Страшни детали од нов извештај откриваат брутални казни што се спроведуваат во Северна Кореја, вклучувајќи затвореници претепани до смрт со чекани, егзекуции на бремени жени и ликвидации поради навредување на лидерот Ким Џонг Ун.

Во некои од најшокантните случаи, затвореници биле убиени во тајни „внатрешни егзекуции“ со употреба на тапи предмети, додека сведоци тврдат дека биле извршувани и стрелања на малолетници и покрај официјалните тврдења дека вакви казни се забранети.

Вознемирувачките наоди се дел од извештај на Работната група за транзициска правда (TJWG), кој ги мапира егзекуциите низ затворената држава и укажува на нивно зголемување за време на пандемијата на ковид-19.

Методите на егзекуција варираат во зависност од локацијата. Во населени места, каде што истрелите би привлекле внимание, почесто се користеле тапи предмети како метални шипки и чекани.

144 егзекуции за 13 години

Според извештајот, во периодот од 2011 до 2024 година, односно за време на владеењето на Ким Џонг Ун, се потврдени 144 егзекуции. Од нив, дури 65 се случиле по воведувањето на рестриктивните мерки за време на пандемијата.

Податоците, пренесени и од Јонхап, покажуваат дека егзекуциите се намалиле во периодот од 2015 до 2019 година, но нагло пораснале по затворањето на границите во 2020 година.

Во следните пет години, бројот на смртни казни се зголемил за повеќе од 100 проценти, додека бројот на засегнати лица пораснал за речиси 250 проценти.

Казни за филмови, музика и религија

Посебно зголемување е забележано кај случаи поврзани со гледање јужнокорејски серии, филмови и K-pop музика, како и религиозни активности.

Според извештајот, властите донеле нови закони во текот на пандемијата, со кои овие дејствија се казнуваат многу построго, а низ земјата се идентификувани повеќе локации за егзекуции.

Брутални случаи што ја шокираа јавноста

Извештајот документира и ретки, но особено сурови убиства, меѓу кои и егзекуции со чекани и метални боздогани во тајни, нејавни казнувања.

Дезертери сведочат и за егзекуции на бремени жени и малолетници, што директно ги демантира официјалните позиции на Пјонгјанг.

Еден од најшокантните случаи е ликвидацијата на менаџер на државна фарма за желки, кој ја изгубил наклонетоста на Ким Џонг Ун. Според извештаите, тој бил погубен откако сите млади желки на фармата угинале поради недостиг на храна и електрична енергија.

Државната новинска агенција претходно објави дека лидерот остро ги критикувал одговорните, а подоцна се појавиле информации дека менаџерот бил егзекутиран за да се „постави пример“.

Авторите на извештајот предупредуваат дека, со зајакнувањето на политичката контрола, постои ризик репресијата дополнително да се интензивира.

The post БРЕМЕНИ ЖЕНИ И ДЕЦА ЛИКВИДИРАНИ СО ЧЕКАНИ Сведоци откриваат како режимот на Ким казнува без милост appeared first on plusinfo.mk.

Бројот на загинати во пожарот во пензионерскиот дом во Тузла се зголеми на 11 лица, додека бројот на повредени на 35, известуваат хрватските медиуми. Индекс ја објави изјавата на градоначалникот на Тузла кој потврди дека меѓу загинатите кои биле сместени на седмиот кат на зградата биле и неподвижни лица и лица со деменција и со тешки болести.

Во сопствена анализа, Индекс го поставува прашањето зошто било дозволено овие лица да бидат сместени најдалеку од излезот на зградата? Индекс, повикувајќи се Кликс.ба, тврди дека во Тузла со години било предупредувано дека зградата е небезбедна.

Јавноста во Босна и Херцеговина е гневна поради фактот дека на горните катови биле сместени лица со тешки дијагнози, неподвижни, зависни од туѓа помош, се вели во анализата.

Одлуката да бидат таму ја донела управата предводена од директорот Мирсад Бакаловиќ, член на СДП, која само пред неколку месеци, наместо да подобри услови, го поскапи престојот за 30%, тврди Индекс.

Притоа, уште во септември, се вели во текстот, советничката Драгана Гагро Берберовиќ од „Наша странка“ јавно предупредила на влажните ѕидови, недоволната храна и мобингот врз вработените.

Видео објавено на социјалните мрежи покажало како старите луѓе живеат меѓу мувла и понижувања. Наместо реакција – управата покренала постапка против неа.

„Ова не е медиумска сензација, туку прашање на достоинство и човекови права“, порачале тогаш од партијата.

Стравичниот пожар во домот во Тузла кој синоќа го потресе регионот се разгорел на седмиот кат од зградата.

– Во осум часот ќе се одржи вонреден состанок на Градскиот совет на Тузла, по што ќе следи состанок на градоначалникот и на цивилната заштита. По тој повод ќе планираме понатамошни активности, но откако истражните органи ќе го завршат својот дел од работата – изјави градоначалникот на Тузла за Кликс.

The post ЗОШТО НАЈРАНЛИВИТЕ ВО ЗГРАДАТА ВО ТУЗЛА БИЛЕ СМЕСТЕНИ НАЈГОРЕ? Бројот на жртви порасна на 11, градоначалникот најави истрага appeared first on plusinfo.mk.

Венецуелската опозициска лидерка Марија Корина Мачадо, која ја доби Нобеловата награда за мир, можеби нема да присуствува на свеченоста во Осло, бидејќи веќе повеќе од една година се крие поради сериозни безбедносни закани од владата на Николас Мадуро.

Додека светската јавност го коментира доделувањето на наградата за која, меѓу другото, беше номиниран и американскиот претседател Доналд Трамп, се чини дека вниманието сега е кон биографијата на Марија Корина.

Според некои мислења, таа е симбол на отпорот, но и на стравот од актуелната власт во Венецуела. Мачадо повеќе од една година живее во тајност. Лидерка на венецуелската опозиција, жена која предизвика трепет кај власта на Николас Мадуро, таа исчезна од јавноста во август 2024 година поради закани за нејзиниот живот.

Оттогаш, комуницира само преку доверливи канали, но продолжува да испраќа пораки за „слобода, правда и светлина во земјата на мракот“, јави „Волстрит Џурнал“.

Марија Корина е родена во богато семејство во Каракас, таа студирала индустриско инженерство, а потоа завршила магистратура на Универзитетот Јеил. Влегла во политиката во времето кога Хуго Чавес ја редефинирал Венецуела. Со нејзината организација „Сумате“ ги документирала изборните манипулации и го предводела движењето за демократија.

Нејзините јавни настапи, остриот јазик и безрезервната поддршка за санкции против авторитарниот режим ѝ донеле и обожување и омраза. Но, токму нејзината решителност да се спротивстави на воената и политичка машинерија на Мадуро ја направи најопасниот непријател на власта.

Меѓутоа, зад нејзината политичка харизма се кријат и контроверзии. Некои поранешни сојузници ја обвинуваат за „елитизам“ и за „американски стил на демократија“, тврдејќи дека ја искористила опозициската борба за личен имиџ. Други, пак, ја бранат како „чиста совест на Венецуела“.

И додека во Осло се прашуваат дали Мачадо ќе може да ја прими наградата лично, во Каракас нејзиното име веќе станува мит.

The post НЕИЗВЕСНО ДАЛИ НОБЕЛОВКАТА МАЧАДО ЌЕ ЈА ПОДИГНЕ НАГРАДАТА Зошто се крие венецуелската опозиционерка? appeared first on plusinfo.mk.

Според индексот на владеење на правото на меѓународната организација на граѓанското општество, World Justice Project (WJP), во делот за Европа, Македонија е рангирана на 31-то место од вкупно 40 европски земји. Македонија е пласирана веднаш под Косово и Бугарија, но можеби е интересен податокот дека на ранг-листата се наоѓа повисоко од најслабо пласираната ЕУ-членка, Унгарија, која е рангирана на 34-то место. Тоа веројатно не изненадува многу со оглед на фактот дека унгарската национал-конзервативна влада на премиерот Орбан повеќе од една деценија е изложена на сериозни критики од страна на Европската комисија и други организации поради кршење на демократските правила, принципите на правната држава, како и поради продлабочувањето на корупцијата. Под Унгарија при самиот крај на листата на WJP се и Србија и Албанија.

Посткомунистичките и постсоветските земји недвојбено изразија стремеж да влезат во ЕУ, по секоја цена. Но, кога ЕУ почнува да поставува барања, големиот ентузијазам делумно се претвора во „фаќање кривини“ на европскиот пат. Во источноевропските земји сè уште се чувствува повеќедецениското влијание од нивното авторитарно наследство. Тоа е посилен фактор од руското влијание.

Во медиумите во Западна Европа често се укажува дека институциите во источноевропските земји се слаби. Власта го контролира општеството. Опозицијата не успева да изгради доволно кредибилитет. Медиумите се длабоко поларизирани. Повеќепартискиот систем врз трагите од постокомунистичкото наследство не успева да профункционира на соодветен начин. Владите во овие земји мошне често постапуваат според принципот „земи сè, или соочи се со целосен пораз“. Тешко се прифаќа и гради политичка култура на споделување на власта.

Прибегнување кон популизам и теориите на заговор се неретко белег што го крактеризира начинот на кој се спроведуваат политиките во низа источноевропски земји, без оглед дали се означени како транзициски добитници или губитници. Дали можат да се избегнат постојаните обвинувања против политичкиот противник, да се избегне политичка дебата која се претвора во уцена, проследена со неконтролирани меѓусебни обвинувања, закани, навреди и понижувања? Македонија е еден од добрите примери што јасно го илустрираат и го потврдува интензитетот на таквата негативна спирала, што резултира со губење на сигурноста и довербата во најширок општествен контекст.

Последните години прашањата поврзани со правната држава се најдоа во фокусот на вниманието во Брисел. ЕУ-членките, според Лисабонскиот договор, мораат да ги исполнат на задоволително ниво барањата за владеење на правото за да ги заштитат, меѓу другото, компаниите, економските субјекти и човековите права и слободи.

Европскиот парламент смета дека Европската комисија е премногу нејасна кога им дава препораки на земјите-членки за зајакнување на владеењето на правото. Во исто време, актуелното шведско претседателство со ЕУ добива критики за пасивност, бидејќи, како што тврди еврокомесарката за вредности и транспарентност, Вера Јурова, неопходни се мерки што ќе овозможат ефикасни промени преку кои принципите на владеењето на правото треба да функционираат како универзални вредности, без оглед на какви било разлики во сфаќањата што произлегуваат од иделошката рамка во одделни држави. Во правна држава се ограничува моќта на власта на разни начини, така што граѓаните, компаниите и здруженијата добиваат заштита против самоволието, корупцијата и неефикасноста на администрацијата. Фокусот околу ова прашање добива сè поголемо значење во ЕУ во последните години, најчесто кога станува збор независноста на судството од политичко влијание.

Во јули годинава се очекува Европската комисија да го објави својот четврт извештај за владеењето на правото, кој ќе содржи препораки како да се засили правната држава, бидејќи состојбите во некои земји покажуваат тенденции на постојано влошување на очиглед на сите. Овие прашања, се разбира, по никаков основ не можат да се оддложуваат и туркаат настрана и во земјите кандидадтки што сакаат да се зачленат во ЕУ. Токму затоа очекувањата се свртени најмногу кон Европската комисија која има одговорност и моќ да дејствува во интерес на граѓаните, а не, како што укажуваат критичарите, во интерес на политичарите. Демократијата и почитувањето на елементарните човечки права не се можни доколку не се почитуваат принципите на правната држава.

Во дебатата што се одржа во Европскиот парламент, во пресрет на усвојувањето на споменатиот извештај, многумина побараа бескомпромисен пристап од страна на Еврокомисијата кон земјите во кои злоупотребите на власта отворено го поткопуваат функционирањето на правната држава, поддржувајќи систем на неказнивост во кој корупцијата е практично неуништлива. „Простете на начинот на кој ќе се изразам“, – нагласи германската социјалдемокреатска европратеничка, Биргит Сипел, – „но тоа е неприфатливо и едноставно тера на блуење“.

Блуење, и тоа не врз систем што донекаде и би можел да се нарече правна држава, ставена во функција на оддржливи реформи и зацврстување на општествените темели врз јасно прифатен и применет принцип на еднаквост на сите пред законот. Туку блуење врз „заробен“ систем, во кој интересите на помали групи моќници се во директна спротивност со градењето функционална правна држава, бидејќи многу полесно се снаоѓаат, како риби во вода, доколку државата остане килава. А во таква држава, – слаба и килава, – за оние што живеат во неа, или што останале да живеат во неа, секогаш, откако ќе се задоволат сите лидерски и функционерски апетити, остануваат барем трошки.

The post Правна или килава држава appeared first on plusinfo.mk.