Реномираниот македонски режисер Дејан Пројковски подготвува голем музичко-сценски спектакл, мјузикл, во чест на 35 години независност на Македонија, во соработка со „Авалон продукција“ и со „ОХО продукција“.

Ќе учествуваат 120 уметници, а ќе се изведе во 15-ина градови низ Македонија во текот на август и септември.

Деталите за третиот голем проект од прославата на 35 години независност на Македонија беа соопштени денеска.

– Самиот проект е замислен како музичко-сценски перформанс на тема 35 години независност на Македонија, за сите важни моменти кои што нè обединуват, нè прават горди и среќни, односно сè она што е важно во овие 35 години, се разбира низ една уметничка перспектива. Музичко-сценскиот перформанс нема задача да биде некаква хронологија, односно да се занимава со реалното време. Всушност, создаваме една уметничка реалност каде што низ едно музичко-сценско патување ќе патуваме низ тие 35 години, обидувајќи се од два агли да ја гледаме независноста. Едниот агол е генарацијата која беше директен учесник во тоа, а другата е младата гнерацијата која ја наследува независноста. Значи, ќе се обидеме низ еден уметнички начин да ги споиме генерациите и да направиме еден мост – рече Пројковски на денешната прес-конференција во Македонската опера и балет.

Она што е интересно истакна, е што настанот ќе биде еден од најголемите сценски спектакли на отворено, инспирација на голем број музичари, пејачи, актери, од кои еден дел се веќе колективна меморија.

– Ќе ги споиме, се разбира, сите уметности, ќе се занимаваме и со ликовната уметност, со филмот, поезијата и со литературата, односно, ќе исплетеме една мрежа со која ќе ја создадеме таа сценска естетика – истакна Пројковски.

Тој додаде дека освен големиот број на уметници на сцената ќе има и сериозна техника и технологија.

– Ќе биде еден визуелен празник за сите. Игор Џамбазов ќе биде главниот лик што ќе нè води низ приказната низ тие 35 години – кажа режисерот.

Актерот Џамбазов рече дека е среќен и почестен што е одбран да биде церемонијал-мајстор на овој мултимедијален спектакл кој се подготвува со големо внимание, радост и ао одговоност.

– Ќе се обидеме овој празник да важи за сите, за сите граѓани на независна Република Македонија. Не дека досега не било така, но овојпат ќе се стави посебен акцент на тоа дека сите го прославуваме ова. Во настанот ќе бидат вметнати и големите успеси на државата, на нашиот спорт, на нашата уметност. Би сакал на оваа прослава да се радуваме на нашето постоење, на постоењето на нашата држава. Разговаравме со Пројковски кој би бил идеалниот почеток и се сложивме дека тоа би биле антологиските стихови на песната „Македонија“ на големиот Анте Поповски напишани пред 45 години – откри Џамбазов.

На конференцијата се обрати и портпаролката на Владата, Марија Митева.

– Сега после сите овие говори на уметници следува оној дел во којшто политички мораме да ја кажеме определбата на Владата за еден ваков грандиозен проект. Интернационалните ѕвезди се вредни за почит, но македонските уметници, македонската култура се оние коишто го носат духот на една нација и сум исклучително горда и јас, но и целата Влада што успеавме да влеземе во ваква организација преку еден ваков проект, каде што над 120 македонски уметници ќе бидат дел прославата на 35 години независност на Република Македонија – рече Митева и упати благодарност до сите учесници.

Покрај мјузиклот, јубилејот од независноста ќе биде прославе и со настапот на Дејвид Гета на стадионот „Тоше Проески“ и со музичкиот спектакл на плоштадот Македонија во Скопје, на кој главна ѕвезда ќе биде шпанскиот тенор Хозе Карерас.

The post ГОЛЕМ СПЕКТАКЛ СО 120 УМЕТНИЦИ ЗА ПРОСЛАВАТА НА 35 ГОДИНИ НЕЗАВИСНА МАКЕДОНИЈА Мјузиклот ќе се изведе во 15 градови appeared first on plusinfo.mk.

Со антивоената приказна на Бертолд Брехт „Мајка Храброст и нејзините деца“, во режија на македонскиот режисер Дејан Пројковски вечерва во 20 часот во МНТ се затвора јубилејното 50 издание на МОТ. Оваа безвременска драма е третата театарска претстава која Пројковски ја поставува во Новосадскиот театар и која силно резонира со актуелното време во кое живееме исто како во времето кога Брехт ја напишал.

– Живееме во специфични времиња во кои времето се мери според војните и жртвите. Историјата не нѐ научи да се промениме на подобро. Човештвото лесно заборава и повторно се враќаме на истите состојби. Играме слични игри, повторуваме исти трагедии. Светот постојано произведува крв и детски солзи. Достоевски нè потсетува дека никаков идеал не вреди кога ќе падне и само една детска солза. „Мајка Храброст“ е огледало кое го открива вистинското лице на општеството и човекот. Таа, како и човештвото, постојано ја губи својата суштина. Живееме во свет на амбалажа, без суштина каде што се сè препакува. „Мајка Храброст“ е како Сизиф кој повторно и повторно ги води своите деца низ војната и ги губи. Тоа е бескраен циклус. Ми потсетува и на Диоген кој со свеќа во рака бара каде исчезнал човекот, што се случува со него во војната, но и во кризите како короната, бидејќи секогаш кога амбалажата ќе падне суштината ја нема. Претставата е универзална приказна за војната, антивоена драма, но и антидрама со структура на античка трагедија. Во античката трагедија има катарза, но овде таа се трансформира во V-ефект – ефект на оттуѓување што се раѓа во спојот помеѓу актерите и публиката – вели режисерот Пројковски пред изведбата на претставата на МОТ.

Мајка Храброст доаѓа – продава чизми, гас-маски, борбен дух натопен во крвава пареа, солзи и религиозно лудило. Таа е хиената на бојното поле, некрунисаната кралица на воениот капитализам. Оваа претстава е искрена, трогателна семејна сага за тоа како војната ги голта своите деца – но и за тоа како работата мора да продолжи, без разлика на сè.

Во ова театарско ремек дело, покрај Пројковски како дел од македонската авторска екипа работеа и Олга Панго, кореограф, Валентин Светозарев, сценографија, Горан Трајковски, музика и Стефан Светозарев, дизајн на постер.

Во „Мајка Храброст и нејзините деца“ играат: Емина Елор, Дина Дедовиќ Томиќ, Даниел Тот, Чаба Бенце Кемивеш, Золтан Ширмер, Роберт Ожвар, Арпад Месарош, Иштван Кереши, Атила Немет, Даниел Хуста, Габриела Црнковиќ, Даниел Гомбош, Габор Понго, Бенце Салаи, Ливиа Банка.

The post „МАЈКА ХРАБРОСТ И НЕЈЗИНИТЕ ДЕЦА“ ГО ЗАТВОРА МОТ Претставата е во режија на Дејан Пројковски appeared first on plusinfo.mk.

На 26 јули, во рамки на програмата на Националниот театарски фестивал во Инчеон, Јужна Кореја, премиерно беше изведена претставата „Приказната на Електра“, во режија на македонскиот театарски режисер Дејан Пројковски и по текст на Сашо Димоски.

Претставата нуди современо читање на античкиот мит за Електра, при што се издвојува по употребата на јазикот на телото, минималистички дијалози и силна визуелна естетика. Овој пристап создава сценски израз што се разбира без превод – универзален и емоционално силен.

– Работата со корејски уметници беше вистински предизвик, не само поради јазичната бариера, туку и поради нивниот прецизен и визуелно рафиниран пристап кон театарот. Но, токму затоа, кога ќе успееш да се разбереш без зборови, сфаќаш дека темите што ги носи оваа претстава се навистина универзални – изјави Пројковски.

Проектот е резултат на меѓународна соработка помеѓу Театарската асоцијација на Јужна Кореја, Националниот театарски фестивал во Инчеон и македонската театарска лабораторија „Артема“. Сите улоги ги толкуваат актери од Јужна Кореја, избрани преку национален кастинг.

Иако сцената беше азиска, авторскиот тим зад претставата е претежно македонски. Сашо Димоски е автор на текстот и драматург, музиката ја потпишува Сашко Костов, сценографијата и видеодизајнот се дело на Сергеј Светозарев, а костимите ги изработи Раде Василев.

По јужнокорејската премиера, „Приказната на Електра“ ќе биде изведена и во Македонија, каде што ќе го затвори годинашното издание на фестивалот „Охридско лето“ на 20 август.

The post ДЕЈАН ПРОЈКОВСКИ СО ПРЕМИЕРА ВО ЈУЖНА КОРЕЈА „Приказната на Електра“ оживеа на сцената во Инчеон appeared first on plusinfo.mk.

Претставата „Кармен“ е монодрама на актерката Биљана Драгиќевиќ – Пројковска.

„Преку внатрешниот дијалог на жена во криза – Кармен, нејзиниот протагонист – Делибес, открил најголем дел од постојаните политички и социјални тензии во тоа време во Шпанија. Не залудно неговото ремек дело Пет часа со Марио спаѓа во рамките на неговата листа на сто најдобри романи на дваесеттиот век“, стои во информацијата за премиерата.

– Изминатата година светот во еден период остана без претстави, изложби, проекции, концерти. Тогаш се запрашавме за смислата на постоењето на нашата цивилизација. Основниот порив на задоволување на животинските нагони сигурно не е она што човекот го прави поразличен од животните. Кога би дошол крајот на оваа наша цивилизација се прашувам што е она што треба да остане како доказ за смислата и вредноста на нашето постоење. Сигурно тоа ќе бидат делата на Шекспир, Достоевски  музиката на Бах, иконите на Дичо Зограф, приказните на Цепенков, зборникот на Миладиновци. Сигурно нема како податок за нашето постоњее да оставиме колку пластични шишиња сме произвеле, колку делфини сме отруле со нафта во океаните, колку војни сме воделе или колку конзерви успешно сме отвориле. Уметноста е духовната смисла на постоењето на секоја цивилизација. Токму затоа театарот е важен сегмент во Ноевиот ковчег на човештвото бидејќи со векови го создава и чува сѐ она што претставува смисла и вредност на постоењето на нашата цивилизација. И токму поради сето тоа е многу важно завесата во театрите да биде секогаш подигната. Им благодарам на сите колеги во Драмскиот театар што изминативе неколку месеци му покажавме на театарот дека сме негови вистински пријатели – истакна режисерот Дејан Пројковски.

Мигел Делибес (1920 – 2010) е шпански романсиер и член на Кралската шпанска академија, повеќекратен добитник на награди и признанија меѓу кои наградата Надал, Принцот од Астуријас и наградата Сервантес. Тој се смета за еден од најважните автори на XX век. Познат е по делата: Дневник на Хантер (за кое добива Национална награда за литература), Црвениот лист (Награда за фондација Хуан Марш), Стаорците (Награда за критичари), Еретикот (Добитник на Националната награда за литература) и др. Особено се истакнува неговото ремек-дело: Пет часа со Марио, објавено во 1966 година кое претставува верен експонент на социјалниот реализам, многу важен литературен тренд во Шпанија во средината на минатиот век.

The post Премиера на „Кармен“ во режија на Дејан Пројковски во Драмски театар appeared first on plusinfo.mk.