Македонското друштво „Илинден“ – Тирана, друштвото „Преспа“ и здружението „ВМРО ДПМНЕ Албанија“ упатија честитки по повод 2 Август – Илинден, порачувајќи дека празникот претставува завет на достоинство и симбол на единството на Македонците.

„Да го почитуваме и достоинствено да го славиме овој голем ден, посветен на Илинденското востание од 1903 година, како и на славниот Илинден од 1944 година, кога беа поставени темелите на современата македонска државност. Илинден е ден кога со длабока почит се сеќаваме на бројните револуционери и борци кои со својата храброст, пожртвуваност и крв ги испишаа најславните страници од историјата на македонскиот народ“, се наведува во честитката на МД „Илинден“, потпишана од претседателот Никола Ѓурѓај, објавувајќи фотографија од излет на Македонците во Тирана во 1937 година.

Честит и вековит Илинден од име на друштвото „Преспа“, организација за заштита на правата на Македонците во Албанија, посакува и неговиот претседател Едмонд Темелко.

„Илинден е огнот во нашите гради, нашата гордост и нашиот вечен корен! Тој е заветот што нѐ обединува сите Македонци, и овде во татковината, и во секој агол на светот. Денес со длабока почит им се поклонуваме на сите херои кои го дадоа својот живот за нашата слобода. Нивната храброст е нашата сила, а нивниот сон е нашата обврска да продолжиме горди и исправени“, се наведува во честитката.

Претседателката на здружението „ВМРО ДПМНЕ Албанија“ Елена Симонофски, честитајќи го Денот на двата Илиндена порачува „Каде и да си, чувај го илинденскиот пламен во срцето. Да продолжиме да го негуваме и зачувуваме она што нашите предци го извојуваа со толкава пожртвуваност и љубов кон татковината. За многу години големиот празник. Нека ни е вечна и непокорна Македонија“.

Честитка упати и Македонска алијанса за европска интеграција (МАЕИ) во која се нагласува дека Илинден е најсветлиот ден во македонската историја и траен симбол на вековната борба за слобода, правда, достоинство и национален опстанок и порака да го чуваме македонскиот идентитет и да останеме обединети.

The post ИЛИНДЕН Е ЗАВЕТ ШТО НЀ ОБЕДИНУВА Македонците од Албанија го честитаа празникот appeared first on plusinfo.mk.

Денеска се одбележува Меѓународниот ден на трудот 1. Мај – симбол на работничката борба за достоинствени услови, фер плата и човечки права. Овој ден не е само празник, туку потсетник дека правата кои денес ги сметаме за нормални се изборени со долгогодишни жртви и отпор.

Почетоците на прославувањето на овој ден водат во Чикаго во 1886 година, кога работниците протестирале барајќи осумчасовно работно време. Протестите завршиле трагично, но токму тие настани станале темел за глобалното работничко движење. Во 1889 година, Втората интернационала, го прогласува 1 Мај за меѓународен ден на работниците.

Овој празник се одбележува во повеќе од 80 земји ширум светот – со протести, синдикални маршеви, но и како ден за одмор и дружење. Во многу држави, 1 Мај е неработен ден, но неговата суштина останува иста: потсетување дека работничките права никогаш не се дадени засекогаш, туку постојано треба да се бранат.

Кај нас, 1 Мај традиционално се одбележува како државен празник. Граѓаните го користат денот за одмор во природа, излети и дружење, но често се заборава вистинската порака – дека зад овој ден стои борба за правда. Синдикатите повремено организираат активности и апелираат за подобри услови за работниците, повисоки плати и почитување на трудот.

Прослава со протест за поголеми плати и повеќе права

Сојузот на синдикати на Македонија (ССМ) денеска со протест ќе го одбележи Меѓународниот ден на трудот, на кој ќе побара повисоки плати и подобри услови за работа.

Протестот почнува во 11 часот пред Работничкиот дом на ССМ, а потоа ќе продолжи пред Собранието, Стопанската комора и Владата, каде ќе бидат упатени синдикалните барања. Во фокусот е барањето за зголемување на минималната плата на 600 евра, што според ССМ е неопходен минимум за достоинствен живот.

На протестот нема да учествува Самостојниот синдикат за образование, наука и култура (СОНК), кои во пресрет на празникот вчера организираа конференција на тема „Трудови политики и колективни договори – законска рамка, примена и предизвици“.

Посебен режим за движење и бесплатен паркинг

Министерството за внатрешни работи соопшти дека денеска во централното подрачје на Скопје ќе биде воспоставен посебен сообраќаен режим поради протестот што по повод 1 Мај – Меѓународниот ден на трудот, го организира ССМ.

„Протестот e предвидено да почне пред зградата на ССМ на ул. „Мирче Ацев“ бр.4 со движење лево по ул. „Филип 2-ри Македонски“, десно по ул. „11-ти Октомври“, право по ул.„Димитрие Чуповски“, десно по ул .„Васил Главинов“, право по бул. „ВМРО“, лево по бул. „Илинден“ до пред Владата“, се вели во соопштението од МВР.

Министерството апелира, граѓаните да ги почитуваат наредбите што ги издаваат полициските службеници по сообраќајниците каде што ќе се движат учесниците на протестот.

По повод 1 Мај – Меѓународниот ден на трудот, денеска дел од паркиралиштата со кои стопанисуваат ЈП „Паркинзи“ на Општина Центар и ЈП „Градски паркинг“ – Скопје ќе бидат бесплатни за сите граѓани. Редовно ќе се наплаќаат само затворените паркиралишта со автоматска наплата.

Честитки од институции и организации

По повод празникот, традиционално, честитики упатуваат повеќе државни институции и политички организации.

„Како претседателка на сите граѓани, потсетувам дека имаме обврска да градиме општество во коешто трудот се цени и вреднува, а социјално-економските права се остваруваат!

Да се однесуваме кон работниците како кон вреден социјален капитал, ако сакаме да ги задржиме тука, или да ги вратиме дома. Да сфатиме дека само задоволни работници може да бидат вредни и продуктивни! Среќен Први мај!“ – се вели во првомајската честитка од претседателката Гордана Сиљановска-Давкова.

„На сите работници во Република Северна Македонија им упатувам искрени честитки и благодарност за нивниот придонес. Вашиот труд е темел на економскиот напредок, на стабилноста на семејствата и на иднината на државата.

Како институции, имаме одговорност да продолжиме да создаваме услови за безбедна, правична и достоинствена работа, во која секој човек ќе биде почитуван, заштитен и соодветно вреднуван“ – се вели во честитката од претседателот на Собранието Арфрим Гаши.

СДСМ: Ова е ден за борба, а не за прослава

СДСМ преку соопштение испрати порака дека 1 Мај е ден на борба, а не на прослава, изрази поддршка за најавениот протест на работниците, оценувајќи дека нивната состојба е влошена и дека институциите не преземаат доволно мерки за подобрување на животниот стандард.

Од партијата во соопштението посочуваат дека, наместо празнично одбележување на Меѓународен ден на трудот, работниците се принудени да излезат на улица поради, како што велат, ниските примања и растот на трошоците за живот. Според СДСМ, нема зголемување на платите, а не е прифатен ниту нивниот предлог за минимална плата од 600 евра.

Министерот Минчев со посебна благодарност до административците 

По повод 1 Мај – Меѓународниот ден на трудот, министерот за јавна администрација, Горан Минчев упати благодарност кон сите работници за нивниот труд, одговорност и секојдневна посветеност, со што, како што посочи министерот, директно придонесуваат за развојот на општеството.

– Посебно сакам да ја истакнам улогата на административните службеници, кои со својата професионалност и ангажман обезбедуваат квалитетни и ефикасни услуги за граѓаните – пишува во неговата пишана изјава.

Како што се додава во пишаната изјава, Министерството за јавна администрација останува целосно посветено на унапредување на условите за работа, зајакнување на професионалниот развој и обезбедување еднакви можности за сите.

– Заедно продолжуваме да градиме модерна, транспарентна и ефикасна јавна администрација, кој е вистински сервис на граѓаните. Честит 1 Мај – Меѓународен ден на трудот – порача министерот.

СПМ: Ја славиме солидарноста, без разлика на професијата 

„Трудот не смее да биде товар или експлоатација. Тој треба да биде креативна сила преку која секој од нас се остварува себеси и придонесува за заедницата која подеднакво се грижи за секого“ – се вели во честитката од Социјалистичакта партија на Македонија по повод 1 Мај.

„Затоа, денес ја славиме солидарноста, онаа невидлива нишка што нè поврзува сите нас, без разлика на професијата.
Кога еден работник е обесправен, сите сме засегнати. Кога еден напредува, сите одиме напред.

Ви посакуваме овој празник да го поминете спокојно, но и со обновена надеж. Нека ни биде мотив да продолжиме да градиме општество во кое социјалната правда не е само пишан збор, туку реалност што ја живееме. Општество во кое трудот е ценет, а работникот е слободен, достоинствен и горд“ – се вели во честеитката.

Вреди: Достоинствената работа заслужува праведна плата и достоинствени услови

Денеска, на 1 Мај – Меѓународниот ден на трудот, ја оддаваме почитта на потта, трудот и жртвата на секој човек кој со своите раце ја гради иднината на нашата земја. Овој ден не е само симболика, туку постојан потсетник дека достоинството на трудот мора да се брани секој ден, со решителност и со конкретни дела – се вели во честитката од партијата Вреди.

„Го реафирмираме нашиот непоколеблив ангажман за правата на работниците, за праведни плати и за достоинствени услови на работното место. Веруваме дека секоја капка пот заслужува праведен надомест, секој труд заслужува почит, и секој работник заслужува живот со достоинство.

Презедовме конкретни чекори: ја зголемивме минималната плата на 26.400 денари нето, важен чекор кон подобрување на животниот стандард и намалување на нееднаквостите. Ги зголемивме платите на здравствените работници, наставниците… и презедовме значајни мерки за поддршка на различни категории во општеството“ – се набројува во честитката на Вреди.

Вреднувањето на трудот се покажува со дела

„Празниците се честитаат, но, вистинското вреднување на трудот се покажува преку дела“, напиша денеска на неговата Фејсбук-страница, в.д. директорот на Фондот за здравствено осигурување, Сашо Клековски.

Tој наведе дека е реализирано кумулативно номинално зголемување на платите во јавното здравство од 22 отсто во последните две години, што според него претставува околу 15 проценти реален раст над инфлацијата, што е резултат на заеднички залагања на Владата, здравствените власти и синдикатите.

„Договорени натамошни зголемувања до 2028 година. Пет отсто раст на вработени во 2025 година од 18.000 на 18.900 вработени во јавно здравство, прв раст по 2019 година. Историски 33 проценти зголемени капитации на матичните лекари. Благодарност на сите здравствени работници. Преку подобри услови и искрено ценење на трудот – до поквалитетно здравство за сите. Честит 1 Мај – Ден на трудот“ – се наведува во објавата на Фејсбук.

Честитки и до припадниците на Армијата

По повод 1 Мај – Меѓународниот ден на трудот, министерот за одбрана Владо Мисајловски упати искрени честитки до сите вработени во одбраната и сите припадници на Армијата.

„Почитувани вработени во одбраната и припадници на Армијата, денешниот ден ја симболизира вредноста и важноста на трудот на секој еден вработен. Високо ја вреднувам вашата работа, вашата посветеност, мотивираноста која е видлива секој изминат ден, работејќи на процесите кои нè прават побезбедни и посилни. Ве охрабрувам со истиот ентузијазам, професионалност и посветеност да продолжите да придонесувате во заштитата на националните интереси и безбедноста на граѓаните”, истакнува министерот Мисајловски.

Професионализмот, тимската работа и заедништвото кои ги покажувате пред секој предизвик и секој ангажман, рече министерот, се квалитети кои ве одликуваат и ве водат секојдневно. „Вие сте темелот на безбедноста на државата и сигурноста на македонските граѓани. Честит  1. Мај!”, потенцира министерот.

The post ТРАЕН ПОТСЕТНИК ЗА ДОСТОИНСТВОТО НА ТРУДОТ И РАБОТНИЧКИТЕ ПРАВА Македонија го слави 1 Мај appeared first on plusinfo.mk.

Највисоки претставници на државниот врв и на политичкиот живот во земјава им го честитаа големиот христијански празник Богојавление Водици на православните верници.

Покрај претседателот на државата Гордана Сиљановска-Давкова и премиерот Христијан Мицкоски, соопштенија и објави по повод водици објавија и претседателот на Собранието Африм Гаши, бројни министри во владата, како и лидерот на СДСМ Венко Филипче.

„Во име на Собранието на Република Северна Македонија и во мое лично име, Ви упатувам честитки по повод празникот Водици. Овој празник ја носи пораката на духовно прочистување и надеж, потсетувајќи нѐ на значењето на заедништвото и посветеноста во градењето на напредна и праведна држава. На православните верници им посакувам овој ден да донесе внатрешен мир, а во нивните домови да владеат здравјето, благосостојбата и спокојот“ – се вели во соопштението од претсдателот на Собранието Африм Гаши.

Министер за јавна администрација Горан Минчев
 го честита празникот во свое име и од име на Министерството за јавна администрација.

„Нека овој празник донесе мир, здравје и благосостојба во Вашите домови и биде поттик за заедништво, солидарност и меѓусебно почитување. Во духот на празникот, со заедничка посветеност, да продолжиме да придонесуваме кон унапредување на јавната администрација, во интерес на сите граѓани“ – напиша министерот Минчев.

Лидерот на опозициската партија СДСМ Венко Филипче, кој денеска беше во Охрид, го честиташе големиот христијански празник Богојавление – Водици.

– Го честитам големиот празник Богојавление, Бог се роди, во мое лично име и во име на Социјалдемократскиот сојуз на Македонија. На момчето коешто и годинава исто како и лани го фати крстот, му посакувам многу успех и среќа оваа година. Тоа што скокна во ладните води на Охридското езеро е доказ за една голема храброст, голема умствена и телесна сила – изјави Филипче во Охрид.

Заменик претседателот на Владата и министер за транспорт, Александар Николоски, денеска од Охрид го честиташе големиот христијански празник Богојавление-Водици, посакувајќи здравје, среќа и благосостојба на сите верници и на првиот кој дојде до Светиот крст во осветените води на Охридското рзеро.

– Драго ми е што имаме еден прекрасен ден, мислам дека имаше преку 20.000 луѓе кои се појавија на градското пристаниште, многу туристи, многу странци. Да му честитам и на оној кој што го фати крстот, да посакам добро здравје, среќа, да го пратат во текот на годината и за убави работи да се гледаме – порача во празничната изјава вицепремиерот Николоски.

И градоначалникот на Скопје Орце Ѓорѓиевски им го честита правникот Богојавление на православните верници.

„Овој празник за мене има и посебна лична тежина, бидејќи денес го одбележувам и мојот именден, што го прави чувството уште посилно и поблагодарно.

Масовноста, сплотеноста и заедништвото на мојот народ, кои денес јасно ги сведочиме, се силен доказ дека нашата вера, традиција и духовни вредности живеат и се пренесуваат од поколение на поколение, како темел на нашиот идентитет и опстојување“ – напиша Ѓорѓиевски во објава на својот профил на Фејсбук.

Тој му честита и на Дарко Митровиќ, кој го извади Светиот Крст од осветените води на реката Вардар и му посака добро здравје, среќа и радост, за него и за неговото семејство.

The post ДРЖАВНИОТ ВРВ ГО ЧЕСТИТА ГОЛЕМИОТ ХРИСТИЈАНСКИ ПРАЗНИК Желби за здравје, благосостојба, спокој… appeared first on plusinfo.mk.

Претставници на сестринските партии на ВМРО-ДПМНЕ со честитки за достигнувањата на партијата кои ги имаше како што велат особено во последните две години и притоа укажуваат на победите на парламентарните, претседателските и локалните избори.

„Честитки, бидејќи не е толку својствено за една партија да го прослави овој извонреден успех. Кога ќе погледнам наназад мислам дека овој успех може да се објасни. Она што сакам да го кажам е дека сте блиску до народот, блиску сте до граѓаните, знаете што мислат граѓаните и знаете за нивните потреби и што е потребно за иднината”, рече во своето видео обраќање на присутните на Конгресот, Гунтер Крихбаум, пратеник во Бундестагот од ЦДУ и државен министер за Европа укажувајќи дека иднината на Македонија е во Европа.

Според него, Христијан Мицкоски и партијата се приказна за успех и затоа им посакува, многу успех што е потребен за во иднината.

Со честитки и желби за понатамошни успеси и Андреј Пленковиќ, претседател на ХДЗ и премиер на Хрватска.

„Сакам да ви посакам успех во одржување на Конгресот по толку одлични изборни победи на парламентарните ,претседателските и сега локалните избори. Повторно и да му дадам поддршка на мојот пријател Мицкоски. Се радувам на унапредување на соработката помеѓу ХДЗ и ВМРО ДПМНЕ и меѓу Хрватска и Македонија. Голема поддршка на патот за кон ЕУ”, кажа Пленковиќ.

Антонио Тајани, потпретседател на Европската народна партија, претседател на Форца Италија и вицепремиер и министер за надворешни на Италија укажа дека Европската народна партија силно ја поддржува Македонија на патот кон ЕУ.

„ВМРО-ДПМНЕ е почитуван член на семејството на ЕНП, делиме исти вредности, посветеност на демократија, владеење на право, борба против корупција, слободен пазар”, вели Тајани.

Виктор Орбан, претседател на ФИДЕС и премиер на Унгарија исто така со честитки за ВМРО-ДПМНЕ и лидерот Мицкоски.

„Ја поставивте Македонија на патот на стабилен, предвидлив и безбеден развој”, напиша Орбан.

The post МИЦКОСКИ И ВМРО-ДПМНЕ СЕ БЛИСКУ ДО ГРАЃАНИТЕ И ЗАТОА ПОБЕДУВААТ Сестриснките партии со пораки и честитки за Конгресот appeared first on plusinfo.mk.

Денеска Македонија одбележува 34 години од својата незавинсност сувереност и самостојност.

Што се случи на вој ден

Пред 34 години на денешен ден, над 95% од граѓаните на референдум се изјаснија за самостојна и суверена држава. Претходно, на 25 јануари 1991 година, беше усвоена Декларацијата за независност од првото повеќепартиско македонско Собрание, а 2 дена подоцна пратениците го избраа Киро Глигоров за прв претседател на самостојна и суверена Република Македонија.

Важни чекори за утврдување на државноста беа усвојувањето на новиот Устав на 17 ноември 1991 година, монетарното осамостојување и  воведувањето на денарот на 26 април 1992, формирањето на сопствени вооружение сили. Меѓународно-правниот субјективитет на државата дефинитивно беше потврден на 8 април 1993 година, кога со акламација во Генералното собрание на Обединетите нации, беше примена како 181. полноправна членка на Светската организација. Поради противењето и притисоците од страна на Грција, која не го прифаќаше уставното име на Република Македонија, зачленувањето во ОН беше под привремената референца: Поранешна Југословенска Република Македонија.

Пат со предизвици и искушенија

Низ 33-годишното самостојно опстојување, државата помина низ низа проблеми и тешкотии. Трицифрената инфлација на почетокот на 90-те години, грчкото ембарго, косовската бегалска криза и конфликтот во 2001 година беа вистински предизвици и закани за младата македонска држава што го забавија нејзиниот пат.

Спорот со Грција поради името, по долгогодишни разговори под покровителство на Обединетите нации, конечно беше решен на 17 јуни 2018 година во Преспа со попишување договор меѓу двете држави. Со тоа се отвори патот на земјава кон НАТО и ЕУ. На 27 март 2020 година Северна Македонија стана 30 членка на НАТО. Како земја кандидат за членство во ЕУ веќе 18 години, со добиена прва препорака за почеток на преговори во 2009 година, државава сега се соочува со блокада од Бугарија.

Одбележување на денот

Под слоганот „Од сон до реалност, за вечност“ денеска со повеќе активности во организација на Владата, се одбележува Денот на независноста – 8 Септември. Свечената академија ќе се одржи во Македонската филхармонија во Скопје, на која ќе се обрати претседателот на Владата, Христијан Мицкоски.

По повод одбележувањето, собраниска делегација предводена од потпретседателот Антонијо Милошоски, составена од пратениците Сергеј Попов и Славјанка Петровска, ќе положи цвеќе во вечното почивалиште на првиот претседател на Републиката, Киро Глигоров, вечното почивалиште на поранешниот претседател на Републиката, Борис Трајковски и вечното почивалиште на првиот претседател на Владата, Никола Кљусев.

Признанија за истакнати спротисти

Активностите стартуваа синоќа со почесна артилериска стрелба со истрелување на 10 плотуни од артилериски орудија од состав на артилерискиот баталјон на Армијата, во касарната „Илинден“ во Скопје.

На свеченост во Собранието во петокот беше доделена годишната награда за животно део „* Септември“ на македонскиот одбојкар, тренер и универзитетски професор Јошко Миленковски.

Покрај Миленковски, признанија за остварувања во областа на спортот им беа врачени и на Хамид Бакија, Зоран Николовски, Виктор Тевчев и Кирил Манев.

Претседателот на Собранието Африм Гаши на приемот што го организираше во Законодавниот дом по повод Денот на независноста, упати порака за единство, сплотеност и визија за иднината на Северна Македонија. Во своето обраќање, Гаши ја нагласи важноста на суштинската сплотеност меѓу граѓаните, почитување на различностите и градење на заедничка иднина без поделби.

– Главната порака што сакам да ја упатам на оваа годишнина од независноста е сплотеноста. Ние, како млада држава, имаме потреба од многу нешта, но мислам дека пред сè и најмногу ни е потребна сплотеноста. Не униформна и погодна, туку суштинска сплотеност. Таа што ги почитува разликите и истите ги претвора во богатство, а не во поделба. Секој од нас треба да почувствува одговорност да не поттикнува поделби, туку да гради мостови, да не ја користи разликата како ѕид, туку како прозорец преку кој се гледаме поблиску еден со друг – рече Гаши.

Претседателот на Собранието нагласи дека по 34 години државност „време е Северна Македонија да се издигне на нивото што го заслужува“.

Честитки по повод празникот

По повод празникот, честитки до граѓаните упатија клучни политички фигури. Претседателката Гордана Сиљановска Давкова потсети деа 34 години потоа, сè уште водиме битка за суверена, рамноправна, европска, правна држава, членка на Европската Унија“.

„Изминативе три децении се соочивме со бројни внатрешни поделби и кризи, со надворешни притисоци и предизвици, со отстапки и компромиси неусогласени со  референдумската одлука од 1991 година, па и со меѓународното и национално право. Политиката, за жал, нè учи дека неправдите не се отстрануваат со потег на перото, туку со макотрпна домашна и меѓународна борба, со правни аргументи и внимателни политички активности, со макотрпно градење пријателски сојузи, а не со непромислени и избрзани акти, со внатрешно единство, а не со поделби, со самопочит, но и со меѓусебна почит.  Патот кон правото и правдата води преку европеизирана држава, втемелена на копенхагенски критериуми, преку демократска власт, ограничена со систем на ефикасни спреги и кочници, преку компетитивна и просперитетна економија, преку партиципативна политичка култура, преку силно граѓанско општество и слободни медиуми“, напиша Сињановска во честитката.

Министерот за одбрана, Владо Мисајловски, во својата честитка повика со гордост да се потсетиме на историскиот чин пред 33 години и да ја чуваме и развиваме татковината за идните генерации.

„Денот на независноста е симбол на нашата одлучност самостојно да ја градиме својата иднина“, напиша тој. Мисајловски потенцираше дека Армијата е еден од најсилните столбови на државата, гарантирајќи ја безбедноста и територијалниот интегритет и претставувајќи пример за дисциплина, чест и љубов кон татковината. Тој нагласи дека денес Армијата е модерна и рамноправна членка на НАТО, симбол на независноста како секојдневна одговорност.

Претседателот на Уставниот суд  Дарко Костадиновски, исто така испрати честитка до граѓаните. Тој нагласи дека 8 Септември 1991 година е ден кога „граѓаните запишаа историја на која треба да сме горди“. Костадиновски подвлече дека овој датум ги задолжува сегашните и идните генерации да ја сакаат и градат татковината со решителност и одговорност.

„Денес вистинската љубов кон татковината значи да се гради правната држава. Врвен патриотизам претставува вистинската посветеност на владеењето на правото“, напиша тој, во честитката.

Леститики поо повод празникот упатија и партиите.

The post 34 ГОДИНИ НЕЗАВИСНА И САМОСТОЈНА МАКЕДОНИЈА Пат поплочен со предизвици и искушенија appeared first on plusinfo.mk.

Израелскиот премиер Бенјамин Нетанјаху со аплауз ја дочека американската воена офанзива врз иранските нуклеарни постројки, нарекувајќи ја „храбра одлука“ и „пресвртница во историјата на регионот“.

– Честитки, претседателе Трамп. Вашата смела одлука да ги нападнете иранските нуклеарни објекти со импозантната и праведна моќ на САД ќе ја промени историјата – изјави Нетанјаху.

Израелскиот премиер посочи дека САД „вечерва дејствуваа со голема сила“, нарекувајќи ја акцијата неспоредлива, а Трамп – лидер што се спротивставил на „најопасниот режим во светот со најопасното оружје“.

– Прво доаѓа сила, потоа мир. И вечерва претседателот Трамп и САД дејствуваа со голема сила – додаде Нетанјаху, алудирајќи на својата позната фраза „Мир преку сила“.

Порака со сличен тон објави и израелскиот амбасадор во ОН, Дени Данон, кој напиша на платформата „X“: „Претседателот Трамп докажа дека ‘Никогаш повеќе’ не е само слоган – тоа е политика“.

The post „ТРАМП ЈА ПРОМЕНИ ИСТОРИЈАТА“ Нетанјаху во екстаза по нападот на САД врз Иран appeared first on plusinfo.mk.

Премиерот Христијан Мицкоски објави честитка по повод изборот за новиот папа Лав XIV.

„Изборот на Неговата Светост, папата Лав XIV, прв понтиф со потекло од САД, претставува историски настан за Римокатоличката црква и за сите верници ширум светот. Овој избор е симбол на ново време на отвореност, духовна одважност и универзална припадност, но и продолжение на традицијата на мир, солидарност и грижа за секој човек.

Од името на Владата и во свое име, упатувам искрени честитки до сите католици, а особено до членовите на македонската католичка заедница, кои со својата вера, култура и граѓанска посветеност придонесуваат за духовната разноликост и општественото богатство на нашата татковина.

Нека мандатот на папата Лав XIV биде воден од мудроста на неговите претходници, од гласот на обесправените и од надежта на новите генерации. Во време на глобални предизвици, неговата порака за мир, дијалог и човечко достоинство добива уште поголемо значење“, вели Мицкоски.

The post МИЦКОСКИ УПАТИ ЧЕСТИТКА ЗА НОВИОТ ПАПА „Овој избор е симбол на ново време на универзална припадност“ appeared first on plusinfo.mk.

Градоначалникот на Општина Струга го прослави својот 68 роденден и во општинските простории. Оптината Струга на официјалнаа Фејсбук-страница објави честитка до градоначалникот и видео со коктелот во општинските простории.

Вработените на градоначалникот Мерко му подарија уметничка слика. Тој пресече торта во форма на бројит 68 и на сите им посака да живеат 100 години.

„Честитки за 68-от роденден на градоначалникот на Општина Струга, г-дин Рамиз Мерко. На овој посебен ден, администрацијата на Општина Струга му упатува искрени честитки и длабока благодарност на градоначалникот Рамиз Мерко. Во текот на годините јавна служба, господин Мерко покажа стабилно лидерство, бескомпромисна посветеност и висока чувствителност кон потребите на граѓаните и вработените во администрацијата. Хармонијата и меѓусебното разбирање, како и односот изграден врз меѓусебно почитување и отворена комуникација, се доказ за вредностите што ги пренесува во секој чекор од институционалното работење. Високо ја цениме плодната соработка и позитивната атмосфера што ја негува секојдневно во институцијата што ја раководи, мотивирајќи нè за чесна, посветена работа со јасна визија. На овој значаен ден, кој се совпаѓа со уште еден јубилеен датум, му посакуваме на градоначалникот Мерко добро здравје, семејна среќа и континуирани успеси во неговата понатамошна мисија за развој на Општина Струга. Среќен роденден, градоначалниче!“, објави Општина Струга до честитката.

Против Мерко во Основниот суд Струга се водат повеќе процеси, меѓу кои и за злоупотреба на службената положба при набавката на општинско луксузно „ауди“ од 65.000 евра, за поставување на спомен-плоча, како и за незакнско именување на директори.

The post 🎥 ОПШТИНАРИТЕ МУ ПОДАРИЈА СЛИКА НА МЕРКО ЗА РОДЕНДЕН Ги учел на чесна и посветена работа appeared first on plusinfo.mk.

Нашето мундијалско патување заврши, со насмевки и исполнети срца го напуштивме Вараждин. Македонија треба да биде горда, бидејќи има светла ракометна иднина, сподели Ракометната федерација на Македонија (РФМ) по завршувањето на нашиот настап на Мундијалот.

Машката ракометна репрезентација на Македонија во конкуренција на 32 селекции го освои 15. место на Светското првенство. Шампионатот го заврши со две победи (Катар и Гвинеја), две ремија (Унгарија и Австрија) и два порази (Холандија и Франција).

„Честитки до ракометарите и до стручниот штаб за одличните игри против силните противници. Видовме борбена и храбра игра. Нашите момци покажаа како треба да се игра за националниот дрес. Македонската репрезентација доби нов лик, новата генерација изгради сопствен идентитет. Процесот на смена на генерацијата не беше лесен, но трпеливо чекоревме кон градење на цврсти темели за нови успеси во спортот број еден во Македонија. Голема благодарност до сите кои дел од оваа мундијалска приказна, секоја ваша поддршка беше мотив плус на теренот. Само сплотени можеме да придонесеме за подобро утре“, соопштија синоќа од РФМ.

The post МАКЕДОНИЈА ТРЕБА ДА БИДЕ ГОРДА НА ОВИЕ РАКОМЕТАРИ Федерацијата со честитки за настапот и со порака дека имаме светла ракометна иднина appeared first on plusinfo.mk.

– Сега, на прагот на новата година, размислуваме за иднината, уверени сме дека сѐ ќе биде во ред – рече рускиот претседател.

Во три и пол минутното телевизиско обраќање со Кремљ во заднината, Путин истакна дека Русија во годината, што завршува, успеала да одговори на најтешките предизвици. Според него, претстојат уште многу работи кои треба да се решат, но дека Русите треба да бидат горди со она што веќе е направено.

Путин, исто така, им се обрати на војниците во прв ред на украинскиот фронт, истакнувајќи дека сега со нив се мислите и надежите на новите семејства и пријатели, на „милиони луѓе ширум земјата“.

– Вие, кои го преземавте овој голем товар, сте вистински јунаци, со чија храброст и смелост се гордее цела Русија – изјави тој.

Рускиот претседател притоа потсети дека следната година ќе се прослави 80-годишнината од победата во Втората светска војна над нацизмот, што во Русија се нарекува Голема татковинска војна. Додаде дека во 2025 година во Русија е прогласена Година на бранителите на татковината.

– Ние, децата, внуците и правнуците на генерацијата којашто го сотре нацизмот, верни сме на заветите и на традициите на нашите ветерани – истакна Путин.

Путин, исто така, нагласи дека Русија минала низ многу големи настани во првата четвртина од 21 век благодарение на единството на нејзиниот народ.

– Земјата си постави пред себе големи цели и ги оствари – рече рускиот претседател, додавајќи дека Русите повеќепати во историјата ги надминувале предизвиците затоа што биле обединети.

– Така се зацврстуваше нашето единство, нашата верба во себеси, во сопствените сили и способности. Останува многу малку до настапувањето на новата година, до нас се најблиските: нашето семејство, децата, родителите, внуците, нашите пријатели и нашите воени другари. Му посакувам благосостојба и напредок на секој наш дом, на секое наше семејство и на нашата сакана земја – Русија. Кога сме заедно, сѐ се остварува – истакна Путин.

Новогодишното обраќање на Путин традиционално се емитува во сите региони и 11 временски зони на Русија пред полноќ по локално време, како што постепено влегуваат во кон 2025 година, почнувајќи од Камчатка на Далечниот исток, каде што веќе го видоа тамошните жители.

Минатата година Путин традиционално се обрати со снимка од Кремљ. Во 2022 година, новогодишните честитки беа снимени во седиштето на Јужниот воен округ во Ростов-на-Дон, на границата со Украина. Тогаш шефот на државата зборуваше опкружен со учесници во Специјалната воена операција, како што Москва официјално ја нарекува инвазијата во соседната земја.

The post „СЀ ЌЕ БИДЕ ВО РЕД“ Путин ја честиташе Новата година appeared first on plusinfo.mk.