Понекогаш не ни треба многу за да замислиме подобар живот, доволно е да погледнеме како функционираат уредени општества како Данска, Норвешка, Шведска или Исланд, но и Луксембург и Монако, па да се запрашаме зошто тоа да не биде можно и кај нас. Не како далечен идеал, туку како реална цел.

Ова го пишувам не како критика, туку како искрена мисла, како граѓанин што сака нормален, достоинствен живот во својата држава. Како некој што верува дека подоброто не е недостижно.

Mартин Лутер Кинг имал сон за слобода, рамноправност и основни човекови права. Ние денес имаме држава, имаме слобода, имаме демократија, имаме право на глас и избор и речиси сè друго. Но прашањето не е само што имаме, туку што правиме со тоа. Дали ја користиме слободата за да градиме, или за да се делиме? Дали демократијата ја разбираме како одговорност, или како дозвола за незаинтересираност, неодговорност и јавшлук односно негрижа за заедничкото добро и иднина?

Токму начинот на кој ги користиме овие вредности ја обликува и државата во која живееме. Затоа, уредено општество не се создава само со формални права, туку со нивна доследна примена во секој сегмент од системот, во институциите, во секојдневните одлуки и во однесувањето на секој поединец. Само тогаш правилата стануваат навика, а вредностите реалност.

Во уредено и правично општество, судството не се наведнува пред политичката или финансиската моќ, без разлика дали станува збор за поединец или групација, а сите носители на јавни функции се еднакви пред лицето на правдата. Во таков систем, функцијата не е заштита, туку обврска. Законот не познава привилегирани, а довербата се гради преку отчетност и интегритет. Јавната функција не се доживува како можност за лично збогатување, туку како обврска да се служи. Позиции што и онака носат одговорност, плата и одредени привилегии, не треба да бидат средство за дополнителна корист. Функционерот треба да биде почестен со довербата да работи за народот. Зашто јавната функција не е лична корист, туку јавна обврска.

Во таква средина, власта не се плаши од критика, а опозицијата не постои за да руши, туку за да коригира. Политичката култура не се сведува на конфликти, туку на одговорност, каде пратениците и министрите знаат дека мора да одговараат пред граѓаните, а не пред партиските структури.

Здравството, како едно од најчувствителните прашања, не остава простор за компромис. Никој не треба да чека со месеци за грижа што му е неопходна, ниту да се чувствува како да мора да бара алтернативни патишта за да добие третман. Хипократовата заклетва не смее да биде формалност, туку секојдневна пракса. Таа не треба да биде лична желба или доба воља туку обврска на докторот и медицинскиот персонал. Довербата меѓу пациентот и лекарот не се купува, таа се гради. Системот треба да биде ефикасен и организиран, така што брзината и квалитетот на услугата да не зависи од нечија можност да плати повеќе, туку од потребата и човечкото достоинство.

Економската сигурност е исто така темел на достоинствен живот. Плата што овозможува мирно, достоинствено и безгрижно поминување на месецот не е луксуз, туку основа. Паралелно со тоа, социјалниот систем треба да биде праведен и насочен да им помага на оние на кои им е најпотребно, но и да спречува злоупотреби. Серизен социјален систем врши постајно ажурирање на лицата на кои им е потребна помош и строго ги казнува сите злоупотреби. Солидарноста има вредност само кога оди рака под рака со одговорноста.

Но да не заборавиме дека важен дел е и културата на однесување. Во едно уредено општество одговорноста не доаѓа само од закони и казни, туку и од внатрешно чувство и од односот со луѓето околу нас, колегите, пријателите, заедницата. Кога човек чувствува самопрекор ако не придонесува, но и поддршка да стане подобар, тогаш системот почнува навистина да функционира. Во таква средина, вредностите не се наметнуваат туку тие се живеат.

Чудно е како во други држави лесно прифаќаме ред, правила и одговорност, а во сопствената држава често забораваме на истите тие вредности. Затоа токму тука треба да почне промената, од нас самите. Сведоци сме и на тоа како дисциплината доаѓа дури кога ќе стане неизбежна. Со мерките за безбеден град во Скопје, за кратко време сите почнавме да ги почитуваме правилата, не затоа што одеднаш станавме поодговорни, туку затоа што системот нè потсети на тоа. И тука се наметнува прашањето: зарем таа свест ја немавме и претходно? Дали навистина мора да нè „потсетуваат“ со казни за да го направиме она што веќе знаеме дека е правилно?

Во едно уредено општество, правата и обврските на граѓаните одат рака под рака. Сите граѓани, без разлика на нивната етничка или друга припадност, треба да се чувствуваат рамноправно и почитувано. Но истовремено, таа рамноправност подразбира и заедничка одговорност да се почитува државата, нејзините институции, симболи и обележја (знаме, грб и химна), како и нејзините вредности; државата да се претставува достоинствено и да се гордееме со неа. Да ја чуваме како зеница во окото, да ја градиме камен по камен, а не да ја разградуваме. Зашто само кога сите ја доживуваме како своја, таа може вистински да функционира. И токму од нашиот однос по ова прашање денес зависи дали и идните генерации ќе ја препознаат како своја.

Посебна приказна се младите. Потребна ни е држава што нема да ги губи своите млади, туку ќе ги задржува. Има ли нешто поубаво да живеете во држава во која младите нема да бараат иднина надвор, туку ќе ја гледаат и ќе ја градат дома. Затоа што најголемиот пораз на едно општество не е сиромаштијата, туку заминувањето на оние што можат да го направат животот подобар.

Во сета оваа согледување и преиспитување на објективната слика за нас и нашиот однос често забораваме на нешто суштинско, како на пример за образованието и воспитувањето. Не само формалното, туку и домашното е она што ги гради вредностите уште од најрана возраст. Не можеме да очекуваме функционална држава ако не создаваме генерации што знаат што значи одговорност, почит и заедништво. Менталитетот „да му цркне козата на комшијата“ или уште пострашно ,,нека умре комшијата, за да му ја земам козата“ не носи напредок, туку носи застој поради постоење злоба и завист. Наместо тоа, потребни ни се хуманизам, заедништво и солидарност, чувство дека туѓиот успех не е закана, туку можност за заеднички раст. Не ми е јасно како и каде се загуби поранешниот хуманизам, слога, заедништво и солидарност?

И сето тоа нема смисла без грижа за околината. Чистиот воздух, водата и природата не се луксуз, туку основно право. Екологијата не смее да биде споредна тема, туку приоритет мерка за тоа колку навистина се грижиме за иднината. Држава и мнозинството поединци што не ја чува својата околина, не ја чува ниту својата иднина.

И на крај, не можеме да зборуваме за уредено и праведно општество без да ја отвориме и темата за одговорност на оние што стекнале богатство на сметка на заедницата. Редно е сите ние да се обидеме со сите сили да им ја всаднме филантропијата која најголем дел од нив ја немаат или ја заборавиле и тоа не треба да биде исклучок, туку вредност и обврска за секој од нив. Во зрело општество, оние што имаат повеќе, вложуваат повеќе во образованието, здравството, културата и иднината на сите.

На крајот, прашањето не е дали ова е можно, туку дали сме подготвени и доволно свесни тоа постојано да го бараме. Државата не е апстрактна категорија, таа е одраз на нашите очекувања, нашата толеранција и нашата волја за промена. И затоа, време е да престанеме да мислиме дека сме помалку способни, помалку одговорни, помалку умни и помалку интелигентни, помалку работливи, а повеќе мрзливи од оние во уредените држави.

Она што за некои е реалност, за мене и за многумина денес е сè уште само убав и недосонуван сон. Прашањето е дали ќе продолжиме да сонуваме или конечно ќе почнеме да го создаваме тој свет и тој систем? Ова не е прашање на идеологија, туку на нормалност затоа што уредено, безбедно, сигурно и стабилно општество не му пречи никому.

Ова се само основните темели. Ако ги поставиме правилно, сонот нема да биде далечна слика туку почеток на реалност. Секако, ниту едно општество не е совршено. Но разликата е во тоа дали сакаме да се движиме напред или да стоиме во место.

Од нас зависи.

The post И јас имам сон! appeared first on plusinfo.mk.

Министерот за здравство, Азир Алиу денеска се обрати на состанокот на Економско-социјалниот совет во Владата, на кој ги презентираше новините во предлог законот за заштита од пушење.

– Постојниот Закон е стар речиси 30 години и не одговара на денешната реалност, особено со појавата на нови производи, како што се електронските цигари и несогорливите тутунски производи, нејасните правила за угостителските објекти и слабата заштита на младите. Овој закон е дел и од нашите обврски кон Европската Унија, но уште поважно, тој е одговор на реалните проблеми што директно ги чувствуваат работниците, компаниите и семејствата. Суштината е дека тутунот не е само здравствен предизвик, туку и економски товар за нашата државата. Тутунот е одговорен за над 3.600 смртни случаи годишно, односно околу 13% од вкупниот број смртни случаи, со што Македонија е меѓу земјите со највисока смртност од пушење во Европа, со над 170 смртни случаи на 100.000 жители, наспроти европскиот просек од 95 отсто – истакна министерот Алиу.

Тој посочи дека освен здравствениот аспект – економскиот товар е речиси четирипати повисок од вкупните приходи што државата ги собира од акцизите на тутунските производи, односно за секој денар што влегува во Буџетот преку акцизи на тутун, економијата троши приближно четири денари за справување со здравствените последици.

– Работниците во угостителството се најизложената група на штетните последици од пушењето. Со овие законски решенија чистиот воздух на работното место станува право на секој работник. Воведуваме и принцип на пропорционална одговорност – работодавачот што ги презел сите мерки и го пријавил прекршувањето, нема да одговара за туѓо однесување. Во однос на грижите за вработените во угостителскиот сектор, научните сознанија од светски референтни истражувања покажуваат дека сеопфатните забрани имаат неутрален или позитивен ефект врз продажбата во угостителскиот сектор. Додека пак, истражување спроведено во нашата држава од декември 2025 година покажува дека само 14% од угостителите сметаат дека сегашната регулатива е целосно неефикасна, а околу 50% се подготвени да се приклучат на иницијативи за средини без чад. Нивните забелешки не се против забраната, туку против нејасните правила и нелојалната конкуренција. Тоа го решаваме со универзални правила за сите. Предвидени се и разумни преодни периоди – шест месеци за изложувањето во малопродажбата и една година за угостителските тераси – заклучи министерот Алиу.

The post ЗА СЕКОЈ ДЕНАР АКЦИЗА ОД ТУТУН, ДРЖАВАТА ПЛАЌА СКОРО 4 ДЕНАРИ ЗА ЛЕКУВАЊЕ Македонија е меѓу земјите со највисока смртност од пушење во Европа appeared first on plusinfo.mk.

За чист воздух во Скопје не е доволно да се посади дрво или да се замени неколку автобуси – потребна е синхронизирана и одлучна акција на сите нивоа, порача Каја Шукова, кандидатката за градоначалничка на Скопје од СДСМ, на дебата на ТВ24.

Таа истакна дека изворите на загадување се јасно идентификувани и дека борбата со овој проблем мора да опфати интервенции во греењето, јавниот превоз, управувањето со отпадот и одржувањето на зеленилото.

– Идентификувани се изворите на загадување и на ниво на Град Скопје и на ниво на држава. Потребна е интервенција во многу сектори: начинот на затоплување, јавниот превоз, управувањето со отпадот и зеленилото, кое со години е запоставено – изјави Шукова.

Шукова нагласи дека е подготвен сеопфатен план со мерки на краток, среден и долг рок, при што дел од активностите може да почнат веднаш и да дадат брз ефект.

– Има мерки што може многу бргу да се реализираат, како што е БРТ системот, кој директно ќе го намали загадувањето од сообраќајот. Или, на пример, проектот за 15 нови паркови за 15 месеци, кој ќе придонесе за почист воздух и подобар урбан живот – додаде таа.

На прашањето за индустриските загадувачи, меѓу кои и цементарницата „Усје“, Шукова посочи дека постои катастар на загадувачи и дека мерките за контрола се веќе предвидени во градските и државните стратегии.

– Имаме доволно планови, време е за акција – рече таа, потенцирајќи дека спроведувањето на мерките досега било попречено од слабите капацитети на општините и недостигот на средства.

Шукова истакна дека клучен проблем е недостатокот на соработка меѓу Градот и општините, што мора да се надмине доколку Скопје сака трајно решение за загадувањето.

– Државата е тука да помогне преку стратегии, поддршка и идентификација на загадувачи, но големиот дел од реализацијата останува на локалната самоуправа – нагласи Шукова.

Како идна градоначалничка, таа вети дека ќе воспостави функционален систем за координација меѓу сите институции, за Скопје конечно да добие чист воздух, повеќе зелени површини и модерен јавен превоз.

The post ШУКОВА ВЕТУВА РЕВОЛУЦИЈА ВО ГРАДОТ 15 нови паркови и чист воздух за само 15 месеци appeared first on plusinfo.mk.

Комисијата за здравство при Собранието денеска едногласно ги усвои заклучоците и препораките од Надзорната расправа на тема „Ефектите од аерозагадувањето во Скопје и другите градови врз здравјето на луѓето и мерките што се преземаат за заштита на јавното здравје“, соопшти пратеничката на ВМРО-ДПМНЕ, Рашела Мизрахи.

Таа објасни дека сослушувањето на сведоци при надзорната расправа траеше 5 дена. Сослушани се експерти, претставници на Светска банка, здруженија на граѓани и истакнати активисти, лекари, директорите на СЗО и на ИЈЗ, министри, заменици министри, како и одговорните лица и раководителите на надлежните институции што беа задолжени да постапат по заклучоците од јавната расправа на истата тема во 2018 година. На петтиот ден обраќање во надзорната расправа имаше и премиерот Христијан Мицкоски.

– Вкупно учествуваа 42 сведоци, кои го дадоа својот исказ и одговараа на прашањата поставени од членовите на Комисијата, а дополнителни прашања поставуваа и сите други присутни и заинтересирани пратеници – изјави пратеничката Мизрахи.

Комисијата за здравство усвои повеќе заклучоци и препораки, додаде таа и таксативно ги наброја.

– Во борбата против аерозагадувањето мора учествуваат сите чинители, почнувајќи од сите власти, контролните механизми и инспекторати, индустрија, граѓани (домаќинства), научни институции и истражувачи, стручни здруженија, медиуми и различни целни групи на граѓани.  Од сведочењата на претставниците на актуелната власт може да се увиди посветеноста и решителноста да се подобри состојбата со аерозагадувањето. Уверена сум дека наредната надзорна расправа на оваа тема ќе биде сосема поинаква и во поинаква атмосфера поради сериозен напредок во битката за чист воздух – рече Мизрахи.

Заклучоци:

Комисијата утврди дека од вкупно усвоени 33 препораки и задолженија од Јавната расправа на тема „Енормно загадување на амбиенталниот воздух во Република Македонија“ одржана во Собранието во 2018 година, властите целосно или делумно спровеле само 6. За 6 години властите имале скромни и недоволни 15% реализација на препораките и задолженијата кои им биле дадени од Собранието.

Согласно исказите од раководните лица од државните институции кои учествуваа во надзорната расправа за состојбите во кои ги затекнале при преземање на функцијата од своите претходници, Комисијата утврди бројни недоследности во спроведувањето на законската регулатива како и негрижа за кадровските решенија, што сериозно ја намалила функционалноста на институциите.

Комисијата утврди потреба од измени и дополнување на законската регулатива и зајакнување на мерките за справување со аерозагадувањето како и на кадровскиот капацитет на институциите релевантни за борбата против аерозагадувањето.

Комисијата заклучи дека во борбата против аерозагадувањето потребна е силна мултинституционална соработка, како и дирекна инволвираност на научната фела, индустријата, медиумите, граѓанскиот сектор и меѓународните организации.

Согласно исказите на сведоците од лекарската фела, директорот на Светската здравствена организација во Македонија како и Институтот за јавно здравје, Комисијата утврди дека долготрајната изложеност на загаден воздух допринесува кон појавата на бројни заболувања, дополнително ја влошува од други причини нарушената здравствена состојба, претставува неспорен фактор кој влијае на бројот на смртни случаи и нанесува огромна финансиска штета врз здравствениот систем во државата.

Комисијата утврди дека за ефикасно справување со аерозагадувањето потребна е државна стратегија со долгорочни мерки со цел трајно подобрување на квалитетот на амбиенталниот воздух на целата теритирија на државата.

Препораки:

1. Се препорачува Владата, надлежните министерства, општините и Градот Скопје да креираат мерки и решенија кои се базираат на релевантни податоци и мерења од релевантни институции и да се употребуваат научни и технички докажани методи за анализа и намалување на загадувањето.

2. Комисијата препорачува општините и Градот Скопје да изработат планови за управување со квалитет на амбиентален воздух со јасно дефиниран временски распоред за спроведување на мерките опфатени со плановите.

3. Се препорачува Владата, општините и Градот Скопје да креираат мерки за намалување на загадувањето од согорување цврсти горива во домаќинствата. Да им се овозможи и понуди на граѓаните приклучок кон соодветен централен систем за греење или да се субвенционираат почисти системи за греење на домаќинствата и енергетски ефикасна реконструкција на објектите.

4. Комисијата препорачува на Владата, Министерството за локална самоуправа, Министерство за транспорт и врски и Министерството за животна средина да изготват и достават до Собранието измени и дополни на Законот за инспекциски надзор, Законот за комунални дејности и Законот за јавна чистота, со цел зајакнување на системот за контрола на штетните влијанија врз животната средина.

5. Комисијата препорачува на Министерството за животна средина, општините и на Градот Скопје да изготват дополнителни контролни мерки за издадените А и Б Интегрирани дозволи, како и за елаборатите за животна средина.

6. Се препорачува на Министерството за економија да изготви мерки за субвенционирање и поволности за набавка на возила со минимални емисии.

7. Се препорачува на Министерството за енергетика, рударство и минерални суровини, Државен пазарен инспекторат, Министерството за внатрешни работи и Царинската управа да изготват дополнителни контролни мерки за квалитетот на горивата и содржината на издувните компоненти од транспортот.

8. Комисијата препорачува Министерството за образование и наука до го зголеми финансирањето на научни и стручни истражувања и иновации од областа на намалување на аерозагадувањето.

9. Комисијата препорачува Владата, општините и Градот Скопје да ги заменат системите за загревање на јавните објекти кои продуцираат цврсти честички со системи кои немаат директна емисија на цврсти честички.

10. Се препорачува на Владата и Министерството за социјална политика, демографија и млади да овозможат инсталирање на системи за чист и свеж воздух во објектите во кои престојуваат деца и ранливи категории на граѓани, во општините каде е детектирана зголемена концентрација на цврсти честички.

11. Се препорачува на Министерството за економија да изготви законска регулатива за квалитет на цврсти горива.

12. Комисијата препорачува зајакнување и зголемување на капацитетите на ЈП Национални шуми и надлежните институции за справување со шумските пожари.

13. Се препорачува на Институтот за јавно здравје да спроведува кампањи за свесност по ризикот по здравјето и животот како и препораки за заштита на граѓаните за време на периодите со високо загадување на воздухот.

14. Комисијата препорачува дека е потребно Министерството за животна средина да изготви и достави до Собранието закон за индустриски емисии, во кој ќе интегрира и унапредени методи на мерење на издувната емисија.

15. Се препорачува на Министерството за животна средина да подготви сет на итни краткотрајни мерки за секој град за намалување на емисиите од индустријата и заштита на населението во периоди на зголемена концентрација на цврсти честички.

16. Комисијата препорачува на Државниот инспекторат за животна средина да овозможи јавна евиденција за извшените контроли и преземените мерки за борбата против аерозагадувањето.

The post ОПШТИНИТЕ ДРЕМАТ, ПА МИНИСТЕРСТВОТО ЌЕ ИМ ИЗГОТВИ МЕРКИ ЗА ЧИСТ ВОЗДУХ! Собранието ѝ препорача на Владата да им донесе централно греење на сите домаќинства appeared first on plusinfo.mk.

Го поддржуваме секој чекор што води кон почист воздух – од користење електрични автомобили, до инсталирање соларни панели на покриви и развој на енергетски задруги каде граѓаните самите ќе можат да произведуваат и користат чиста енергија. Оваа Влада е цврсто определена за зелена иднина. Интензивно се работи на реализација на капитални проект, изјави министерката за енергетика Сања Божиновска.

На денешната надзорна расправа во Собранието на тема „Ефектите од аерозагадувањето во Скопје и во другите градови врз здравјето на луѓето и мерките што се преземаат за заштита на јавното здравје” Божиновска  информира за проектите за зелена енергија кои придонесуваат за чист воздух.

-Греење без емисија- топлински пуми, високо ефикасни котли, когенеративни гасни централни, проект државата не загадува-водиме со пример, такси без директни емисии. Преку овие мерки, Министерството за енергетика, рударство и минерални суровини ја потврдува својата посветеност кон создавање на одржлив и еколошки енергетски систем, кој ќе обезбеди почист воздух и подобар квалитет на живот за сите граѓани – рече Божиновска.

Божиновска потсети на скандалот со набавка на токсичен мазут за греење на болници и јавни објекти од 2023 година кој, како што рече имал големо влијание врз здравјето на граѓаните.

The post ВЛАДАТА Е ЦВРСТО ОПРЕДЕЛЕНА КОН ЗЕЛЕНА ИДНИНА Божиновска вели дека се поддржува и секој чекор кој води до почист воздух appeared first on plusinfo.mk.

Чиста животна средина и спречување на аерозагадувањето се обврска на секој поединец, но и на секоја институција, порача министерот за локална самоуправа Златко Перински на денешната надзорна расправа во Собранието на тема „Ефектите од аерозагадувањето во Скопје и во другите градови врз здравјето на луѓето и мерките што се преземаат за заштита на јавното здравје”.

Тој нагласи дека иако Министерството за локална самоуправа нема директни ингеренции во областа на аерозагадувањето, сепак активно се вклучува со конкретни активности таму каде што има можност.

– Заштитата на животната средина и природата, како и преземањето на мерки за спречувањето на загадувањето на воздухот се утврдени како надлежности на општините согласно Законот за локална самоуправа. Ова значи дека борбата за чист воздух е заедничка обврска и одговорност на сите нивоа на власт – рече Перински.

Тој се осврна и на Акцискиот план за спроведување на програмата за одржлив локален развој и децентрализација за периодот 2024–2026 година, во кој се предвидени конкретни мерки за справување со аерозагадувањето.

– Во таа насока, Акцискиот план предвидува конкретни мерки за справување со аерозагадувањето, препознавајќи ја сериозноста и влијанието на квалитетот на животот – подвлече Перински и додаде:

„Предвидените мерки опфаќаат подобрување на сообраќајните услови за превозни средства кои не предизвикуваат аерозагадување, зајакната соработка меѓу државата и општините, институционални активности, како унапреден мониторинг, засилен инспекциски надзор и подготовка на локални планови за квалитетен воздух. Спроведувањето на овие мерки бара координиран ангажман од повеќе институции, со што темата добива заслужен приоритет во националните развојни политики“.

Министерот истакна и дека Министерството за локална самоуправа посредно учествува во финансирање на активности во областа на животната средина и дека е потребно постојано предлагање на мерки и решенија коишто ќе го подигнат или превенираат проблемот со аерозагадувањето.

– Министерството за локална самоуправа посредно учествува и во финансирање на активности во областа на животната средина. Една од таквите активности е распределбата на средства остварени по основ на надомест на производство на енергија од фосилни горива, согласно Законот за животна средина, членот 187а. Владата на предлог на министерот за локална самоуправа донесува уредба за методологија за распределба на средствата остварени како приход од надоместокот за производство на енергија од фосилни горива. Собраните средства се користат за финансирање на програми и активности за управување со животната средина во однос на влијанието од енергетскиот сектор и тоа во подрачјата на општините сразмерно на приходот остварен од наплатата на овој надомест – заклучи Перински.

The post „ЧИСТИОТ ВОЗДУХ Е ЗАЕДНИЧКА ОДГОВОРНОСТ“ Перински вели дека борбата против аерозагадувањето е обврска на сите нивоа на власт appeared first on plusinfo.mk.

За годинава, напомена, имаме не помалку од 15 инвестиции, но бројот се зголемува.

– Ќе бидете сведоци на објавување камен-темелници и на почнување производства на некои од директните странски инвестиции. Но, да не ги потцениме и домашните инвестиции кои исто така ќе почнат, користејќи го унгарскиот кредит – напомена Мицкоски.

Во врска со турскиот „Казанџи холдинг“, премиерот информира дека не е само оваа компанија заинтересирана за влез во Македонија кога се работи за изградба на когенеративни централи.

– „Казанџи холдинг“ е само една од неколкуте компании што изразија желба да инвестираат. Овие инвестиции за кои ние преговараме се темелат исклучиво на пазарни услови: струјата што ќе се произведува ќе се продава на слободниот пазар, цената на топлинската енергија ќе се регулира со одлука на Регулаторната комисија и ресурсот е на товар на инвеститорот. Нема оваа Влада да каже кој да ја гради, зошто тој, која е причината, кој ќе го прави далноводот…, и по тоа се разликуваме од нашите претхоници – истакна Мицкоски.

Според него, за да се почувствува ефектот на почис воздух од капацитетите што планира да ги гради „Казанџи холдинг“, ќе треба време, 3 до 5 години.

– Чуда се невозможни, жалам што не е направено ништо досега од аспект на тоа, да им овозможиме на граѓаните енергенс за затоплување на домовите што ќе биде еколошки, – рече Мицксоки

The post ПРЕМИЕРОТ НАЈАВИ КАМЕН ТЕМЕЛНИЦИ, ПРОИЗВОДСТВО, РАСТ Македонија ќе има најголем број странски инвестиции по глава на жител во регионот appeared first on plusinfo.mk.

Премиерот Христијан Мицкоски денеска најави мегаинвестиција во енергетиката со која ќе се обезбеди и чист амбиентен воздух – ќе се градат гасни централи, а домаќинствата бесплатно ќе се приклучуваат на идните нови топлови и на секундарната гасна мрежа, што ќе ја гради турската компанија„Казанчи Холдинг“.

– Денес имавме средби со раководството на „Казанчи Холдинг“, која со своите енергетски компании што работат под брендот „АКСА“, преставува еден од најголемите енергетски гиганти во својата област. Со повеќе од 25 години искуство, „АКСА Енерџи“ е водечка турска компанија во енергетскиот сектор и клучен глобален инвеститор во одржлива енергија. Компанијата располага со инсталиран капацитет од над 3.500MW во 8 земји. Mнозинскиот сопственик на „АКСА Енерџи“, „Казанчи Холдинг“ работи во 22 земји на четири континенти. Јас во минатото говорев, кога станува збор за решавање на проблемот со загадување на воздухот, дека разговараме со инвеститори кои се заинтересирани за градење на когенеративни гасни централи, кои всушност се единственото трајно решение за загадениот воздух. Сè друго би значело ставање на проблемот под тепих – рече Мицкоски.

Станува збор, објасни тој, за когенеративни централи со 500MW инсталиран капацитет кои произведуваат 4,1TWh електрична енергија и 720 GWh топлинска енергија на годишно ниво.

– Токму „Казанчи Холдинг“ е компанијата со која разговараме за изградба на секундарна мрежа на гас и топловодна мрежа која ќе стига до домаќинствата по исклучително поволни услови. Приклучоците на гасоводна и топловодна мрежа се предвидуваат на 0 денари за домаќинствата, а цената на природниот гас за домаќинствата ќе биде многу пониска од онаа цена која е на берзите. Целиот проект, изградба на секундарна гасоводна мрежа, топловодна мрежа и когенеративните централи е димензиониран на инвестиција од над една милијарда евра. Оваа инвестиција не е важна само за трајно решавање на проблемот со загадување на воздухот кој е еден од главните проблеми на граѓаните за кој што сум високо свесен и за кој што ќе ве излажам ако ви кажам дека има брзи решенија, туку и за енергетскиот потенцијал на државата – рече Мицкоски.

Инвестициите во ова поле, потенцира премиерот, се гаранција и зацврстување на нашата енергетска независност која во 21 век е всушност и зацврстување на сувереноста на државата во нејзиното одлучување и водење на политика.

– Разговараме за проекти кои се од темелно значење за животната средина, економијата, енергетската независност и стратешкото позиционирање на Македонија. Разговорите продолжуваат и сигурен сум дека за брзо време ќе се договориме и ќе има конкретни чекори во реализација на нивните планови. Само така работиме за иднината на сите граѓани, како премиер ќе дадам се од себе да се реализираат овие работи кои се од децениска и клучна важност за Македонија – рече премиерот Мицкоски.

The post МЕГАИНВЕСТИЦИЈА ОД 1 МИЛИЈАРДА ЕВРА ЗА ЧИСТ ВОЗДУХ И ЕНЕРГЕТСКА НЕЗАВИСНОСТ НА МАКЕДОНИЈА За домаќинствата бесплатен приклучок на гас appeared first on plusinfo.mk.

„Ја поздравувам најголемата донација во земјата од страна на македонската компанија ЕКОТИП во вредност од 1 милион евра. Оваа значајна донација на напредни прочистувачи од реномираниот германски производител Mann+Hummel ќе обезбеди воздух со највисоки медицински стандарди за најранливите категории: во градинките, училиштата, болниците и другите јавни установи каде што квалитетот на воздухот е од клучно значење. Оваа иницијатива не само што ќе го подобри квалитетот на воздухот во јавните установи, туку и ќе помогне во креирање на поздраво општество. Воедно продолжуваме дијалог со претставниците на германската Mann+Hummel, кои деновиве со тимот на Владата и Екотип ја анализираат можноста за понатамошна соработка со фокус на долгорочни иницијативи и заеднички развојни перспективи. Ваквите примери нека бидат повик за акција, секој придонес, мал или голем, е чекор кон поздраво општество“, напиша Мицкоски.

The post ЧИСТИОТ ВОЗДУХ Е НАШЕ ЗАЕДНИЧКО ПРАВО Македонска компанија донираше 1 милион евра за подобрување на квалитетот на воздухот appeared first on plusinfo.mk.

– Според податоците на Дирекцијата за транспорт, само лани биле регистрирани 100 илјади возила увезени од 81 земја, од кои над 33 илјади ја исполниле само нормата Еуро 4, додека 22 илјади биле постари од 15 години. Оваа политика доаѓа како обид да се исполнат меѓународните барања за заштита на животната средина и за безбедноста на патиштата, бидејќи постарите автомобили се сметаат за позагадувачки и поопасни за сообраќајни несреќи – објавија албанските медиуми.

Црна Гора го забрани увозот на автомобили произведени пред 2009 година. Косово од 2017 година не дозволува увоз на возила постари од 10 години, а од 1 јануари 2025 година го забрани увозот на автомобили произведени пред 2015 година. Во моментов, просечната старост на автомобилите во регионот е 18 години, додека во ЕУ е 12 години.

The post АЛБАНИЈА ЌЕ ГО ЗАБРАНИ УВОЗОТ НА ВОЗИЛА ПОСТАРИ ОД 2011 ГОДИНА Политика за почист воздух и за побезбеден сообраќај appeared first on plusinfo.mk.