопшто постапиле на терен и дали за оваа градба постои било какво одобрение или документ.

– Кој дозволи во срцето на Дебар Маало, на само 200 метри од кабинетот на градоначалникот, да никне нелегален објект? Дали ова е Општина Центар или Див Запад, каде секој си гради што сака и каде сака? – додаде тој.

Портпаролот Мемов оцени дека градоначалникот Герасимовски молчи и не презема ништо, иако узурпацијата се случува буквално пред неговиот дом и канцеларија.

– Ова е буквално во вашето маало, градоначалниче. Ако тука не реагирате, како граѓаните да веруваат дека ќе реагирате воопшто? Ова е срамота и слика на една неспособна и незаинтересирана општинска власт – рече Мемов.

Тој додаде дека граѓаните на Дебар Маало секојдневно гледаат како јавните површини се претвораат во приватни, а зеленилото исчезнува пред нивните очи.

На крајот, Мемов порача дека ова не е изолиран случај, туку симбол на четиригодишното владеење на СДСМ во Центар, кое, како што рече, резултирало со урбан хаос и селективна правда.

– Ова мора да престане. На 19 октомври граѓаните ќе одлучат и ќе изберат човек кој ќе работи за јавниот интерес, ќе го штити зеленилото и ќе ја врати човечката димензија на Центар. Граѓаните знаат, Центар знае – заврши Мемов.

The post 📽️ „МЕЧКА“ ГО ПРОГОЛТА ТРОТОАРОТ Герасимовски молчи додека ресторанот се проширува, обвини Мемов appeared first on plusinfo.mk.

Дебар Маало, едно од најпрепознатливите и најдинамични маала во Скопје, наскоро би можело да стане тест-зона за нов сообраќаен режим кој треба да донесе повеќе ред, тишина и безбедност за жителите. Општина Центар подготви пилот-проект за ограничување на движењето на возилата во внатрешноста на Дебар Маало за време на викендите, како одговор на долгогодишните реакции од граѓаните кои живеат во овој дел на градот.

Општината ќе го достави проектот до Град Скопје, а потоа ќе биде проследен до СВР Скопје за конечна согласност. Доколку биде одобрен, пилот-проектот ќе стартува и ќе трае шест месеци. Во зависност од реакциите на граѓаните и ефектите од неговото спроведување, можно е тој да се продолжи на уште една година и да премине во трајно решение, кое ќе значи и постојано ограничување на сообраќајот во Дебар Маало.

– Со забрана за движење на возила ќе се зголеми пешачката безбедност, а луѓето ќе бидат охрабрени да се движат пеш или со алтернативни превозни средства, кои не прават бучава. Дебар Маало ќе стане една голема пешачка зона во која сите ќе можат да уживаат – без разлика дали одат на кафе, во ресторан или само на прошетка. Проектот го почнуваме поради постојаните барања на жителите на Дебар Маало. Наша цел е да овозможиме мирна и безбедна средина за живеење, без бучава, загадување и хаос од сообраќајот кој кулминира за време на викендите – велат од Општина Центар за Плусинфо.

Строго контролиран влез за викендите

Планот предвидува од петок во 18 часот до понеделник во 6 часот наутро, сообраќајот да биде строго контролиран, а влезот во зоната да биде дозволен само за жителите кои ќе имаат посебна дозвола. Сите останати возила ќе имаат право да влезат, но само доколку излезат од зоната во рок од 15 минути. Во спротивно, ќе следуваат казни. Се предвидува транзитно поминување, но не и долготрајно паркирање или престој.

– Планираме да го направиме Дебар Маало вистинска пешачка зона, каде што граѓаните ќе можат безбедно да се движат, а воздухот ќе биде почист. Угостителските објекти ќе функционираат, но нема веќе да има хаос од автомобили за време на викендите. Жителите ќе добијат бесплатен пристап, а за некои улици ќе се користи и мобилна апликација за отворање на рампите. Овој систем го развиваме во соработка со стручњаци. Општината има средства, поточно со ребалансот може да се обезбедат и проектот да се реализира. Но доколку добиеме дозвола некаде кон крајот на август, нема да можеме да го реализираме проектот бидејќи следат избори и законски не смееме да го реализираме – велат од Општината.

Ако се покаже функционален, ќе се прошири и во другите населби

Планирано е проектот да се спроведе во три фази. Во првата фаза ќе се воспостави затворен круг помеѓу улиците Орце Николов, Климент Охридски, Партизански одреди и 29 Ноември (кај Градежен факултет). Во овој дел ќе бидат поставени електронски контроли со рампи и безжичен систем на надзор, кој ќе го регулира влезот и излезот на возилата. Секое возило ќе има дозвола да влезе само еднаш, а пред повторен влез ќе мора претходно да ја напушти контролирана зона.

За улиците кои се слепи и не овозможуваат поставување рампи, ќе се воведе безжична контрола со мобилна апликација. Жителите ќе можат бесплатно да ја отворат рампата со повик до одреден телефонски број кој нема да им се наплатува, а кој ќе биде поврзан со регистарскиот број на нивното возило. Во истата фаза ќе биде дозволен пристап до паркинзите кај улиците Орце Николов, Аминта III, Ленинова и 29 Ноември, за да се овозможи нормално користење на јавниот паркинг за посетителите кои ќе имаат потреба да го паркираат своето возило во близина.

Ќе се воведат посебни правила и за дотурот на стока. Нема да биде дозволен влез на возила потешки од 3,5 тони, освен ако не се работи за посебно одобрени ситуации со дозвола издадена од Град Скопје кој ќе биде наутро од 7 до 9 часот. За да се олесни снаоѓањето, ќе биде поставена и соодветна физичка сигнализација на улиците Партизанска, Климент Охридски, Илинденска и Рузвелтова, со што ќе се информираат сите учесници во сообраќајот за новиот режим.

Во втората фаза, контролираниот сообраќаен режим ќе се прошири и ќе го опфати поширокиот дел на Дебар Маало, вклучително и улицата 29 Ноември, Рузвелтова, Орце Николов и Партизански одреди. Со оваа фаза се планира затворање на улицата 29 Ноември при што рампите од улиците Дебарска и Радњанска ќе се преместат на 29 Ноември. Со ова се зголемува затворениот круг, а се проширува кон 29 Ноември, Дане Крапчев и Ѓорѓија Пулевски, а на останатите пристапи ќе бидат поставени рампи со картички и со телефонски броеви.

Во третата фаза се планира да се вклучат и делови од таканареченото Дебар Маало 2 или делот околу Градскиот парк, односно улиците Наум Наумовски Борче, Јордан Хаџи Констатинов – Џинот и булеварот Свети Климент Охридски. Проширувањето на контролата ќе се реализира само доколку претходните фази покажат позитивни резултати и ќе биде проследено со нов траен сообраќаен режим изработен од стручните служби на Општина Центар. Во оваа фаза е предвидено формирање на два затворени система помеѓу Ленинова, Аминта III, Јордан Хаџи Констатинов – Џинот, Наум Наумовски Борче, Ристо Шишков, 8 Март, а другиот круг ќе биде помеѓу Ристо Шишков, Ленинова, Јордан Хаџи Констатинов – Џинот и Благоја Страчков. На претходно споменатите сообраќајници ќе бидат поставени рампи, а останатите ќе бидат со мобилен телефон.

– Ако видиме дека мерката е прифатена и дава резултати, ќе продолжиме со неа. Нашата намера не е да казнуваме, туку да создадеме нова, поквалитетна урбана култура во Центар – порачуваат од Општина Центар.

Од Општината додаваат дека доколку овој пилот проект се покаже како успешен во Дебар Маало, ваков режим на сообраќај би можел да се примени во Буњаковец, Капиштец и во сите други зони на нејзината територија.

The post ОПШТИНА ЦЕНТАР ПЛАНИРА ДА СПУШТИ РАМПА ЗА ВОЗИЛАТА ВО ДЕБАР МААЛО Пилот-проектот би траел 6 месеци, ако воопшто стаса да се реализира пред изборите appeared first on plusinfo.mk.

„Нема потреба од никакви коментари. Постапено е според позитивните прописи што важат во вакви случаи“, вака накратко за порталот Скопје1 одговори поранешниот министер за надворешни работи и амбасадор, Срѓан Керим, откако беше прашан за несовесното паркирање на луксузно „порше“ во скопската населба Дебар Маало.

Возилото, кое предизвика бројни реакции во јавноста, не е сопственост на полициски службеник, како што првично се шпекулираше, туку токму на Керим.

Информациите од Министерството за внатрешни работи (МВР) го потврдуваат ова, бидејќи во нив стои дека на возачот со иницијали С.К. му бил издаден платен налог, што укажува дека токму Керим го управувал возилото во моментот на прекршокот.

Случајот останува актуелен поради тоа што отвора прашања околу односот кон законот и привилегиите на јавни личности и поранешни функционери, дури и оние во пензија.

Како што утрово објавивме, на социјалните мрежи се појави видео на коешто се гледа како граѓани се расправаат со службеното лице на Пајак-службата кој одбива да отстрани неправилно паркирано возило на велосипедска патека пред ресторан во скопската населба Дебар Маало.

• ДРАМА ВО ДЕБАР МААЛО Пајак служба одби да собере луксузно возило на полицаец, граѓаните збеснаа

Полицаецот одбивал да го крене возилото, објаснувајќи дека станува збор за службено возило, а дека неговиот сопственик е полицаец на должност.

Сепак, по консултација по телефон и поради инсистирањето на граѓаните, на крајот рекол: „Кревајте го“, по што вработените од ПОЦ го отстраниле возилото.

МВР ТВРДИ ДЕКА „ПОРШЕТО“ НЕ БИЛО НА ПОЛИЦАЕЦ Пајак службата чекала налог, вината е кај службеното лице, вели Герасимовски

The post СРЃАН КЕРИМ Е ГАЗДАТА НА ЛУКСУЗНОТО „ПОРШЕ“ Еве како поранешниот амбасадор го искоментира инцидентот во Дебар Маало appeared first on plusinfo.mk.

Скопската полиција му издала платен налог на возачот кој се паркираше пред кафеана во Дебар Маало. Министерството за внатрешни работи информираше дека возилото било подигнато од ПОЦ. Исто така, МВР во соопштението потврдува дека лицето не е полициски службеник.

„Во врска со видеото на социјалните мрежи на кое се гледа непрописно паркирано возило со скопски регистарски ознаки на територија на Дебар Маало во Скопје, Министерството за внатрешни работи ја информира јавноста дека конкретниот настан се случил на 22.03.2025. Имено, возилото е подигнато од страна на ПОЦ, а од страна на СВР Скопје преземени се мерки по член 63 став 6 од Закон за безбедност на сообраќајот на патиштата и на возачот на возилото С.К. издаден му е платен налог. Исто така ве информираме дека предметното возилото не е на полициски службеник.

Во врска со постапувањето пак на полициските службеници при подигнувањето на возилото, веќе постапува Одделот за внатрешната контрола, криминалистички истраги и професионални стандарди при МВР и по завршување на целокупната постапка соодветно ќе ја известиме јавноста“, се вели во соопштението.

The post ПОЛИЦИЈАТА ГО КАЗНИЛА ВОЗАЧОТ НА „ПОРШЕТО“ Ќе мора да плати за паркирањето пред кафеана во Дебар Маало appeared first on plusinfo.mk.

Видео снимката која ги преплави социјалните мрежи, во врска со автомобил „порше“ кој е непрописно паркиран во Дебар Маало, е од настан кој се случил во сабота, на 22 март, потврдуваат од МВР за Курир.

– Возилото е подигнато од страна на ПОЦ и од страна на СВР Скопје е издаден платен налог. Исто така ве информираме дека предметното возилото не е на полициски службеник – појаснуваат од Министерството.

Пајак службата не е виновна

Градоначалникот на Општина Центар, Горан Герасимовски, истакнува дека се крајно некоректни и манипулативни обидите од некои медиуми да се префрли одговорноста на Пајак службата на ЈП „Паркинзи на Општина Центар“ (ПОЦ) која професионално си ја врши работата.

„Отстранувањето на непрописно паркираните возила е по налог на службено овластено лице. Во случајов нашите вработени воопшто не го стопираат кревањето, туку едноставно чекаат налог од страна на службеното лице, полицаец. По добивање на истиот, веднаш постапуваат и го креваат возилото“, напиша Герасимовски на својот профил на Фејсбук.

Тоа впрочем и го објаснува службеникот од ПОЦ во самото видео, додава градоначалникот на Општина Центар.

„Благодарност до екипите на ПОЦ кои неуморно работат на санкционирање на несовесни возачи. Ја поздравувам и активноста на граѓаните кои бараат санкционирање на сите оние коишто со своите возила ги блокираат улиците и велосипедските патеки во Центар. Истовремено, недозволиво е полициски службеник да не сака да си ја врши својата работа. Барам од МВР да ги санкционира полициските службеници кои не постапуваат при очигледни прекршоци. Недозволива е селективноста при казнување на граѓаните“, потенцира Герасимовски.

Според она што се слуша на видеото, возилото стоело повеќе од 4 часа на велосипедска патека, а полицаецот кој е присутен заедно со вработените во пајак службата, вели дека возилото е службено, а сопственик е полицаец на должност.

ДРАМА ВО ДЕБАР МААЛО Пајак служба одби да собере луксузно возило на полицаец, граѓаните збеснаа

The post МВР ТВРДИ ДЕКА „ПОРШЕТО“ НЕ БИЛО НА ПОЛИЦАЕЦ Пајак службата чекала налог, вината е кај службеното лице, вели Герасимовски appeared first on plusinfo.mk.

Граѓани успеаја да издејствуваат пајак службата да отстрани неправилно паркирано возило на велосипедска патека пред ресторан во скопската населба Дебар Маало. Инцидентот бил проследен со неколкуминутна расправија со вработените во пајак службата, кои на почетокот одбивале да го подигнат возилото, објаснувајќи дека станува збор за службено возило, а дека неговиот сопственик е полицаец на должност.

Возилото го предизвикало револтот на минувачите бидејќи било паркирано сред велосипедска патека.

Полицаецот, кој бил присутен на местото заедно со пајак службата, на почетокот се обидувал да ја оправда одлуката да не се подигне возилото.

Сепак, по консултација по телефон и поради инсистирањето на граѓаните, на крајот рекол: „Кревајте го“, по што вработените од ПОЦ го отстраниле возилото.

The post 📽 ДРАМА ВО ДЕБАР МААЛО Пајак служба одби да собере луксузно возило на полицаец, граѓаните збеснаа appeared first on plusinfo.mk.

На улицата Михаил Цоков во скопско Дебар Маало вчера било пронајдено телото на 58-годишна жена од Велика Британија, со иницијали Г.Ф.Д., соопшти МВР.

„Лекар од Итна медицинска помош констатирал смрт, а по наредба на јавен обвинител телото на починатата било предадено на обдукција. Извршен бил увид од екипа на СВР Скопје“, соопшти полицијата.

The post БРИТАНКА E ПРОНАЈДЕНА МРТВА ВО ДЕБАР МААЛО Телото било предадено на обдукција appeared first on plusinfo.mk.

Полицијата попладнево објави дополнителни информации за инцидентот во кој осомничен бегалец од полицијата, во обид да им побегне на полицајци, се качил на дрво високо 15 метри во скопската населба Дебар Маало.

МВР попладнево соопшти дека вчера во 15 часот, во СВР Скопје било пријавено дека на улица „Благој Давков“ било забележано машко лице, најверојатно со психички нарушувања, кое тропало по вратите на становите и вознемирувало станарите.

„Веднаш биле испратени полициски службеници на терен, а кога осомничениот ги забележал, се качил на дрво на висина од 15 метри. По некое време, се симнал доброволно“, пишува во полицискиот билтен.

Убедувањето меѓу полицијата и осомничениот траело речиси два часа, објавија денеска медиумите.

Според МВР, човекот имал иницијали Д.Б., а по укажаната медицинска помош на самото место од екипа на итната помош, тој бил пренесен во здравствена установа.

The post ЧОВЕКОТ КОЈ СЕ КАЧИ НА ДРВО ВО ДЕБАР МААЛО ИМАЛ ПСИХИЧКИ НАРУШУВАЊА Полицијата два часа се oбидувала да го симне appeared first on plusinfo.mk.