Градоначалникот на Чикаго, Брендон Џонсон, остро ја отфрли можноста за распоредување на Националната гарда во неговиот град, откако синоќа потпиша извршна наредба за заштита на жителите од претстојната федерална репресија против имиграцијата.

Џонсон потсети на неодамнешното распоредување на воени сили во Вашингтон по наредба на претседателот Доналд Трамп и порача: „Не сакаме да видиме тенкови на нашите улици“.

Според градоначалникот, Чикаго се соочува со можност за „милитаризирано спроведување на имиграциските закони“, со потенцијална појава на војници, воени возила и вооружени патроли, иако тоа не било побарано од локалните власти.

– Добивме веродостојни извештаи дека имаме денови, а не недели, пред нашиот град да види некаков вид милитаризирана активност од страна на федералната влада. Во моментов не е јасно како точно ќе изгледа тоа – изјави Џонсон.

Со извршната наредба, градските одделенија се задолжуваат да ги заштитат жителите од евентуални федерални акции. Локалната полиција, како што нагласи Џонсон, нема да смее да „соработува со воениот персонал во полициски патроли или во спроведување на цивилна имиграција“.

Градоначалникот, кој е дел од Демократската партија, ја нарече администрацијата на Трамп „непредвидлива и импулсивна“, додавајќи дека токму тоа ја зголемува неизвесноста околу следните чекори. Тој го повика републиканскиот претседател „да се предомисли“ и да не го милитаризира градот.

Трамп претходно овој месец ја активираше Националната гарда во Вашингтон со образложение дека криминалот е неконтролиран, иако полициската статистика не потврдува такви трендови. Тој најави дека Чикаго би можел да биде следниот град каде што ќе „воспостави ред“.

Џонсон, пак, тврди дека во последната година токму криминалот е во пад, со значително намалување на бројот на убиства, грабежи и вооружени напади.

The post „НЕ САКАМЕ ТЕНКОВИ НА УЛИЦИТЕ“ Трамп сака војска во Чикаго, градоначалникот му се спротивстави appeared first on plusinfo.mk.