Со 40 фестивалски денови, 48 настани и учество на повеќе од 700 уметници од 24 земји, фестивалот „Охридско лето“ го заокружи 66 издание со богата музичка, театарска и балетска програма.

Од управата на фестивалот оценуваат дека и годинава „Охридско лето“ го потврдило статусот на еден од најпрепознатливите македонски културни брендови, со значајно меѓународно присуство и публика од земјата и странство.

Во рамки на фестивалската програма беа реализирани концерти, театарски и балетски претстави, камерни и вокално-инструментални концерти, како и четири џез-вечери.

Голем интерес предизвика свеченото отворање со оперската гала „Љубов“, на која настапија оперските уметници Ермонела Јахо и Чарлс Кастроново со оркестарот на Националната опера и балет. Според организаторите, настанот бил распродаден две недели пред почетокот на фестивалот, а го проследиле повеќе од 4.000 посетители.

Од „Охридско лето“ наведуваат дека и голем број други настани биле распродадени пред нивното одржување, што, според организаторите, е потврда за големиот интерес на публиката.

– Зад нас се четириесет дена исполнети со врвна уметност, прекрасни концерти, силни емоции и публика која беше најголемиот успех на ова фестивалско издание. Особено ме радува што интересот беше огромен уште од самиот почеток, а голем број настани беа распродадени и пред да се одржат – вели директорот на „Охридско лето“, Ѓорѓи Цуцковски.

Посебно место во програмата имаше „OH, JAZZ 2026“, во рамки на кој настапија повеќе реномирани музичари, меѓу кои Нубаја Гарсија и Питер Сомуа.

Фестивалската програма опфати и театарски претстави, балетски вечери, камерни и вокално-инструментални концерти, како и содржини посветени на македонското културно наследство.

Меѓу настаните кои предизвикаа голем интерес кај публиката беа концертите на Стефан Миленковиќ, Ана и Игор Дурловски и Националниот џез-оркестар.

Цуцковски упати благодарност до уметниците, фестивалскиот тим, публиката, Министерството за култура и туризам, како и до партнерите и спонзорите за поддршката на годинешното издание.

– „Охридско лето“ продолжува со уште поголема одговорност, уште повисоки стандарди и со јасна цел оваа македонска културна визит-карта да биде уште посилна и повидлива во светот – додава Цуцковски.

The post 40 ДЕНА, 48 НАСТАНИ И УМЕТНИЦИ ОД 24 ЗЕМЈИ „Охридско лето“ го заврши 66 фестивалско издание appeared first on plusinfo.mk.

Со гала-концертот „Љубов“, на кој ќе настапат светски познатата албанска сопранистка Ермонела Јахо и американскиот тенор Чарлс Кастроново, вечер во 21 часот на сцената на Античкиот театар во Охрид ќе биде отворено 66. издание на фестивалот Охридско лето.

Концертот ќе биде под диригентската палка на италијанецот Марко Боеми, во придружба на Националната опера и балет.

Директорот на НУ Охридско лето, Ѓорѓи Цуцковски, истакна дека фестивалот веќе 66 години успешно ја гради својата меѓународна репутација, претставувајќи мост меѓу културите, народите и генерациите.

„Како директор на фестивалот чувствувам особена одговорност, но и привилегија да бидам дел од приказната што со децении ја обликува духовната и културната мапа на нашата земја и пошироко. Охридско лето не е само фестивал – тоа е традиција, вредност и мост што ги поврзува културите, народите и генерациите“, рече Цуцковски.

Во рамките на 40-дневната програма ќе бидат реализирани околу 50 музички и сценски настани од областа на класичната музика, џезот, балетот и театарот, со учество на повеќе од 700 уметници од 24 земји.

Фестивалот годинава ќе одбележи и два значајни јубилеи – 100 години од раѓањето на оперската дива Ана Липша-Тофовиќ и 60 години од основањето на Факултетот за музичка уметност во Скопје.

Новост во програмата се концертите на џез-музика, кои ќе се одржат од 13 до 16 август на сцените „Долни Сарај“ и „Света Софија“, со настап на врвни музичари од САД, Гана, Велика Британија, Холандија, Германија и Северна Македонија.

Минатогодишното издание беше најпосетено во последната деценија, со над 10.000 посетители и публика од повеќе од 30 земји, што претставува значаен придонес за промоција на Охрид како културна и туристичка дестинација.

Фестивалот се одржува под покровителство на претседателката Гордана Сиљановска-Давкова, со финансиска поддршка од Владата преку Министерството за култура и туризам. Генерален спонзор е „А1 Македонија“.

The post НАД 50 НАСТАНИ И 700 УМЕТНИЦИ ЗА 66. „ОХРИДСКО ЛЕТО“ Вечерва „Љубов“ ќе ја отвори сцената во Античкиот театар appeared first on plusinfo.mk.