Грчкиот премиер Киријакос Мицотакис на 8 ноември 2026 година присуствуваше на свечена литургија во митрополитанската црква во Серес (Сер), каде што официјално беа пречекани и изложени религиозните и црковни реликвии што Бугарија ѝ ги врати на Грција.

Ова враќање е резултат на билатерален договор и меморандум за разбирање потпишан меѓу министерствата за култура на двете земји на крајот од септември.

Бугарија на Грција ѝ врати вкупно 48 (според некои извори 53) историски црковни предмети. Мицотакис на церемонијата детално ги наведе следните репатрирани скапоцености: свети икони и процесиски крстови, литургиски одежди и реликвијари, црковни прибори и говорници (аналои), импресивен резбан владички (епископски) престол, позлатени сребрени рипиди (литургиски лепези) со византиски емајл од 16 век.

Овие предмети потекнуваат од периодот меѓу 16 и 19 век. Тие биле однесени од страна на бугарските воени трупи во 1917 година за време на Првата светска војна од манастирот „Свети Јован Крстител“ (Тимос Продромос) кај Серес, старата митрополитанска црква „Свети Теодор“ и манастирот „Панагија Икосифиниса“.

На насловната фотографија се прикажани едни од највредните црковни реликвии кои Бугарија неодамна ѝ ги врати на Грција. Во стаклената витрина се изложени: Сребрена глава – реликвијар (моштехранителница) на Свети Дионисиј (десно) – изработена со исклучителни детали од позлатено сребро. Во неа оригинално се чувал дел од черепот на светецот. Богато резбана сребрена кутија (ковчег за мошти) (лево) – на која се наоѓаат детални релјефни прикази на светци и црковни сцени.

Враќањето на овие црковни реликвии беше реализирано како дел од историска културна размена меѓу Атина и Софија. Во замена за реликвиите, Грција на Бугарија ѝ ги предаде посмртните останки (коските) кои му се припишуваат на средновековниот цар Самоил (заедно со друг антрополошки материјал од четири саркофази), кои беа пронајдени во 1965 година од грчкиот археолог Николаос Муцопулос во базиликата „Свети Ахил“ на Малото Преспанско Езеро. Официјалното примопредавање на коските се случи претходно, на 3 октомври во Солун.

Откако беа преземени од Грција, предметите најпрво беа изложени во Музејот на византиската култура во Солун до 5 ноември, по што пристигнаа на нивната крајна дестинација во Серес.

Мицотакис во својот говор во Серес ја истакна важноста на „културната дипломатија“ и изјави дека договорот ја исправа „историската неправда“ и ја враќа колективната меморија во нејзиниот природен простор. Тој исто така најави дека преговорите со Бугарија продолжуваат со цел да се идентификуваат и вратат и други историски и ракописни вредности кои сè уште се наоѓаат на бугарска територија.

– Бидејќи навистина ништо не би било постигнато без тивките, но упорни преговори што на крајот доведоа до договор за размена со соседната земја. Врз основа на тоа, во истиот момент кога нашите свети мошти се враќаат во Сер, Атина ја исполнува својата обврска со тоа што ѝ ги предава на Софија останките на цар Самуил, заедно со антрополошкиот материјал од четирите саркофази на Свети Ахил – рече Мицотакис.

Мицотакис директно им одговори и на критичарите на договорот во самата Грција кои сметаа дека размената на коските на цар Самуил за реликвиите е нееднаква:

– Договорот кој го отвора патот за репатријација на нашите богатства не е едностран. Она што е навистина еднострано, и што на крајот работи против нас, се инерцијата и неактивноста кои ги држат овие богатства подалеку од нас.

The post МИЦОТАКИС ОТКРИ ШТО ДОБИЛА АТИНА ЗА ВОЗВРАТ НА КОСКИТЕ НА САМУИЛ Грција очекува и други вредности кои се на бугарско тло appeared first on plusinfo.mk.