Венко Филипче ја менува својата политика и позиции во зависност од потребите на својот финансиски и политички ментор, Зоран Заев, а кои се во нивен заеднички интерес да се задржат на чело на СДСМ, коментира денеска Антонијо Милошоски од ВМРО-ДПМНЕ во врска со црвените линии на Филипче.

Тој предвидува дека СДСМ по изборите го очекува не само пораз, туку и големи турбуленции во партијата.

– Венко Филипче знае дека ќе претрпи пораз на овие локални избори. Неговата борба после локалните избори, не е борба за позициите на Македонија. Неговата борба, е борба за задржување на чело на СДСМ, бидејќи тој и Зоран Заев имаат интерес СДСМ да ја третираат како нивна приватна сопственост. Затоа оваа предлог-резолуција за наводни црвени линии кон францускиот предлог, е порака со која што Венко Филипче бара спас и поддршка од дел од меѓународната заедница и после поразот на локалните избори да му овозможат и да му помогнат да остане на чело на СДСМ, за во иднина да го доврши предавството што го започнаа Заев и Бујар Османи – рече Милошоски.

Тој вели дека нивното време завршило.

– Најдобро е Венко Филипче наместо предлог-резолуција со црвени линии за францускиот предлог, да предложи внатре во СДСМ предлог-резолуција за сериозни реформи во таа партија која што ја окупираа финансиски олигарси, предводени од Зоран Заев – порача Милошоски, член на Извршниот комитет на ВМРО-ДПМНЕ.

Тој потсети дека на прес-конференција на 1 октомври 2024 година, Венко Филипче изјави дека францускиот предлог е победа и голем успех на нашата дипломатија.

– Парадоксот е толку голем, што денес една година потоа, Филипче изјавува дека се потребни црвени линии и резолуција за заштита од оваа негова во наводници прогласена дипломатска победа. Дали Венко Филипче лажеше во 2024 година кога кажа дека дипломатијата победила со прифаќањето на францускиот предлог или лаже денес кога нуди предлог резолуција со црвени линии за заштита од истиот француски предлог којшто е целосно во корист на источниот сосед – прашува Милошоски.

Според него, Венко Филипче не знае да изгради ниту автопат, ниту клинички центар, но е многу способен, како што рече, заедно со неговиот гуру Зоран Заев, да стави потпис и печат на секој иден документ, којшто дополнително би ја потчинил Република Македонија на ист начин како што тоа го направи Бујар Османи со францускиот предлог и анексите кои што ги прифати во корист на соседна Софија.

– Затоа сметаме дека ваквите изјави и изменети ставови на Филипче, не се порака до македонските граѓани, туку се порака до соседна Бугарија, бидејќи Венко Филипче се надева дека источниот сосед или некој меѓународен актер ќе му помогне да дојде на власт, или барем да ја задржи водечката позиција во СДСМ, бидејќи знае дека нема поддршка од македонските граѓани, а нема поддршка ниту од најголемиот дел од симпатизерите или членовите на СДСМ – вели Милошоски.

The post НАМЕСТО ЦРВЕНИ ЛИНИИ, ФИЛИПЧЕ ДА ПРЕДЛОЖИ СЕРИОЗНИ РЕФОРМИ ВО СДСМ Милошоски предвидува големи турбуленции во партијата по изборите appeared first on plusinfo.mk.

Владата и сите институции доследно да се придржуваат кон определбата за безусловно почитување на јазичните, идентитетските, историските и културните особености на македонскиот народ, како елементи за кои не се преговара со ЕУ, и дека Република Северна Македонија е подготвена да ги исполни обврските од Преговарачката рамка со ЕУ, вклучувајќи ги и уставните измени со јасна определба дека е тоа последната пречка, без прифаќање на нови барања или прашања од билатерален и идентитетски карактер.

Ова се двете главни точки од Резолуцијата за дефинирање заеднички позиции за продолжување на европскиот пат на државата, што денеска ја презентираше на брифинг со медиуми лидерот на СДСМ Венко Филипче.

– Ова се нашите црвени линии. Ова е предлог решение за постигнување на сите заеднички национални и стратешки цели со консензус со оглед на високото мнозинство граѓаните за членство на државата во ЕУ – изјави Филипче.

Документот како работна верзија најпрво ќе биде доставен до сите политички партии, а потоа Собранието треба да се излезе со заеднички документ.

– Документот доаѓа со предлог закон, за улогата на Собранието во процесот на евроинтеграциските преговори. Очекувам сите да бидат конструктивни и да не се злоупотребува за политички цели во предизборни кампањи – нагласи Филипче.

Документот, како што посочи, содржи и конкретна временска рамка, како и механизми кои чекори треба да ги преземе Собранието доколку некоја од земјите членки задираат во идентитетските прашања.

– Сметам дека е крајно неодговорно да не се прави ништо на ова поле. Ако ние постигнеме национален консензус никој нема да може да се бори со нас и да нѐ запре – порача Филипче.

Временската рамка за спроведување на определбите на оваа Резолуција предвидува Владата од 15 до 25 ноември 2025 година да се изјасни дали останува на истиот текст или подготвува и предлага нов текст на уставните амандмани. Доколку предлага нов текст на амандманите, тој да биде усвоен од Владата и доставен до Собранието до 1 декември 2025 година.

„Собранието да ја започне постапката за измена на Уставот и да се достигне до фазата на прво гласање најдоцна до 15 декември 2025 година.

Собранието да ја заврши постапката за измена на Уставот со финално гласање најдоцна до 10 февруари 2026 година.

Истиот ден на финалното гласање и усвојување на Уставниот закон за спроведување на уставните амандмани Владата да испрати писмо до државите членки на ЕУ и до Европската комисија дека е исполнета нашата обврска за одблокирање на преговарачкиот процес и да ги достави потребните документи (Патокази) кои ги има подготвено како инструменти вообичаени за преговорите.

Во истото писмо, Владата да ја повика Европската комисија, согласно Заклучоците на Советот на ЕУ донесени на 18 јули 2022 година, да организира Меѓувладина конференција помеѓу државите членки на ЕУ и Северна Македонија на која ќе се донесат сите потребни одлуки за одблокирање на преговорите за членство и ќе биде отворен првиот кластер – Темелни вредности не подоцна од 15 февруари 2026 година“, се наведува во Резолуцијата што ја предложи Филипче.

The post ФИЛИПЧЕ ПРЕДЛАГА ДО 10 ФЕВРУАРИ 2026 ГОДИНА ДА ЗАВРШАТ УСТАВНИТЕ ИЗМЕНИ Лидерот на СДСМ ги објави црвените линии appeared first on plusinfo.mk.