На самитот ЕУ-Западен Балкан што се одржува во Тиват, Црна Гора, Брисел планира да им понуди некои претпристапни бенефиции на земјите-кандидатки од Западен Балкан, а прва се очекува да биде пристап до бесплатен роаминг со земјите на ЕУ.

Оваа вест се очекува денеска во Тиват официјално да ја соопшти претседателката на Европската комисија Урсула фон дер Лајен.

Исто така, Франција и Германија ги здружија силите за да презентираат опции за оние земји-кандидатки во регионот кои веројатно нема да се приклучат на блокот на краток рок, вклучително и учество на состаноци како набљудувачи и нудење пристап до единствениот пазар.

– Постои јасен моментум за проширување. Црна Гора почна да го подготвува својот договор со ЕУ, Албанија напредува во процесот, а и Молдавија и Украина ја отклучија првата рунда преговори – рече претседателот на Европскиот совет, Антонио Коста, кој ги посети земјите-кандидатки низ регионот во изминатите денови.

Францускиот претседател Емануел Макрон и германскиот канцелар Фридрих Мерц ќе бидат меѓу лидерите на ЕУ кои ќе учествуваат на денешниот самит во Тиват, на кој се очекува 27-те земји-членки да дојдат до консензус за тоа колку далеку и колку брзо треба да оди процесот на приклучување на нови членки во блокот.

Ниту една нова членка не е примена откако Хрватска се приклучи во 2013, но во услови на политичка и економска неизвесност, земјите-кандидатки го зголемуваат притисокот да ги отворат вратите.

Црна Гора, која има нешто повеќе од 600.000 жители, има големи надежи дека ќе стане 28. членка на ЕУ до 2028 година. Нејзината апликација беше поднесена до Брисел во 2008.

– Дојдовме до позиција каде што уживаме целосна поддршка од земјите-членки и како предводник меѓу земјите-кандидатки, ние сме на добар пат да се приклучиме кон европското семејство во предвидениот временски рок – изјави премиерот на Црна Гора, Милојко Спајиќ.

The post БРИСЕЛ ЌЕ „ЧЕСТИ“ БЕСПЛАТЕН РОАМИНГ ЗА ЗЕМЈИТЕ-КАНДИДАТКИ? Во Тиват се отворa пакет претпристапни бенефиции appeared first on plusinfo.mk.

Шведскиот премиер Улф Кристерсон оцени дека, и покрај очигледната географска оддалеченост од Европа, Канада би можела да биде дел од поширокиот европски политички простор, бидејќи Европската Унија, како што изјави, не е само прашање на мапа, туку и на заеднички вредности.

Во интервју за канадската телевизија CTV, Кристерсон рече дека самото име на Европската Унија се однесува на географијата, но дека прашањето со кои земји-членки сакаат да се интегрираат политички, економски и вредности е подеднакво важно.

Шведскиот премиер ја опиша ЕУ како „многу гостопримлив клуб за истомисленици“, нагласувајќи ја блискоста на Канада со европските демократии.

Во западните политички и медиумски кругови, сè повеќе се зборува за можноста Канада, како еден од најблиските трансатлантски партнери на Европа, институционално да се приближи уште повеќе до Брисел.

Таа дискусија беше особено оживеана по изјавите на американскиот претседател Доналд Трамп за Канада како можна 51. американска држава, што предизвика силни политички реакции во Отава и го забрза барањето алтернативни сојузи.

Идејата дека Канада припаѓа на европскиот круг на вредности не е нова.

Шефицата на европската дипломатија, Каја Калас, на почетокот на мај, на состанокот на Европската политичка заедница во Ереван, изјави дека „Европа не е прашање на географија, туку на вредности и принципи“, додавајќи дека Брисел затоа е задоволен што Канада учествувала во тој формат.

Сепак, формалното членство на Канада во Европската Унија останува далеку од реално сценарио.

Според правилата на проширување, пристапувањето кон ЕУ е отворено за европските земји кои ги прифаќаат фундаменталните вредности на Унијата и ги исполнуваат политичките, економските и правните услови.

Токму затоа во Канада и ЕУ, наместо за полноправно членство, многу поконкретно се зборува за зајакнување на партнерствата во областите на безбедноста, трговијата, одбраната, дигиталната политика и енергетската соработка.

Канадскиот премиер Марк Карни минатата година во Брисел со лидерите на ЕУ објави ново стратешко партнерство меѓу Канада и Европската Унија, со посебен акцент на безбедносната и одбранбената соработка.

Во официјалното соопштение на канадската влада беше наведено дека ова е чекор кон подлабока врска меѓу двете страни, но не и за започнување на процесот на пристапување кон Унијата.

Засега, затоа, пораката на Кристерсон има повеќе политичко отколку правно значење.

Таа покажува дека во Европа Канада сè повеќе се смета за природен сојузник во време на глобални превирања, но исто така дека Брисел отвора простор за нови форми на поврзување со земјите што ги делат европските политички и безбедносни приоритети, дури и кога тие не се на европскиот континент.

The post ШВЕДСКА ПРЕДЛАГА КАНАДА ДА ВЛЕЗЕ ВО ЕВРОПСКАТА УНИЈА!? Европа веќе не е само географски поим appeared first on plusinfo.mk.

Европската Унија би можела привремено да им го одземе правото на вето на идните земји-членки за да ги спречи да се мешаат во надворешната политика на блокот, објави „Гардијан“, повикувајќи се на извори во ЕУ.

Според весникот, Европската комисија сега разгледува план според кој новите членки нема автоматски да добијат овластување да ги блокираат одлуките за надворешна политика или други прашања што бараат едногласност. Мерката би можела да се применува неколку години по пристапувањето.

Предлогот за ограничување на правото на вето наводно бил покренат за време на преговорите со Црна Гора, која преговара за пристапување 14 години и се надева дека ќе стане 28 членка на ЕУ до 2028 година. Таа во моментов се смета за фаворит меѓу деветте официјални земји-кандидати за членство.

Доколку ова ограничување конечно биде прифатено, договорот за пристапување на Црна Гора подоцна би можел да послужи како образец за другите кандидати, тврди „Гардијан“, истакнувајќи дека мерката е на „работ на правото“ и би морала да биде временски ограничена за да се избегне создавање членки на ЕУ од втор ред.

Германија, пак, поддржува построги ограничувања за неистомислениците од ЕУ и укинување на едноглансоста во одлучувањето. Предлогот на Берлин доаѓа во време кога Брисел постојано се мачи да ги протурка големите одлуки за надворешна политика, како што е огромниот заем од 90 милијарди евра за Киев, поради вградените правила за едногласност на блокот, како и отпорот од земјите-членки кои се противат на финансирањето на Украина.

Голем број претставници на ЕУ оттогаш повикаа на напуштање на принципите на едногласност на блокот, а германскиот министер за надворешни работи Јохан Вадефул нагласи дека ЕУ со над 33 членки не може да продолжи да работи според правилата дизајнирани за помал блок.

Поранешниот комесар за надворешната политика на ЕУ Жозеп Борел слично тврдеше дека едногласноста го направила блокот ирелевантен во меѓународната политика, повикувајќи на формирање помала основна група членки што би донесувала одлуки за клучните политики на ЕУ.

Сепак, критичарите на овој обид го обвинија Брисел дека го користи конфликтот во Украина и дебатата за проширување за централизирање на моќта на сметка на националниот суверенитет. Словачкиот премиер Роберт Фицо предупреди дека укинувањето на правото на вето за фундаменталните прашања на ЕУ би било „почеток на крајот“ за блокот.

The post ЕУ РАЗГЛЕДУВА ПЛАН ЗА ЧЛЕНСТВО БЕЗ ПРАВО НА ВЕТО Ќе биде укината едногласноста во одлучувањето appeared first on plusinfo.mk.

Кога станува збор за европскиот пат на Северна Македонија, Хрватска е силен и конзистентен нејзин поддржувач – изјави хрватскиот премиер Андреј Пленковиќ, кој е во посета на Македонија, за време на заедничката прес-конференција заедно со неговиот домаќин, македонскиот премиер Христијан Мицкоски.

– Ве поддржуваме од првиот ден. Се сеќавам на почетокот од 2000-тите години кога Хрватска беше чекор зад вас. Денес сме веќе 13 години членка на Европската Унија. Нема подобар пример за тоа колку е неправедна сегашната ситуација и колку е важно процесите да се деблокираат и да се направат клучни чекори кон членството – рече Пленкови, притоа потсетувајќи дека Хрватска ќе продолжи да помага во тој процес, како природен дел на односите на двете земји, од сојузништвото во НАТО како и реформите што ги спроведува Северна Македонија.

Мицкоски рече дека со премиерот Пленковиќ разговарале за билатералната соработка, економските односи, инвестициите, инфраструктурното поврзување, енергетиката, европските интеграции, регионалната безбедност, како и за геополитичките случувања што влијаат врз целиот европски простор.

Хрватскиот премиер Пленковиќ од своја страна ги истакна добрите економски односи меѓу двете земји, за кои рече дека постепено достигнуваат ниво од околу 350 милиони евра годишна размена, што смета дека е добра основа која треба дополнително да се зајакнува.

Претходно владините делегации на двете земји одржаа билатерална средба, на која беа потпишани договори за стратешка соработка помеѓу двете земји. Меморандум за соработка потпишаа македонското Министерство за енергетика, рударство и минерални суровини и хрватското Министерство за економија.

– Го поздравувам потпишувањето на овој договор за стратешка соработка, кој е плод на меѓусебната доверба и на односите што ги имаме меѓу двете пријателски земји и двата народа. Особено го цениме добриот третман на Хрватите во Македонија, како и третманот на македонското малцинство во Хрватска. Се радуваме на унапредувањето на таа соработка и ќе продолжиме да ги поддржуваме програмите поврзани со македонското малцинство во Хрватска, исто како што ја цениме грижата за Хрватите во Македонија – рече Пленковиќ.

Во врска со потпишаниот договор за соработка во областа на енергетиката тој рече дека се работи за една од најважните теми, не само за двете земји, туку и за целата Европска унија.

– Во последните години поминавме низ неколку големи кризи и настојувавме да обезбедиме сигурност во снабдувањето со енергија, како и прифатливи цени, што се темел на нашите економии. Верувам дека оваа соработка ќе овозможи дополнителен напредок и во тој сектор. Особено ми е драго што разговаравме и за соработката во транспортот. Двете земји се наоѓаат на важни трансевропски транспортни коридори, а тоа е особено важно за вас – рече Пленковиќ.

Тој уште ја нагласи добрата соработка во областите на туризмот, одбраната – дигиталната трансформација.

МНОГУ МОЖНОСТИ ЗА СОРАБОТКА И ЗАЕДНИЧКА ЕВРОПСКА ПЕРСПЕКТИВА Мицкоски и Пленковиќ по конструктивната и пријатна средба во Охрид

The post БЕВТЕ ПРЕД НАС, А НИЕ СМЕ ВЕЌЕ 13 ГОДИНИ ВО ЕУ, ТОА КАЖУВА СЀ Пленковиќ смета дека македонскиот пат кон ЕУ е исполнет со неправди appeared first on plusinfo.mk.

Европска комисија денеска потврди дека го примила писмото од германскиот канцелар Фридрих Мерц, во кое предлага забрзана интеграција на Западен Балкан и Молдавија, како и придружно членство за Украина.

– Тоа покажува дека постои силна посветеност на земјите-членки проширувањето да стане реалност, што е можно поскоро. Многу е јасно дека проширувањето сега е геостратешка инвестиција во нашиот просперитет, мир и безбедност, наведе портпаролот на ЕК, Гијом Мерсие.

Тој додаде дека членството на Украина во ЕУ е суштински поврзано со безбедноста на Унијата, но оти „подеднакво е важно да се заврши процесот на проширување на ЕУ со сите земји-кандидатки кои работат кон пристапување со години“, при што „сите иновативни решенија треба да бидат водени и од процес заснован на заслуги“.

Но, Мерсие не одговори дали идејата за придружно членство во ЕУ е правно можно без измени на договорите и едногласно одобрување од земјите-членки.

– Сè уште не сме во фаза на правна дискусија, туку политичка дискусија што треба да се одржи во рамките на Европскиот совет. Проширувањето е дискусија водена од земјите-членки. Комисијата е таму за да го олесни процесот и да обезбеди експертиза, но прво ни е потребна политичка дискусија, истакна Мерсие.

ПРВО ПРИСТАП ДО ПАЗАРОТ, ПОТОА ЧЛЕНСТВО Мерц бара интеграција „чекор по чекор“ за Западен Балкан 

The post ПРЕДЛОГОТ НА МЕРЦ НАПРЕДУВА НИЗ ЕВРОПСКИТЕ ЛАВИРИНТИ Забрзано, но „постепено“ членство за Западен Балкан, за да влезе и Украина appeared first on plusinfo.mk.

„Тоа што го научивме е дека е секогаш тешко и ризично да се ветуваат датуми за ЕУ-членство“, рече деновиве шведската министерка за европски прашања, Јесика Росенкранц, коментирајќи ги зачестените барања на Украина да добие фиксен датум за пристапување во ЕУ, по можност веќе во наредната 2027 година.

Дури и најпријателски настроените европски земји кон Украина, меѓу кои несомнено се вбројува и Шведска, заедно со соседните Данска и Финска, ги отфрлаат заложбите за поставување и дефинирање временска рамка со утврдување конкретен датум за проширување на ЕУ.

Украина сè повеќе бара брз пат кон ЕУ. Но и Германија, од која се очекува да го покрие поголемиот дел од трошоците за украинското пристапување кон европските интеграции, се спротивставува. Тоа, се разбира, го засилува украинското разочарување, бидејќи германскиот канцелар Мерц беше категоричен и веќе изрази уверување дека „брза траса“ не е решение, и дека Украина мора да ги исполни критериумите за членство.

Забрзаната постапка би значела дека Украина не би морала да ги исполни таканаречените Копенхашки критериуми за да стане членка на ЕУ. Украинскиот претседател Зеленски посакува да добие јасен и недвосмислен датум за ЕУ-членство, бидејќи знае дека ниту еден Украинец не верува во нејасни ветувања. „Зборуваме за конкретен датум за членство во ЕУ – 2027 година – и очекувам нашите партнери да нè поддржат“, напиша Зеленски на почетокот на февруари на платформата X.

Но, во рамките на ЕУ постои голем скептицизам. Особено во Берлин. Германија е најголемата земја-членка на Унијата, и економски најмоќна. Значаен дел од трошоците за интеграција во ЕУ на земја разорена од војна, со 40 милиони жители и со гигантски земјоделски сектор, би паднале на товар на Германците. Токму затоа Мерц јасно стави до знаење дека не доаѓа предвид Украина да стане членка на ЕУ на 1 јануари 2027 година. „Тоа не е можно“, изјави канцеларот Мерц неодамна по средбата со своите владини партнери, социјалдемократите. Украина треба да има перспектива за приклучување, но тоа е подолг процес.

Во исто време предлогот, кој во последно време се позачестено се заговара на разни нивоа во ЕУ, Украина да добие еден вид членство од Б-класа, без право на глас и со пристап до внатрешниот пазар, не предизвикува никаков посебно голем ентузијазам во Украина. Она што го интересира Киев е зачленувањето да се случи брзо.

Дополнителни главоболки создава и фактот дека неколку земји-кандидати за прием во членството во ЕУ, посебно од Западен Балкан, се пред Украина во редот на чекање. На пример, Црна Гора, која заврши 12 од 33 поглавја од преговорите за членство. Како следна во Брисел се споменува Албанија. Долгиот процес на реформи во пристапувањето, за кој зборува Мерц, и е секако добро познат и на Македонија, која е веќе две децении во чекалната на ЕУ.

Сепак, очекувањата во Украина постојано растат. Како што се укажува, тие во последно време се чини се зголемуваат, а што, меѓу другото, се должи на начнот на кој украинските медиуми известуваат, но едновремено не ја следат ЕУ одвнатре. Никој посебно не им објаснува на Украинците како всушност функционира Унијата или што треба да знаат за германската внатрешна политика (што е од големо значење за ЕУ). Проблематиката околу проширувањето на ЕУ се симплифицира со истакнување на фактот дека „Европејците се плашат од Русите“.

Ниту една земја од ЕУ не ги исполнила сите критериуми кога станала членка, е едно од тврдењата што се потенцираат во дел од украинските медиуми. Патем речено, истото тоа тврдење редовно се исфрала во преден план и во земјите кандидатки од Западен Балкан, како одговор на тврдо поставените реформски барања од страна на Брисел.

Но тоа, сепак, не може да се смета за целосна вистина. Во случајот на скандинавските земји, кога се во прашање Данска и Финска, или Шведска, преговорите траеја по неколку години, се до целосното исполнување на сите поставени критериуми за полноправно ЕУ-членство. Тоа што на некои други земји, како, на пример, на Романија и Бугарија, им е „прогледано низ прсти“, е друго прашање, замаглено делумно преку геополитичките интереси.

Неоспорно е дека геополитичките перспективи и војната во Украина ги интензивираа дискусиите за проширување на ЕУ. Но самата ЕУ придонесе за недоразбирањата, бидејќи, оптоварена со грижа на совеста за недоволната помош на Украина по започнувањето на руската инвазија, делумно да го компензираше тоа со испраќање на двојни сигнали за можно украинско приклучување кон ЕУ.

Сега се чини како сè да е подготвено разочарувањето во Украина да биде уште поголемо. Потребна е перспектива за приклулчување, но тоа подразбира подолг процес, вели Мерц. На каква должина на процесот можат во овој момент да се надеваат и земјите од Западен Балкан, е прашање кое секако не треба да се разгледува изолирано од таквите пораки.

Ставовите околу тоа дека ЕУ мора да се подготви за големо проширување, преку укинување на ветото, зголемување на буџетот, зајакнување на владеењето на правото, како и воведување на пофлексибилно членство, што пред извесно време значајна група експерти назначени од Франција и Германија ги изнесоа како предлози за иднината на Унијата, и понатаму се актуелни.

Со оглед на тоа дека низа ЕУ-членки заземаат јасен став во полза на Украина и на другите земји кандидадтки да се приклучат кон Унијата кога ќе ги исполнат условите, се засилуваат и барањата за реформи за создавање претпоставки за прием на десетина нови членки. Неопходни се промени за да се спроведе процесот на проширувањето, а истовремено и да се подготви ЕУ за други идни предизвици во однос безбедносната ситуација, климатските промени и пандемиите.

Во секој случај, Украина бара преговорите да можат да се усогласат на утврден датум за членство. Но, во пристапните преговори за членство во ЕУ, возниот ред, или, да речеме, редоследот на возовите е спротивен. ЕУ е затворен клуб, каде што мора да се исполнат одредени стандарди, кога некоја земја сака да се приклучи кон европското семејство.

Приемот во членство ќе се случи колку што е можно побрзо. Таков одговор најчесто се слуша. А и сега не се разликува многу од порано. Дури и кога се размислува и разговара за „диференцирано членство“, или можеби „делумно членство“ без право на глас и без сите права и обврски. Сукцесивно членство. И така би можело да се нарече.

Се разбира, вели шведската министерка Росенкранц, секогаш можеме да имаме разни „креативни дискусии“. Каков ќе биде исходот на оваа најнова дискусија околу „редуцираното“ членство, е прашање на кое сè уште нема јасен одговор.

The post Креативни решенија за кочење на ЕУ-членството appeared first on plusinfo.mk.

Пратеничката Дафина Стојаноска од ВМРО-ДПМНЕ го прозва лидерот на ДУИ за неговите изјави дека наводно договарал предвремени избори.

Стојаноска вели дека вистина е дека Али Ахмети се пазарел за влез во новоформираната влада во 2024 година, но дека ВМРО-ДПМНЕ принципиелно ја одбила понудата.

„Али Ахмети кажува дека со претседателот Мицкоски пред една година договорил предвремени избори, но не ја кажува вистината за средбата во мојата канцеларија, каде нудеше влез во Владата, без да бара претседателско место во Собранието и со прифаќање едно министерско место помалку од тоа што го бараше Влен, само да биде дел од истата оваа влада. Но, ние останавме истрајни во она што беше порака од народот – дека ДУИ мора да оди во опозиција. Друг пат, пред да кажува невистини, нека размисли добро и нека биде подготвен дека ние ќе кажуваме вистини“, објави Стојаноска на својот Фејсбук профил.

Пратеничката ја завршува објавата прашувајќи дали изјавите на Ахмети служат за да се спречи, како што вели, ерозијата во членството на ДУИ и ерозијата кај досегашните поддржувачи на ДУИ.

The post AХМЕТИ ДА НЕ ЛАЖЕ ДЕКА ДОГОВАРАЛ ПРЕДВРЕМЕНИ ИЗБОРИ „Се пазареше да влезе во Влада во 2024 година, го одбивме“ appeared first on plusinfo.mk.

Поранешниот градоначалник на Струмица Костадин Костадинов објави дека го одмрзнал членството на СДСМ. Одлуката на Костадинов доаѓа откако во јули тој го замрзна членството поради одлуката на лидерот на партијата, Венко Филипле за кандидат за градоначалник да го поддржи општинскиот претседател на партијата, Марјан Даскаловски.

По доволно поминато време и по донесена лична одлука, одлучив да го одмрзнам моето членство во СДСМ, објави на својот фејсбук-профил поранешниот градоначалник на Струмица, Костадин Костадинов.

„Сакам јасно да нагласам дека останувам зад сите мои претходни ставови и позиции по однос на бројни прашања од јавен интерес и дека овој чекор не значи нивно менување или повлекување. Во овој момент не најавувам никаква форма на активен ангажман, туку стојам на располагање, со почит кон партијата, нејзините вредности и секој член поединечно. Единството бара подавање рака, држење до принципи и искрени разговори во имe на секој еден социјалдемократ“, порача тој.

The post КОСТАДИНОВ ГО ОДМРЗНА ЧЛЕНСТВОТО ВО СДСМ Единството бара подавање рака appeared first on plusinfo.mk.

СДСМ е заробена партија, функционира по принцип на должничко-доверителски односи и таму има луѓе против кои се водат сериозни кривични постапки во моментов, дополнително и поранешниот и актуелниот лидер исто така, вели во гостување на Сител лидерот на движењето ЗНАМ Максим Димитревски.

– Нема ништо ново, нема нова идеја. Сите наводно нивни конструктивни политики како опозиција се апсолутно неконструктивни. Креираат фиктивни сценарија, одредени заговори во јавноста, како со мигрантските кампови, тиа се само обиди да се избега од актуелните политички теми, како Законот за судскиот совет, со кој ќе се оневозможи да имаме вакво судство какво што го имаме – приватизирано или пристрасно судство. Потребна е правда и оваа власт ќе го испорача тоа.

За новото раководство на СДСМ, Димитриевски вели „далеку од тоа да е ново“.

– Една невидена рашомонијада, но нивна работа, само се потврдуваа онаа теза што ја зборувам подолг временски период. Не зборувам за членовите на СДСМ, зборувам за раководството. Во членството има прекрасни луѓе, не добиваат и никогаш нема да добијат шанса бидејќи ова е едно акционерско друштво. Ако во минатото беше 50/50 на релација Заев – Филипче, сега е 70/30 во акционерскиот удел во однос на Заев – Филипче. Тоа е нивна работа, нека тераат – рече Димитриевски.

Тој додаде дека сè поголем број членови на СДСМ бараат пристапница во ЗНАМ и „нашите врати се отворени, особено за вистинските социјалдемократи“. Според него, „СДСМ оди надолу и ова раководство ќе му прогласи стечај“.

На прашањето дали ќе има или ќе нема предвремени избори тоа на ЗНАМ му одговара од секој аспект.

– Ние повторно ќе се провериме каде сме на политичката сцена. На Македонија и е потребна политичка стабилност и еден период каде треба да се испорача кон граѓаните.

За последниот извештај на ЕУ и дека нема напредок во правосудството, претседателот на ЗНАМ се осврна на вчерашната оставка на јавниот обвинител и рече дека „не можете со сила како извршна власт да се мешате во работата на независната судска или обвинителска власт“.

– Ете тргнаа некои процеси. Му беше оставено шанса на јавниот обвинител, за жал не ја оправда довербата. Мислењето во јавноста за таа независна власт во државата е таква. Министерот не може да оди по ходници и лично да ги разрешува судиите, туку треба да се донесат законски решенија кои ќе дадат можност на вистинските професионалци, да се одважат и да влезат во процесот на промени преку еден нов состав на Републички судски совет и во Советот за јавни обвинители – вели Димитриевски.

Тој истакна дека веќе одржале конгрес и оти е задоволен од работата на своите кадри. Вели дека разговараат со премиерот, кој има апсолутно право како мандатар да предлага нови имиња за ресори од кои не е задоволен во нивното работење, тоа ги опфаќа и кадрите на ЗНАМ.

– За носењето мигранти во земјава, Димитриевски вели дека за ова е разговорано во владината коалиција и никогаш не е отворено прашањето за отворање мигрантски кампови зошто Македонија нема таков капацитет. – Нам ни се потребни станови за млади брачни парови во Македонија, а не станови за мигранти – рече Димитриевски, кој потенцира дека нема простор за отворање мигрантски кампови во Македонија.

The post СДСМ Е ЗАРОБЕНА ПАРТИЈА, КРЕИРА ПРИКАЗНИ ЗА МИГРАНТИ Сè повеќе членови бараат пристапница во ЗНАМ appeared first on plusinfo.mk.

Wolt ја активира претплатничката услуга Wolt+ во Македонија, наменета за корисници кои нарачуваат храна, намирници и производи од локалните продавници присутни на платформата. Со Wolt+, сите нарачки од партнерите обележани со W+ во апликацијата се испорачуваат со нула денари надомест за достава. Месечната претплата изнесува 199 денари, со можност за годишен пакет по намалена цена, а новите корисници можат да го пробаат сервисот бесплатно во период од два месеца.

Нула надомест за достава кај W+ партнерите кои се квалификуваат, транспарентни минимални износи, двомесечен бесплатен пробен период и можност за откажување во секое време директно во апликацијата.

За корисниците кои почесто нарачуваат, Wolt+ се „исплатува“ со околу 2–3 нарачки месечно, според вообичаените трошоци за достава. Платформата со W+ ги обележува рестораните и продавниците кои се наоѓаат на растојание до 5 км од корисникот на апликацијата, а минимален износ во кошничката е 350 денари за ресторани, 350 денари за продавници и 700 денари за намирници. По активирање на претплатата, корисникот во апликацијата веднаш може да види кои партнери се означени со W+. Апликацијата овозможува претплатата да се откаже во секое време преку корисничкиот профил. Wolt+ се обновува автоматски, а со членството можете да го управувате или да го откажете во секое време од табот Wolt+ во вашиот профил.

Wolt+ е осмислен со јасна корист за потрошувачите, како намалување на вкупните трошоци за достава за оние кои нарачуваат почесто, со едноставни правила видливи во апликацијата и транспарентни услови за откажување.

Но, бенефитот од платформата го чувствуваат и партнерите – рестораните и продавниците кои немаат потреба да инвестираат во сопствена онлајн продавница, а стигаат до многу поголем број потрошувачи. Платформата ја зголемува видливоста на малите бизниси, а со тоа и бројот на нивни потрошувачи. Сега со обележувањето на рестораните, маркетите и специјализираните продавници со W+ значка се зголемуваат и можностите за ексклузивни понуди за потрошувачите. Со приклучување на Wolt+, корисниците откриваат повеќе омилени места што се во околината, што за партнерите значи почести посети од потрошувачи и повисока фреквенција на нарачки.

– Со Wolt+ сакавме преку намалување на трошоците за достава на корисниците на платформата Wolt да им овозможиме уште поудобно и подостапно искуство при нарачување. Најголеми придобивки имаат оние што користат почесто, но и повремените корисници остваруваат значајни заштеди. Во повеќето случаи, членството се исплатува по само две до три нарачки месечно. Бенефитот не е само за потрошувачите, рестораните и продавниците добиваат поголема видливост и повисока побарувачка. Нашите партнери се задоволни и веќе забележуваат значителен пораст на нарачките – изјави Ѓорѓе Давидовиќ, генерален менаџер за Србија и Wolt Македонија.

Претплатата важи само за државата каде е купена претплатата, а правилата, минималните износи и опсезите може да се ажурираат во секое време. Сите детали  важечките услови се достапни во апликацијата и на веб-страницата на Wolt.

Wolt е технолошка компанија со седиште во Хелсинки, со мисија да донесе радост, едноставност и заработка во соседствата ширум светот. Wolt развива платформа за развој на локалната економија која ги поврзува луѓето што сакаат да нарачаат храна, намирници и други производи со луѓе заинтересирани да ги продаваат и испорачуваат. Wolt е основан во 2014 година и во 2022 се здружи со DoorDash, кој во 2025 година ја заврши аквизицијата на Deliveroo. Денес, Wolt е дел од DoorDash семејството и работи во повеќе од 30 земји.

The post НУЛА ДЕНАРИ ДОСТАВА СО МЕСЕЧНА ПРЕТПЛАТА Wolt+ стартува и во Македонија appeared first on plusinfo.mk.